Makapira mo na ito isiring ha imo kalugaringon o ha iba pag-abri mo han bag-o nga gowa hini nga magasin? May katuyoan an pagbutang han makaruruyag nga mga retrato nga ginpili hin maopay. Nabulig ito ha pagtutdo ngan nakakaaghat ha aton nga maghunahuna ngan umabat. Makakabulig ito ha aton labi na kon nag-aandam kita ngan nagkukomento ha Pag-aram ha Barantayan.

Pananglitan, hunahunaa kon kay ano nga an retrato ha tinikangan han tagsa nga aradman nga artikulo an ginpili para hito nga artikulo. Ano an iginhuhulagway hito? Ano an kalabotan hito ha ulohan han artikulo o ha tema nga teksto? Ha tagsa han iba pa nga retrato, hunahunaa kon ano an kalabotan hito ha topiko nga ginhihisgotan ngan ha imo kinabuhi.

An konduktor han Pag-aram ha Barantayan sadang maghatag hin higayon ha kabugtoan nga komentohan an tagsa nga retrato. Puydi nira isaysay kon ano an kalabotan hito ha topiko nga gin-aadman o kon ano an epekto hito ha ira. Ha pipira nga kahimtang, iginbutang ha kapsyon han retrato an numero han parapo. Ha iba nga kahimtang, an konduktor mahimo magdesisyon kon ha ano nga parapo angayan gud hisgotan an tagsa nga retrato. Hini nga paagi, an ngatanan bug-os nga magpapahimulos ha mga retrato nga nabulig basi magin matin-aw ha aton hunahuna an mga leksyon ha Pulong han Dios.

Sugad hini an pagsaysay hito han usa nga brother, “Katapos basahon an usa nga artikulo nga iginsurat hin maopay, an mga retrato sugad hin icing ha keyk.”