Tikang pa han akon kabata, nalilipay ako pagkinita han palibot. An amon pamilya agsob mamasyada ha mag-opay nga kagurangan ngan danaw ha amon baryo han Jyväskylä, ha Central Finland. Mahilig liwat ako ha hayop. Karuyag ko hangkopan an kada misay ngan ayam nga akon nakikita. Samtang nagtutubo, nagugupong ako nga agsob abusuhon han mga tawo an mga hayop. Ha urhi, inapi ako hin organisasyon nga nagpapanalipod han katungod han hayop, ngan didto nakilala ko adton may pariho an panhunahuna ha akon.

Aktibo nga nangampanya kami para ha katungod han hayop. Nagpasarang kami hin impormasyon ngan nag-organisar hin mga protesta ngan rally kontra ha mga nagbabaligya hin barahibo han hayop ngan ha mga laboratoryo nga nagamit hin hayop ha pag-eksperimento. Naghimo pa ngani kami hin organisasyon basi panalipdan an mga hayop. Tungod han amon rebelyoso nga pamaagi, agsob kami magkaproblema ha awtoridad. Damu ka beses nga naaresto ako ngan inatubang ha korte.

Diri la ha mga hayop ako nababaraka, kondi pati ha iba nga isyu ha kalibotan. Salit, inapi ako ha iba pa nga organisasyon, pariho han Amnesty International ngan Greenpeace. Iginhatag ko an akon kusog ha pagsuporta han ira mga aktibidades. Nagin representante ako para ha mga pobre, nagugutom, ngan iba pa nga makalolooy an kahimtang.

Pero hinay-hinay nga nasantop ko nga diri ko mababag-o an kalibotan. Bisan kon nasusulbad hito nga mga organisasyon an pipira nga gudtiay nga problema, baga hin nagtitikagrabe la an dagku nga problema. Baga hin naputos na han karaotan an kalibotan, pero diri nababaraka hito an mga tawo. Inabat ko nga waray ako mahihimo.

Tungod hito, nagtikang ako paghunahuna ha Dios ngan ha Biblia. Hadto, nag-aram ako han Biblia kaupod han mga Saksi  ni Jehova. Bisan kon gin-apresyar ko an ira pagin buotan ngan personal nga interes ha akon, waray ko mabag-o an akon pagkinabuhi. Pero iba na an kahimtang yana.

Nagtikang ako pagbasa han Biblia. Nakaliaw gud ito ha akon. Nabasa ko an damu nga teksto nga nagtututdo ha aton nga atamanon an mga hayop. Usa hito an Darahonon 12:10 nga nasiring nga “nagmamangno an maopay nga tawo han iya kahayopan.” (Maopay nga Sumat) Nasantop ko liwat nga diri an Dios an hinungdan han problema ha kalibotan. Lugod, nagtitikagrabe an problema tungod kay diri ginsusunod han kadam-an an Iya giya. Nabantad gud ako han hibaroan ko an mahitungod han gugma ngan hilawig nga pagpailob ni Jehova.—Salmo 103:8-14.

Hito nga panahon, nakabiling ako hin kupon para ha libro nga Ano Gud ba an Igintututdo han Biblia? Ginpil-apan ko ito ngan iginpadara. Waray pag-iha, ginbisita ako hin mag-asawa nga Saksi. Nagtanyag hira hin pag-aram ha Biblia, ngan ginkarawat ko ito. Nagtikang liwat ako pagtambong ha mga katirok ha Kingdom Hall. Tungod hito, nahisilsil an kamatuoran han Biblia ha akon kasingkasing.

Ha bulig han Biblia, damu an akon nabag-o ha akon kinabuhi. Inundang ako pagsigarilyo ngan pag-ininom. Ginbag-o ko an akon hitsura, panyakan, ngan an akon pagtagad ha sekular nga awtoridad. (Roma 13:1) Ginbayaan ko liwat an akon imoral nga pagkinabuhi.

Pero, an pinakamakuri para ha akon amo an pagkaada husto nga panhunahuna ha mga organisasyon nga nagpapanalipod ha katungod han tawo ngan hayop. Ha tinikangan, nahunahuna ko nga pagtraydor hini nga mga organisasyon an pag-resign. Kondi, nasantop ko nga an Ginhadian han Dios la an tinuod nga paglaom han kalibotan. Salit nagdesisyon ako paghatag han akon suporta hito nga Ginhadian ngan pagbulig ha iba nga mahibaro mahitungod hito.—Mateo 6:33.

Sugad nga aktibista, para ha akon, duha la nga klase an tawo—maopay ngan maraot—ngan andam ako makig-away hadton gintatagad ko nga maraot. Kondi ha bulig han Biblia, nawara ko an sugad nga pag-abat. Lugod, nangangalimbasog ako nga patuboon an Kristiano nga gugma ha ngatanan. (Mateo 5:44) Usa nga paagi nga iginpapakita ko ito amo an pakigbahin ha pagsangyaw han maopay nga sumat han Ginhadian han Dios. Nalilipay ako nga ini nga buruhaton nag-aaghat hin kamurayawan, kalipay, ngan tinuod nga paglaom ha mga tawo.

Tungod kay iginsasarig ko kan Jehova an ngatanan, may kamurayawan ako ha hunahuna. Kombinsido ako nga sugad nga Maglalarang, diri niya tutugotan nga abusuhon an tawo ngan hayop, o bungkagon an aton maopay nga tuna tubtob ha waray kataposan. Ha kabaliktaran, pinaagi han iya Ginhadian, ibabalik niya ha maopay nga kahimtang an ngatanan. (Isaias 11:1-9) Daku gud an akon kalipay ha paghibaro hini nga mga kamatuoran ngan ha pagbulig ha iba nga magkaada pagtoo hito. Para ha akon, diri ko na kinahanglan bag-uhon an kalibotan.