“Han naglabay, an pagkaada espirituwal nga pagkaon ha elektroniko nga pormat baga hin imposible gud.” Mauyon ka ba hito? Bahin ito han makapadasig nga pahayag ni Brother Geoffrey Jackson ha 2020 nga Update Tikang ha Nagmamando nga Lawas #6. Hiya nagpadayon: “Pero yana bangin naghuhunahuna kita, mag-aano daw la kita hini nga panahon han pandemya kon waray an garamiton sugad han JW Library? Ginbuligan kita ni Jehova hinin naglabay nga mga tuig basi magin-andam ha sugad hini nga kahimtang.”

 Paonan-o kita ginbuligan ni Jehova? Ano an nahiuupod ha paghimo han JW Library nga app, ngan ano an ginkikinahanglan basi mamintinar ngan mapaopay ito?

 Han Mayo 2013, ginhangyo han Nagmamando nga Lawas an MEPS Programming, usa nga departamento ha world headquarters, nga maghimo hin app nga may-ada han ginrebisa nga New World Translation. “Hito nga panahon waray pa kita ginrelis nga mobile app ha bisan ano nga app store,” siring ni Paul Willies, nga nagtatrabaho ha MEPS Programming. “Pero naghimo kami hin usa nga team, gin-undang an pipira nga proyekto, ngan nakigkooperar ha iba nga departamento basi igdisenyo ngan himoon an app ngan an mga sulod hito. Pirme kami nag-aampo, ngan ha bulig ni Jehova nairelis an app ha tinuig nga katirok paglabay la hin lima ka bulan!”

 An sunod nga pagsari amo an himoon ito nga app nga tinuod nga librarya, diin may-ada mas damu nga publikasyon ngan linggwahe. Han Enero 2015, an kadam-an han aton bag-o nga publikasyon ha Ingles aada na ha app, ngan paglabay la hin unom ka bulan, mada-download na ito nga mga publikasyon ha ginatos nga iba pa nga linggwahe.

 Tikang hadto, ginpaopay pa han aton kabugtoan an app ha pipira nga paagi, gindugangan hin mga video, ginbutang an tanan nga publikasyon ngan media para ha mga katirok han kongregasyon ha usa nga tab, ngan maa-access na an mga reperensya ha Tulong sa Pag-aaral direkta mismo ha usa nga bersikulo ha Biblia.

 An JW Library ginagamit ha 8 ka milyon nga gadyet kada adlaw ngan ha sobra 15 ka milyon nga gadyet kada bulan! Ano an ginkikinahanglan basi gumana hin maopay ito nga app ha mga gadyet? Ini an iginsaysay ni Brother Willies: “An usa nga mobile app diri gud natatapos. Pirme kami may igindudugang nga bag-o nga mga feature ngan ginpapaopay ito basi magin mas masayon an paggamit. Tungod kay pirme nag-a-update an komersyal nga mga operating system han mga gadyet, kinahanglan namon pirme ig-adjust an app basi padayon ito nga gumana ha pinakabag-o nga mga operating system. Kinahanglan liwat namon mintinaron ngan ig-upgrade an aton internal software tungod kay padayon nga nagdadamu an mga publikasyon ngan rekording ha JW Library.” Kon iihapon an ngatanan nga linggwahe, may-ada yana mga 200,000 nga publikasyon ngan sobra 600,000 nga audio ngan video nga mga rekording ha JW Library!

 Basi padayon nga gumana an app, diri la computer hardware an kinahanglan. Kinahanglan liwat pumalit hin pipira nga software license. An usa la nga license nagkakantidad hin $1,500 (U.S.) kada tuig. Dugang pa, nagasto an MEPS Programming hin mga $10,000 (U.S.) kada tuig ha mga gadyet nga tikang ha iba-iba nga manufacturer basi masiguro nga an app padayon nga magana hin maopay ha bag-o nga mga kompyuter, tablet, ngan celfon.

 Daku an natitipid nga gasto ha pag-imprinta, pag-bind, ngan pagpadara hin literatura tungod han JW Library. Usa nga ehemplo hini amo an Pag-usisa han Kasuratan Adlaw-Adlaw. Nag-imprinta kita hin haros 12 ka milyon nga kopya han Pag-usisa han Kasuratan—2013. Pero an 2020 nga edisyon, mga lima ka milyon la ka kopya an aton gin-imprinta—bisan kon may nadugang nga mga 700,000 nga magwarali ha bug-os nga kalibotan. Kay ano? Kay damu han aton kabugtoan an nagbabasa na yana han inadlaw nga teksto ha JW Library. a

 An JW Library nabulig liwat ha mga nagamit hito ha damu nga paagi. Hi Geneviève, nga naukoy ha Canada, inabat nga tungod han app nagin mas regular an iya pag-aram. “Ha tinuod la, kon kukuhaon ko pa an ngatanan nga libro nga akon ginkikinahanglan basi mag-aram, diri ako makakag-aram kada aga,” siring niya. “Pero tungod han app, kukuhaon ko la an akon tablet ngan aada na an ngatanan nga akon ginkikinahanglan. Tungod hini nga regular nga pag-aram, naparig-on an akon pagtoo ngan nagin mas duok ako kan Jehova.”

 Daku gud nga bulig ini nga app labi na ha panahon han COVID-19 nga pandemya. Hi Charlyn, nga taga United States, nagsaysay: “Han nagkaada COVID-19 ha bug-os nga kalibotan, waray ako makakarawat hin bisan ano nga bag-o nga inimprinta nga publikasyon ha sulod hin sobra usa ka tuig. Pero pinaagi han JW Library may-ada kita han ginkikinahanglan basi magin marig-on an aton pagtoo, ngan ginpapasalamatan ko hi Jehova tungod hinin mahigugmaon nga probisyon.”

 Damu an pariho an inaabat kan Faye nga naukoy ha Pilipinas. Hiya nagsiring: “Ginagamit ko inin maopay gud nga app basi magpabilin nga duok kan Jehova. Ito an una ko nga ginbabasa kada aga. Ito an ginpapamatian ko samtang naghihimo hin mga buruhaton ha balay. Ito an ginagamit ko ha pag-aram para ha katirok. Ito an ginagamit ko basi mangandam para ha pag-Bible study. Nagkikita ako dida hin mga video kon may bakante ako nga oras. Dida ako nagbabasa hin mga artikulo o han Biblia samtang napila ako. Daku gud ini nga bulig.”

 Daku liwat nga bulig ini nga app ha ministeryo. Pananglitan, samtang nagsasangyaw, karuyag gamiton han usa nga sister ha Cameroon an teksto nga iya nakita nga gin-gamit han usa nga sister pipira pa la ka semana an naglabay. Pero diri niya nahinunumdoman kon ano adto nga teksto. Hiya nagsaysay: “Maopay na la nga may nahinumdoman ako nga mga pulong hadto nga teksto. Gin gamit ko an app, gin-abrihan an Biblia, ngan gin-search ko adto nga mga pulong. Nabilngan ko dayon an teksto. Pinaagi hini nga app, nabibilngan ko an damu nga teksto nga usahay nakakalimtan ko.”

 Pinaagi han iyo donasyon nga iginhahatag gamit an iba-iba nga pamaagi nga makikita ha donate.jw.org nagin posible para ha amon nga mahimo, mamintinar, ngan mapaopay an JW Library nga app para ha aton mga kabugtoan ha bug-os nga kalibotan. Salamat han iyo pagkamahinatagon.

1. Oktubre 2013—Ginrelis an app nga may ada han ginrebisa nga New World Translation

2. Enero 2015—Nagkaada hin mga publikasyon ha Ingles ngan ginsundan hin ginatos nga iba pa nga linggwahe

3. Nobyembre 2015—Igindugang an feature nga pag-highlight

4. Mayo 2016—Igindugang an tab nga Meetings

5. Mayo 2017—Igindugang an feature nga paghimo hin note

6. Disyembre 2017—Igindugang an mga feature para ha Study Bible

7. Marso 2019—Puydi na ma-download an mga audio rekording, mag-stream hin video, ngan makita an mga reperensya ha Tulong sa Pag-aaral

8. Enero 2021—Igindugang an maopay nga mga feature para ha Mabuhi hin Malipayon ha Waray Kataposan!