Han ginpasulod ha usa nga balay ha Kenya an duha nga payunir, nahipausa hira han makita nira an gutiay nga lalaki nga nahigda ha katre. Gutiay hinduro an iya lawas ngan halipot an mga butkon. Samtang iginsusumat nira ha iya an saad han Dios nga an “piol malukso sugad hin bugsok,” hiniyom hiya.—Isa. 35:6.

Hinbaroan han mga payunir nga hi Onesmus natawo nga may osteogenesis imperfecta, o brittle bone disease. An iya mga tul-an matapok hinduro nga bisan kon lamanuhon la hiya mahimo na mabari ito. Tungod kay waray ito tambal, ginkarawat na ni Onesmus nga mag-aantos hiya hin kaul-ol ha bug-os niya nga kinabuhi ngan pirme na la hiya aada ha wheelchair.

Hi Onesmus nagpa-Bible study. Kondi an iya nanay nadiri nga tumambong hiya ha mga katirok kay bangin la hiya mabarian ngan madugangan an iya mag-ul-ol. Salit iginrirekord han kabugtoan an mga katirok, ngan pinamamatian ito ni Onesmus ha ira balay. Paglabay hin lima ka bulan tikang han nag-Bible study hiya, nagdesisyon hiya nga tumambong ha mga katirok bisan pa han mga peligro.

Nadugangan ba an mag-ul-ol ni Onesmus tungod han iya pagtambong ha mga katirok? Kabaliktaran an nahitabo. “An kaul-ol nga pirme ko inaabat baga hin nagtitikawara samtang natambong ako ha mga katirok,” siring ni Onesmus. Ginhunahuna niya nga an iya bag-o nga gintotoohan amo an hinungdan nga nagtikaopay hiya. Naobserbaran han nanay ni Onesmus nga nabag-o an disposisyon han iya anak ngan nalipay gud hiya salit nag-Bible study liwat hiya. “An pag-alagad ha Dios amo an tambal han akon anak,” siring niya.

Waray pag-iha, hi Onesmus nagin diri-bawtismado nga magwarali. Ha urhi, nabawtismohan hiya ngan yana ministeryal na. Bisan kon diri nakakalakat ngan usa la nga kamot an iya nagagamit, karuyag niya buhaton an ngatanan niya nga mahihimo ha pag-alagad kan Jehova. Karuyag niya mag-auxiliary payunir pero nag-aalang hiya pag-aplay. Kay ano? Tungod kay maaram hiya nga basi mahimo ito, kinahanglan may-ada hiya kaupod nga magduduso han iya wheelchair. Han iginsumat niya ito ha kabugtoan, nagsaad hira nga bubuligan nira hiya. Ginbuligan gud man nira hi Onesmus basi makag-auxiliary payunir.

Karuyag ni Onesmus nga mag-regular payunir, pero nag-aalang la gihapon hiya. Kondi usa ka adlaw, nadasig hiya han iya nabasa ha inadlaw nga teksto. Ginkotar ito ha Salmo 34:8: “Tilawi niyo ngan kitaa nga hi Jehova maopay.” Katapos pamalandungon ito, nagdesisyon hi Onesmus nga mag-regular payunir. Yana nagsasangyaw hiya hin upat ka adlaw ha usa ka semana ngan may mga Bible study hiya nga nag-uuswag ha espirituwal. Han 2010, nakaeskwela hiya ha Pioneer Service School. Nalipay gud hiya nga an iya instruktor usa han duha nga brother nga siyahan nga nagsangyaw ha iya!

Yana, hi Onesmus hirani na mag-40 anyos. An iya mga kag-anak namatay na, pero igintatagana han mga kabugtoan ha kongregasyon an iya adlaw-adlaw nga panginahanglan. Mapasalamaton gud hiya han ngatanan nga bendisyon nga iya napapahimulosan yana, ngan ginpapamulat niya an adlaw nga ‘waray na umurukoy nga masiring: Ako masakit.’—Isa. 33:24.