Hirani Na an Mas Maopay nga Kinabuhi!

“Diri na mag-iiha, ngan an magraot mawawara na . . . Pero an mga maaghop magtatag-iya han tuna, ngan magmamalipayon hira hinduro tungod han hura nga kamurayawan.”​—SALMO 37:10, 11.

KARUYAG mo ba makita an katumanan han tagna nga ginkotar ha igbaw? Sigurado nga karuyag mo. May marig-on nga mga basihan para tumoo nga hirani na ito matuman.

Ginhisgotan han nauna nga mga artikulo an pipira la han mga tagna han Biblia nga nagpapamatuod nga nagkikinabuhi na kita ha “kataposan nga mga adlaw.” (2 Timoteo 3:1-5) Gin-giyahan han Dios an mga parasurat han Biblia nga itagna ito nga mga panhitabo basi magkaada kita paglaom. (Roma 15:4) An katumanan han sugad nga mga tagna nagpapasabot nga hirani na matapos an magraot nga panhitabo nga aton naieksperyensyahan yana.

Ano an mahitatabo kahuman han kataposan nga mga adlaw? Mamandoan han Ginhadian han Dios an ngatanan nga tawo. (Mateo 6:9) Pansina an paghulagway han Biblia ha mga kahimtang ha tuna hito nga panahon:

● Mawawara na an gutom. “Magkakaada hin hura nga lugas ha tuna; ha pungkay han kabukiran magsasap-ay ito.”​—Salmo 72:16.

● Mawawara na an sakit. “Waray residente nga masiring: ‘May sakit ako.’”​—Isaias 33:24.

● Mabalik na an kahusay han tuna. “An kamingawan ngan an uga nga tuna magrarayhak, ngan an disyerto nga kapatagan magkakalipay ngan mamumukad pariho han tanom nga safron.”​—Isaias 35:1.

Pipira la ini han makalilipay nga mga tagna han Biblia nga hirani na matuman. Puydi mo hangyoon an mga Saksi ni Jehova nga ipakita ha imo kon kay ano nga kombinsido gud hira nga hirani na an mas maopay nga kinabuhi.