1, 2. (a) Ano an nakabulig ha imo ha pagdesisyon nga mag-alagad ha Dios? (b) Ano an mahimo naton ipakiana mahitungod han aton espirituwal nga panurundon?

MINILYON ha aton an naghimo hin maaramon nga desisyon nga mag-alagad kan Jehova nga Dios ngan sundon hin maopay an mga pitad ni Jesu-Kristo. (Mat. 16:24; 1 Ped. 2:21) Seryoso nga desisyon an aton pagdedikar ha Dios. Iginbasar naton ito diri ha hamabaw la nga kahibaro ha pipira nga teksto, kondi ha pag-aram hin maopay han Pulong han Dios. Sugad nga resulta, nahibaroan naton an damu nga makaparig-on ha pagtoo nga mga detalye mahitungod ha panurundon nga iginsaad ni Jehova ha mga ‘nakilala ha iya ngan ha iya ginsugo, hi Jesu-Kristo.’—Juan 17:3; Roma 12:2.

² Kon karuyag naton matipigan an aton maopay nga relasyon kan Jehova, kinahanglan pirme kita maghimo hin mga desisyon nga nakakapalipay ha iya. Hihisgotan hini nga artikulo inin importante nga mga pakiana: Ano an aton panurundon? Paonan-o naton ito sadang tagdon? Paonan-o naton masisiguro nga makakarawat naton an aton panurundon? Ano an makakabulig ha aton nga makahimo hin maaramon nga mga desisyon?

3. Ano an panurundon nga makakarawat (a) han mga dinihogan ngan (b) han “iba nga mga karnero”?

³ Gutiay la nga mga Kristiano an naglalaom nga makakarawat hin “panurundon nga diri-nadudunot ngan waray-hugaw ngan diri-nalubad”—an birilhon gud nga pribilehiyo nga magmando kaupod ni Kristo ha langit. (1 Ped. 1:3, 4) Basi makarawat ito nga panurundon, kinahanglan “ig-anak utro” hira. (Juan 3:1-3) Ano an panurundon han minilyon nga “iba nga mga karnero” ni Jesus nga kaupod han iya dinihogan nga mga  sumurunod ha pagsangyaw han maopay nga sumat han Ginhadian han Dios? (Juan 10:16) An iba nga mga karnero makarawat hin panurundon nga waray gud makarawat han makasasala nga hira Adan ngan Eva—an kinabuhi nga waray kataposan ha tuna nga waray na pag-antos, kamatayon, o kabido. (Pah. 21:1-4) Salit nakagsaad hi Jesus ha magburuhat hin maraot nga namatay kaupod niya: “Ha pagkamatuod susumatan ko ikaw yana, Makakaupod ko ikaw ha Paraiso.”—Luc. 23:43.

4. Ano nga mga bendisyon an napapahimulsan na naton?

⁴ Bisan yana, nagpapahimulos na kita han pipira nga bahin han aton panurundon. Tungod kay nagpapakita kita hin pagtoo ha “lukat nga iginbayad ni Kristo Jesus,” may-ada kita kamurayawan ha hunahuna ngan duok nga relasyon ha Dios. (Roma 3:23-25) Nasasabtan naton hin matin-aw an birilhon nga mga saad nga aada ha Pulong han Dios. Sugad man, makalilipay gud nga magin bahin han mahigugmaon nga internasyonal nga pagminagburugto. Ngan dungganon gud nga pribilehiyo nga magin usa han mga Saksi ni Jehova. Sigurado nga ginpapabilhan naton an aton panurundon!

5. Ano an ginpapangalimbasogan ni Satanas nga buhaton ha katawohan han Dios, ngan ano an makakabulig ha aton nga makatindog hin marig-on kontra ha iya tuso nga mga buhat?

⁵ Kondi basi masiguro nga diri mawara an aton panurundon, kinahanglan maglikay kita pirme ha mga lit-ag ni Satanas. Pirme hiya nangangalimbasog nga impluwensyahan an katawohan han Dios nga maghimo hin mga desisyon nga magigin hinungdan nga mawara an ira panurundon. (Num. 25:1-3, 9) Tungod kay maaram hiya nga hirani na hiya bungkagon, mas nangangalimbasog hiya nga limbongan kita. (Basaha an Pahayag 12:12, 17.) Basi padayon kita nga “makatindog hin marig-on kontra ha tuso nga mga buhat han Yawa,” kinahanglan pabilhan gud naton pirme an aton panurundon. (Efe. 6:11) May kalabotan hini, may importante nga leksyon kita nga mahibabaroan ha nagpapahamangno nga ehemplo ni Esau, an anak han patriarka nga hi Isaac.

6, 7. Hin-o hi Esau, ngan ano an iya magigin panurundon?

⁶ Mga 4,000 ka tuig na an naglabay, hira Isaac ngan Rebeca nagkaada karuha nga anak nga hira Esau ngan Jacob. Samtang nagtitikadaku an magkaruha, mag-iba an ira disposisyon ngan mga hilig. “Hi Esaw [o Esau] batid nga parapanganop, tawo ha kauumhan; ngan hi Jakob [o Jacob] maukoy nga tawo nga nag-uukoy ha mga salapdag.” (Gen. 25:27) An Hebreo nga pulong nga iginhubad nga “maukoy” nangangahulogan hin “integridad o pagin inosente pa ngani,” siring han parahubad han Biblia nga hi Robert Alter.

⁷ Han 15 anyos na hira Esau ngan Jacob, namatay an ira lolo nga hi Abraham, kondi waray kalimti ni Jehova an iya saad kan Abraham. Paglabay han panahon, ginsiring utro ito ni Jehova kan Isaac. An Dios nagsiring nga an ngatanan nga nasud ha tuna mabubulahan o bibendisyonan pinaagi han tulin ni Abraham. (Basaha an Genesis 26:3-5.) Ito nga saad nagpapakita nga an Mesias—an matinumanon nga “katulinan,” o binhi nga gin-unabi ha Genesis 3:15—magtitikang ha tulin ni Abraham. Sugad nga suhag nga anak nga lalaki ni Isaac, hi Esau an may legal nga katungod hito nga saad. Makalilipay gud ito nga panurundon ni Esau! Gin-apresyar ba niya ito?

8, 9. (a) Ano an ginpili ni Esau may kalabotan ha iya panurundon? (b) Paglabay han mga tuig, ano an nasantop ni Esau mahitungod han iya ginpili, ngan ano an iya nagin reaksyon?

⁸ Usa ka adlaw, han hi Esau inabot tikang ha uma, nakita niya hi Jacob nga “nagluto hin mga utan.” Hi Esau nagsiring: “Nanginginyupo ako ha imo, tuguti ako pagkaon hini nga mapula nga utan: kay ako maluya.” Hi Jacob binaton: “Igbaligya ha akon yana an imo panurundon ha pagkamagurang.” Ano an ginpili ni Esau? Hiya nagsiring: “Ano man an kapulsanan ha akon han kagamhanan ha pagkamagurang?” Oo, mas ginpili ni Esau an usa ka yahong nga utan kay han iya katungod ha pagkamagurang! Basi magin legal ito nga transaksyon, hi Jacob nagsiring:  “Panumpa ha akon yana.” Waray pag-alang nga iginhatag ni Esau an iya katungod ha pagkamagurang. Katapos hito, “hi Jakob hinatag ha kan Esaw hin tinapay ngan hin utan nga mga liso nga lenteha; ngan hiya kinaon ngan ininom, ngan binuhát, ngan nagpadayon paglakat: amo ito an pagtamay ni Esaw han iya kagamhanan ha pagkamagurang.”—Gen. 25:29-34.

⁹ Paglabay han mga tuig, han naghunahuna hi Isaac nga hirani na hiya mamatay, ginhikay ni Rebeca nga makarawat gud ni Jacob an katungod ha pagkamagurang nga ginbaligya ni Esau. Han nasantop ni Esau ha urhi an iya sayop nga desisyon, nakimalooy hiya kan Isaac: “Bendisyoni ako, ako man liwat, O amay ko . . . Waray ka ba pagtipig hin bendisyon tungod ha akon?” Han nagsiring hi Isaac nga diri na niya puydi bag-uhon an iya bendisyon kan Jacob, ‘hi Esaw ginuliat hin daku, ngan nagtangis.’—Gen. 27:30-38.

10. Paonan-o gintagad han Dios hira Esau ngan Jacob, ngan kay ano?

¹⁰ Ano nga leksyon an aton hibabaroan ha disposisyon ni Esau hini nga asoy? Iya iginpakita nga mas importante ha iya an pagsunod ha iya mga hingyap kay han pagkarawat han mga bendisyon nga iginsaad ni Jehova sugad nga bahin han iya panurundon. Waray pabilhi ni Esau an iya katungod ha pagkamagurang ngan matin-aw nga diri gud hiya nahigugma ha Dios. Dugang pa, waray niya hunahunaa an magigin epekto ha iya tulin han iya ginbuhat. Ha luyo nga bahin, ginpabilhan gud ni Jacob an iya panurundon. Pananglitan, ginsunod niya an sagdon han iya mga kag-anak ha pagpili hin asawa. (Gen. 27:46–28:3) Tungod kay ginhimo ni Jacob ini nga desisyon nga nagkinahanglan hin pagpailob ngan pagsakripisyo, nagin kaapoy-apoyan hiya han Mesias. Paonan-o gintagad han Dios hira Esau ngan Jacob? Pinaagi han propeta nga hi Malakias, hi Jehova nagsiring: “Akon hinigugma hi Jakob; kondi ako nangalas kan Esaw.”—Mal. 1:2, 3.

11. (a) Kay ano nga mapulsanon ha aton nga mga Kristiano an ehemplo ni Esau? (b) Kay ano nga gin-unabi ni Pablo an pagin imoral may kalabotan ha ginbuhat ni Esau?

¹¹ Mapulsanon ba ha mga Kristiano yana an ginsisiring han Biblia mahitungod kan Esau? Oo. Hi apostol Pablo nagpahamangno ha mga Kristiano nga magbantay nga ‘waray bisan hin-o an sadang magin imoral o waray apresasyon ha sagrado nga mga butang, pariho kan Esau nga an katungod ha pagkasuhag iginbalyo ha usa nga pagkaon.’ (Heb. 12:16) Ito nga pahamangno aplikado pa gihapon ha mga Kristiano. Kinahanglan pirme naton pabilhan an sagrado nga mga butang basi diri kita madaog han makasasala nga mga hingyap ngan mawara an aton espirituwal nga panurundon. Kondi kay ano nga gin-unabi ni Pablo an pagin imoral may kalabotan ha ginbuhat ni Esau? Kay kon an usa ka tawo magpadaog ha iya mga hingyap pariho kan Esau, posible gud nga madagmit hiya makabuhat hin sala sugad han imoralidad ngan mawawara niya an iya panurundon.

12. (a) Paonan-o kita ginsusulay ni Satanas? (b) Paghatag hin mga ehemplo ha Kasuratan nga mabulig ha aton kon ginsusulay kita nga magbuhat hin sayop.

¹² Sugad nga mga surugoon ni Jehova, nangangalimbasog gud kita nga likyan an mga kahimtang nga mahimo magresulta ha pagbuhat hin imoralidad. Nag-aampo kita nga buligan kita ni Jehova nga Dios kon may nagsusulay ha aton nga magtalapas ha Iya. (Mat. 6:13) Pero hi Satanas padayon nga nangangalimbasog pagpaluya han aton espirituwalidad samtang nangangalimbasog kita nga tipigan an aton integridad dinhi hinin maraot nga kalibotan. (Efe. 6:12) Sugad nga dios hinin maraot nga sistema, an Yawa maaram kon paonan-o niya gagamiton an aton mga hingyap pinaagi hin mga pagsulay nga makakadani ha diri hingpit nga mga tawo. (1 Cor. 10:8, 13) Pananglitan, hunahunaa nga aada ka ha sitwasyon nga may higayon ka nga buhaton an imo hingyap ha imoral nga paagi. Ano an imo bubuhaton? Susubaron mo ba hi Esau nga madagmit la nga nasulay? O aatohan mo an pagsulay ngan mapalagiw sugad han ginbuhat han anak ni Jacob nga hi Jose han ginsulay hiya han asawa ni Potipar?—Basaha an Genesis 39:10-12.

13. (a) Paonan-o ginsusubad han damu yana hi Jose, kondi paonan-o ginsusubad han iba hi Esau? (b) Ano an sadang naton buhaton basi diri kita magin pariho kan Esau?

¹³ Damu han aton kabugtoan an inatubang hin mga pagsulay ngan kinahanglan magpili kon hin-o an ira susubaron kanda Esau ngan Jose. Kadam-an an nagin maaramon ngan ira napalipay an kasingkasing ni Jehova. (Prob. 27:11) Kondi, an iba han aton kabugtoan nagdesisyon nga subaron hi Esau ngan nawara nira an ira espirituwal nga panurundon. Ha pagkamatuod, kada tuig damu an gindidisiplina ngan ginpapaiwas ha kongregasyon tungod han pagbuhat hin seksuwal nga imoralidad. Importante gud nga iandam naton an aton kasingkasing yana, antes pa kita mahingada ha mga sitwasyon nga masasarihan an aton integridad! (Sal. 78:8) Hisgotan naton an duha han mga puydi naton himoon basi iandam an aton kalugaringon ha pag-ato ha pagsulay ngan ha paghimo hin maaramon nga mga desisyon.

14. Ano nga mga pakiana an mabulig ha aton nga ‘kangalasan an maraot’ ngan ‘kumupkop ha maopay’?

¹⁴ An siyahan nga puydi naton himoon amo an paghunahuna han magigin resulta han aton ginbubuhat. An aton apresasyon ha aton espirituwal nga panurundon nadepende ha kahilarom han aton gugma kan Jehova, an naghatag hito nga panurundon. Kay kon hinigugma naton an usa nga tawo diri naton karuyag nga pasakitan hiya. Lugod, nangangalimbasog kita nga mapalipay hiya. Salit maopay nga maggahin kita hin panahon ha paghunahuna han magigin epekto ha aton ngan ha iba kon magpapadaog kita ha mahugaw nga mga hingyap. Sadang naton pakianhan an aton kalugaringon: ‘Ano an magigin epekto ha akon relasyon kan Jehova han akon pagbuhat han akon kalugaringon nga karuyag? Ano an magigin epekto ha akon pamilya han akon sayop nga buhat? Ano an magigin epekto hito ha akon kabugtoan ha kongregasyon? Makakapakdol ba ako ha iba?’ (Fil. 1:10) Mahimo liwat kita magpakiana: ‘An madaliay ba nga kalipay ha pagbuhat hin imoralidad makakawara han akon kabidoan katapos hito? Karuyag ko gud ba magin pariho kan Esau ngan magtangis tungod han duro nga kasubo kon masantop ko an akon ginbuhat?’ (Heb. 12:17) An paghunahuna hito nga mga pakiana mabulig ha aton nga ‘kangalasan an maraot’ ngan ‘kumupkop ha maopay.’ (Roma 12:9) Tungod han aton gugma kan Jehova mangangalimbasog gud kita nga diri mawara an aton panurundon.—Sal. 73:28.

15. Ano an mabulig ha aton nga magin andam ha pag-ato ha bisan ano nga pagsulay ngan mapanalipdan an aton espirituwalidad?

¹⁵ An ikaduha nga puydi naton himoon amo an pagpangandam ha pag-ato ha pagsulay. Damu an mga tagana ni Jehova ha aton basi makaato kita ha mga pagsulay han kalibotan ngan mapanalipdan an aton espirituwalidad. Upod hito an pag-aram ha Biblia, mga katirok, ministeryo, ngan pag-ampo. (1 Cor. 15:58) Ha kada panahon nga  iginsusumat naton kan Jehova an aton inaabat pinaagi ha pag-ampo ngan ha kada panahon nga madasigon nga nakikigbahin kita ha ministeryo, igin-aandam naton an aton kalugaringon ha pag-ato ha pagsulay. (Basaha an 1 Timoteo 6:12, 19.) Kinahanglan padayon nga mangalimbasog kita nga buhaton ini kon karuyag naton nga magin andam ha pag-ato ha pagsulay. (Gal. 6:7) Ginhihisgotan ini ha ikaduha nga kapitulo han Proberbios.

16, 17. Paonan-o kita maglalampos ha pagkaada han abilidad nga ginkikinahanglan ha paghimo hin maaramon nga mga desisyon?

¹⁶ An kapitulo 2 han Proberbios nag-aaghat ha aton nga mangalimbasog nga magkaada kinaadman ngan abilidad ha pagturotimbang. Ini nga mga kalidad mabulig ha aton ha pagdesisyon kon ano an pipilion, an husto o an sayop, an pagpugong ha aton mga hingyap o an pagbuhat hito ha sayop nga paagi. Kondi maglalampos la kita kon pangangalimbasogan gud naton ito. An Biblia nasiring: “Anak ko, kon ikaw kumarawat han akon mga pulong, ngan magtipig han akon mga sugo kaupod ha imo; basi ihilig mo an imo talinga ngada han kinaadman, ngan ibutang an imo kasingkasing ha sarabotan [o, husto nga pagturotimbang]; oo, kon ikaw magsangpit ha katinoan [o, pagsabot], ngan alsahon mo an imo tingog para ha sarabotan; kon mamiling ka ha iya sugad hin salapi, ngan magsusi para ha iya sugad hin para ha tinago nga mga bahandi: dida hito makakasabot ka han kahadlok kan Jehova, ngan makakaagi han paghibaro han Dios. Kay hi Jehova nahatag hin kinaadman; tikang ha iya baba nagawas an hibaro ngan an sarabotan.”—Prob. 2:1-6.

¹⁷ Kon sugad, matin-aw nga an aton kalamposan ha pagkaada han abilidad nga ginkikinahanglan ha paghimo hin maaramon nga mga desisyon nadepende ha aton pagsunod ha mga gin-unabi ha Proberbios. Makakatindog kita hin marig-on kontra ha mga pagsulay kon magpapamolde kita kan Jehova, kon padayon nga mag-aampo kita para han giya han Dios, ngan kon padayon nga pamimilngon naton an kahibaro han Dios pariho han pamiling hin tinago nga bahandi.

18. Ano an determinado ka nga padayon nga buhaton, ngan kay ano?

¹⁸ Hi Jehova naghahatag hin kahibaro, pagsabot, husto nga pagturotimbang, ngan kinaadman ha mga nangangalimbasog nga magkaada hito. Kon mas nangangalimbasog kita ha pamiling ngan paggamit hito, mas magigin duok kita ha naghahatag hito, hi Jehova. Ngan an aton duok nga relasyon kan Jehova nga Dios magpapanalipod ha aton kon umatubang kita hin pagsulay. Kon magpapabilin kita nga duok kan Jehova ngan may kahadlok ha iya, mapapanalipdan kita ha pagbuhat hin sayop. (Sal. 25:14; San. 4:8) Hinaot an aton pakigsangkay kan Jehova ngan an pag-aplikar han kinaadman han Dios magpagios ha aton ngatanan nga padayon nga maghimo hin mga desisyon nga makakapalipay ha kasingkasing ni Jehova ngan magpapanalipod han aton panurundon.