DAMU yana an masurub-on; naghuhunahuna hira nga waray nahigugma ha ira. An mga lagas agsob nga naabat hin sugad. Ngan damu nga bata yana, bisan adton nagsisingba ha Dios, an nasusubo ngan nahahadlok liwat. Maaram ka ba kon kay ano?— *

Damu an posible nga rason. Pananglitan, aton pag-istoryahan an nahitabo kan Elias, usa nga lalaki nga nabuhi maiha na hinduro an naglabay, haros usa ka yukot ka tuig antes matawo hi Jesus. Ha iya panahon diri na nagsisingba kan Jehova, an tinuod nga Dios, an mga Israelita. Kadam-an ha ira nagsisingba na ha buwa nga dios nga hi Baal. Hi Elias nagsiring: ‘Ako la an nahibilin.’ Pero tinuod gud ba nga hi Elias na la an nagsisingba kan Jehova?—

Aw, diri maaram hi Elias nga damu pa ha Israel an nagsisingba ha Dios. Pero nagtatago hira tungod ha kahadlok. Maaram ka ba kon kay ano?—

An hadi han Israel nga hi Ahab diri nagsisingba kan Jehova. Nagsisingba hiya kan Baal, an buwa nga dios han iya maraot nga asawa nga hi Jesebel. Salit ginpinamiling nira an mga nagsisingba kan Jehova basi patayon, labi na hi Elias. Tungod hito, pinalagiw hi Elias hin haros 483 kilometro ngadto ha disyerto han Horeb, nga tinatawag liwat ha Biblia nga Sinai. Ginatos ka tuig na an naglabay antes han panahon ni Elias, dida hito nga lugar ginhatag ni Jehova ha mga Israelita an Napulo nga Sugo ngan an Iya iba pa nga Balaud. Nagtago hi Elias nga nag-uusahan  ha usa nga lungib didto. May rason ba hi Elias nga mahadlok?—

Iginpapakita han Biblia nga gin-gamit na ni Jehova hi Elias ha paghimo hin urusahon nga mga milagro. Makausa, ginbaton Niya an pag-ampo ni Elias pinaagi ha pagpadara hin kalayo tikang ha langit ha paglamoy hin halad. Hito nga paagi, ginpamatud-an ni Jehova nga Hiya an tinuod nga Dios, diri hi Baal. Ngan han nakadto hi Elias ha lungib, nakiistorya ha iya hi Jehova.

Hi Jehova nagpakiana: “Nag-aano ka dinhi?” Hito nga takna, hi Elias nagsiring, ‘Ako la an nahibilin ha mga nagsisingba ha imo.’ Katapos, mahigugmaon nga ginsaway hiya ni Jehova, ‘May-ada pa pito ka yukot nga nagsisingba ha akon.’ Ginsidngan hiya ni Jehova nga bumalik tungod kay damu pa an Iya ipapabuhat kan Elias.

Ano an aton mahibabaroan tikang ha istorya mahitungod kan Elias?— Mahibabaroan naton nga bisan an mga nagsisingba kan Jehova usahay nahahadlok liwat. Salit kita ngatanan, bata man o lagas, kinahanglan mangaro hin bulig kan Jehova. An Biblia nagsasaad: “Hi Jehova hirani ha ira ngatanan nga nagsasangpit ha iya.”

Ini an usa pa nga leksyon: May kabugtoan kita ha bug-os nga kalibotan nga nahigugma kan Jehova ngan ha aton. An Biblia nasiring: “Ini nga mga pag-antos natutuman man ha [aton] mga kabugtoan nga aada ha kalibotan.” Diri ka ba nalilipay nga diri ka nag-uusahan?—