PIPIRA ka tuig na an naglabay, hira Roald ngan Elsebeth, usa nga mag-asawa nga hito nga panahon hirani na mag-50 anyos, mahimyang nga nagkikinabuhi ha Bergen, an ikaduha nga pinakadaku nga syudad ha Norway. Matinumanon nga nakikigbahin hira ha mga buruhaton han kongregasyon upod an ira mga anak nga hira Isabel ngan Fabian. Tigurang hi Roald ngan payunir hi Elsebeth, ngan aktibo nga mga magwarali hira Isabel ngan Fabian.

Kondi han Septyembre 2009, nagdesisyon an ira pamilya nga magsangyaw hin usa ka semana ha hirayo nga lugar. Salit hira Roald, Elsebeth, ngan hi Fabian, nga hito nga panahon 18 anyos, nagbiyahe ngadto ha Nordkyn, usa nga peninsula ha probinsya han Finnmark, ha igbaw han Arctic Circle. Didto, ha baryo han Kjøllefjord, nagsangyaw hira upod han iba nga kabugtoan nga kinadto liwat basi bumulig pagsangyaw. “Ha tinikangan hito nga semana,” siring ni Roald, “kontento gud ako kay naeskedyol ko an akon mga buruhaton basi makigbahin hinin espesyal nga buruhaton ha bug-os nga semana.” Kondi ha urhi hito nga semana, diri na namumurayaw hi Roald. Ano an nahitabo?

Hi Roald nagsiring: “Hi Mario, usa nga payunir ha Finnmark, tigda nga nagpakiana ha amon kon andam ba kami bumalhin ha bungto han Lakselv basi bumulig ha kongregasyon didto nga may 23 nga magwarali.” Natigdaan hi Roald hiton diri ginlalaoman nga pakiana. Hiya nagsiring: “Nahunahuna namon ni Elsebeth an posibilidad nga mag-alagad ha lugar nga mas daku an panginahanglan—pero dida na kon waray na ha amon poder an amon mga anak.” Kondi ha pipira ka adlaw nga nagsasangyaw hi Roald hiton hirayo nga lugar, nakita niya nga an mga tawo naruruyag mahibaro mahitungod kan Jehova. Kinahanglan nira an bulig yana—diri ha tidaraon. “Nakonsensya ako hito nga pakiana salit pipira ka gab-i nga diri ako nahingangaturog,” siring niya. Katapos gindul-ong ni Mario hi Roald ngan an iya pamilya ha Lakselv, mga 240 ka kilometro ha sur han Kjøllefjord. Karuyag ni Mario nga makita mismo han mga bisita an gutiay nga kongregasyon didto.

Ha Lakselv, iginpasyada hira ni Andreas, usa han duha nga tigurang didto, basi makita nira an lugar ngan an Kingdom Hall. An kongregasyon mahigugmaon nga nag-abiabi ha ira ngan nagsiring kanda Roald ngan Elsebeth nga malilipay gud an kabugtoan kon an ira pamilya mabalhin didto basi bumulig ha buruhaton han Ginhadian. Nahiyom nga nagsiring hi Andreas nga nagpaeskedyol na hiya hin interbyu ha trabaho para kanda Roald ngan Fabian! Ano an bubuhaton hini nga mga bisita?

Ini an siyahan nga reaksyon ni Fabian: “Diri ko karuyag bumalhin dinhi.” Diri hiya nalilipay paghunahuna nga iya babayaan an iya duok nga kasangkayan ha ira kongregasyon nga iya nakaupod tikang ha kabata ngan maukoy ha gutiay nga bungto. Ngan diri pa hiya tapos pag-eskwela ha pagin elektrisyan. Kondi, han hi Isabel (nga 21 anyos hito nga panahon) an ginpakianhan kon ano an iya masisiring mahitungod han pagbalhin, hiya nagsiring: “Ito gud an akon karuyag buhaton tikang pa hadto!” Kondi katapos hito, ini an iginsumat ni Isabel: “Han ginpamalandong ko ito, nahunahuna ko, ‘Maopay gud ba ini nga ideya? Mimingawon ba ako ha akon kasangkayan? Magpapabilin la ba ako ha amon kongregasyon diin kombinyente ngan nahiaraan na an mga butang?’” Ano an reaksyon ni Elsebeth ha imbitasyon? “Inabat ako nga gintagan ni Jehova hin toka an amon pamilya,” siring niya, “kondi nahunahuna ko liwat an amon balay nga bag-o pa la nga gin-ayad ngan an ngatanan nga gamit nga amon napundar ha sulod han naglabay nga 25 ka tuig.”

Han natapos na an usa ka semana, hi Roald ngan an iya pamilya binalik ha Bergen, kondi nahunahuna la gihapon nira an kabugtoan ha Lakselv, nga mga 2,100 ka kilometro an kahirayo. “Makadamu ako nag-ampo kan Jehova,” siring ni Elsebeth, “ngan padayon ako nga nakigkomunikar ha kabugtoan nga amon nakilala didto pinaagi ha pagpadara hin mga retrato ngan mga eksperyensya, ngan nagpapadara liwat hira.” Siring ni Roald: “Nagkinahanglan ako hin panahon basi makarawat ko nga mabalhin kami. Kinahanglan ko liwat pamurubuuton kon praktikal ba ito. Paonan-o namon masusuportahan an amon panginahanglan? Damu ka beses nga nag-ampo ako kan Jehova ngan nakiistorya ha akon pamilya ngan ha eksperyensyado nga kabugtoan.” Hi Fabian nagsiring: “Samtang mas ginhuhunahuna ko ito, mas nasantop ko nga waray gud ako makatadunganon nga hinungdan nga magbaribad. Agsob ako mag-ampo kan Jehova, ngan hinay-hinay nga nadugangan an akon hingyap nga bumalhin.” Kumusta hi Isabel? Basi iandam an iya kalugaringon ha posible nga pagbalhin, nagtikang hiya pagpayunir ha ira bungto. Katapos hin unom ka bulan nga pagpayunir, nga durante hito daku liwat nga panahon an iya gin-gamit ha personal nga pag-aram ha Biblia, inabat hiya nga andam na hiya bumalhin.

Samtang nadudugangan an hingyap hini nga pamilya nga mag-alagad ha lugar nga mas daku an panginahanglan hin magwarali, naghimo hira hin mga paagi basi makab-ot an ira tumong. Nag-i-enjoy gud hi Roald ha iya trabaho nga daku an sweldo, kondi naghangyo hiya nga mag-leave hin usa ka tuig. Pero ginsidngan hiya han iya agaron nga padayon nga magtrabaho hin part-time—duha ka semana nga matrabaho, ngan unom ka semana nga diri matrabaho. “Ginutiay gud an akon kità, pero okey la ito,” siring ni Roald.

Hi Elsebeth nagsiring: “Ginsidngan ako han akon bana nga mamiling hin balay ha Lakselv ngan papletehan an amon balay ha Bergen. Nagkinahanglan ito hin daku nga panahon ngan pangalimbasog, kondi naglampos kami. Waray pag-iha, an amon mga anak nakabiling hin part-time nga mga trabaho,” siring niya, “ngan ginbubuligan nira kami ha mga kagarastohan ha pagkaon ngan transportasyon.”

 Hi Isabel nagsiring: “Tungod kay gutiay an bungto nga amon ginbalhinan, an akon pinakadaku nga problema amo an pamiling hin trabaho basi suportahan an akon pagpayunir. May mga panahon nga baga hin nawawarayan na ako paglaom.” Pero pinaagi ha pagsulod ha bisan ano nga part-time nga trabaho nga iya naagian—siyam ha siyahan nga tuig—nasuportahan ni Isabel an iya mga panginahanglan. Kumusta hi Fabian? “Basi matapos an akon pag-eskwela sugad nga elektrisyan, kinahanglan mag-aprentis ako. Nag-aprentis ako ha Lakselv. Ha urhi, nakapasar ako ha eksaminasyon ngan nakaagi hin part-time nga trabaho sugad nga elektrisyan.”

Hi Marelius ngan an iya asawa nga hi Kesia karuyag liwat mag-alagad ha lugar nga mas daku an panginahanglan hin magwarali. Hi Marelius, nga 29 anyos na yana, nagsiring: “An mga pahayag ngan interbyu ha kombensyon mahitungod ha pagpayunir nagpagios ha akon nga hunahunaon an pagpauswag han akon pag-alagad.” Kondi hi Kesia, nga 26 anyos na yana, nakurian pagkarawat han ideya nga bumalhin ha lugar nga hirayo ha pamilya. “Nadiri gud ako paghunahuna nga mahihirayo ako ha akon mga hinigugma,” siring niya. Dugang pa, hi Marelius nagtatrabaho hin bug-os-panahon basi mabayaran an ira balay. Hiya nagsiring: “Ha bulig hi Jehova ngan han damu nga pag-ampo diin nangaro kami han iya bulig basi makahimo hin mga pagbag-o, nahimo namon an pagbalhin.” Siyahan, naggahin hira hin dugang nga panahon ha pag-aram ha Biblia. Katapos, ira ginbaligya an ira balay, binaya ha ira trabaho, ngan han Agosto 2011 binalhin hira ha syudad han Alta, ha norte han Norway. Basi masuportahan an ira pagpayunir didto, hi Marelius nagtatrabaho sugad nga accountant ngan hi Kesia nagtatrabaho ha usa nga tindahan.

Hira Knut ngan Lisbeth, usa nga mag-asawa nga sobra 30 anyos na yana, nabantad han mga eksperyensya ha Yearbook mahitungod ha mga nag-aalagad ha lugar nga mas daku an panginahanglan hin magwarali han Ginhadian. “Ini nga mga eksperyensya nagpagios ha amon nga hunahunaon an pag-alagad ha iba nga nasud,” siring ni Lisbeth, “pero nag-alang ako kay nagruhaduha ako kon mahihimo ba ini hin ordinaryo nga tawo sugad ha akon.” Bisan pa hito, naghimo hira hin mga paagi basi makab-ot an ira tumong. Hi Knut nagsiring: “Ginbaligya namon an amon apartment, ngan basi makatirok, linungon kami ha akon nanay. Ha urhi, basi masarihan kon ano an kahimtang han pag-alagad ha iba nga nasud, binalhin kami ha English nga kongregasyon ha Bergen ha sulod hin usa ka tuig, ngan linungon kami ha nanay ni Lisbeth.” Waray pag-iha, inabat hira Knut ngan Lisbeth nga andam na hira bumalhin, ngan hirayo an ira ginbalhinan—ha Uganda. Nauli hira ha Norway duha ka bulan kada tuig basi magtrabaho. Hito nga paagi may igo hira nga kwarta para ha ira pagkinabuhi ngan pagsangyaw hin bug-os-panahon ha Uganda ha nabibilin nga mga bulan han tuig.

Ano an resulta han desisyon hinin kabugtoan nga andam magsakripisyo? Hi Roald nagsiring: “Mas daku nga panahon nga nagkakaurupod kami sugad nga pamilya dinhi hini nga lugar kay han nakadto kami ha Bergen. An amon pamilya mas duok na ha usa kag usa. Bendisyon gud an pakakita nga an amon mga anak nag-uuswag ha espirituwal.” Nagsiring liwat hiya: “Yana diri na kami naghihingyap hin materyal nga mga butang. Diri na ito sugad kaimportante han amon ginhunahuna.”

 Nasantop ni Elsebeth nga kinahanglan niya mag-aram hin iba nga yinaknan. Kay ano? Upod ha teritoryo han kongregasyon ha Lakselv an baryo han Karasjok, ha lugar han mga Sami—an nitibo nga mga tawo ha norte han Norway, Sweden, Finland, ngan Russia. Salit basi mas masayon makaistorya ini nga mga nitibo, hi Elsebeth nag-eskwela han yinaknan han mga Sami. Yana nakakaistorya na hiya gamit an simple nga mga pulong hito nga yinaknan. Nag-i-enjoy ba hiya ha iya bag-o nga teritoryo? Hiya malipayon nga nagsiring: “Unom an akon Bible study. Malipayon gud ako ha akon pag-alagad dinhi!”

Hi Fabian, nga yana payunir na ngan ministeryal nga surugoon, nagsiring nga ha ira bag-o nga kongregasyon, hira ni Isabel nakabulig hin tulo nga tin-edyer nga nagkinahanglan hin pagdasig basi mas makigbahin ha mga buruhaton han kongregasyon. Iton tulo nga tin-edyer aktibo na yana ha ministeryo. Ngani, duha ha ira an bawtismado na ngan nag-auxiliary payunir han Marso 2012. Usa han mga tin-edyer nga hadto nagtikang na pagluya an espirituwalidad an nagpasalamat kanda Fabian ngan Isabel ha pagbulig ha iya nga “magin madasigon utro.” Hi Fabian nagsiring: “Nabantad gud ako han nagsiring hiya hito. Makalilipay gud an pagbulig ha iba!” Hi Isabel nagsiring: “Hini nga toka, akon gud ‘natilawan ngan nakita nga hi Jehova maopay.’” (Sal. 34:8) Nagsiring liwat hiya: “Labot pa hito, makalilipay gud an pag-alagad dinhi!”

Yana hira Marelius ngan Kesia mas simple na an pagkinabuhi, pero mas mapulsanon ito. An kongregasyon ha Alta, nga ira ginbalhinan, may 41 na yana nga magwarali. Hi Marelius nagsiring: “Ha paghinumdom han naglabay, makapadasig gud hunahunaon an daku nga pagbag-o ha amon kinabuhi. Nagpapasalamat kami kan Jehova nga nakakag-alagad kami ha iya dinhi sugad nga mga payunir. Waray na gud mas mapulsanon pa hito.” Nagsiring liwat hi Kesia: “Nahibaro ako nga mas bug-os nga sumarig kan Jehova, ngan ginmamangnoan gud niya kami. Nasantop ko liwat nga an pag-ukoy nga hirayo ha akon mga paryente nakakabulig ha akon nga mas pabilhan an mga higayon nga nagkakaurupod kami. Waray gud ako magbasol ha amon desisyon.”

Kumusta hira Knut ngan Lisbeth ha Uganda? Hi Knut nagsiring: “Nagkinahanglan hin panahon basi makapahiuyon ha bag-o nga lugar ngan kultura. Ha panapanahon nagkakaproblema kami ha tubig, koryente, ngan sakit ha tiyan, kondi nakakagdumara kami hin bisan pira nga Bible study nga amon karuyag!” Hi Lisbeth nagsiring: “Mga 30 minutos la tikang ha amon gin-uukyan, may mga teritoryo nga waray pa gud masangyawi han maopay nga sumat. Pero kon napakadto kami, nakikita namon an mga tawo nga nagbabasa han Biblia ngan naghahangyo ha amon nga tutdoan hira. Waray gud kapariho an kalipay han pagtutdo han mensahe han Biblia hiton mapainubsanon nga mga indibiduwal!”

Sigurado nga malipayon gud an aton Lider nga hi Kristo Jesus nga makita tikang ha langit kon paonan-o iginpapadayon ha mas damu gud nga lugar ha tuna an pagsangyaw nga buruhaton nga iya gintikangan! Oo, para ha ngatanan nga katawohan han Dios, makalilipay gud an pagsakripisyo basi buhaton an iginsugo ni Jesus nga ‘manhimo hin mga tinon-an ha ngatanan nga nasud.’—Mat. 28:19, 20.