Han Mayo 23, 2023, an kilala nga health official ha United States nagpahamangno ha publiko han maraot nga epekto han social media ha damu nga batan-on.

•   “Bisan kon an social media may mag-opay nga epekto ha pipira nga kabataan ngan mga tin-edyer, damu liwat nga ebidensya an nagpapakita nga an social media mahimo makadaot gud ha mental ngan pisikal nga kahimsog ha kabataan ngan mga tin-edyer.”—Social Media and Youth Mental Health: The U.S. Surgeon General’s Advisory, 2023.

 Ito nga research nagpahamangno kon kay ano nga kinahanglan kita maghatag hin atensyon.

•   An mga tin-edyer nga nag-edad 12 tubtob 15 “nga naggagahin hin sobra 3 ka oras kada adlaw ha social media mas daku an posibilidad nga magkaada mga problema ha mental nga kahimsog upod na an mga sintomas han depresyon ngan kabaraka.”

•   An mga 14 anyos an edad, “nga mas nagamit hin social media kasagaran nga diri nakakaturog hin tuhay, nabu-bully ha online, nababaraka ha ira hitsura, naabat hin kawaray-pulos, ngan nadidepres. Kasagaran nga nahitatabo ini ha mga babaye kay ha mga lalaki.”

 Paonan-o mapuprotektaran han mga kag-anak an ira mga anak tikang hini nga mga peligro? An Biblia naghahatag hin praktikal nga mga sagdon.

 Ayaw pagpabaya. Sugad nga mga kag-anak, hunahunaa an mga peligro ngan pagdesisyon kon an imo anak kinahanglan gumamit hin social media o diri.

•   Prinsipyo ha Biblia: “Bansaya an batan-on ha dalan nga angay niya laktan.”—Proberbios 22:6, footnote.

•   Basi mahibaro hin dugang pa, basaha an artikulo nga “Dapat Bang Gumamit ang Anak Ko ng Social Media?”

 Kon gintutugotan mo an imo anak nga gumamit hin social media, magin alerto ha posible nga mga kadelikadohan ngan ayaw hiya pabay-i ha iya ginbubuhat ha online. Paonan-o?

 Proteksyuni an imo mga anak tikang ha nakakadaot nga mga kiritaon. Ig-train an imo anak nga mahibaroan ngan likyan an magraot nga kiritaon.

•   Prinsipyo ha Biblia: “An seksuwal nga imoralidad ngan ngatanan nga klase hin kahugawan o kahakog diri ngani sadang unabihon dida ha iyo, . . . bisan an makaarawod nga panggawi bisan an linurong nga yakan bisan an malaw-ay nga pagpatawa.”—Efeso 5:3, 4.

•   Para ha praktikal nga mga tip, basaha an artikulo nga “Ituro ang Tamang Paggamit ng Social Media sa Anak Mong Teenager.”

 Paghimo hin mga limitasyon. Pananglitan, paghimo hin mga surundon kon san-o ngan ano kaiha mahimo gumamit hin social media an imo anak.

•   Prinsipyo ha Biblia: “Padayon nga magbantay hin maopay nga an iyo paglakat . . . pariho han maaramon nga mga tawo, nga ginagamit ha pinakamaopay nga paagi an iyo panahon.”—Efeso 5:15, 16.

•   Gamita an whiteboard animation nga Magin Maaramon ha Paggamit han Social-Network basi buligan an imo anak nga masabtan kon kay ano nga kinahanglan maghimo hin mga limitasyon.