NAGKIKINABUHI kita ha pinakamakuri nga panahon ha bug-os nga kasaysayan han tawo. (2 Tim. 3:1-5) Kada adlaw, ginsasarihan an aton gugma kan Jehova ngan an aton determinasyon nga magkinabuhi uyon ha iya matadong nga mga suruklan. Maaram hi Jesus nga magigin makuri ini nga panahon, salit iya ginpasarig an iya mga sumurunod nga makakakarawat hira han ginkikinahanglan nga pagdasig basi makailob tubtob ha kataposan. (Mat. 24:3, 13; 28:20) Basi maparig-on hira, nagpili hiya hin matinumanon nga uripon para magtagana hin espirituwal nga “pagkaon ha husto nga panahon.”—Mat. 24:45, 46.

Tikang han ginpili an matinumanon nga uripon han 1919, minilyon nga “mga surugoon ha panimalay” tikang ha ngatanan nga yinaknan an natitirok ha organisasyon han Dios ngan ginpapakaon ha espirituwal. (Mat. 24:14; Pah. 22:17) Kondi diri ngatanan nga literatura ha Biblia may-ada ha ngatanan nga yinaknan. Diri liwat ngatanan nga tawo nakakapahimulos ha elektroniko nga mga porma han aton mga publikasyon. Pananglitan, damu an diri nakakakita han mga video ngan nakakabasa han mga artikulo nga iginpupublikar la ha jw.org. Karuyag sidngon ba hini nga kulang an ira nakakarawat nga pagkaon nga ira ginkikinahanglan basi magpabilin hira nga mahimsog ha espirituwal? Basi mabaton ito, hisgotan naton an upat nga importante nga pakiana.

Han ginsulay ni Satanas hi Jesus nga himoon nga tinapay an mga bato, hi Jesus binaton: “Diri la ha tinapay nabubuhi an tawo, kondi ha tagsa nga pulong nga nagawas ha baba ni Jehova.” (Mat. 4:3, 4) An mga pulong ni Jehova iginsurat ha Biblia. (2 Ped. 1:20, 21) Salit an Biblia amo an nangunguna nga panakot ha aton espirituwal nga pagkaon.—2 Tim. 3:16, 17.

Igintatagana han organisasyon ni Jehova an bug-os nga New World Translation of the Holy Scriptures o an mga bahin hito ha sobra 120 nga yinaknan, ngan damu pa nga yinaknan an nahidudugang kada tuig. Labot pa hito nga hubad, binilyon nga kopya han iba pa nga bersyon han Biblia an mababasa ha yinukot nga yinaknan. Inin makatirigamnan nga kalamposan nauyon ha kaburut-on ni Jehova nga “matalwas an ngatanan nga klase hin tawo ngan magkaada husto nga kahibaro ha kamatuoran.” (1 Tim. 2:3, 4) Ngan tungod kay ‘waray hinimo nga diri nakikita’ ni Jehova, makakasiguro kita nga igpapahirani niya ha iya organisasyon adton “mahunahunaon han ira espirituwal nga panginahanglan” ngan tataganahan hira hin espirituwal nga pagkaon.—Heb. 4:13; Mat. 5:3, 6; Juan 6:44; 10:14.

Basi magin marig-on an pagtoo han usa nga tawo, labaw pa kay ha pagbasa han Biblia an kinahanglan niya buhaton. Kinahanglan niya masabtan an iya ginbabasa ngan iaplikar an iya hinbabaroan. (San. 1:22-25) Maaram an yunuko nga taga-Etiopia, han siyahan nga siglo, han pagkaimportante hito. Ginbabasa niya an Pulong han Dios han ginpakianhan hiya han ebanghelisador nga hi Felipe: “Nasasabtan mo ba an imo ginbabasa?” An yunuko binaton: “Paonan-o ko ini masasabtan kon waray magtututdo ha akon?” (Buh. 8:26-31) Salit ginbuligan ni Felipe ini nga yunuko basi magkaada husto nga kahibaro ha Pulong han Dios. Napagios gud an yunuko han iya hinbaroan salit nagpabawtismo hiya. (Buh. 8:32-38) Ha pariho nga paagi, an aton mga publikasyon nga basado ha Biblia nabulig ha aton nga magkaada husto nga kahibaro ha kamatuoran. Nakakaapekto ito ha aton mga emosyon ngan nagpapagios ha aton nga iaplikar an aton hinbabaroan.—Col. 1:9, 10.

Pinaagi han mga publikasyon, hura nga igintatagana ha mga surugoon ni Jehova an espirituwal nga mga butang basi ira kaunon ngan inumon. (Isa. 65:13) Pananglitan, an Barantayan, nga mababasa ha sobra 210 nga yinaknan, nagsasaysay han mga tagna ha Biblia, nabulig nga mas masabtan naton an higlarom nga kamatuoran tikang ha Dios, ngan nagpapagios ha aton nga magkinabuhi uyon ha mga prinsipyo ha Biblia. An Pagpamata!, nga iginpupublikar ha mga 100 nga yinaknan, nagpapauswag han aton kahibaro mahitungod han mag-opay nga linarang ni Jehova ngan nagpapakita kon paonan-o naton iaaplikar an praktikal nga mga sagdon han Biblia. (Prob. 3:21-23; Roma 1:20) An matinumanon nga uripon nagtatagana hin mga publikasyon nga basado ha Biblia ha sobra 680 nga yinaknan! Naggagahin ka ba hin panahon kada adlaw basi basahon an Biblia? Ginbabasa mo ba an tagsa nga bag-o nga gowa han mga magasin ngan an ngatanan nga bag-o nga publikasyon nga may-ada ha imo yinaknan?

Labot pa han mga publikasyon, igintatagana liwat han organisasyon ni Jehova an basado ha Biblia nga mga outline nga iginpapahayag ha mga katirok ha kongregasyon, asembleya, ngan kombensyon. Ginpapabilhan mo ba an mga pahayag, drama, pasundayag, ngan mga interbyu nga iginpipresentar durante hito nga mga katirok? Oo, hi Jehova nagtatagana ha aton hin hura nga espirituwal nga pagkaon!—Isa. 25:6.

Diri. Ngan diri kita sadang mahipausa kon may mga panahon nga an pipira nga surugoon ni Jehova nakakakuha hin mas damu nga espirituwal nga pagkaon kay ha iba. Kay ano? Hunahunaa an mga apostol. Mas damu nga instruksyon an ira nakarawat kay ha iba nga mga disipulo ha siyahan nga siglo. (Mar. 4:10; 9:35-37) Bisan pa hito, waray magluya an relasyon ha Dios han iba nga mga disipulo; nakarawat nira an ira ginkikinahanglan.—Efe. 4:20-24; 1 Ped. 1:8.

Makapainteres liwat nga kadam-an han ginsiring ngan ginbuhat ni Jesus dinhi ha tuna waray isurat ha mga asoy han Ebanghelyo. Hi apostol Juan nagsiring: “Ha pagkamatuod, damu pa an ginbuhat ni Jesus, nga kon isusurat an bug-os nga detalye, ha akon paghunahuna diri maigo ha kalibotan an mga linukot nga ginsuratan.” (Juan 21:25) Bisan kon an siyahan-siglo nga mga sumurunod ni Jesus mas damu an hinbabaroan mahitungod ha iya kon itanding ha aton, diri karuyag sidngon nga kulang an iginhahatag ha aton nga impormasyon. Ginsisiguro ni Jehova nga igo an aton kahibaro mahitungod kan Jesus basi masunod naton an iya mga pitad.—1 Ped. 2:21.

Hunahunaa liwat an mga surat han mga apostol nga iginpadara ha mga kongregasyon ha siyahan nga siglo. Posible nga usa nga surat ni Pablo an waray ig-api ha Biblia. (Col. 4:16) Nagpapasabot ba ito nga kulang an aton espirituwal nga pagkaon tungod kay waray naton mabasa ito nga surat? Diri. Maaram hi Jehova han aton ginkikinahanglan ngan igo an iya iginhahatag basi magpabilin nga marig-on an aton relasyon ha iya.—Mat. 6:8.

Yana, may pipira nga surugoon ni Jehova nga nakakakuha hin mas damu nga espirituwal nga pagkaon kon itanding ha iba. Gutiay la ba an publikasyon nga may-ada ha imo yinaknan? Kon amo, hunahunaa nga hi Jehova interesado ha imo. Admi an mga publikasyon nga may-ada ka, ngan kon mahihimo, tambong ha mga katirok nga gindudumara ha yinaknan nga imo nasasabtan. Ngan sarig nga bubuligan ka ni Jehova basi magpabilin nga marig-on an imo relasyon ha iya.—Sal. 1:2; Heb. 10:24, 25.

An aton Web site nagpupublikar hin mga magasin ngan iba pa nga literatura nga basado ha Biblia. May-ada liwat ito mga impormasyon nga nabulig ha mga mag-asawa, tin-edyer, ngan ha gudtiay pa nga kabataan. Nagpapahimulos an mga pamilya pinaagi ha paghisgot hini durante han ira Pagsingba han Pamilya. May-ada liwat mga report ha aton Web site mahitungod ha espesyal nga mga programa, sugad han mga gradwasyon ha Gilead ngan han tinuig nga katirok. Naghahatag liwat ito hin mga impormasyon mahitungod ha mga kalamidad ngan ha mga kaso ha korte nga nakakaapekto ha katawohan ni Jehova. (1 Ped. 5:8, 9) Epektibo liwat ini nga garamiton ha pagsangyaw, kay pinaagi hini naipapasamwak an maopay nga sumat bisan ha mga lugar nga igindidiri an aton buruhaton.

Kondi, nakakapahimulos ka man ha aton Web site o diri, mahimo pa gihapon magpabilin nga marig-on an imo pagtoo. Nangangalimbasog gud an uripon basi makagtagana hin igo nga inimprinta nga mga publikasyon para an tagsa nga surugoon ha panimalay mapakaon hin maopay ha espirituwal. Salit diri mo sadang abaton nga obligado ka pumalit hin gadyet basi la makapahimulos ha jw.org. An iba bangin nagpi-print hin pipira nga literatura nga iginpublikar ha aton Web site ngan iginhahatag ito ha mga waray Internet. Pero diri obligado an mga kongregasyon nga buhaton ito.

Mapasalamaton kita kan Jesus kay gintutuman niya an iya saad nga ihahatag niya an aton ginkikinahanglan basi magpabilin nga marig-on an aton pagtoo. Samtang madagmit nga nagtitikahirani an kataposan hinin maraot nga kalibotan, makakasarig kita nga hi Jehova padayon nga magtatagana han espirituwal nga “pagkaon ha husto nga panahon.”