Abraham—Tawo nga Maisugon

Nagkikinita hi Abraham ha iya pamilya ngan mga surugoon samtang nag-aandam hira ha pagbiyahe tipakadto ha Kanaan. (Genesis 12:1-5) Samtang nakapokus hinin daku nga grupo nga nadepende ha iya, inabat niya an responsabilidad ha ira. Paonan-o hiya makakagtagana han ira materyal nga panginahanglan ha tuna nga waray pa niya makadtui? Diri ba mas masayon ini himoon ha Ur, usa nga lugar nga riko, haluag an kaumhan, matambok an tuna, ngan abunda an tubig? Ano man kon masakit o mamatay hiya dida hito nga lugar? Hin-o man la an mag-aataman han iya pamilya? Kon nabaraka man hito hi Abraham, waray niya tuguti nga madaog hito. Determinado hiya ha pagsunod ha sugo han Dios anoman an mahitabo, ngan usa ito nga pangirilal-an han tinuod nga kaisog.

 ANO AN KAISOG? Ito an pagin marig-on ngan waray ginkakahadlokan; an kabaliktaran ha kahadlok o katalaw. Kondi diri ito nagpapasabot nga an may kaisog diri na gud mahahadlok. Lugod, an tawo nga may hatag han Dios nga kaisog nagios bisan kon nahahadlok.

HA ANO NGA PAAGI NAGPAKITA HI ABRAHAM HIN KAISOG? Hi Abraham waray mahadlok nga maiba. Nagtubo hiya ha lugar nga damu an ginsisingba nga dios-dios. Bisan pa hito, waray niya tuguti an kahadlok ha huhunahunaon han iba nga makapugong ha iya ha pagbuhat han husto. Lugod, maisugon nga nagkinabuhi hiya ha iba nga paagi—nagsingba ha usa la nga Dios, an “Dios nga Gihitaasi,” hi Jehova.—Genesis 14:21, 22.

Gin-una ni Abraham an pagsingba ha tinuod nga Dios kay ha materyal nga mga butang. Ginbayaan niya an iya komportable nga kinabuhi ha Ur ngan kumadto ha kamingawan, nasarig nga itatagana ni Jehova an iya materyal nga panginahanglan. Syempre, samtang nalabay an katuigan, bangin nahunahuna niya an iya kinabuhi ha Ur. Bisan pa hito, nasarig hiya nga hi Jehova pirme magtatagana para ha iya ngan ha iya pamilya. Pero tungod kay gintatagad niya hi Jehova sugad nga an pinakaimportante nga Persona, nagkaada hiya kaisog nga sundon an Iya mga sugo.

ANO NGA MGA LEKSYON AN ATON MAHIHIBAROAN? Masusubad naton hi Abraham pinaagi ha pagkultibar hin kaisog ha pagsunod kan Jehova, bisan kon diri ito an ginbubuhat han iba. Pananglitan, nasiring an Biblia nga mahimo kontrahon adton marig-on an pagtoo kan Jehova, bangin han ira mga sangkay o paryente nga waray maraot nga motibo. (Juan 15:20) Kondi kon kombinsido kita han aton hinbabaroan mahitungod kan Jehova, matinalahuron nga titipigan naton an aton gintotoohan.—1 Pedro 3:15.

Dugang pa, makakasarig kita ha saad han Dios ha pagtagana kon kita may pagtoo ha iya. Tungod hito magkakaada kita kaisog ha pagsentro han aton kinabuhi ha Dios imbes ha materyal nga mga butang. (Mateo 6:33) Tagda kon paonan-o ginbuhat ito han usa nga pamilya.

Hira Doug ngan Becky karuyag bumalhin ha nasud nga daku an panginahanglan hin magsarangyaw han maopay nga sumat pero gudti pa an ira duha nga anak. Katapos magsaliksik ngan sinsero nga mag-ampo, nagdesisyon hira nga ipadayon an ira plano. “Nagkikinahanglan hin kaisog an pagbalhin labi na nga gudti pa an amon mga anak ngan diri kami maaram han amon dadangatan,” siring ni Doug. “Han nagtitikang pa la kami pagplano, ginhisgotan namon hira Abraham ngan Sara. An paghunahuna han ira daku nga pagsarig kan Jehova—ngan han Iya pagbulig ha ira—nakabulig gud ha amon.”

May kalabotan han ira pagkinabuhi ha iba nga nasud, hi Doug nagsiring: “Damu gud an amon nakarawat nga bendisyon.” Hiya nagdugang: “Tungod kay nagin mas simple an amon kinabuhi, an amon pamilya haros bug-os nga adlaw na nga magkaupod—ha pagsangyaw, pag-uruistorya, ngan pag-uyag upod han amon mga anak. Usa ito nga kagawasan nga waray pulong nga makakagsaysay.”

Posible nga diri ito mahihimo han ngatanan. Kondi, masusubad naton an ehemplo ni Abraham ha pag-una ha Dios, nasarig nga bubuligan kita Niya. Kon bubuhaton naton ito, ginsusunod naton an sagdon han Biblia nga “[magmaisog] kita ngan magsiring, ‘An Ginoo an akon kabulig, diri ako mahahadlok.’”—Hebreo 13:5, 6, Maopay nga Sumat.

[Blurb ha pahina 7]

An tawo nga may hatag han Dios nga kaisog nagios bisan kon nahahadlok

 [Kahon/Retrato ha pahina 8]

Diosnon nga Babaye Ngan Birilhon nga Asawa

Hi Sara asawa hin usa nga may daku nga pagtoo. Pero hiya mismo susbaranan para ha aton. Ha pagkamatuod, tulo ka beses nga ginngaranan hiya sugad nga susbaranan han kababayin-an nga may kahadlok ha Dios. (Isaias 51:1, 2; Hebreo 11:11; 1 Pedro 3:3-6) Bisan kon pipira la nga bersikulo han Biblia an naghihisgot mahitungod hinin birilhon nga babaye, makikita naton an iya mag-opay nga kalidad.

Tagda, pananglitan, an iya siyahan nga reaksyon han ginsumatan hiya ni Abraham nga ginpapabaya hira han Dios ha Ur. Nagpakiana ba hiya kon makain hira ngan kon kay ano? Nabaraka ba hiya han ira materyal nga panginahanglan? Nasubo ba hiya ha pagbaya ha iya kasangkayan ngan pamilya kay diri hiya maaram kon magkikita pa hira? Sigurado nga nahunahuna niya ito. Kondi kinaburut-on nga sumunod hiya, nasarig nga bibendisyonan ni Jehova an iya pagkamasinugtanon.—Buhat 7:2, 3.

Dugang pa ha pagin matinumanon nga surugoon han Dios, hi Sara maopay nga asawa. Imbes makigkompetensya ha iya bana ha pagkontrol han kahikayan han ira pamilya, ginkultibar niya an sinsero nga pagtahod ha iya bana, mahigugmaon nga ginsuportahan niya ito samtang nangunguna han ira pamilya. Ha pagbuhat hito, nagin mahusay hiya tungod han iya mag-opay nga kalidad.—1 Pedro 3:1-6.

May kapulsanan ba an sugad nga mga kalidad ha mga asawa yana? “An susbaranan ni Sara nagtutdo ha akon nga diri mag-alang pagyakan ngan pagpahayag han akon ginhuhunahuna ha akon bana,” siring ni Jill nga malipayon nga inasaw-an ha sulod hin sobra 30 anyos na. Hiya nagdugang: “Ha pariho nga panahon, an akon bana sugad nga ulo han pamilya, an may responsabilidad ha paghimo hin desisyon. Ngan kon may desisyon na, responsabilidad ko an pagbuhat han tanan nga akon mahihimo basi maglampos ito.”

Bangin an pinakamakapabantad nga leksyon nga aton mahihibaroan kan Sara amo ini: Bisan kon mahusay hinduro, waray hiya magpahitaas. (Genesis 12:10-13) Lugod, mapainubsanon nga ginsuportahan niya hi Abraham, may problema man hira o waray. Oo, hira Abraham ngan Sara matinumanon, mapainubsanon, ngan mahigugmaon nga bana ngan asawa nga tinuod nga bendisyon ha usa kag usa.