1, 2. (a) Pagsaysay hin eksperyensya nga nagpapakita han kapulsanan han paggamit hin ginhunahuna hin maopay nga mga pakiana. (Kitaa an retrato hini nga pahina.) (b) Kay ano nga diri kita sadang mahadlok ha paghisgot hin magkuri nga topiko?

MGA pipira ka tuig na an naglabay, usa nga sister an nakighisgot mahitungod ha Biblia ha iya diri tumuroo nga bana nga membro hadto han usa nga relihiyon han Kakristianohan. Durante han ira pag-istorya, an iya bana nagsiring nga natoo hiya ha Trinidad. Tungod kay naobserbaran han sister nga baga hin diri hito nasasabtan an katutdoan mahitungod han Trinidad, mataktika nga ginpakianhan niya ito: “Natoo ka ba nga Dios an Dios, Dios hi Jesus, ngan Dios an baraan nga espiritu; kondi diri ba usa la an Dios diri tulo?” Tungod kay nakalasan, an iya bana bumaton, “Diri ako natoo hito!” Sugad nga resulta, nagin maopay an ira pag-istoryahay mahitungod ha kon hin-o gud an Dios.

² Iginpapakita hini nga eksperyensya an kapulsanan han paggamit hin mataktika ngan ginhunahuna hin maopay nga mga pakiana. Ginpapabug-atan liwat hini an importante nga punto: Diri kita sadang mahadlok ha paghisgot hin magkuri nga topiko sugad han Trinidad, naglalaga nga impyerno, o an pag-eksister han Maglalarang. Kon masarig kita kan Jehova ngan ha pagbansay nga iya igintatagana, makakahatag  kita hin makakombinse nga baton nga mahimo makabantad ha kasingkasing han aton kaistorya. (Col. 4:6) Usisahon naton kon ano an ginbubuhat han epektibo nga mga magwarali kon naghihisgot han sugad nga mga topiko. Hihisgotan naton kon paonan-o (1) magbabangon hin mga pakiana basi hibaroan an gintotoohan han aton kaistorya, (2) mangangatadongan uyon ha Kasuratan, ngan (3) magamit hin mga ilustrasyon basi maipatin-aw an punto.

3, 4. Kay ano nga importante an pagpakiana basi hibaroan naton an gintotoohan han aton kaistorya? Paghatag hin ehemplo.

³ An mga pakiana mabulig ha aton basi hibaroan an gintotoohan han aton kaistorya. Kay ano nga importante ini? “Hiya nga nahatag han baton nga diri pa hiya nakakabati, amo an kalurongan ngan kaalohan ha iya,” siring han Proberbios 18:13. Salit antes hisgotan kon ano an ginsisiring han Biblia mahitungod ha usa nga topiko, maopay kon aton anay hibaroan kon ano gud an gintotoohan han aton kaistorya. Kay kon diri, bangin makarag la an aton panahon ha pagpinamatuod nga sayop an usa nga ideya nga diri man ngay-an niya gintotoohan!​—1 Cor. 9:26.

⁴ Pananglitan, nakikighisgot kita ha usa mahitungod ha impyerno. Diri ngatanan natoo nga an impyerno usa nga naglalaga nga lugar diin ginpapasakitan an magraot nga tawo. Damu an natoo nga nagpapasabot la ito hin pagin waray maopay nga relasyon ha Dios. Salit mahimo kita sumiring: “Iba-iba an opinyon han mga tawo mahitungod han impyerno, puydi ko ba hibaroan kon ano an imo gintotoohan mahitungod hito?” Katapos mabatian an iya baton, mas mabubuligan na naton hiya nga masabtan kon ano an ginsisiring han Biblia mahitungod hini nga topiko.

5. Paonan-o an mga pakiana mabulig ha aton nga mahibaroan kon kay ano nga sugad hito an gintotoohan han usa?

⁵ An mataktika nga mga pakiana mabulig liwat ha aton nga hibaroan kon kay ano nga sugad hito an gintotoohan han usa. Pananglitan, kumusta kon may makaistorya kita ha ministeryo nga diri natoo ha Dios? Bangin maghunahuna dayon kita nga naimpluwensyahan hiya han teoriya han ebolusyon. (Sal. 10:4) Pero an pipira nawad-an hin pagtoo ha Dios tungod han duro nga pag-antos nga ira nakita o naeksperyensyahan. Bangin diri nira masabtan kon kay ano nga gintutugotan han mahigugmaon nga Maglalarang an sugad nga pag-antos. Salit kon an tagbalay magpahayag hin pagruhaduha mahitungod han pag-eksister han Dios, mahimo kita magpakiana, “Ito gud ba an imo gintotoohan tikang pa hadto?” Kon sumiring hiya nga diri, mahimo kita magpakiana kon may panhitabo ba nga nagin hinungdan han iya pagruhaduha. An iya baton mahimo makabulig ha aton nga hibaroan kon ano an pinakamaopay nga paagi basi mabuligan hiya ha espirituwal.​—Basaha an Proberbios 20:5.

6. Ano an sadang naton buhaton katapos naton magpakiana?

⁶ Katapos magpakiana, kinahanglan gud naton pamatian an baton han aton kaistorya ngan ipakita nga ginrirespeto naton an iya opinyon. Pananglitan, bangin isumat niya nga tungod han usa nga trahedya nagruhaduha hiya kon may-ada gud ba mahigugmaon nga Maglalarang. Antes naton pamatud-an nga may-ada Dios, maopay kon ipapaabat naton ha iya nga nasasabtan naton hiya ngan diri sayop an pagpakiana kon kay ano nga nag-aantos kita. (Hab. 1:2, 3) An aton mahigugmaon ngan mapailubon nga pakiistorya mahimo magpagios ha iya nga maruyag nga mahibaro hin dugang. *

7. Ha ano nadepende an aton pagin epektibo ha ministeryo?

⁷ Hisgotan naton yana kon paonan-o kita mangangatadongan uyon ha Kasuratan. Syempre, an Biblia amo an aton nangunguna nga garamiton ha ministeryo. Nabulig ito ha aton nga “magin  bug-os nga may-kapas, andam gud ha tagsa nga maopay nga buhat.” (2 Tim. 3:16, 17) An aton pagin epektibo ha ministeryo diri nadepende ha kadamu han teksto nga aton ginbabasa, kondi ha kon paonan-o naton ito iginsasaysay ngan ginagamit ha pangatadongan. (Basaha an Buhat 17:2, 3.) Ha pag-ilustrar, tagda an masunod nga tulo nga kahimtang.

8, 9. (a) Paonan-o kita mahimo mangatadongan ha usa nga natoo nga hi Jesus katupong han Dios? (b) Ano an iba pa nga pangatadongan mahitungod hini nga topiko an nakita mo nga epektibo?

⁸ Kahimtang 1: Ha aton pagsangyaw, may nakaistorya kita nga natoo nga hi Jesus katupong han Dios. Ano nga mga teksto an mahimo naton gamiton ha pangatadongan? Mahimo naton ipabasa ha iya an Juan 6:38, diin hi Jesus nagsiring: “Linusad ako tikang ha langit diri ha pagbuhat han akon kaburut-on, kondi ha pagbuhat han kaburut-on han nagsugo ha akon.” Katapos mahimo naton hiya pakianhan: “Kon hi Jesus an Dios, hin-o an nagsugo ha iya nga lumusad tikang ha langit? Diri ba ito nga nagsugo mas gamhanan kay ha kan Jesus? Syempre, an nagsugo mas gamhanan kay ha ginsugo.”

⁹ Mahimo liwat naton basahon an Filipos 2:9, diin iginsaysay ni apostol Pablo kon ano an ginbuhat han Dios katapos mamatay hi Jesus ngan mabanhaw. Ito nasiring: “Iginbutang [hi Jesus] han Dios ha hitaas nga posisyon ngan mahigugmaon nga gintagan hiya hin ngaran nga labaw han ngatanan nga ngaran.” Basi mabuligan an aton kaistorya nga mangatadongan uyon hito nga teksto, mahimo kita magpakiana: “Kon hi Jesus katupong han Dios antes hiya mamatay ngan iginbutang hiya han Dios ha hitaas nga posisyon, diri ba magigin mas labaw na hiya ha Dios? Posible ba nga may mas labaw pa ha Dios?” Kon gintatahod niya an Biblia ngan tangkod an iya kasingkasing, ito nga pangatadongan mahimo magpagios ha iya nga mag-usisa hin dugang pa mahitungod hini nga topiko.​—Buh. 17:11.

10. (a) Paonan-o kita mahimo mangatadongan ha usa nga natoo ha naglalaga nga impyerno? (b) Ano nga pangatadongan mahitungod han naglalaga nga impyerno an nakita mo nga epektibo?

¹⁰ Kahimtang 2: Usa nga relihiyoso gud nga tagbalay nga nakukurian pagkarawat nga an magraot nga tawo diri papasakitan ha kadayonan ha naglalaga nga impyerno. Bangin natoo hiya ha naglalaga nga impyerno tungod kay karuyag niya nga masirotan an magraot nga tawo tungod han ira magraot nga buhat. Paonan-o kita mangangatadongan ha iya? Siyahan, siguruhon naton ha iya nga sisirotan an magraot. (2 Tes. 1:9) Katapos mahimo naton ipabasa an Genesis 2:16, 17, nga nagpapakita nga an bayad han sala amo an kamatayon. Mahimo naton isaysay ha iya nga tungod han sala ni Adan, an ngatanan natawo nga makasasala. (Roma 5:12) Kondi mahimo kita sumiring ha iya nga waray mag-unabi an Dios mahitungod ha pagpasakit ha naglalaga nga impyerno. Katapos mahimo kita magpakiana, “Kon hira Adan ngan Eva namimeligro man ngay-an  nga pasakitan ha kadayonan, diri ba ito unta an iginpahamangno ha ira han Dios?” Mahimo naton basahon an Genesis 3:19, diin iginpahibaro ha ira an sirot katapos nira makasala kondi waray ito mag-unabi mahitungod han naglalaga nga impyerno. Lugod, ginsidngan hi Adan nga mabalik hiya ha tapotapo. Mahimo kita magpakiana, “Makatadunganon ba nga magsiring an Dios kan Adan nga mabalik hiya ha tapotapo kon mahingangadto man ngay-an hiya ha naglalaga nga impyerno?” Kon abrido an hunahuna han tagbalay, an sugad nga pakiana mahimo magpagios ha iya nga hunahunaon hin maopay ito nga topiko.

11. (a) Paonan-o kita mahimo mangatadongan ha usa nga natoo nga an ngatanan nga maopay nga tawo makadto ha langit? (b) Ano an iba pa nga pangatadongan mahitungod hini nga topiko an nakita mo nga epektibo?

¹¹ Kahimtang 3: Ha aton pagsangyaw, may nakaistorya kita nga natoo nga an ngatanan nga maopay nga tawo makadto ha langit. An sugad nga pagtoo mahimo makaapekto ha kon paonan-o ginsasabot han aton kaistorya an Biblia. Pananglitan, ginbasa naton ha iya an Pahayag 21:4. (Basaha.) Bangin hunahunaon niya nga an mga bendisyon nga gin-unabi ha teksto mahitatabo ha langit. Paonan-o kita mangangatadongan ha iya? Imbes nga magbasa hin iba pa nga teksto, mahimo kita magpokus ha usa nga detalye nga aada mismo hito nga teksto. Nasiring ito nga “mawawara na an kamatayon.” Mahimo kita magpakiana kon mauyon ba hiya nga antes mawara an usa nga butang, kinahanglan nga naeksister anay ito. Posible nga umuyon hiya hito. Katapos mahimo kita sumiring nga waray gud kamatayon ha langit; dinhi la ha tuna an may-ada kamatayon. Salit makatadunganon la nga an Pahayag 21:4 naghihisgot ha tidaraon nga mga bendisyon dinhi ha tuna.​—Sal. 37:29.

12. Kay ano nga gumamit hi Jesus hin mga ilustrasyon?

¹² Labot la ha mga pakiana, gumamit liwat hi Jesus hin mga ilustrasyon ha iya pagsangyaw. (Basaha an Mateo 13:34, 35.) Ito nga mga ilustrasyon nakabulig basi mahibaroan an motibo han iya mga mamarati. (Mat. 13:10-15) Nakabulig liwat ito basi magin makapainteres ngan mahinumdoman an iya mga igintutdo. Paonan-o naton magagamit an mga ilustrasyon ha aton pagtutdo?

13. Paonan-o naton mahimo ig-ilustrar nga mas labaw an Dios kay ha kan Jesus?

¹³ Epektibo gud gamiton an simple nga mga ilustrasyon. Pananglitan, kon iginsasaysay naton nga mas labaw an Dios kay ha kan Jesus, mahimo naton sarihan an masunod nga ilustrasyon. Mahimo kita sumiring nga iginpariho han Dios ngan ni Jesus an ira relasyon ha mag-amay. Gintawag han Dios hi Jesus sugad nga iya Anak, ngan gintawag ni Jesus an Dios sugad nga iya Amay. (Luc. 3:21, 22; Juan 14:28) Katapos puydi naton pakianhan an tagbalay: “Kon karuyag mo igtutdo ha akon nga magkatupong an duha nga tawo, ano nga klase hin relasyon ha sulod han pamilya an imo gagamiton basi iilustrar ito?” Bangin sumiring hiya nga an relasyon han magbugto o bangin magkaruha pa ngani. Kon ito an iya baton, puydi kita sumiring nga ito nga ilustrasyon an kasagaran nga aton mahuhunahuna. Katapos mahimo kita magpakiana: “Kon nahunahuna naton dayon ito nga ilustrasyon, diri ba mahuhunahuna liwat ito ni Jesus​—an Bantogan nga Magturutdo? Kondi waray ito gamita ni Jesus, lugod gintawag niya an Dios sugad nga iya Amay. Hini nga paagi, iginpakita ni Jesus nga mas labaw ngan mas daku an awtoridad han Dios kay ha iya.”

14. Ano nga ilustrasyon an nagpapakita nga diri makatadunganon nga sugoon han Dios an Yawa basi pasakitan an mga tawo ha naglalaga nga impyerno?

¹⁴ Hunahunaa inin usa pa nga ehemplo. An pipira natoo nga hi Satanas ginsugo han Dios basi “magdumara” ha naglalaga nga impyerno. Usa nga ilustrasyon an mahimo makabulig ha kag-anak basi makita niya nga diri makatadunganon nga sugoon han Dios an Yawa nga pasakitan an mga tawo ha naglalaga nga impyerno. Mahimo kita sumiring: “Pananglitan an imo anak nagin rebelyoso gud ngan damu an ginhihimo nga maraot. Ano an imo bubuhaton?” Bangin bumaton  hiya nga iya ito sasawayon. Bangin pauroutro pa ngani niya nga buligan ito nga umundang ha pagbuhat hin maraot. (Prob. 22:15) Katapos, mahimo naton hiya pakianhan kon ano an iya bubuhaton kon diri magbag-o an iya anak bisan pa han iya duro nga pangalimbasog. Kadam-an nga kag-anak an masiring nga waray na hira mahihimo kondi sirotan an anak. Katapos mahimo kita magpakiana, “Kondi anoman kon nahibaroan mo nga may maraot nga tawo nga nag-impluwensya ha imo anak nga magrebelde?” Sigurado nga an kag-anak masisina gud hito nga tawo. Basi maipatin-aw an punto han ilustrasyon, mahimo naton pakianhan an kag-anak, “Kon iton maraot nga tawo an nag-impluwensya ha imo anak, susugoon mo ba hiya nga hiya an magsirot ha imo anak?” Syempre diri. Salit matin-aw nga diri gud susugoon han Dios hi Satanas nga sirotan an mga tawo nga an Yawa mismo an nag-iimpluwensya ha ira nga magbuhat hin maraot!

15, 16. (a) Kay ano nga diri kita sadang maglaom nga an ngatanan nga aton ginsasangyawan makarawat han mensahe han Ginhadian? (b) Kinahanglan ba nga maopay kita hinduro magtutdo basi magin epektibo kita ha ministeryo? Isaysay. (Kitaa an kahon nga “ Usa nga Garamiton nga Mabulig ha Aton Basi Makabaton.”)

¹⁵ Maaram kita nga diri ngatanan nga aton ginsasangyawan makarawat han mensahe han Ginhadian. (Mat. 10:11-14) Tinuod ito bisan kon nagamit kita hin mataktika nga mga pakiana, makakombinse nga mga pangatadongan, ngan maopay nga mga ilustrasyon. Ngani, gutiay la an namati ha mga igintutdo ni Jesus​—bisan kon hiya an pinakabantogan nga Magturutdo nga nabuhi ha tuna!​—Juan 6:66; 7:45-48.

¹⁶ Ha luyo nga bahin, bisan kon pag-abat naton diri kita maopay hinduro magtutdo, mahimo pa gihapon kita magin epektibo ha aton ministeryo. (Basaha an Buhat 4:13.) An Pulong han Dios nagpapasarig ha aton nga “an ngatanan nga may husto nga disposisyon basi magkaada kinabuhi nga waray kataposan” makarawat han maopay nga sumat. (Buh. 13:48) Salit kultibaron ngan tipigan naton an timbang nga panhunahuna ha aton kalugaringon ngan ha aton mga ginsasangyawan han maopay nga sumat han Ginhadian. Hinaot pahimulsan naton hin bug-os an pagbansay nga igintatagana ni Jehova, nasarig nga magpapahimulos kita hito pati adton namamati ha aton. (1 Tim. 4:16) Mabulig hi Jehova ha aton nga ‘mabaton an tagsa nga tawo.’ Ha sunod nga artikulo, hibabaroan naton kon paonan-o kita mabubuligan nga maglampos ha ministeryo pinaagi ha pag-aplikar han gintatawag nga Bulawanon nga Sugo.