1. Ano nga mga bendisyon ni Jehova an mabulig ha aton basi magin malipayon?

KARUYAG ni Jehova nga magin malipayon kita, ngan damu an iya bendisyon ha aton basi magmalipayon kita. Usa hini amo an iya iginhatag ha aton nga kinabuhi. Magagamit naton ito ha pagdayaw ha iya, tungod kay ginpahirani kita niya ha tinuod nga pagsingba. (Sal. 144:15; Juan 6:44) Ginpapasarig kita ni Jehova han iya gugma ngan ginbubuligan kita niya basi makapadayon ha pag-alagad ha iya. (Jer. 31:3; 2 Cor. 4:16) Naieksperyensyahan naton an espirituwal nga paraiso, diin may hura nga espirituwal nga pagkaon ngan mahigugmaon nga pagminagburugto. Labot pa hito, may-ada kita makalilipay nga paglaom ha tidaraon.

2. Ano an ginpapangalimbasogan nga atohan han pipira nga matinumanon nga surugoon han Dios?

² Bisan pa hini nga mga hinungdan basi magin malipayon, may pipira nga matinumanon nga surugoon han Dios nga nangangalimbasog ha pag-ato han negatibo nga mga panhunahuna mahitungod ha ira kalugaringon. Bangin hira umabat nga diri hira ginpapabilhan ni Jehova ngan an ira pag-alagad ha iya. Para ha mga tawo nga pirme may negatibo nga mga pagbati, imposible magin malipayon ha sulod hin “damu nga katuigan.” Para ha ira, an kinabuhi baga hin puros la kasub-anan.—Ekles. 11:8.

3. Ano an mahimo magin hinungdan han negatibo nga mga pagbati?

 ³ Bangin nagkakaada negatibo nga mga pagbati an sugad nga kabugtoan tungod han mga kapakyasan, sakit, o pagluya nga epekto han kalagas. (Sal. 71:9; Prob. 13:12; Ekles. 7:7) Dugang pa, kinahanglan karawaton han tagsa nga Kristiano nga an kasingkasing malimbungon ngan mahimo ito maghukom nga diri kita nakakapalipay ha Dios. (Jer. 17:9; 1 Juan 3:20) An Yawa nag-aakusar ha mga surugoon han Dios. Ngan adton may-ada han panhunahuna ni Satanas bangin mag-impluwensya ha aton nga karawaton an ginsiring han waray pagtoo nga hi Elipas nga waray kita pulos ha Dios. Buwa ito nga ideya ha panahon ni Job ngan tubtob ha aton yana.—Job 4:18, 19.

4. Ano an aton hihisgotan hini nga artikulo?

⁴ Ha Kasuratan, hi Jehova nagpapasarig nga uupdan niya adton ‘naglalakat ha patag han lambong han kamatayon.’ (Sal. 23:4) An usa nga iya ginagamit ha pag-upod ha aton amo an pinaagi han iya Pulong. An Biblia ‘gamhanan nga mga armas nga hatag han Dios basi itumba an mga butang nga nakagamot hin marig-on,’ pati an sayop ngan negatibo nga mga panhunahuna. (2 Cor. 10:4, 5) Salit hisgotan naton kon paonan-o naton magagamit an Biblia basi magkaada kita positibo nga panhunahuna ngan matipigan naton ito. Mahimo ka magpahimulos hini ngan mahimo mo liwat madasig an iba.

5. Ano nga pag-usisa an makakabulig ha aton basi magkaada kita positibo nga panhunahuna?

⁵ Iginhulagway ni apostol Pablo an pipira nga butang nga mahimo makabulig ha aton basi magkaada kita positibo nga panhunahuna. Gin-aghat niya an kongregasyon ha Corinto: “Padayon nga usisaha niyo an iyo kalugaringon kon marig-on an iyo pagtoo.” (2 Cor. 13:5) “An pagtoo” amo an kabug-osan nga Kristiano nga gintotoohan nga aada ha Biblia. Kon an aton mga pulong ngan buhat uyon hito nga mga gintotoohan, iginpapakita hito nga ‘marig-on an aton pagtoo.’ Syempre, kinahanglan liwat naton usisahon kon nagkikinabuhi ba kita uyon ha bug-os nga Kristiano nga katutdoan. Diri puydi nga pilion naton kon ano la an karuyag naton sundon.—San. 2:10, 11.

6. Kay ano nga sadang naton usisahon an aton kalugaringon kon ‘marig-on an aton pagtoo’? (Kitaa an retrato ha tinikangan hini nga artikulo.)

⁶ Bangin mag-alang ka ha pag-usisa ha imo kalugaringon labi na kon naabat ka nga bangin diri mo nasusunod an mga katutdoan. Kondi mas importante an pagkita ni Jehova ha aton kay han aton pagkita ha aton kalugaringon, ngan mas hitaas gud an iya panhunahuna kay han aton. (Isa. 55:8, 9) Gin-uusisa niya an iya mga magsiringba diri basi hukman hira, lugod basi bilngon an ira mag-opay nga kalidad ngan buligan hira. Kon gagamiton mo an Pulong han Dios ha pag-usisa ha imo kalugaringon kon ‘marig-on an imo pagtoo,’ makikita mo an imo kalugaringon sugad han pagkita han Dios ha imo. Makakabulig ini basi an anoman nga ideya nga waray ka pulos ha Dios masaliwnan hinin pasarig han Biblia: Birilhon ka kan Jehova. Kon hinunumdoman mo ini sugad hin ginpapali mo an kurtina basi malamragan an usa nga masirom nga kwarto.

7. Paonan-o kita magpapahimulos tikang ha ehemplo han matinumanon nga mga tawohan ha Biblia?

⁷ An usa nga maopay nga paagi ha pag-usisa ha aton kalugaringon amo an pagpamalandong ha ehemplo han matinumanon nga mga tawohan ha Biblia. Itanding an ira kahimtang o pagbati ha imo sitwasyon, ngan kitaa kon paonan-o ka posible nga magios kon ikaw an aada ha ira kahimtang. Hisgotan naton an tulo nga ehemplo nga nagpapakita kon paonan-o mo magagamit an Biblia ha pag-usisa kon ‘marig-on an imo pagtoo’ basi magkaada ka positibo nga panhunahuna ha imo kalugaringon.

8, 9. (a) Ano an kahimtang han pobre nga balo? (b) Ano an negatibo nga mga pagbati an bangin gin-abat han balo?

⁸ Ha templo ha Jerusalem, nakita ni Jesus an usa nga pobre nga balo nga babaye. An ehemplo hito nga balo mabulig ha aton nga matipigan an positibo nga panhunahuna bisan pa han aton  mga limitasyon. (Basaha an Lucas 21:1-4.) Tagda an iya kahimtang. Kinahanglan ilubon niya diri la an kasubo han kamatay han iya bana kondi pati na an hakugnon nga ginbubuhat han relihiyoso nga mga lider nga ‘nangangagaw han mga balay han mga balo nga babaye’ imbes nga bumulig ha ira. (Luc. 20:47) Pobre hiya hinduro salit an iya maidudonar ha templo katugbang la han sweldo han usa nga trabahador nga posible nga gintrabahoan ha sulod hin pipira ka minutos.

⁹ Hunahunaa an gin-abat han balo samtang nasulod hiya ha bungsaran han templo dara an duha nga sinselyo nga gutiay an bili. Naghunahuna ba hiya nga gutiay gud la an iya donasyon kon itanding han maihahatag unta niya kon buhi pa an iya bana? Naawod ba hiya kay dagku an donasyon han mga nahiuna ha iya, bangin naghunahuna kon may bili gud ba an iya donasyon? Bisan kon bangin ito an iya gin-abat, iginhatag la gihapon niya an iya maaakos para suportahan an tinuod nga pagsingba.

10. Paonan-o iginpakita ni Jesus nga an balo importante ha Dios?

¹⁰ Iginpakita ni Jesus nga importante kan Jehova an balo ngan an iya donasyon. Hiya nagsiring nga an balo ‘naghulog hin mas damu kay ha ngatanan’ nga riko. Haros diri na ngani makikita an donasyon han balo kon itampo ito ha iba, kondi gindayaw hiya ni Jesus. An mga nag-iihap han mga donasyon ha templo diri maaram kon mationan-o kaimportante kan Jehova adton duha nga sinselyo ngan an kablas nga balo. Pero bisan pa hito, an panhunahuna ni Jehova amo gud an importante, diri an panhunahuna han iba nga tawo o an panhunahuna han balo ha iya kalugaringon. Magagamit mo ba ini nga asoy basi mausisa kon marig-on an imo pagtoo?

11. Ano an imo hibabaroan ha asoy mahitungod han balo?

¹¹ An imo kahimtang mahimo makaapekto ha kon ano an imo maihahatag kan Jehova. Tungod han kalagas o sakit, bangin limitado na gud la an panahon nga nagagamit han iba ha pagsangyaw han maopay nga sumat. Sadang ba nira hunahunaon nga diri na kinahanglan nga ig-report an ira oras? Bisan kon bata o mahimsog ka pa, bangin hunahunaon mo nga an imo iginrireport gutiay gud la nga bahin han kabug-osan nga oras nga  igin-gagahin kada tuig han katawohan han Dios para ha pag-alagad ha iya. Kondi hinbaroan naton ha asoy mahitungod han pobre nga balo nga nakikita ngan ginpapabilhan ni Jehova bisan kon gutiay la an aton nahihimo para ha iya, labi na kon ginbuhat ito ha makuri nga mga kahimtang. Hunahunaa an imo pag-alagad kan Jehova durante han naglabay nga tuig. Ginkinahanglan mo ba maghimo hin daku nga sakripisyo para ha usa han mga oras nga imo gin-gamit ha pag-alagad ha iya? Kon amo, makakasiguro ka nga ginpapabilhan ni Jehova an imo ginbuhat durante hito nga oras. Pariho han pobre nga balo, kon ginbubuhat mo an ngatanan nga imo mahihimo ha pag-alagad kan Jehova, ginpapamatud-an mo nga “marig-on an imo pagtoo.”

12-14. (a) Paonan-o naapektohan hi Elias han negatibo nga mga pagbati? (b) Ano an posible nga hinungdan nga nagin negatibo hi Elias?

¹² Hi propeta Elias maunungon kan Jehova ngan may marig-on nga pagtoo. Pero may higayon nga nasubo hiya hinduro salit nag-ampo hiya kan Jehova nga mamatay na la unta hiya. Hiya nagsiring: “Igo na; yana, O Jehova, kuhaa an akon kinabuhi.” (1 Hadi 19:4) Bangin hunahunaon hadton waray pa umabat hin sugad hito nga kasubo nga ‘mapintas an mga pulong’ ni Elias. (Job 6:3) Kondi amo gud ito an iya gin-abat. Pero tigamni nga imbes nga masina hi Jehova kan Elias tungod kay karuyag hito nga mamatay, iya ito ginbuligan.

¹³ Kay ano nga sugad hito an inabat ni Elias? Diri pa la maiha antes hito, nagbuhat hiya hin milagro nga nagpamatuod nga hi Jehova an tinuod nga Dios, ngan nagresulta ito ha kamatayon han 450 nga propeta ni Baal. (1 Hadi 18:37-40) Posible nga naglaom hi Elias nga an katawohan han Dios mabalik ha putli nga pagsingba, kondi waray ito mahitabo. An maraot nga hi Rayna Jesebel nagpadara hin mensahe ngadto kan Elias nga iya ipapapatay hi Elias. Tungod kay nahadlok hi Elias, pumalagiw hiya. Tumabok hiya ha sur han Juda ngan kumadto ha kamingawan.—1 Hadi 19:2-4.

¹⁴ Samtang nag-uusahan, nahunahuna ni Elias nga baga hin waray pulos an iya ginbuhat sugad nga propeta. Hiya nagsiring kan Jehova: “Diri ako maoroopay kay han akon mga amay.” Inabat niya nga waray hiya pulos pariho han iya patay na nga kaapoy-apoyan nga tapotapo ngan tul-an na la. Hito nga paagi, sugad hin iya gin-usisa an iya kalugaringon uyon ha iya suruklan ngan naghunahuna nga pakyas hiya, o waray hiya bili kan Jehova o ha bisan hin-o.

15. Paonan-o ginpasarig ni Jehova nga ginpapabilhan pa gihapon niya hi Elias?

¹⁵ Kondi iba an pagkita ni Elias kay ha pagkita han Makagarahum ha ngatanan. Importante pa gihapon hiya kan Jehova, ngan may ginbuhat an Dios basi pasarigon hiya hito. An Dios nagsugo hin anghel basi parig-unon hiya. Gintaganahan liwat hiya ni Jehova hin pagkaon ngan irimnon durante han iya 40 ka adlaw nga pagbiyahe tikang ha sur tipakadto ha Bukid Horeb. Dugang pa, may pagkabuotan nga gintadong han Dios an sayop nga panhunahuna ni Elias nga waray na iba nga Israelita nga nagpabilin nga matinumanon kan Jehova. Tigamni liwat nga gintagan pa ngani hiya ni Jehova hin bag-o nga mga toka, ngan iya ito ginkarawat. Nagpahimulos hiya han bulig ni Jehova, ngan nagin madasigon utro ha iya toka sugad nga propeta.—1 Hadi 19:5-8, 15-19.

16. Ano an pipira nga paagi nga bangin gin-gagamit han Dios ha pagparig-on ha imo?

¹⁶ An ehemplo ni Elias mabulig basi masiguro mo nga marig-on an imo pagtoo ngan magin positibo. Siyahan, hunahunaa kon paonan-o ka ginbubuligan ni Jehova. Nabuligan ka na ba hin usa nga tigurang o hamtong nga Kristiano han nagkaada ka hin problema? (Gal. 6:2) Naparig-on ka na ba pinaagi han Biblia, Kristiano nga mga publikasyon, ngan han mga katirok ha kongregasyon? Ha sunod nga mapahimulosan mo an sugad nga mga bulig, hunahunaa kon hin-o an tinuod nga Surok hito ngan pagpasalamat ha iya ha pag-ampo.—Sal. 121:1, 2.

17. Ano an ginpapabilhan ni Jehova ha iya mga surugoon?

¹⁷ Ikaduha, hinumdumi nga malimbungon an  negatibo nga panhunahuna. An panhunahuna ha aton han Dios amo an importante. (Basaha an Roma 14:4.) Ginpapabilhan ni Jehova an aton debosyon ngan pagkamatinumanon ha iya. An aton pagin birilhon ha iya diri nadepende kon mationan-o kadaku an aton nahihimo para ha iya. Ngan pariho kan Elias, bangin diri ka la maaram nga daku an imo nabubuhat para kan Jehova. Bangin may-ada mga kabugtoan ha kongregasyon nga naparig-on tungod han imo maopay nga ehemplo, o bangin may mga tawo ha iyo teritoryo nga nahibaro han kamatuoran tungod han imo mga pangalimbasog.

18. Ano an ginpapamatud-an han imo toka tikang kan Jehova?

¹⁸ Ha urhi, hunahunaa an tagsa nga toka tikang kan Jehova sugad nga pamatuod nga hiya kaupod mo. (Jer. 20:11) Pariho kan Elias, bangin manluya ka tungod kay baga hin diri mabungahon an imo pag-alagad o tungod kay bangin diri mo nakakab-ot an pipira han imo espirituwal nga tumong. Bisan pa hito, nakikigbahin ka pa gihapon ha gidadakui nga pribilehiyo nga napapahimulosan naton ngatanan—an pagsangyaw han maopay nga sumat ngan tawagon sugad nga Saksi ni Jehova. Magpabilin nga matinumanon. Ngan sugad han ginsiring ni Jesus, mahimo ka ‘malipay upod han imo agaron.’—Mat. 25:23.

19. Ano an kahimtang han parasurat han Salmo 102?

¹⁹ An parasurat han Salmo 102 inatubang hin makuri nga mga problema. Nakaeksperyensya hiya hin “kakurian,” nag-antos hin duro nga kasakit ha pisikal o ha emosyon, ngan nawarayan liwat hin igo nga kusog ha pag-atubang ha iya mga problema. (Sal. 102, superskripsyon) Makikita naton ha iya mga pulong nga duro an iya kasakit ngan kasubo. (Sal. 102:3, 4, 6, 11) Naghunahuna hiya nga karuyag ni Jehova nga ipilak hiya.—Sal. 102:10.

20. Paonan-o an pag-ampo mabulig ha usa nga nangangalimbasog ha pag-ato ha negatibo nga mga panhunahuna?

²⁰ Kondi mahimo pa gihapon gamiton han salmista an iya kinabuhi ha pagdayaw kan Jehova. (Basaha an Salmo 102:19-21.) Sugad han iginpapakita han Salmo 102, bisan adton may-ada pagtoo mahimo makaeksperyensya hin mga kasakit ngan mahimo magpokus na la ha ira problema. Inabat han salmista nga pariho hiya hin “nag-uusaan nga tamsi ha atop han bobong,” nga sugad hin napapalibotan hiya han mga problema. (Sal. 102:7, Maopay nga Sumat) Kon sugad hito an imo inaabat, isumat kan Jehova an aada ha imo kasingkasing pariho han ginbuhat han salmista. An pag-ampo han nagkukuri—an imo pag-ampo—makakabulig ha imo samtang nangangalimbasog ka ha pag-ato han negatibo nga mga panhunahuna. Hi Jehova nagsasaad nga ‘mamamati hiya ha mga pag-ampo han mga diri binubuligan, ngan diri niya tatamayon an ira pag-ampo.’ (Sal. 102:17) Sarig hito nga saad.

21. Paonan-o mahimo magin mas positibo an usa nga may negatibo nga mga pagbati?

²¹ Iginpapakita liwat han Salmo 102 kon paonan-o ka magigin mas positibo. Ginbuhat ito han salmista pinaagi ha pagpokus ha iya relasyon kan Jehova. (Sal. 102:12, 27) Naliaw hiya ha paghibaro nga hi Jehova andam pirme bumulig ha Iya katawohan basi mailob an mga pagsari. Salit kon an negatibo nga mga pagbati temporaryo nga nag-uulang basi diri mo mabuhat an karuyag mo himoon ha pag-alagad ha Dios, ig-ampo ito. Paghangyo ha Dios nga batunon an imo mga pag-ampo diri la basi masolusyonan an imo problema kondi basi liwat ‘maipahayag an ngaran ni Jehova.’—Sal. 102:20, 21.

22. Paonan-o naton mapapalipay hi Jehova?

²² Oo, magagamit naton an Biblia basi pamatud-an ha aton kalugaringon nga marig-on an aton pagtoo ngan ginpapabilhan kita ni Jehova. Tinuod nga hinin presente nga sistema, bangin diri naton bug-os nga malikyan an negatibo nga mga pagbati o panluya. Bisan pa hito, mahimo pa gihapon naton mapalipay hi Jehova ngan matalwas kita pinaagi han matinumanon ngan mapailubon nga pag-alagad ha iya.—Mat. 24:13.