HAN Agosto/Septyembre 1929, maipapariho hin buhawi an kadagmit han ginbuhat nga siyam ka adlaw nga kampanya han pagsangyaw. Sobra 10,000 nga magwarali an nakigbahin hito ha mga lugar han United States. Nakapahamutang hira hin 250,000 nga libro ngan bokleta ha mga tawo. Kaupod hini nga mga magwarali han Ginhadian an mga usa ka yukot nga colporteur. Madagmit gud an ira pagdamu! An Bulletin * nagsiring nga “haros diri gud katoohan” nga nag-triple an kadamu han mga payunir tikang han 1927 tubtob 1929.

Ha ikatarapos han 1929, nagkaada krisis ha ekonomiya. Han Black Tuesday, Oktubre 29, 1929, naalarma an mga tawo han tigda nga naghamubo hinduro an presyo han mga stock han New York Stock Exchange. Nakaapekto ito ha ekonomiya han bug-os nga kalibotan ngan nagresulta hin Great Depression. Yinukot nga bangko an nalugi. Waray na nag-uma. Nagsara an dagku nga pabrika. Minilyon an nawad-an hin trabaho. Han 1933, inabot hin 1,000 nga balay ha U.S. an gin-iimbargo kada adlaw.

Paonan-o makakapadayon ha buruhaton an bug-os-panahon nga mga magwarali durante hini nga krisis? Usa nga nakabulig ha ira amo an pag-ukoy ha house car o ha awto nga ginhimo nga balay. Tungod kay waray ini plete ngan waray buhis, nakaiban ini ha kagarastohan han damu nga payunir salit nakabulig ini ha ira nga makapadayon ha ira ministeryo. * Ngan ha panahon han kombensyon nagagamit nira ini sugad nga libre nga akomodasyon. Han 1934, an Bulletin nagpublikar hin detalyado nga plano para ha usa nga gutiay kondi komportable nga house car nga may-ada han ginkikinahanglan nga mga butang sugad han suplay han tubig, lutoan, folding bed, ngan heater.

An madiskarte nga mga magwarali ha bug-os nga kalibotan naghimo hin ira mga house car. Hi Victor Blackwell nagsiring, “Hi Noe waray eksperyensya ha paghimo hin arka, waray liwat ako eksperyensya o kahibaro ha paghimo hin house car.” Bisan pa hini, naghimo la gihapon hito hi Victor.

Hira Avery ngan Lovenia Bristow may-ada house car. Hi Avery nagsiring, “Pariho ako hin bao nga aada ha iya balayan—daradara ko pirme an akon balay.” Nagpayunir hira kaupod nira Harvey ngan Anne Conrow nga may-ada liwat house car. An bungbong hito ginbutangan hin mga tar-paper. Ha kada nira pagbabalhin, may nababakbak dida hito. Hi Avery nagsiring, “waray ka makikita hadto nga awto nga pariho hito, ngan waray ka na gud makikita nga sugad hito!” Kondi hiya nagsiring nga an mag-asawa nga Conrow ngan an ira duha nga anak nga lalaki amo “an pinakamalipayon nga pamilya nga imo makikita.” Hi Harvey nagsurat, “Waray gud kami magkulang hin bisan ano, ngan inabat namon nga waray gud kami pabay-i ni Jehova ha amon pag-alagad ha iya ngan mahigugmaon nga ginmangnoan niya kami.” Ha urhi, inin upat nga membro han pamilya Conrow nakaeskwela ha Gilead School ngan nagin mga misyonero ha Peru.

An mag-asawa nga Giusto ngan Vincenza Battaino nagpayunir liwat. Han hinbaroan nira nga magkakaada na hira anak, an ira 1929 Model A Ford nga trak ginhimo nira nga balay nga “baga hin hotel” kon ikompara ha mga tolda nga ira gin-ukyan hadto. Kaupod an ira gutiay pa nga anak nga babaye, nagpadayon hira ha buruhaton  nga ira naruruyagan gud, an pagsangyaw ha mga Italyano nga nag-uukoy ha United States.

Damu an namati han maopay nga sumat, kondi an mga pobre ngan waray trabaho talagsa la makagdonar hin kwarta para ha mga literatura. Lugod naghahatag hira hin iba-iba nga produkto kabalyo hito. Han iginlista han duha nga payunir an magkalain-lain nga produkto nga ira nakarawat tikang ha mga interesado, inabot ito hin 64 ka klase. Ito nga lista “pariho hin imbentaryo hin usa nga tindahan.”

Hi Fred Anderson may nakaistorya nga usa nga parauma nga naruyag magkaada han aton mga libro. Salit iginbalyo hito nga parauma an antiyuhos han iya nanay. Ha sunod nga uma, usa nga lalaki an nagpakita hin interes ha aton mga literatura kondi nagsiring, “Diri ko ini mababasa kay waray ako antiyuhos.” Kondi han iginsul-ot niya an antiyuhos nga iginhatag kan Fred, nabasa niya hin maopay an mga libro ngan nalipay hiya ha pagdonar para ha mga libro ngan ha antiyuhos.

Hi Herbert Abbott may dara-dara nga tangkal hin manok ha iya awto. Kon nakakatirok na hiya hin tulo o upat nga manok kabalyo han mga literatura, iginbabaligya niya ito ha merkado ngan an bayad hito iya igin-gagasolina. Hiya nagsurat, “May mga panahon nga haros waray na kami kwarta. Pero waray namon tuguti nga makapaundang ito ha amon. Samtang may gasolina an amon awto, nagpapadayon kami ha buruhaton, ngan iginsasarig namon an ngatanan kan Jehova.”

An pagsarig kan Jehova ngan marig-on nga determinasyon nakabulig ha iya katawohan nga magpadayon bisan pa hiton makuri nga mga panahon. Durante han usa nga bagyo, hira Maxwell ngan Emmy Lewis bumaya ha ira awto. Maopay na gud la nga nakagawas hira kay waray pag-iha natumbahan ito hin kahoy ngan natunga. Hi Maxwell nagsurat, “Waray makaulang ha amon ini nga panhitabo, aksidente la ito, ngan waray gud sumulod ha amon hunahuna nga umundang. Damu pa hinduro an buruhaton, ngan determinado kami nga buhaton ito.” Tungod han pagin pursigido, ngan ha bulig han mahigugmaon nga kasangkayan, naayad an ira house car.

Ha aton makuri nga panahon yana, iginpapakita liwat han minilyon nga madasigon nga mga Saksi ni Jehova an pariho nga nagsasakripisyo ha kalugaringon nga disposisyon. Oo, pariho han mga payunir ha naglabay, determinado kita nga padayon nga magsangyaw tubtob nga sumiring hi Jehova nga tapos na an buruhaton.