Para ha imo, mas nagtitikakuri na ba mahibaroan kon ano an tinuod ngan kon ano an buwa? An mga tawo yana baga hin mas natoo ha mga butang nga basado ha ira inaabat ngan kalugaringon nga panhunahuna imbes nga ha kamatuoran ngan ha masasarigan nga impormasyon. Ha bug-os nga kalibotan, damu nga tawo yana an natoo nga waray masisiring nga kamatuoran.

 Diri na bag-o ini nga panhunahuna. Mga 2,000 ka tuig na an naglabay, an Romano nga Gobernador nga hi Ponsio Pilato may pagruhaduha nga nagpakiana kan Jesus: “Ano an kamatuoran?” (Juan 18:38) Bisan kon waray hulata ni Pilato an baton ni Jesus, an iya pakiana importante. Naghahatag an Biblia hin baton nga bangin makakombinse ha imo, ngan mabulig ito ha imo nga mahibaroan kon ano an kamatuoran ngan kon ano an buwa hini nga kalibotan diin damu nga tawo an diri nahibabaro parte hito.

May-ada gud ba kamatuoran?

 May-ada. Ginagamit han Biblia an pulong nga “kamatuoran” basi magtudlok ha kon ano an napamatud-an nga tinuod sugad man kon ano an tama. Nagtututdo ito nga hi Jehova a nga Dios an gintitikangan han bug-os nga kamatuoran, gintatawag hiya nga “an Dios han kamatuoran.” (Salmo 31:5) Mababasa ha Biblia an kamatuoran nga tikang ha Dios, ngan iginpapariho ito nga kamatuoran ha kalamrag, nga makakaggiya ha aton yana ha ngatanan nga kasamok hini nga kalibotan.—Salmo 43:3; Juan 17:17.

Paonan-o mo mabibilngan an kamatuoran?

 Diri karuyag han Dios nga basta na la naton karawaton an kamatuoran nga tikang ha Biblia. Lugod, gin-aaghat kita niya nga usisahon ito gamit an aton abilidad ha pangatadongan imbes nga sumarig ha aton emosyon. (Roma 12:1) Karuyag niya nga kilalahon ngan higugmaon naton hiya gamit an aton ‘bug-os nga hunahuna,’ ngan gindadasig kita niya nga pamatud-an ha aton kalugaringon nga an aton nahibaroan tikang ha Biblia kamatuoran.—Mateo 22:37, 38; Buhat 17:11.

Hin-o an nagpatikang han kabuwaan?

 Iginsusumat han Biblia nga an kabuwaan nagtikang ha kaaway han Dios, nga hi Satanas nga Yawa, nga gintatawag ha Biblia nga “an amay han kabuwaan.” (Juan 8:44) Nagbuwa hiya ha siyahan nga mga tawo parte ha Dios. (Genesis 3:1-6, 13, 17-19; 5:5) Tubtob yana, padayon nga iginpapasarang ni Satanas an kabuwaan ngan igintatago an kamatuoran parte ha Dios.—Pahayag 12:9.

Kay ano nga komon na gud la yana an pagbuwa?

 Gintatawag han Biblia an aton panahon nga “kataposan nga mga adlaw,” diin an impluwensya ni Satanas ngan panlimbong ha mga tawo mas grabe na gud. Komon na ha mga tawo an pagbuwa basi makapanlimbong ngan makapamentaha ha iba. (2 Timoteo 3:1, 13) Komon liwat yana ha mga relihiyon an kabuwaan. Sugad han igintagna han Biblia parte ha aton panahon, ‘papalibotan han mga tawo an ira kalugaringon hin mga magturutdo nga maggigiritikgitik han ira mga talinga,’ nga ginpipili nga ‘diri mamati han kamatuoran.’—2 Timoteo 4:3, 4.

Kay ano nga importante an kamatuoran?

 Ginkikinahanglan han mga tawo an kamatuoran basi magkaada pagtapod ha usa kag usa. Kon waray pagtapod, magluluya an pagkamagsarangkay ngan an komunidad. An Biblia nagsiring nga karuyag han Dios nga an aton pagsingba basado ha kamatuoran. Ito nasiring: “An mga nagsisingba ha [Dios] kinahanglan magsingba uyon ha espiritu ngan ha kamatuoran.” (Juan 4:24) Basi mahibaroan kon paonan-o an kamatuoran nga tikang ha Biblia makakabulig ha imo nga masabtan kon ano an kabuwaan han relihiyon ngan magkaada kagawasan tikang hito, basaha an mga serye han artikulo nga “Mga Buwa nga Nagpapahirayo ha mga Tawo ha Dios.”

Kay ano nga karuyag han Dios nga mahibaroan ko an kamatuoran?

 Karuyag han Dios nga matalwas ka, ngan para mahimo ito kinahanglan mo mahibaroan an kamatuoran parte ha iya. (1 Timoteo 2:4) Kon mahibaroan mo an mga suruklan han Dios parte han tama ngan sayop ngan magkinabuhi uyon hito, magkakaada ka duok nga pakigsangkay ha iya. (Salmo 15:1, 2) Basi buligan an mga tawo nga mahibaroan an kamatuoran, ginpakanhi han Dios hi Jesus ha tuna. Karuyag han Dios nga mamati kita han mga katutdoan ni Jesus.—Mateo 17:5; Juan 18:37.

Wawad-on ba han Dios an kabuwaan?

 Oo. Nangangalas an Dios kon an mga tawo nanlilimbong basi makabentaha ha iba. Nagsaad hiya nga iya wawad-on an mga naruruyag magbinuwa. (Salmo 5:6) Kon buhaton na ito han Dios, tutumanon liwat niya an iya saad nga: “An tangkod nga mga im-im magpapadayon ha waray kataposan.”—Proberbios 12:19.