An Baraan nga Espiritu—An Pwersa nga Imo Ginkikinahanglan

“AYAW gud ako isalikway ha imo atubangan; ngan ayaw pagkuhaa ha akon an imo baraan nga Espiritu.” (Salmo 51:11) Ini an kinasingkasing nga panginyupo ni Hadi David katapos makabuhat hin daku nga sala.

Hi David agsob makaeksperyensya han gahum han baraan nga espiritu. Han tinedyer pa hiya, nabuligan hiya hito ha pagpirde kan Goliat—usa nga makusog hinduro nga sundalo. (1 Samuel 17:45-50) Nakabulig liwat ito ha iya ha pagsurat hin mag-opay hinduro nga mga salmo. Hiya nagsiring: “An Espiritu ni Jehova naghimangraw pinaagi ha akon, ngan an iya pulong nakada han akon dila.”—2 Samuel 23:2.

Hi Jesu-Kristo mismo nagkompirma han bahin han baraan nga espiritu ha kinabuhi ni David. Makausa, hi Jesus nagsiring: “Kay hi David ngahaw siniring tungod ha Espiritu Santo: An Ginoo siniring ha akon Ginoo: lingkod ha akon too tubtob nga akon ipahamtang an imo mga kaaway ha ilarom han imo mga tiil.” (Markos 12:36; Salmo 110:1) Maaram hi Jesus nga gin-giyahan hi David han baraan nga espiritu han ginsurat ni David an pipira nga bahin han salmo. Mahimo ba liwat kita mabuligan hito nga baraan nga espiritu?

 “Pangaro Kamo, Ngan Ihahatag ha Iyo”

Bangin diri ka magsurat hin salmo. Kondi posible nga umatubang ka hin dagku nga problema sugad han daku ngan makuri atubangon nga hi Goliat. Pananglitan, tagda hi Isabel. a Ginbayaan hiya han iya bana tungod hin mas bata nga babaye, ginbilin ha iya an daku nga utang, ngan waray hiya tagi hin sustento para ha ira duha nga gudtiay nga anak. “Sugad hin gintraydor ako ngan gintamastamasan,” siring niya. “Bisan pa hito, tikang han binaya an akon bana, inabat ko an bulig han baraan nga espiritu han Dios.”

Naghunahuna ba hi Isabel nga makakarawat niya an baraan nga espiritu bisan waray hiya buhaton? Waray, lugod kada adlaw ginpangaro niya ito ha Dios. Maaram hiya nga kinahanglan an kusog han Dios basi may kaisog nga maatubang an tidaraon, maataman hin maopay an iya mga anak, ngan maibalik an iya pagtahod ha kalugaringon. Iya ginsunod an ginsiring ni Jesus: “Pangaro kamo, ngan ihahatag ha iyo; pamiling kamo, ngan iyo hiaagian; pagtuktok kamo, ngan bubuksan ha iyo.”—Mateo 7:7.

Hi Roberto inabat liwat nga kinahanglan niya an espiritu han Dios tungod hin iba nga problema. Giyan hiya ha tabako ngan marijuana. Ha sulod hin duha ka tuig, nangalimbasog hiya pag-undang ha iya bisyo, kondi nabalik hito ha pipira ka beses. “Mag-aantos ka kon umundang ka pagtabako ngan pagmarijuana,” siring niya. “Kada adlaw ginbibiling ito han lawas.”

“Kondi determinado ako magbag-o basi makag-alagad ha Dios ha paagi nga iya kinakarawat,” siring ni Roberto. “Nangalimbasog ako nga pun-on an akon hunahuna hin positibo nga mga punto tikang ha Biblia. Kinasingkasing nga nag-ampo ako kada adlaw, nanginginyupo ha Dios para hin kusog basi maipahiuyon an akon pagkinabuhi ha Biblia. Maaram ako nga diri ako maglalampos ha akon kalugaringon nga pangalimbasog la. Ngan nakita ko nga ginbaton ni Jehova an akon mga pag-ampo, labi na kon nanluluya ako katapos makabuhat utro han akon bisyo. Natoo ako nga an baraan nga espiritu han Dios naghatag ha akon hin kusog; kon waray ito, diri gud unta ako makakaundang ha akon bisyo.”—Filipos 4:6-8.

‘Pagsaka Pinaagi han mga Pako Sugad hin mga Agila’

Pariho kanda Isabel ngan Roberto, minilyon nga Saksi ni Jehova an nakaeksperyensya han gahum han baraan nga espiritu. An kan Jehova aktibo nga pwersa—an pwersa nga gin-gamit ha paglarang han uniberso—mahimo mo makarawat kon karuyag mo. Andam ngan naruruyag hiya ha paghatag han iya espiritu kon kinasingkasing nga pangaroon mo ito. Kondi basi makarawat ito, kinahanglan hibaroan mo an kamatuoran mahitungod ha iya ngan sinsero nga buhaton an iya kaburut-on.—Isaias 55:6; Hebreo 11:6.

Pinaagi han pwersa han baraan nga espiritu, mahimo mo makarawat an kusog basi makag-alagad ha Dios nga malampuson ngan maatubang an bisan ano nga problema. An Biblia nagpapasarig: “[Hi Jehova] nahatag hin gahum ngadto ha nanluluya; ngan ha iya nga waray gahum iya dinudugangan hin kusog. . . . Hira nga naghuhulat kan Jehova magbabag-o han ira kusog; hira masaka pinaagi hin mga pako sugad hin mga agila; hira madalagan, ngan diri maguguol; hira maglalakat, ngan diri maluya.”—Isaias 40:28-31.

[Footnote]

[Blurb ha pahina 8]

‘Kinasingkasing nga nag-ampo ako kada adlaw, nanginginyupo ha Dios para hin kusog. Maaram ako nga diri ako maglalampos ha akon kalugaringon nga pangalimbasog la. Ngan nakita ko nga ginbaton niya an akon mga pag-ampo’

 [Kahon/Mga Retrato ha pahina 7]

AN NAHIHIMO HAN BARAAN NGA ESPIRITU

An baraan nga espiritu gin-gamit han Dios ha paglarang han tuna ngan han bug-os nga uniberso. “O Jehova, . . . pagkadamu han imo mga buhat! Pinaagi ha kaaram imo ito ngatanan ginhimo: An tuna puno han imo mga manggad,” siring han salmista. Kon “imo pinadadara an imo Espiritu, nagkakahihimo hira.”—Salmo 104:24, 30; Genesis 1:2; Job 33:4.

An baraan nga espiritu naggiya ha kalalakin-an nga mahadlukon ha Dios ha pagsurat han Biblia. “An ngatanan nga mga Baraan nga Surat nga ginpakaaghat han Dios may kapulsanan,” nagsurat hi apostol Pablo. (2 Timoteo 3:16) An Griego nga pulong nga ginhubad nga “ginpakaaghat han Dios,” o gin-giyahan, literal nga nangangahulogan hin “ginhuypan han Dios hin gininhawa.” An kan Jehova gininhawa, o espiritu, naggiya ha mga parasurat han Biblia, salit ira naisurat an “pulong han Dios.”—1 Tesalonika 2:13.

An baraan nga espiritu naggiya ha mga surugoon han Dios nga makagtagna hin husto. Hi apostol Pedro nagsaysay: “Waray igintagna han Santos nga Surat nga paghubaron pinaagi ha kalugaringon nga hunahuna. Kay waray pa gud igintagna nga inabot pinaagi ha kaburut-on han tawo: kondi an mga tawo nagyayakan tikang ha Dios, tungod nga ginmandoan han Espiritu Santo.”—2 Pedro 1:20, 21; Joel 2:28.

An baraan nga espiritu binulig kan Jesus ngan ha magtinumanon nga kalalakin-an ha pagsangyaw han maopay nga sumat han Ginhadian han Dios ngan ha pagbuhat hin mga milagro. Hi Jesus nagsiring: “An Espiritu han Ginoo aadi ha akon; kay iya ako ginhirogan ha pagwali han mag-opay nga mga sumat ha mga makalolooy; hiya nagsugo ha akon pagpasabot hin kaluwasan ha mga bihag; ngan pagpakita ha mga buta.”—Lukas 4:18; Mateo 12:28.

 [Kahon/Mga Retraro ha pahina 9]

MGA PAAGI HAN BARAAN NGA ESPIRITU HA PAGBULIG

An baraan nga espiritu makakaparig-on ha imo nga maatohan an mga pagsulay ngan mabayaan an magraot nga bisyo. Hi apostol Pablo nagsiring: “An Dios matinumanon, nga diri matugot nga pagsulayon kamo labaw ha iyo kasadangan; kondi upod ha pagsulay mahatag liwat hiya hin katigayonan ha paglikay, basi nga kamo makahimo ha pag-antos.”—1 Korinto 10:13.

An baraan nga espiritu makakabulig ha imo nga makultibar an mga kalidad han Dios. “An bunga han Espiritu amo an gugma, kalipay, pakigdait, pagkamailob, pagkamalolooyon, pagkamaopay, pagkamatinooron, pagkaaghop, paggahum ha kalugaringon.”—Galasia 5:22, 23.

An baraan nga espiritu makakapakusog ha imo nga makailob ha mga problema. “Ngatanan mahihimo ko ha gahum han Nagpaparig-on ha akon.”—Filipos 4:13.