Abraham—Tawo nga Daku an Pagtoo

Ha mamingaw nga kagab-ihon, nagtinindog hi Abraham ha gawas. Samtang nagkikinita ha damu an bitoon nga kalangitan, nahuhunahuna niya an saad han Dios nga an iya katulinan magigin pariho kadamu han bitoon. (Genesis 15:5) Para ha iya, an mga bitoon nagpapahinumdom ngan garantiya han saad ni Jehova. Aw, kon may gahum hi Jehova ha paglarang han haluag nga uniberso ngan han ngatanan dida hito, diri gud imposible para ha Iya an paghatag hin anak ha ira ni Sara, ngan ito an iya gintotoohan.

ANO AN PAGTOO? Ha Biblia, an “pagtoo” nagtutudlok ha marig-on nga pagsarig ha usa nga butang nga diri nakikita kondi may marig-on nga ebidensya. An tawo nga may pagtoo ha Dios nakasentro ha katumanan han Iya mga saad, gintatagad ito nga sugad hin natuman na.

HA ANO NGA PAAGI NAGPAKITA HI ABRAHAM HIN PAGTOO? Ginpamatud-an ni Abraham nga natoo hiya ha mga saad han Dios. Tungod ha pagtoo, binaya hiya ha iya natawohan nga nasud, nasarig nga tutumanon ni Jehova an Iya saad ha pagpakita ha iya hin iba nga tuna. Tungod ha pagtoo, naglakaton hiya ha Kanaan, nasarig nga ha urhi pagtatag-iyahon ito han iya katulinan. Ngan tungod liwat ha pagtoo, ighahalad na unta niya hi Isaak, nasarig nga kon kinahanglan babanhawon ni Jehova ito.—Hebreo 11:8, 9, 17-19.

Nagpokus hi Abraham ha tidaraon imbes ha naglabay. Bisan kon mas komportable an kinabuhi nira Abraham ngan Sara ha Ur kay ha Kanaan, waray na hira ‘magdumdom han tuna nga ira giniknan.’ (Hebreo 11:15) Lugod ginpokus nira an ira hunahuna ha magigin bendisyon han Dios ha ira ngan ha ira katulinan.—Hebreo 11:16.

 May basihan ba an pagtoo ni Abraham? May-ada. Gintuman ni Jehova an ngatanan nga iya saad. Ha urhi, an katulinan ni Abraham nagdamu ngan nagin usa nga nasud nga ginkilala nga Israel. Inabot an panahon an mga Israelita nag-ukoy ha Kanaan, an tuna nga iginsaad ni Jehova kan Abraham.—Josue 11:23.

ANO NGA MGA LEKSYON AN ATON MAHIHIBAROAN? Makakasarig kita nga tutumanon ni Jehova an iya mga saad. Bisan kon an iba hito baga hin imposible ha tawo, maaram kita nga “ha Dios an ngatanan nga mga bagay mahihimo.”—Mateo 19:26.

Dugang pa, an ehemplo ni Abraham nagtututdo ha aton ha pagpokus han aton hunahuna, diri ha naglabay, kondi ha mga bendisyon ha tidaraon. Ito an hinbaroan han may sakit nga hi Jason. Hiya nag-antos hin sakit nga nakaparalisar han iya bug-os nga lawas. “May mga panahon nga ginhuhunahuna ko an naglabay,” siring ni Jason. Hiya nagdugang: “Ngan ginpapangandoy ko gud an pagbuhat han simple nga mga butang, sugad ha paghangkop ha akon asawa nga hi Amanda.”

Bug-os an pagtoo ni Jason nga tutumanon ni Jehova an iya mga saad, upod na an paghimo han tuna nga paraiso ha diri maiha ngan paghatag hin kinabuhi nga dayon ha hingpit nga kahimsog ha magtinumanon nga tawo. * (Salmo 37:10, 11, 29; Isaias 35:5, 6; Pahayag 21:3, 4) Hi Jason nagsiring: “Ginpapahinumdom ko an akon kalugaringon nga an mag-opay nga panahon tiarabot pa,” ngan nagdugang: “Ha diri maiha, mawawara na an istres, kabaraka, kasubo, ngan pag-abat hin pagkasalaan.” Daku an iya pagtoo, pariho han kan Abraham!

[Footnote]