HAN 1870, gintikangan han usa nga gutiay nga grupo ha Pittsburgh (Allegheny), Pennsylvania, E.U.A., an pag-usisa han Kasuratan. Ha pagpanguna ni Charles Taze Russell, gin-adman nira an mahitungod han lukat han Kristo ngan ira hinbaroan an importante gud nga bahin hito ha katuyoan ni Jehova. Nalipay gud hira ha paghibaro nga tungod han lukat nagin posible an katalwasan, bisan hadton waray pa mahibaro mahitungod kan Jesus! An ira apresasyon para hito nagpagios ha ira nga isaurog an Memoryal han kamatayon ni Jesus kada tuig.—1 Cor. 11:23-26.

Iginpublikar ni Bugto Russell an Zion’s Watch Tower, nga nagpasamwak han doktrina han lukat sugad nga nangunguna nga kapahayagan han gugma han Dios. Gintawag han Watch Tower an panahon han Memoryal han kamatayon han Kristo nga “usa nga presyoso gud nga panahon” ngan gin-aghat an magbarasa nga isaurog ito ha Pittsburgh o ha bisan diin nga pribado nga lugar. “Bisan kon duha o tulo la an may-ada han sugad nga presyoso nga pagtoo”—o bisan usa la—magigin “kaupod na nira an Ginoo.”

Kada tuig, nagtikadamu an natambong han Memoryal ha Pittsburgh. An imbitasyon nasiring: “Malipayon nga kakarawaton kamo.” Ngani, kinaburut-on nga ginpaukoy ngan ginpakaon han mga Estudyante han Biblia ha Pittsburgh an ira kabugtoan ha espirituwal. Han 1886, nagkaada “General Meeting” ha sulod hin pipira ka adlaw durante han panahon han Memoryal. An Watch Tower nag-aghat: “Kadi kamo nga may daku nga gugma ha Agaron ngan ha iya kabugtoan ngan ha iya kamatuoran.”

Ha sulod hin pipira ka tuig, an mga Estudyante han Biblia ha Pittsburgh nag-organisar hin mga kombensyon para ha mga natoo ha lukat nga kinadto ha Pittsburgh basi tumambong ha Memoryal. Samtang nagtitikadamu an Estudyante han Biblia, nagtikadamu liwat an nagkakatirok para ha Memoryal ha bug-os nga kalibotan. Nahinumdoman ni Ray Bopp han iglesia (kongregasyon) han Chicago nga ha dekada han 1910, naabot hin pipira ka oras an pagpasa han mga emblema ha ginatos nga natambong tungod kay haros ngatanan nakikigbahin ha mga emblema.

Ano nga mga emblema an gin-gamit? Bisan kon gin-unabi han Watch Tower nga bino an gin-gamit ni Jesus ha Panihapon han Ginoo, ha pipira ka panahon, iginrekomendar hito an paggamit han duga hin ubas o ginluto nga pasas, basi diri masulay adton “maluya an unod.” Pero, nagtagana hin bino para hadton natoo nga “pinaaslom nga bino an sadang gamiton.” Ha urhi, hinsabtan han mga Estudyante han Biblia nga puro nga pula nga bino an angayan nga simbolo han dugo ni Jesus.

An paghinumdom han kamatayon ni Jesus naghatag hin higayon para ha seryoso nga pagpamalandong. Kondi ha pipira nga kongregasyon, nagigin masurub-on an pagsaurog, ngan katapos han programa, nauli an  mga tinambong nga haros diri nag-iiristorya. Pero, an libro nga Jehovah nga iginpublikar han 1934 nagsiring nga an Memoryal diri sadang isaurog “ha kasubo” tungod han masakit nga kamatayon ni Jesus, kondi “ha kalipay” tungod kay nagmamando na hiya sugad nga Hadi tikang han 1914.

Han 1935, nagkaada daku nga pagbag-o nga nakaapekto ha pagsaurog han Memoryal tungod kay iginpatin-aw an kahulogan han “daku nga kadam-an” (KJ), o “daku nga grupo,” han Pahayag 7:9. Antes hito, gintatagad han mga surugoon ni Jehova ini nga grupo sugad nga dedikado nga mga Kristiano nga diri madasigon. Pero hito nga tuig, iginpatin-aw nga inin daku nga grupo ginkukompwesto han magtinumanon nga magsiringba nga may paglaom nga mabuhi ha paraiso nga tuna. Katapos hini nga pagpatin-aw ngan hin tangkod nga pag-usisa ha kalugaringon, hi Russell Poggensee nagsiring: “Waray ipaabat ha akon ni Jehova pinaagi han baraan nga espiritu nga may-ada ako langitnon nga paglaom.” Hiya ngan an damu pa nga maunungon pariho ha iya, inundang ha pakigbahin ha mga emblema kondi padayon nga tinambong ha Memoryal.

Durante hinin “presyoso gud nga panahon,” an espesyal nga kampanya ha pagsangyaw naghatag ha ngatanan hin maopay nga higayon nga ipakita an ira apresasyon ha lukat. Usa nga gowa han Bulletin han 1932 an nag-aghat ha mga Kristiano nga diri magin “mga santo ha Memoryal”—nakikigbahin ha mga emblema pero diri “magburuhat,” o magsarangyaw han kamatuoran. Han 1934, an Bulletin nanawagan hin “mga auxiliary.” Ito nagpakiana: “May-ada ba 1,000 nga mag-aaplay ha panahon han Memoryal?” May kalabotan ha mga dinihogan, an Informant nagsiring: “Magigin bug-os la an ira kalipay kon makikigbahin hira ha pagpamatuod mahitungod ha Ginhadian.” Ha urhi, ito liwat an aabaton hadton may tunan-on nga paglaom. *

Para ha katawohan ni Jehova, an Memoryal an pinakasagrado nga gab-i han tuig. Ginsasaurog nira ito bisan ha magkuri nga sitwasyon. Pananglitan, han 1930, hi Pearl English ngan an iya bugto nga hi Ora nagbaktas hin mga 80 ka kilometro basi tumambong ha Memoryal. Samtang nakadto an misyonero nga hi Harold King ha bartolina ha usa nga prisohan ha Tsina, nagsurat hiya hin mga siday ngan kanta mahitungod ha Memoryal ngan naghimo hin mga emblema tikang ha black currant (usa nga klase hin itom nga berry) ngan kan-on. Tikang ha Este Europa tubtob ha Sentral Amerika ngan tubtob ha Aprika, waray kahadlok nga iginsaurog han mga Kristiano an Memoryal han kamatayon ni Jesus bisan ha panahon han girra o pagdiri ha aton buruhaton. Hain man kita o anoman an aton kahimtang, nagkakatirok kita basi pasidunggan hi Jehova nga Dios ngan hi Jesu-Kristo durante han presyoso nga panahon han Memoryal.