Damu an diri naruruyag nga pag-istoryahan an mahitungod han kamatayon. Kondi naabot an panahon nga aatubangon naton ito. Ngan an sugod han kamatayon nagriresulta ha duro nga kasakit.

Waray tawo nga makakag-andam gud para ha kamatayon hin kag-anak, asawa, o anak. Mahimo umabot ha aton an diri ginlalaoman nga trahedya. Kondi anoman an kahimtang, aada an posibilidad han kamatayon, ngan duro nga kasakit an resulta hito.

Hi Antonio nga namatayan hin tatay ha usa nga aksidente ha kalsada, nagsiring: “Pariho ito hin may nagtrangka han imo balay, ngan gindara an yawi. Diri ka na makakasulod, bisan madaliay la. Waray nahibilin ha imo kondi an paghandom han naglabay. Ini an bag-o nga reyalidad. Bisan kon diri mo makarawat ito tungod kay baga hin diri ito makatadunganon, waray ka na mahihimo.”

Han nabalo hi Dorothy ha edad nga 47, namiling hiya hin mga baton ha iya pakiana may kalabotan ha kamatayon. Sugad nga maestra hin Sunday school, igintututdo niya nga may-ada kinabuhi katapos han kamatayon. Kondi diri gud hiya maaram han nahitatabo kon mamatay an usa. “Ano an nahitatabo ha aton kon kita mamatay?” hiya nagpakiana ha usa nga Anglikano nga ministro. “Waray gud maaram,” binaton ito. “Hulat na gud la kita kon ano an mahitatabo.”

Maghuhulat na la gud ba kita kon ano an mahitatabo? May-ada ba paagi basi makasiguro kita kon an kamatayon ba an kataposan han ngatanan?