NAHITABO adto han Agosto 1936 ha Kraal, o compound, han hadi han Swaziland. Hira Robert ngan George Nisbet nagpatokar pa la ha sound car hin nakarekord nga musika nga ginsundan han nakarekord nga mga pahayag ni Brother J. F. Rutherford. Nalipay hi Hadi Sobhuza II. “Naawod gud kami,” siring ni George, “kay karuyag niya paliton an record player, mga plaka, ngan an loudspeaker para han nakarekord nga mga mensahe han Ginhadian!”

Nangaro hin dispensa hi Robert ngan nagsiring nga diri ito iginbabaligya. Kay ano? Kay may tag-iya na ito. Karuyag hibaroan han Hadi kon hin-o an tag-iya hito.

Hi Robert binaton: “Hadi liwat an tag-iya hito.” Katapos nagpakiana hi Sobhuza kon hin-o nga Hadi. “Hi Jesu-Kristo, an Hadi ha Ginhadian han Dios,” siring ni Robert.

“Harangdon hiya nga Hadi,” matinalahuron gud nga nagsiring hi Sobhuza. “Diri ko karuyag kuhaon an bisan ano nga iya panag-iya.”

Hi Robert nagsurat: ‘Binilib gud ako ha disposisyon han Nangunguna nga Lider, hi Hadi Sobhuza. Maopay hiya mag-Ingles pero diri naghahambog o nagpapahitaas, ngan masayon gud hiya makaistorya. Mga 45 minutos nga nag-istorya kami ha iya opisina samtang hi George nagpapatokar hin musika ha gawas.

‘Ha urhi hito nga adlaw,’ siring ni Robert, ‘binisita kami ha Swazi National School diin nahitabo an amon pinakamakaruruyag nga eksperyensya. Nagsangyaw kami ha prinsipal ngan namati hiya hin maopay. Han nagsiring kami nga may dara kami nga record player ngan karuyag namon ipabati ha ngatanan nga estudyante an mga rekording hito, nalipay hiya ngan iginpatawag an haros 100 nga estudyante basi lumingkod ha mga banwa ngan mamati. Ginsumatan kami nga ito nga hayskul nagtututdo hin agrikultura, paggardin, pagpanday, panukod, Ingles, ngan matematika ha mga estudyante nga lalaki; an mga babaye gintututdoan hin nursing, mga trabahoon ha balay, ngan iba pa nga mapulsanon nga mga trabaho.’ An lola han Nangunguna nga Lider an nagpahimo han eskwelahan. *

Tikang pa han 1933, nalilipay hi Hadi Sobhuza pagpamati ha mga payunir nga nabisita ha iya Kraal. Makausa, iya pa ngani gintirok an iya mga bodyguard nga 100 nga sundalo basi mamati han nakarekord nga mensahe han Ginhadian. Kinuha hiya hin subskripsyon han aton mga magasin ngan kinarawat hin literatura.  Waray pag-iha, haros kompleto na an iya librarya han aton mga publikasyon! Dugang pa, padayon nga gintipigan niya ito bisan kon igindiri han gobyerno han Britain an aton mga literatura han ikaduha nga girra ha kalibotan.

Padayon nga gin-abiabi ni Hadi Sobhuza II an mga Saksi ha iya Kraal ha Lobamba, ginpakadto pa ngani an mga ministro hin relihiyon basi mamati ha ira mga pahayag mahitungod ha Biblia. Samtang ginhihisgotan ni Helvie Mashazi, usa nga Saksi nga taga-didto, an Mateo kapitulo 23, usa nga grupo hin mga ministro han relihiyon an nasisina nga tinindog ngan nagsari pagpirit ha iya nga lumingkod. Kondi ginsaway hira han Hadi ngan ginhangyo hi Brother Mashazi nga ipadayon an iya pahayag. Dugang pa, ginsidngan han Hadi an mga mamarati nga isurat an ngatanan nga teksto ha Biblia nga gin-unabi ha pahayag!

Ha lain nga higayon, katapos mamati ha pahayag han usa nga payunir nga brother, upat nga ministro nga nakadto an nagsiring: “Diri na kami mga ministro kondi mga Saksi ni Jehova na yana.” Katapos nagpakiana hira ha payunir kon may mga libro hiya nga pariho han mga libro han Nangunguna nga Lider.

Tikang han dekada han 1930 tubtob ha iya kamatay han 1982, an Nangunguna nga Lider nagpakita hin pagtahod ha mga Saksi ni Jehova ngan waray hiya tumugot nga timarauton hira tungod han diri pagsunod ha mga rituwal ha Swaziland. Salit may maopay nga hinungdan an mga Saksi nga magin mapasalamaton ha iya, ngan nasubo gud hira han namatay hiya.

Ha tinikangan han 2013, sobra 3,000 na an magwarali ha Swaziland. Tungod kay sobra la usa ka milyon an umurukoy hini nga nasud, may-ada ito ratio nga 1 nga magwarali ha kada 384 ka tawo. Sobra 260 nga payunir an okupado ha 90 nga kongregasyon, ngan 7,496 an tinambong ha Memoryal han 2012. Matin-aw nga daku an potensyal para ha dugang nga pag-uswag. Sigurado nga nagkaada marig-on nga pundasyon tungod hiton siyahan nga mga pagbisita ha Swaziland han dekada 1930.—Tikang ha aton daan nga mga koleksyon ha South Africa.