Philippians 4:1-23
4 So my brothers wey I love and wey I really want see, una wey be my joy and my crown, make una stand strong like this as people wey de follow the Lord, my dear brothers and sisters.
2 I de advice Eu·o′di·a and I de advice Syn′ty·che make them get the same mind as people wey de follow the Lord.
3 I still de beg you as better person wey de work with me* to continue to help this women. True-true, this women and Clement and the other people don work hard* together with me to spread the good news. All their names dey for the book of life.
4 Always de happy because of the Lord. I go talk-am again say, De happy!
5 Make everybody know una as people wey de use sense do things,* the Lord dey near.
6 Make una no de overworry unaself about anything, but for everything, make una de pray and de really beg God for help and still de thank-am. Make una de tell God the things wey de worry una,
7 and the peace wey God de give go protect una heart and the way una de think through Jesus Christ. This peace pass anything wey person fit understand.
8 So my brothers, anything wey dey true, anything wey dey serious,* anything wey dey correct for God eye, anything wey dey clean,* anything wey de make love dey, anything wey them de talk well about, anything wey dey good for God eye, and anything wey reach to get praise, make una continue to put una mind for* this things.
9 The things wey una don learn, wey una don accept, wey una don hear and wey una don see from me, make una continue to follow this things well, and the God of peace go dey with una.
10 I dey happy no be small because of the Lord, say now una don show again say una de worry about me. I know say una de worry about me, but chance no come for una to show say una de worry about me.
11 I no de talk this one because I need something. I don learn to dey okay with my condition* no matter how e be.
12 I know how to manage the small wey I get and how to enjoy the plenty wey I get. For everything and no matter how things be, I don learn the secret of how to live when belle full and when hunger dey, when I get plenty and when I no get at all.
13 For everything, I de get the power wey I need from God wey de give me power.
14 Even with that one, una do well as una help me when I de suffer.
15 My brothers for Phi·lip′pi, the truth na say, una still know say after una first learn about the good news, when I don comot for Mac·e·do′ni·a, no other congregation help me,* na only una.
16 When I dey for Thes·sa·lo·ni′ca, una send me wetin I need. No be just once, but na even two times.
17 No be say I want make una give me gift, but I want make una get the blessing wey go bring more gain for una.*
18 But I get everything wey I need and I even get more. I really get enough, now wey I don receive wetin una send E·paph·ro·di′tus make e give me. This gift be like something wey get fine smell, like sacrifice wey God accept and wey e really like.
19 Because of this one, my God wey get plenty fine-fine things go use Christ Jesus give una everything wey una need.
20 Now make our God and Papa get the praise forever and ever. Amen.
21 Help me greet all the holy ones wey dey as one with Christ Jesus. The brothers wey dey with me say make I greet una.
22 All the holy ones say make I greet una, especially the ones wey dey for the house of Caesar.
23 Make the special favor of the Lord Jesus Christ dey with una because of una good heart.
Footnotes
^ For Greek na, “correct person wey de carry the same yoke with me.”
^ Or “don really struggle.”
^ Or “de accept the ideas of other people.”
^ Or “wey de bring honor.”
^ Or “pure.”
^ Or “to think deep about.”
^ Or “to make the things wey I get dey enough for me.”
^ For Greek na, “join me to do give and take.”
^ For Greek na, “to una account.”
