Klaro an siring han Biblia kon ano an hihimoon ni Jehova ngan han iya Anak, hi Jesu-Kristo, may kalabotan ha pag-antos nga iginpapahinabo ni Satanas nga Yawa. “Ini an hinungdan nga ginpakanhi an Anak han Dios [Jesus]: basi bungkagon an mga buhat han Yawa,” siring han Biblia. (1 Juan 3:8) Pagwawad-on an presente nga sistema nga puno hin kahakog, kapungot, ngan karaotan. Ngan hi Jesus nagsasaad nga an “magmarando hini nga kalibotan”—hi Satanas nga Yawa—“paiiwason.” (Juan 12:31) Kon waray na an impluwensya ni Satanas, maiestablisar na an usa nga bag-o nga matadong nga kalibotan, ngan magigin murayaw na an tuna.—2 Pedro 3:13.

Ano man an mahitatabo ha mga nadiri pagbag-o ngan padayon nga nagbubuhat hin maraot? Ini an masasarigan nga saad: “An matadong maukoy dida ha tuna, ngan an hingpit mapabilin dida hini. Kondi an magraot paghihinginlan tikang ha tuna. Ngan an mga malingoon pagrarabuton tikang dida.” (Proberbios 2:21, 22) Mawawara na an impluwensya han magraot nga tawo, ngan an mga masinugtanon hinay-hinay nga makakatalwas ha napanunod nga pagkadiri-hingpit.—Roma 6:17, 18; 8:21.

Paonan-o wawad-on han Dios an karaotan? Diri pinaagi ha pagkuha han kagawasan ha pagbuot han tawo ngan paghimo ha ira nga robot. Lugod, tututdoan niya an masinugtanon nga mga tawo han iya paagi, ngan bubuligan hira nga bug-os nga talikdan an magraot nga panhunahuna ngan buhat.

Ano man liwat an bubuhaton han Dios ha mga sakit ngan ha diri ginlalaoman nga mga kalamidad? An Dios nagsasaad nga an iya Ginhadian diri na maiha magmando ha tuna. Hi Jesu-Kristo an Iya ginpili nga Hadi hito nga Ginhadian ngan may gahum ha pagtambal han mga may sakit. (Mateo 14:14) May gahum liwat hi Jesus ha pagkontrol han pwersa han palibot. (Marcos 4:35-41) Tungod hito mawawara na an pag-antos nga resulta han ‘panahon ngan higayon.’ (Eklesiastes 9:11) Ilarom hito nga pagmando, mawawaray na kalamidad.—Proberbios 1:33.

Kumusta man an minilyon nga inosente nga nagkamatay ha trahedya? Antes banhawon ni Jesus an iya sangkay, hi Lasaro, hiya nagsiring: “Ako an pagkabanhaw ngan an kinabuhi.” (Juan 11:25) Oo, may gahum hi Jesus pagbanhaw ha mga namatay!

Karuyag mo ba umukoy ha kalibotan nga waray maraot nga mahitatabo ha mag-opay nga tawo? Kon oo, gin-aaghat ka namon ha pag-usisa mahitungod ha tinuod nga Dios ngan han iya katuyoan pinaagi ha pag-aram han Biblia. Malilipay an mga Saksi ni Jehova ha iyo lugar nga buligan ka. Alayon pakigkomunikar ha amon o pagsurat ha nagpublikar hini nga magasin.