Pakiana han Magbarasa

Kon Hingpit hi Adan, Kay Ano nga Nakasala Hiya?

Posible nga makasala hi Adan tungod kay han ginlarang hiya han Dios, gintagan hiya hin kagawasan ha pagbuot. Ito nga regalo diri gud nasumpaki ha pagin hingpit ni Adan. Ha pagkamatuod, an Dios la an hingpit ha ngatanan nga paagi. (Deuteronomio 32:3, 4; Salmo 18:30; Markos 10:18) Limitado la an pagin hingpit han bisan hin-o o bisan ano nga butang. Ha pagkamatuod, hingpit la an usa ka butang kon natutuman hito an katuyoan han paghimoa hito.

Niyan, ano an katuyoan han Dios han ginlarang niya hi Adan? Katuyoan han Dios nga pinaagi kan Adan magkaada hin intelihente nga katawohan nga may kagawasan ha pagbuot. Adton naruruyag pagkultibar han ira gugma ha Dios ngan ha iya mga paagi magpapakita hini pinaagi ha pagpili ha pagsunod han iya mga balaud. Tungod hito, an pagkamasinugtanon waray igbutang nga daan ha hunahuna han tawo kondi magigin resulta han kinaburut-on nga pagpili. (Deuteronomio 10:12, 13; 30:19, 20) Salit, kon hi Adan waray abilidad ha pagpili nga magtalapas, magigin diri kompleto—diri hingpit—unta hiya. May kalabotan ha kon paonan-o ginpili ni Adan nga gamiton an iya kagawasan ha pagbuot, ipinapakita han rekord ha Biblia nga iya ginsunod an iya asawa ha pagtalapas han balaud han Dios mahitungod “han kahoy han kinaadman han kaopayan ngan han karaotan.”—Genesis 2:17; 3:1-6.

Bueno, ginlarang ba han Dios hi Adan nga kulang hin abilidad ha pagpili han husto ngan sayop nga tungod hito diri hiya makakahimo hin maaramon nga mga desisyon o makakaato ha pagsulay? Hinumdumi nga antes magtalapas hi Adan, gin-usisa han Dios an ngatanan nga iya linarang ha tuna, upod na an siyahan nga tawhanon nga mag-asawa, ngan nakita niya nga ito “duro hin kaopay.” (Genesis 1:31) Salit, han nakasala hi Adan, diri ini nangangahulogan nga may-ada depekto an paghimo ha iya, kondi hi Adan gud la an mababasol. (Genesis 3:17-19) Waray niya tuguti nga an gugma ha Dios ngan husto nga prinsipyo an magpagios ha iya nga magin masinugtanon ha Dios labaw ha ngatanan.

Hunahunaa liwat nga han hi Jesus nakanhi ha tuna, hingpit hiya pariho kan Adan. Kondi diri pariho han iba nga mga tulin ni Adan, hi Jesus iginburod pinaagi han baraan nga espiritu salit waray hiya napanunod nga kaluyahan nga magigin hinungdan nga diri hiya makaato ha pagsulay. (Lukas 1:30, 31; 2:21; 3:23, 38) Hi Jesus kinaburut-on nga nagpabilin nga maunungon ha iya Amay bisan pa han pinakamakuri nga mga pagsulay. Hi Adan, ha paggamit han iya kagawasan ha pagbuot, may baratunon ha iya kapakyas ha pagsunod han sugo ni Jehova.

Kondi, kay ano nga ginpili ni Adan nga magtalapas ha Dios? Naghunahuna ba hiya nga magigin mas maopay an iya kahimtang? Waray, tungod kay hi apostol Pablo nagsurat nga “hi Adan waray kalimbongi.” (1 Timoteo 2:14) Kondi, nagdesisyon hi Adan nga sundon an iya asawa, nga nagpili na nga kumaon han bunga han igindidiri nga kahoy. An hingyap ni Adan nga lipayon an iya asawa mas labaw kay han iya hingyap nga sugton an iya Maglalarang. Han igintanyag ha iya an igindidiri nga bunga, ginpamalandong unta anay niya an magigin epekto han iya pagtalapas ha iya relasyon ha Dios. Tungod kay waray hilarom ngan marig-on nga gugma ha Dios, masayon la hiya masulay, bisan han iya asawa.

Nakasala hi Adan antes magkaada hin mga anak, salit an ngatanan nga iya katulinan natawo nga diri hingpit. Kondi pariho kan Adan, may-ada kita kagawasan ha pagbuot. Hinaot pilion naton nga mamalandong nga may apresasyon ha pagkamaopay ni Jehova ngan patuboon an marig-on nga gugma ha iya, nga takos han aton pagsugot ngan pagsingba.—Salmo 63:6; Mateo 22:36, 37.