1, 2. (a) Hin-o an “matinumanon ngan totoo nga saksi”? (b) Ano an kahulogan han ngaran nga Jesus, ngan paonan-o nagkinabuhi an Anak han Dios uyon ha iya ngaran?

“TUNGOD hini natawo ako, ngan tungod hini kinanhi ako ha kalibotan, basi magpamatuod han kamatuoran.” (Basaha an Juan 18:33-37.) Ginsiring ito ni Jesu-Kristo ha Romano nga gobernador han Judea han ginbibista hiya. Hito nga takna, nagpakilala pa la hi Jesus nga hadi hiya. Paglabay hin mga katuigan, gin-unabi ni apostol Pablo inin maisugon nga ehemplo ni Jesus, “sugad nga saksi nga nagpamatuod hin maopay ha publiko ha atubangan ni Ponsio Pilato.” (1 Tim. 6:13) Naukoy kita ha kalibotan nga kontrolado ni Satanas ngan puno hin kapungot. Basi padayon kita nga makagsangyaw, kinahanglan magin maisugon gud kita pariho kan Jesus, “an matinumanon ngan totoo nga saksi”!—Pah. 3:14.

² Sugad nga usa nga Judio, hi Jesus saksi na ni Jehova tikang pa ha iya katawo. (Isa. 43:10) Oo, hiya an nagin pinakabantogan nga saksi nga ginpili han Dios basi magrepresentar ha Iya ngaran. Nagkinabuhi hi Jesus uyon ha ngaran nga iginhatag ha iya han Dios. Han ginsidngan han usa nga anghel an pinakaamay ni Jesus nga hi Jose nga nagburod hi Maria pinaagi han baraan nga espiritu, an anghel nagdugang: “Manganganak hiya hin lalaki ngan pagngangaranan mo hin Jesus, kay hiya an magtatalwas han iya katawohan tikang ha  ira mga sala.” (Mat. 1:20, 21) Kadam-an nga eskolar han Biblia an nauyon nga an ngaran nga Jesus nagtikang ha Hebreo nga ngaran nga Jeshua, nga nangangahulogan hin “Hi Jehova an Katalwasan.” Uyon ha kahulogan han iya ngaran, ginbuligan ni Jesus “an nagkawara nga mga karnero ha panimalay han Israel” nga magbasol ha ira mga sala basi makarawat utro nira an pag-uyon ni Jehova. (Mat. 10:6; 15:24; Luc. 19:10) Basi mahimo ini, madasigon nga iginsangyaw ni Jesus an mahitungod han Ginhadian han Dios. An parasurat han Ebanghelyo nga hi Marcos nagsiring: “Kinadto hi Jesus ha Galilea ngan nagsangyaw han maopay nga sumat han Dios, nasiring: ‘An itinanda nga panahon inabot na, ngan hirani na an Ginhadian han Dios. Magbasol kamo ngan tumoo ha maopay nga sumat.’” (Mar. 1:14, 15) Maisugon nga ginkondenar liwat ni Jesus an mga lider han relihiyon han mga Judio, nga usa nga hinungdan kon kay ano nga iginraysang hiya ha kahoy.—Mar. 11:17, 18; 15:1-15.

3. Ano an nahitabo ha ikatulo ka adlaw tikang han kamatay ni Jesus?

³ Kondi may milagro nga nahitabo! Ha ikatulo ka adlaw katapos han makuri nga kamatayon ni Jesus, ginbanhaw hiya ni Jehova, diri sugad nga tawo, kondi sugad nga imortal nga espiritu. (1 Ped. 3:18) Basi pamatud-an ito, an Ginoo nga hi Jesus nagpakita sugad nga tawo ngan ebidensya ito nga nabanhaw hiya. Ha adlaw mismo nga ginbanhaw hiya, mga lima ka beses nga nagpakita hiya ha iba-iba nga disipulo.—Mat. 28:8-10; Luc. 24:13-16, 30-36; Juan 20:11-18.

4. Ano an nahitabo han nagpakita hi Jesus ha iya mga disipulo, ngan ano an iya iginsugo nga kinahanglan nira buhaton?

⁴ Han ikalima ka beses nga nagpakita hi Jesus, nagkakatirok an iya mga apostol ngan an iba pa nga mga tawo. Hiton diri hingangalimtan nga okasyon, nagdumara hiya hin puropariho hin pag-aram ha Pulong han Dios. “Iya gin-abrihan hin bug-os an ira hunahuna basi masabtan nira an kahulogan han Kasuratan.” Salit nasabtan nira nga an iya kamatayon ha kamot han mga kaaway han Dios ngan an iya milagroso nga pagkabanhaw igintagna ha Kasuratan. Ha ikatarapos hiton importante nga katirok, iginpatin-aw ni Jesus ha iya mamarati kon ano an ira kinahanglan buhaton. Iya ginsidngan hira nga “pinaagi han iya ngaran, an mensahe mahitungod han pagbasol isasangyaw tikang ha Jerusalem ngadto ha ngatanan nga nasud.” Hiya nagsugo: “Kamo an magpapasamwak hini nga mga butang nga iyo nakita.”—Luc. 24:44-48.

5, 6. (a Kay ano nga nagsiring hi Jesus: “Magigin mga saksi ko kamo”? (b) Ano nga mensahe an ipapasamwak han mga disipulo ni Jesus?

⁵ Salit paglabay hin 40 ka adlaw, durante han ultimo nga pagpakita ni Jesus, sigurado nga nasabtan han mga apostol an karuyag sidngon hinin iya simple kondi mapwersa nga sugo: “Magigin mga saksi ko kamo ha Jerusalem, ha bug-os nga Judea ngan Samaria, ngan tubtob ha pinakahirayo nga lugar ha tuna.” (Buh. 1:8) Kay ano nga hi Jesus nagsiring: “Magigin mga saksi ko kamo,” diri saksi ni Jehova? Ginsiring niya ito tungod kay an iya mga kaistorya mga Israelita nga mga saksi na ni Jehova.

⁶ Ipapasamwak han mga disipulo nga ginagamit yana ni Jehova hi Jesus ha pagtalwas ha katawohan—mas daku nga katalwasan kay ha katalwas han Israel tikang ha pagkauripon ha Ehipto ngan ha pagkabihag ha Babilonya. Tungod han kamatayon ngan pagkabanhaw ni Jesu-Kristo, nagin posible nga magkaada kagawasan an mga tawo tikang ha pagkauripon ha sala ngan kamatayon. Han Pentekostes 33 C.E., iginpasamwak han bag-o nga dinihogan nga mga disipulo ni Jesus ha mga tawo an “gamhanan nga mga buhat han Dios,” ngan damu nga nakabati an kumarawat hito. Salit an binanhaw nga hi Jesus nagkaada na bag-o nga awtoridad ha langit, ngan ginagamit hiya ni Jehova basi talwason an yinukot nga katawohan ha tuna.—Buh. 2:5, 11, 37-41.

7. Ano an ginpamatud-an han mga panhitabo han Pentekostes 33 C.E.?

⁷ An mga panhitabo han Pentekostes 33 C.E. nagpamatuod nga ginkarawat ni Jehova an bili han hingpit nga halad ni Jesus sugad nga bayad, o tabon, para han sala. (Heb. 9:11, 12, 24) Sugad han iginsaysay ni Jesus, kinanhi hiya “diri basi pagserbihan kondi basi magserbi ngan maghalad han iya kalag sugad nga lukat para ha damu nga tawo.” (Mat. 20:28) Diri la an mabinasulon nga mga Judio an magkukompwesto ha “damu nga tawo” nga magpapahimulos han halad-lukat ni Jesus. Lugod, kaburut-on han Dios nga “matalwas an ngatanan nga klase hin tawo,” tungod kay an lukat “nagkukuha han sala han kalibotan!”—1 Tim. 2:4-6; Juan 1:29.

8. Ano an nagin resulta han pagsangyaw han mga disipulo ni Jesus, ngan paonan-o ito nagin posible?

⁸ May-ada ba kaisog an mga disipulo ni Jesus hadto basi padayon nga magsangyaw mahitungod ha iya? Oo, pero waray nira ito buhata ha ira kalugaringon nga kusog. An gamhanan nga baraan nga espiritu ni Jehova nagpagios ngan nagpakusog ha ira basi padayon nga magsangyaw. (Basaha an Buhat 5:30-32.) Paglabay hin mga 27 ka tuig tikang han Pentekostes 33 C.E., masisiring nga an “mensahe han kamatuoran han maopay nga sumat” nakaabot ha mga Judio ngan ha mga Hentil “ha ngatanan nga hinimo han Dios ha ilarom han langit.”—Col. 1:5, 23.

9. Sugad han igintagna, ano an nahitabo ha orihinal nga Kristiano nga kongregasyon?

⁹ Kondi makasurubo, an orihinal nga Kristiano nga kongregasyon hinay-hinay nga nahugawan han apostasya. (Buh. 20:29, 30; 2 Ped. 2:2, 3; Jud. 3, 4) Sugad han igintagna ni Jesus, ito nga apostasya nga igin-aaghat han “usa nga maraot,” hi Satanas, magtitikakalyap ngan magtatabon ha tinuod nga Kristianidad tubtob ha “ikatarapos hini nga sistema.” (Mat. 13:37-43) Katapos, ibubutang ni Jehova hi Jesus ha trono sugad nga Hadi ha bug-os nga katawohan. Nahitabo ito han Oktubre 1914, an tinikangan han “kataposan nga mga adlaw” han maraot nga sistema ni Satanas.—2 Tim. 3:1.

10. (a) Ano an importante nga petsa nga iginpasamwak han dinihogan nga mga Kristiano ha moderno nga panahon? (b) Ano an nahitabo han Oktubre 1914, ngan paonan-o kita nahibaro hito?

¹⁰ Abanse nga iginpasamwak han dinihogan nga mga Kristiano ha moderno nga panahon nga an Oktubre 1914 usa nga importante nga petsa. Iginbasar nira ito ha tagna ni Daniel mahitungod han daku nga kahoy nga gin-utod ngan tinubo utro paglabay hin “pito nga panahon.”  (Dan. 4:16) Gin-unabi ni Jesus ito gihapon nga peryodo sugad nga “an itinanda nga panahon han mga nasud” ha iya tagna mahitungod han iya tidaraon nga presensya ngan “han ikatarapos hini nga sistema.” Tikang han 1914, an “tigaman han [kan Kristo] presensya” sugad nga bag-o nga Hadi ha tuna nagin matin-aw ha ngatanan. (Mat. 24:3, 7, 14; Luc. 21:24) Salit tikang hito, an “gamhanan nga mga buhat han dios” nag-uupod han iginbutang ni Jehova hi Jesus ha trono sugad nga Hadi han bug-os nga katawohan.

11, 12. (a) Tikang han 1919, ano an ginbuhat han bag-o nga Hadi ha tuna? (b) Ano pa nga pag-uswag an nagin matin-aw tikang han 1935? (Kitaa an retrato ha tinikangan hini nga artikulo.)

¹¹ Sugad nga bag-o nga Hadi ha tuna, gintikangan na pagawson ni Jesu-Kristo an iya dinihogan nga mga sumurunod tikang ha kabihag ha “Babilonya nga Gamhanan.” (Pah. 18:2, 4) Han 1919, waray pag-iha katapos han Girra ha Kalibotan I, an mga dinihogan nagkaada mas daku nga kagawasan nga magsangyaw ha bug-os nga kalibotan. Ira iginsangyaw an paagi han Dios para magkaada katalwasan ngan an maopay nga sumat mahitungod han naestablisar nga Ginhadian. Ginsalingabot han mga dinihogan ini nga higayon basi magsangyaw, salit yinukot pa nga dinihogan an natirok para magin mga igkasi-manurunod ni Kristo.

¹² Tikang han 1935, nagin matin-aw nga gintikangan tirukon ni Kristo an minilyon nga iya “iba nga mga karnero,” nga magkukompwesto han “daku nga grupo” nga tikang ha iba-iba nga nasud. Ilarom ha paggiya han dinihogan nga mga Kristiano, ginsusunod liwat hinin daku nga grupo an maisugon nga ehemplo ni Jesus ngan iginpapasamwak nira nga utang nira an ira katalwasan ha Dios ngan kan Kristo. Pinaagi han ira padayon nga pagsangyaw ngan pagpakita hin pagtoo ha halad-lukat ni Kristo, makakapribilehiyo hira nga makatalwas “ha daku nga kasakitan,” nga magtatapos han kalibotan ni Satanas.—Juan 10:16; Pah. 7:9, 10, 14.

13. Sugad nga mga Saksi ni Jehova, determinado kita nga buhaton an ano, ngan kay ano nga makakasiguro kita nga maglalampos kita?

¹³ Hinaot padayon naton nga pabilhan an aton pribilehiyo nga magin mga Saksi ha “gamhanan nga mga buhat” nga ginhimo ni Jehova nga Dios ngan ha iya mga saad para ha tidaraon. Tinuod, diri pirme masayon an pagsangyaw mahitungod hito. Damu han aton kabugtoan an nagsasangyaw ha mga teritoryo diin damu an nagtatamay, nakontra, o diri interesado. Mahimo naton subaron an ginbuhat ni apostol Pablo ngan han iya mga kaupod. Hi Pablo nagsiring: “Ginparig-on kami han aton Dios basi waray kahadlok nga isaysay ha iyo an maopay nga sumat han Dios bisan pa han daku nga pagkontra.” (1 Tes. 2:2) Salit diri gud kita sadang manluya. Lugod, magin determinado kita nga magkinabuhi uyon ha aton dedikasyon samtang nabubungkag an sistema ni  Satanas. (Isa. 6:11) Diri naton ini mahihimo ha aton kalugaringon nga kusog, kondi sugad han ginbuhat han siyahan-siglo nga mga Kristiano, kinahanglan mangaro kita kan Jehova han iya baraan nga espiritu basi magkaada kita “diri-ordinaryo nga gahum.”—Basaha an 2 Corinto 4:1, 7; Luc. 11:13.

14, 15. (a) Paonan-o gintratar an mga Kristiano ha siyahan nga siglo, ngan ano an ginsiring ni apostol Pedro mahitungod ha ira? (b) Ano an sadang naton hunahunaon kon ginkukontra kita tungod han aton pagin Saksi ni Jehova?

¹⁴ Yana minilyon an nag-aangkon nga Kristiano, “pero an ira mga buhat nagpapakita nga iginsasalikway nira [an Dios], kay mangil-ad hira ngan diri-masinugtanon ngan diri kwalipikado ha bisan ano nga maopay nga buhat.” (Tito 1:16) Hinumdoman naton nga han siyahan nga siglo, damu an nangalas ha tinuod nga mga Kristiano, posible nga an kadam-an hito mga kadungandungan nira. Tungod hini, hi apostol Pedro nagsurat: “Malipayon kamo kon gin-iinsulto kamo tungod ha ngaran han Kristo, kay . . . an espiritu . .  han Dios, aada ha iyo.”—1 Ped. 4:14.

¹⁵ Aplikado ba liwat inin giniyahan nga mga pulong ha mga Saksi ni Jehova yana? Oo, tungod kay iginsasangyaw naton an pagin Hadi ni Jesus. Salit kon ginkakangalasan kita tungod kay mga Saksi kita ni Jehova, pariho ito ha ‘pag-insulto ha aton tungod ha ngaran ni Kristo,’ nga nagsiring ha iya mga parakontra: “Kinanhi ako ha ngaran han akon Amay, pero diri kamo natoo ha akon.” (Juan 5:43) Salit ha sunod nga makaeksperyensya ka hin pagkontra ha imo pagsangyaw, magin maisugon. Pamatuod ito nga gin-uuyonan ka han Dios ngan an iya espiritu ‘aada ha imo.’

16, 17. (a) Ano an naieksperyensyahan han katawohan ni Jehova ha iba-iba nga bahin han kalibotan? (b) Ano an imo determinasyon?

¹⁶ Hinumdumi liwat nga ha iba-iba nga bahin han kalibotan, damu nga tawo an nakarawat han kamatuoran. Bisan ha mga teritoryo nga agsob masangyawan, may nabibilngan pa gihapon kita nga mga tawo nga andam mamati ha aton maopay nga mensahe mahitungod han katalwasan. Hinaot magin maduruto kita ha pagbalik ha mga interesado ngan, kon mahihimo, dumarahan hira hin pag-aram ha Biblia. Buligan naton hira nga mag-uswag tubtob nga magdedikar hira ngan magpabawtismo. Posible nga naeksperyensyahan mo na an gin-abat ni Sarie nga taga-South Africa, nga sobra 60 ka tuig na nga madasigon nga Saksi. Hiya nagsiring, “Mapasalamaton gud ako nga pinaagi han halad-lukat ni Jesus, mahimo ako magkaada hin maopay nga relasyon kan Jehova, an Soberano ha uniberso, ngan malipayon ako nga maipakilala an iya mahimayaon nga ngaran.” Hiya ngan an iya bana nga hi Martinus damu na an nabuligan nga magin mga magsiringba ni Jehova, upod na hito an ira tulo nga anak. Hi Sarie nagdugang, “Waray iba nga buruhaton an naghahatag ha akon hin daku nga katagbaw, ngan pinaagi han iya baraan nga espiritu, iginhahatag ni Jehova ha aton ngatanan an kusog nga aton ginkikinahanglan basi makapadayon hinin nagluluwas-kinabuhi nga buruhaton.”

¹⁷ Bawtismado man kita o diri pa, may-ada kita hinungdan nga magin mapasalamaton ha pribilehiyo nga makig-upod ha bug-os-kalibotan nga kongregasyon han mga Saksi ni Jehova. Salit padayon nga bug-os nga magpamatuod samtang nangangalimbasog ka nga magpabilin nga limpyo tikang ha maraot nga kalibotan ni Satanas. Kon bubuhaton mo ito, mapapasidunggan mo an aton mahigugmaon ngan langitnon nga Amay, nga pribilehiyo naton nga tawagon ha iya mahimayaon nga ngaran.