Epektibo an sagdon han Biblia may kalabotan ha pagkaada malipayon nga pag-asawa tungod kay tikang ito ha nagpatikang han pag-asawa, hi Jehova nga Dios. Gintututdoan kita hito ha pagkultibar han mag-opay nga kalidad nga makakabulig ha pagkaada malipayon nga pag-asawa, ngan ginpapahamangnoan kontra ha mga panggawi nga nakakadaot han pag-asawa. Dugang pa, gintututdoan kita hito kon paonan-o makikigkomunikar an mag-asawa basi hira magin malipayon.—Basaha an Colosas 3:8-10, 12-14.

Sadang pasidunggan ngan tahuron han mag-asawa an kada tagsa. Kon bubuhaton han mag-asawa an responsabilidad nga iginhatag han Dios ha kada tagsa ha ira, magigin malipayon hira.—Basaha an Colosas 3:18, 19.

Malilikyan han mag-asawa an pagbulag kon hinigugma nira an usa kag usa. Gintututdoan kita han Dios kon paonan-o magpapakita hin gugma. Hiya ngan an iya Anak, hi Jesus, hingpit nga susbaranan han gugma nga andam ha pagsakripisyo.—Basaha an 1 Juan 4:7, 8, 19.

Kon tatahuron han mag-asawa an kahikayan han Dios ha pag-asawa, malilikyan nira an pagbulag. Katuyoan han Dios nga an pag-asawa magin permanente nga pag-upod hin lalaki ngan babaye basi mapanalipdan an pamilya. Mahimo gud malikyan an pagbulag tungod kay ginlarang han Dios an lalaki ngan babaye nga may abilidad ha pagsuporta han kada tagsa ha pisikal ngan emosyonal nga paagi. Iya liwat hira ginlarang uyon ha iya dagway, ngan may abilidad ha pagsubad han iya gugma.—Basaha an Genesis 1:27; 2:18, 24.