Hi David nagsurat nga ‘waray pa hiya makakita hin matadong nga ginpasibay-an, bisan an katulinan hito waray pa pakilimos hin tinapay.’ Nakagyakan hiya hito kay ito mismo an iya naeksperyensyahan. Maaram gud hiya nga an Dios pirme nag-aataman. (Sal. 37:25) Kondi an iya ginsiring diri nagpapasabot nga waray magsiringba nga nagkulang o magkukulang han ira ginkikinahanglan.

May mga higayon nga nakaeksperyensya mismo hi David hin makuri hinduro nga mga kahimtang. Usa hito amo an iya pagpalagiw kan Saul. Nagkulang an suplay han pagkaon ni David, ngan naghangyo hiya hin tinapay para ha iya ngan ha iya mga kaupod. (1 Sam. 21:1-6) Bisan kon hini nga kahimtang nagkulang an pagkaon ni David, waray hiya magin makililimos. Maaram hiya nga diri hiya papabay-an ni Jehova.

Ha Mateo 6:33, mababasa naton an pasarig ni Jesus nga itatagana han Dios an mga panginahanglan han magtinumanon nga surugoon nga gin-uuna an Ginhadian ha ira kinabuhi. Hi Jesus nagsiring: “Kon sugad, padayon nga unaha niyo an pagpamiling han Ginhadian ngan han iya katadongan, ngan ini ngatanan [kaupod hito an pagkaon, irimnon, ngan bado] idudugang ha iyo.” Pero nagsiring liwat hi Jesus nga tungod han pagtimaraot, an iya “kabugtoan” mahimo makaeksperyensya hin kagutom. (Mat. 25:35, 37, 40) Nahitabo ito kan apostol Pablo. May mga panahon nga nakaeksperyensya hiya hin kagutom ngan kauhaw.—2 Cor. 11:27.

Ginsusumatan kita ni Jehova nga pagtitimarauton kita ha iba-iba nga paagi. Bangin tugotan niya nga makaeksperyensya kita hin kakurian samtang nabulig kita ha pagbaton ha mga akusasyon han Yawa. (Job 2:3-5) Pananglitan, an pipira han aton igkasi-Kristiano, sugad hadton napriso ha mga kampo konsentrasyon han Nazi, nameligro tungod han pagtimaraot. An diri paghatag hin igo nga pagkaon ha mga Saksi usa han maraot hinduro nga paagi nga gin-gamit basi bungkagon an ira integridad. An matinumanon nga mga Saksi nagpabilin nga masinugtanon kan Jehova. Waray hira pabay-i ni Jehova. Gintugotan niya nga maeksperyensyahan nira ito, sugad la nga gintutugotan niya an ngatanan nga Kristiano nga makaeksperyensya hin iba-iba nga pagsari. Pero sigurado nga ginbubuligan ni Jehova nga makailob an ngatanan nga nag-aantos tungod han iya ngaran. (1 Cor. 10:13) Hinumdoman naton an ginsiring ha Filipos 1:29: “Gintagan kamo hin pribilehiyo tungod han Kristo, nga diri la kamo tumoo ha iya kondi mag-antos liwat tungod ha iya.”

Hi Jehova nagsasaad nga diri niya papabay-an an iya mga surugoon. Pananglitan, an Isaias 54:17 nasiring: “Waray hinganiban nga ginhitsura patok ha imo nga mauswag.” Ini ngan an iba pa nga pariho hini nga mga saad nagpapasarig nga tatalwason han Dios an iya katawohan ha kabug-osan. Kondi, sugad nga indibiduwal, an usa nga Kristiano mahimo makaeksperyensya hin mga pagsari, bangin mamatay pa ngani hiya.