Handurawa nga aadto ka ha iba nga nasud ha siyahan nga higayon. Makakakita ka hin mga tawo, kustomre, pagkaon, ngan kwarta nga diri ka pamilyar. Natural la nga bangin mawara an imo kalipay.

Bangin sugad liwat hito an imo gin-abat ha imo siyahan nga pagbasa han Biblia. Binalik ka ngadto ha kadaan nga kalibotan nga diri ka pamilyar. Didto makikilala mo an mga tawo nga gintatawag nga Pilisteohanon, makakaobserbar hin naiiba nga kustomre, sugad han ‘paggisi han panapton,’ ngan mahibabaro mahitungod han pagkaon nga gintatawag nga mana ngan han sinselyo nga gintatawag nga drakma. (Eksodo 16:31; Josue 13:2; 2 Samuel 3:31; Lucas 15:9) Ini ngatanan mahimo makawurok ha imo. Pariho ha pagkadto ha iba nga nasud, diri ka ba malilipay kon may magsaysay ha imo mahitungod hini nga mga butang?

Tikang ha panahon nga siyahan nga iginsurat inin sagrado nga mga sinurat han ika-16 ka siglo B.C.E., may-ada na bulig nga igintatagana basi masabtan ini. Pananglitan, ‘iginpahayag’ han siyahan nga lider han nasud han Israel nga hi Moises kon ano an nakasurat.—Deuteronomio 1:5.

Paglabay han mga napulo ka siglo, may-ada pa gihapon kwalipikado nga mga magturutdo han Kasuratan. Han 455 B.C.E., nagkatirok ha usa nga panpubliko nga lugar ha syudad han Jerusalem an usa nga daku nga grupo han mga Judio kaupod an damu nga kabataan. Nakadto an mga magturutdo han Kasuratan ‘nga nagbabasa han [sagrado nga] libro ha daku nga tingog.’ Kondi diri la ito an ira ginbuhat, ginbuligan nira an mga tawo nga ‘masabtan an ginbabasa.’—Nehemia 8:1-8.

Paglabay hin lima ka siglo, nagtutdo liwat hi Jesus mahitungod han Kasuratan. Ha pagkamatuod, kilala hiya han mga tawo sugad nga magturutdo. (Juan 13:13) Nagtutdo hiya ha daku nga mga grupo ngan ha mga indibiduwal. Ha usa nga okasyon, nagtutdo hiya ha damu nga tawo han gintatawag nga Sermon ha Bukid, ngan “nahipausa gud [hira] ha iya paagi han pagtutdo.” (Mateo 5:1, 2; 7:28) Ha katsaringsing han 33 C.E., nagtutdo hi Jesus ha duha han iya mga disipulo samtang nagbabaktas hira tikadto ha usa nga baryo hirani ha Jerusalem, ‘iginsasaysay ha ira hin maopay an Kasuratan.’—Lucas 24:13-15, 27, 32.

An mga disipulo ni Jesus mga magturutdo liwat han Pulong han Dios. Ha usa nga higayon, usa nga opisyal nga taga-Etiopia an nagbabasa han Kasuratan han gindaop hiya han disipulo nga hi Felipe ngan ginpakianhan: “Nasasabtan mo ba an imo ginbabasa?” An Etiopiahanon binaton: “Paonan-o ko ini masasabtan kon waray magtututdo ha akon?” Salit iginsaysay ni Felipe an kahulogan han ginbabasa han Etiopiahanon.—Buhat 8:27-35.

Pariho ha mga magturutdo han Biblia ha naglabay, an mga Saksi ni Jehova yana okupado ha pagpanutdo mahitungod ha Biblia ha 239 nga nasud ha bug-os nga kalibotan. (Mateo 28:19, 20) Kada semana, ginbubuligan nira an sobra siyam ka milyon nga indibiduwal nga masabtan an Biblia. Damu han nag-aaram diri tikang ha Kristiano nga relihiyon. Libre ini nga mga pag-aram ngan puydi himoon ha balay o ha iba nga kombinyente nga lugar. An iba nag-aaram pinaagi han telepono o video gamit hin kompyuter o gadyet.

Alayon kontaka an usa han mga Saksi ni Jehova para han mga detalye kon paonan-o ka magpapahimulos hini nga kahikayan. Makikita mo nga an Biblia diri makuri hisabtan, kondi “mapulsanon ha pagtutdo, ha pagsaway, ha pagtadong, ngan ha pagdisiplina uyon ha katadongan” basi ka “magin bug-os nga may-kapas, andam gud ha tagsa nga maopay nga buhat.”—2 Timoteo 3:16, 17.