DIRI ko gud hingangalimtan an usa nga urosa nga pamahaw han amon pamilya han Lunes, Agosto 22, 2005. An akon kinabuhi namimeligro tungod han daku nga tumor ha akon ulo. An akon bana, hi Krishna, nanguna ha pag-ampo, katapos nakiistorya ako ha amon pamilya.

“Magkakaada ako major operation, salit kinahanglan magin andam kamo ha kon ano man an mahitatabo,” siring ko. “Gin-andam ko na an akon lubong, kon pananglitan diri maglampos an operasyon. Para ha iyo nga nagsisingba kan Jehova, alayon pagpadayon. Ngan ha mga diri pa, nakikimalooy ako nga karawaton niyo an pag-aram ha Biblia ngan tumambong ha mga katirok. Hito nga paagi, mahimo niyo makarawat kon ano an akon ginlalaoman ha bag-o nga kalibotan diin an tinuod nga magsiringba han Dios mabubuhi ha kadayonan ha hingpit nga kahimsog ha paraiso nga tuna.”

Antes ko isumat an resulta han akon operasyon, isusumat ko anay an mahitungod han akon kinabuhi ngan kon paonan-o ko nakilala an tinuod nga Dios.

An amon pamilya nag-uukoy ha daku nga balay nga hinimo tikang ha kahoy ngan puthaw ha usa nga bungtod ha syudad han Durban, South Africa. Ito nga syudad napapalibotan hin baybayon. Basi makaabot ha prente nga puthaw nga geyt han amon balay, nasaka anay kami hin 125 ka balitang tikang ha kalsada, katapos naagi hin haligot nga aragian nga damu an tanom. Ha ligid han geyt nahimumutang an gruto han akon lola nga puno hin retrato ngan rebulto hin mga dios han Hindu. Hi Lola nasiring nga ako “anak han templo” (mandir kī baccā, ha Hindi) ngan natawo ako tungod han mga dios nga amon ginsisingba. Ha atubangan hini nga templo may pula nga hagdan tipakadto ha prente nga purtahan. Daku an amon balay nga may hilaba nga pasilyo, haluag nga kusina nga may abohan, ngan pito nga kwarto. Ha sapit hini, makikita an usa pa nga gutiay nga balay. Hinin duha nga balay 27 an naukoy, an akon mga apoy, an akon tatay, an iya tulo nga manghod nga kalalakin-an, an ira puto nga babaye, ngan an ira mga pamilya.

Diri masayon an pagtagana ha sugad kadaku nga pamilya. Kondi an pag-ukoy nga lurungon nagbugkos han amon pamilya ngan naghatag hin damu nga makalilipay nga eksperyensya. An upat nga umagad nga kababayin-an, upod na an akon nanay, hi Gargee Devi, nagbuburublig ha mga buruhaton. Nagsusurosaliwan hira ha pagluto ngan paglimpyo. Hi Lolo an ulo han pamilya, ngan an napalit hin pagkaon para ha ngatanan. Kada Mierkoles an akon mga apoy namimerkado hin karne, prutas, ngan utanon para ha bug-os nga semana. Samtang naghuhulat han ira pag-abot, nanlilingkod kami ha landong hin usa nga pine tree ha pangpang diin tikang didto nakikita namon an palibot. Salit paghaw-as nira ha bus nga may dagku nga basket, nandadadlagan kami tipaubos han 125 ka balitang basi bumulig pagdara han ginpamalit.

Ha amon hardin, may hitaas nga puno hin palma diin naghihimo hin salag an mga tamsi nga mayna. Didto naglulupadlupad hira ngan hinbabatian namon an ira huni. Samtang  nanhuhuni hira, usahay nalingkod hi Lola ha hagdan han prente nga purtahan ngan nagsusumat hin mga istorya nga sugad hin gin-iinterpretar an ira huni. Damu gud an akon makalilipay nga eksperyensya ha amon balay—nagkakaragtatawa kami, nagtatangis, nag-uuyag, nagkakaurosa. Nalilipay gud kami ha paglurungon sugad nga usa ka daku nga pamilya! Labaw ha ngatanan, dinhi kami siyahan nga nahibaro mahitungod han Maglalarang, hi Jehova, ngan han iya Anak, hi Jesu-Kristo.

Antes namon makilala hi Jehova, damu an amon inadlaw nga rituwal. Nagsasaurog liwat kami hin dagku nga selebrasyon diin nangingimbitar kami basi maghatag hin katalahoran ha mga dios ngan diosa. Ha pipira hito nga selebrasyon, hi Lola nagkakaada bisyon ngan nakakagkomunikar ha mga espiritu, ngan ha katutnga han gab-i, naghahalad kami hin mga hayop basi malukmay an mga espiritu. Samtang hi Lolo kilala tungod han iya dagku nga donasyon ha pagtukod ngan pamalakat han panpubliko nga mga eskwelahan ngan mga templo.

Han 1972, nagkasakit hi Lolo ngan namatay. Paglabay hin pipira ka bulan, an akon dadâ nga hi Indervathey, tinatawag liwat nga Jane, kinarawat hin Watchtower ngan Awake! nga mga magasin tikang ha duha nga Saksi ni Jehova. Nakonsensya hiya nga waray niya hira pasudla ha amon balay. Hadto, gintatabog namon an mga Saksi. Pero han ira pagbalik, ginpasulod hira han akon dadâ ngan nakiistorya ha ira mahitungod han paghinubog han akon batâ. Gin-aaghat hiya han amon mga amyaw ngan mga paryente nga makigbulag. Kondi iginsaysay ha iya han mga Saksi an panhunahuna han Dios mahitungod ha pag-asawa. (Mateo 19:6) Nalipay an akon dadâ ha sagdon han Biblia ngan han saad hito nga maopay nga kinabuhi dinhi ha tuna. a Nagbag-o an iya hunahuna. Waray niya bayai an akon batâ, ngan nagtikang hiya pag-aram han Biblia ha ira. Samtang nag-aaram hira ha sala, nanmamati ha ira an iba nga umagad nga kababayin-an tikang ha ira mga kwarto.

Inabot an panahon, an ngatanan han umagad nga kababayin-an nag-aram liwat han Biblia. Hi Dadâ Jane, an nauna ha pag-aram, nagsusumat han iya hinbabaroan ngan agsob basahan ngan istoryahan kami tikang ha libro nga Pagpamati ha Daku nga Magturutdo. b Han hibaroan han akon mga batâ nga nag-aaram han Biblia an akon mga dadâ, kinontra hira. Usa ha ira an nagkuha han amon mga literatura, upod na an usa nga Biblia, ngan ginsunog ito. Kon natambong kami ha mga katirok, ginpapakaraot nira kami ngan ginkakastigo. Hi Tatay la an waray magkontra ha amon. An upat nga umagad nagpadayon pagtambong ha katirok ngan ha urhi naghilarom an ira gugma kan Jehova nga Dios.

Han 1974, nabawtismohan hi Dadâ Jane sugad nga Saksi ni Jehova, ngan waray pag-iha nabawtismohan liwat hi Nanay ngan an akon iba nga dadâ. Paglabay han panahon, ginbayaan liwat ni Lola an iya relihiyon. Ha sulod hin damu ka tuig, nag-inupod ako pagtambong ha mga katirok. Katapos, ha usa ka kombensyon  han mga Saksi, usa nga Saksi nga hi Shameela Rampersad, an nagpakiana, “San-o ka mapabawtismo?” Binaton ako, “Diri ako mababawtismohan kay waray nagba-Bible study ha akon.” Salit, nagtanyag hiya ha pag-study ha akon. Han sunod nga kombensyon, han Disyembre 16, 1977, nabawtismohan ako. Ha urhi, ha 27 nga membro han amon pamilya, 18 an nabawtismohan. Kondi han maoperahan ako, diri pa Saksi an akon tatay nga hi Sonny Deva.

An Filipos 4:6, 7 nakabulig gud ha akon, labi na han hinbaroan ko nga may tumor ako ha ulo. Ito nasiring: “Diri kamo magkabaraka hin bisan ano nga bagay; kondi ha ngatanan nga bagay tungod ha pag-ampo ngan pangamuyo upod an pagpasalamat ipahibaro niyo ha atubangan han Dios an iyo mga pinangangaro. Ngan an kamurayawan han Dios, nga labaw ha ngatanan nga hibabroan, magbabantay ha iyo mga kasingkasing ngan ha iyo mga hunahuna kan Kristo Jesus.” Makuri nga ‘diri mabaraka ha bisan ano nga bagay’ labi na kon maaram ka nga puydi ka mamatay ha bisan ano nga oras. Ha siyahan nagtinangis ako, katapos nag-ampo ako kan Jehova. Tikang hito, inabat ko “an kamurayawan han Dios, nga labaw ha ngatanan nga hibabroan.”

Sugad hin ginkakaptan ni Jehova an akon too nga kamot, ngan inabat ko gud an iya pagtugway ha akon. (Isaias 41:13) Ginbuligan niya ako nga magkaada kaisog ha pagsaysay ha mga doktor han akon determinasyon nga sundon an Biblia nga maglikay ha dugo. (Buhat 15:28, 29) Salit inuyon an surgeon ngan an anesthetist ha pag-opera nga waray pag-abuno hin dugo, ngan naglampos hira. Nagsiring an surgeon nga waray pa hiya pasyente nga naopay dayon katapos han sugad ka peligroso nga operasyon.

Paglabay hin tulo ka semana, nagdumara na ako hin pag-aram ha Biblia bisan nahigda la. Pag-ikatarapos han ikapito ka semana, nagdadrayb na ako, nagsasangyaw, ngan natambong na ha katirok. Nagpapasalamat gud ako han bulig han Kristiano nga kabugtoan nga naupod ha akon ha ministeryo. Ginsisiguro nira nga pirme ako may upod ngan talwas nga nakakauli. Natoo ako nga an pagpamati ha audio recording han Biblia ngan an akon pagsentro ha akon espirituwalidad nakabulig ha akon madagmit nga pag-opay.

Katapos ko maoperahan, nalipay ako nga kinarawat hi Tatay hin pag-aram ha Biblia ngan nabawtismohan ha edad nga 73. Yana madasigon nga nag-aalagad hiya kan Jehova. Sobra 40 han akon paryente an nag-aalagad na gihap kan Jehova. Bisan kon nadaot an akon wala nga mata ngan an tul-an han akon ulo kinahanglan tugkupon, naglalaom ako nga ha tiarabot nga Paraiso hihimoon ni Jehova “an ngatanan nga mga butang nga bag-o.”—Pahayag 21:3-5.

Mapasalamaton gud ako ha pagkaada mahigugmaon nga bana nga usa nga tigurang ha kongregasyon, ngan mahusay nga anak, hi Clerista, nga usa nga surok han akon kusog samtang nag-aalagad ako sugad nga payunir. Hura nga ginbibendisyonan ni Jehova an akon ministeryo. Nabuligan ko an damu han akon gindudumarahan hin pag-aram ha Biblia nga maeksperyensyahan an gahum han Pulong han Dios. Sobra 30 na ha ira an nagdedikar ha Dios ngan nagpabawtismo.

Yana an akon kasingkasing puno hin paglaom, ngan ginpapamulat ko gud an panahon diin luluwason kita ni Jehova tikang hinin maraot nga sistema ngan tutugwayan tipakadto ha paraiso nga tuna.