1, 2. (a) Ano nga klase hin Dios hi Jehova ha nasud han Israel? (b) Ano nga pakiana an hihisgotan hini nga artikulo?

HA PANAHON ni Nehemia, ginkarawat han usa nga grupo hin mga Lebihanon ha ira pag-ampo ha publiko nga an ira kaapoy-apoyan pauroutro nga “riniwa ha pagsugot” ha mga sugo ni Jehova. Kondi pauroutro nga ginpamatud-an ni Jehova nga hiya “an Dios nga andam ha pagpasaylo, maaghupon ngan maloloy-on, mahinay ha pagkasina, ngan hura hin mahigugmaon nga pagpaid.” An mga binalik tikang ha pagkabihag ha panahon ni Nehemia padayon nga ginpakitaan ni Jehova hin diri-matupngan nga pagkabuotan.—Neh. 9:16, 17.

² An tagsa ha aton mahimo magpakiana ha aton kalugaringon: ‘Paonan-o ako makakapahimulos ha pagpasaylo ni Jehova?’ Basi buligan kita nga mabaton inin importante nga pakiana, aton usisahon kon paonan-o gintratar ni Jehova an duha nga lalaki nga nagpahimulos ha Iya pagpasaylo—an duha nga hadi nga hira David ngan Manases.

3-5. Paonan-o hi David nakabuhat hin dagku nga sala?

³ Bisan kon hi David may kahadlok ha Dios, nakabuhat hiya hin dagku nga sala. An duha hito may kalabotan ha mag-asawa nga hira Uria ngan Batseba. An mga resulta hito makasurubo gud ha ngatanan nga nahidabi. Kondi an paagi han pagtadong ni Jehova kan David may-ada damu nga igintututdo may kalabotan ha pagpasaylo ni Jehova. Tagda an nahitabo.

⁴ Hi David nagsugo ha kasundalohan han Israel nga likosan an Raba, an kapital han Amon. Mga 80 ka kilometro ito ha este han Jerusalem, ha tabok han Salog Jordan. Samtang waray an kasundalohan, hi David nakadto ha atop han iya palasyo ha Jerusalem ngan iya nakita nga nakarigo an usa nga inasaw-an nga babaye, hi Batseba. Waray an bana ni  Batseba. Naruyagan gud ni David hi Batseba salit nagsugo hiya nga dad-on hi Batseba ha iya palasyo, ngan nakabuhat hira hin pag-adulteryo.—2 Sam. 11:1-4.

⁵ Han hinbaroan ni David nga burod hi Batseba, ginpauli niya ha Jerusalem an bana ni Batseba nga hi Uria kay karuyag niya nga makighilawas hi Uria kan Batseba. Kondi hi Uria nadiri bisan pagsulod ha ira balay bisan kon gin-inaghat hiya ni David. Salit an hadi sekreto nga nagsurat ha kumander han iya kasundalohan nga ibutang hi Uria “ha giaatubangi han gimapapasoi nga away” ngan nagsugo nga paatrason an iya mga igkasi-sundalo. Masayon la nga napatay han mga kaaway hi Uria sugad han plano ni David. (2 Sam. 11:12-17) Salit an sala han hadi nga pag-adulteryo nadugangan tungod kay iya iginpapatay an usa nga inosente nga tawo.

6. Ano an ginbuhat han Dios han nakasala hi David, ngan ano an igintututdo hito ha aton mahitungod kan Jehova?

⁶ Syempre, nakita ni Jehova an ngatanan nga nahitabo. Waray naitatago ha iya. (Prob. 15:3) Bisan kon ha urhi gin-asawa han hadi hi Batseba, “waray malipay an GINOO han ginbuhat ni David.” (2 Sam. 11:27, Maopay nga Sumat) Salit ano an ginbuhat han Dios? Iya ginsugo an iya propeta nga hi Natan nga kumadto kan David. Tungod kay hi Jehova mapinasayloon nga Dios, matin-aw nga karuyag niya makabiling hin basihan ha pagpakita hin kalooy kan David. Diri ba nakakaliaw ini nga ginbuhat ni Jehova? Waray Niya pirita hi David nga magsumat han iya sala kondi ginsugo la Niya hi Natan nga magsaysay ha hadi hin istorya nga nagpapakita nga maraot gud an iya ginbuhat. (Basaha an 2 Samuel 12:1-4.) Epektibo gud ito nga paagi han pagsulbad hiton komplikado nga sitwasyon!

7. Ano an reaksyon ni David ha gin-istorya ni Natan?

⁷ An ilustrasyon ni Natan nakaaghat kan David nga umabat nga ginkikinahanglan an hustisya. Nasina hi David ha riko nga tawo ha istorya ngan nagsiring kan Natan: “Sugad nga hi Jehova buhi, an tawo nga nagbuhat hini angay patayon.” Dugang pa, hi David nagsiring nga an mga nawara ha biktima hito nga kawaray hustisya sadang bayaran. Kondi hi Natan nagsiring kan David: ‘Ikaw amo an tawo!’ Katapos ginsidngan hi David nga sugad nga resulta han iya ginbuhat, an “kampilan” diri mabulag ha iya panimalay ngan magkakaada mga trahedya ha iya pamilya. Papakaalohan liwat hiya ha kadaygan tungod han iya mga sala. Nasantop ni David an kabug-at han iya nabuhat nga mga sala ngan mabinasulon nga iya ginkarawat: “Nakasala ako patok kan Jehova.”—2 Sam. 12:5-14.

8, 9. Paonan-o iginpapakita han Salmo 51 an tinuod nga inabat ni David, ngan ano an igintututdo hito ha aton mahitungod kan Jehova?

⁸ An mga pulong han usa nga kanta nga ginkomposo ni Hadi David katapos hito nagpapakita han iya kinasingkasing nga pagbasol. Mababasa ha Salmo 51 an makapabantad nga mga pakimalooy ni David kan Jehova, ngan iginpapakita hito nga diri la kay ginkarawat niya an iya mga sala. Ginbasolan liwat niya ito. Pinakaimportante kan David an iya relasyon ha Dios. “Kontra ha imo, ha imo gud la, ako nakasala,” hiya nagsiring. Nakimalooy hiya kan Jehova: “Himoa ha akon, O Dios, an usa nga kasingkasing nga matalinis; ngan pagbag-ohi ako hin matadong nga espiritu ha sakob nakon. . . . Ulian ha akon an pagpahimulos han imo katalwasan; ngan pagpakadasigon ako ha espiritu nga malipay.” (Sal. 51:1-4, 7-12) Sugad ka ba hito kasinsero ngan katangkod kan Jehova kon nagsusumat ka ha iya han imo mga sala?

⁹ Waray panalipdi ni Jehova hi David ha magraot nga resulta han iya mga sala. An mga epekto hito nagpadayon tubtob nga buhi hiya. Kondi, tungod han mabinasulon nga disposisyon ni David—may-ada hiya ‘ruba ngan mabinasulon  nga kasingkasing’—ginpasaylo hiya ni Jehova. (Basaha an Salmo 32:5; Sal. 51:17) Nasasabtan han Makagarahum-ha-ngatanan nga Dios an tinuod nga disposisyon ngan motibo han tawo nga nakasala. Salit imbes nga magsugo hin mga hukom nga tawo basi sentensyahan hin kamatayon hira David ngan Batseba uyon ha Mosaiko nga Balaud, hi Jehova mismo an naghukom ha ira, ngan nagpakita hiya hin kalooy. (Leb. 20:10) Ginhimo pa ngani han Dios an ira anak nga hi Salomon nga magin sunod nga hadi han Israel.—1 Kron. 22: 9, 10.

10. (a) Ano an posible nga ginbasaran ni Jehova ha pagpasaylo kan David? (b) Ano an nagpapagios kan Jehova nga magpasaylo?

¹⁰ Bangin usa pa nga hinungdan nga ginpasaylo ni Jehova hi David kay nagpakita hi David hin kalooy kan Saul. (1 Sam. 24:4-7) Sugad han ginsiring ni Jesus, an pagtratar ha aton ni Jehova pariho han aton pagtratar ha iba. “Diri kamo maghukom, basi diri kamo paghukman,” siring ni Jesus, “kay an paghukom nga iyo iginhuhukom, kamo man paghuhukman; ngan ha taraksan nga iyo igtatakos, gintataksan man ha iyo.” (Mat. 7:1, 2) Nakakaliaw gud hibaroan nga mapapasaylo ni Jehova an aton mga sala—bisan an mga sala nga sugad kadagku han pag-adulteryo o pagpatay! Bubuhaton niya ito kon kita andam magpasaylo, kon aton ginsusumat an aton mga sala ha iya, ngan kon aton ginbabag-o an aton disposisyon ha aton magraot nga buhat. Hi Jehova naghahatag hin “panahon nga mahalayahay” kon an mga nakasala sinsero nga nagbabasol.—Basaha an Buhat 3:19.

11. Ha ano nga mga paagi nagbuhat hi Hadi Manases hin maraot ha paniplatan han Dios?

¹¹ Tagda an usa pa nga asoy ha Kasuratan nga nag-iilustrar kon tubtob diin andam magpasaylo hi Jehova. Mga 360 ka tuig katapos magtikang pagmando hi David, hi Manases nagin hadi ha Juda. An iya 55-ka-tuig nga pagmando nahibantog tungod han karaotan, ngan tungod han iya mangil-ad nga mga buhat ginkondenar hiya ni Jehova. Pananglitan, naghimo hi Manases hin mga halaran para kan Baal, nagsingba ha “ngatanan nga binuhat ha langit,” ginpalatas ha kalayo an iya mga anak, ngan igin-aghat an espiritismo. Oo, “hiya nagbuhat hin daku nga karaotan ha paniplatan ni Jehova.”—2 Kron. 33:1-6.

12. Paonan-o hi Manases binalik kan Jehova?

¹² Ha urhi, hi Manases ginbihag ngan ginpriso ha Babilonya. Didto bangin nahinumdoman niya ini nga ginsiring ni Moises ha Israel: “Kon aada ka ha kakurian, ngan dumangat ini ngatanan nga mga bagay ha imo, ha urhi nga mga adlaw ikaw mabalik kan Jehova nga imo Dios, ngan mamamati han iya tingog.” (Deut. 4:30) Binalik hi Manases kan Jehova. Paonan-o?  Hiya “nagpaubos ha daku gud” ngan padayon nga “nag-ampo” ha Dios (sugad han makikita ha retrato ha pahina 21). (2 Kron. 33:12, 13) Waray kita mababasa ha Biblia kon ano gud an ginsiring ni Manases ha iya mga pag-ampo, kondi posible nga puropariho ito ha pag-ampo ni Hadi David ha Salmo 51. Anoman an kahimtang, bug-os nga nabag-o an disposisyon ni Manases.

13. Kay ano nga ginpasaylo ni Jehova hi Manases?

¹³ Ano an baton ni Jehova ha mga pag-ampo ni Manases? Hiya ‘namati ha pakimalooy ni Manases.’ Pariho kan David, nasantop ni Manases kon ano kadaku an iya mga sala ngan tinuod nga nagbasol. Salit ginpasaylo hiya han Dios ngan iginbalik ha pagin hadi ha Jerusalem. Sugad nga resulta, “hi Manases nakakilala nga hi Jehova hiya amo an Dios.” (2 Kron. 33:13) Nakakaliaw gud inin dugang nga pamatuod nga an aton maloloy-on nga Dios nagpapasaylo ha mga tinuod nga nagbabasol!

14. Ano an basihan ni Jehova ha pagpasaylo ha mga nakasala?

¹⁴ Pipira la ha katawohan han Dios yana an kinahanglan mangaro hin pasaylo ha nabuhat nga mga sala nga pariho kadagku han sala ni David ngan ni Manases. Kondi an pagpasaylo ni Jehova hinin duha nga hadi nagtututdo ha aton nga an aton Dios andam magpasaylo bisan ha dagku gud nga sala kon tinuod nga nagbabasol an nakasala.

15. Kay ano nga makakasiring kita nga hi Jehova diri awtomatiko nga nagpapasaylo?

¹⁵ Syempre, diri husto nga maghunahuna kita nga awtomatiko nga ginpapasaylo ni Jehova an mga sala han ngatanan nga tawo. May kalabotan hini, aton itanding an disposisyon ni David ngan ni Manases ha disposisyon han matinalapason nga katawohan han Israel ngan Juda. Ginsugo han Dios hi Natan nga komprontahon hi David ngan tagan hiya hin higayon nga magbasol. Mapasalamaton nga ginkarawat ni David ito nga higayon. Han makuri hinduro an kahimtang ni Manases, napagios  hiya nga sinsero nga magbasol. Kondi an katawohan han Israel ngan Juda kasagaran na nga diri nagbabasol. Salit waray hira pasayloa ni Jehova. Lugod, pauroutro nga ginsugo niya an iya mga propeta basi ipahayag an iya panhunahuna ha ira pagkamatinalapason. (Basaha an Nehemia 9:30.) Bisan han an mga bihag binalik na ha ira kalugaringon nga tuna tikang ha Babilonya, hi Jehova padayon nga nagsugo hin matinumanon nga mga mensahero, sugad han saserdote nga hi Esra ngan han propeta nga hi Malakias. Han ginbuhat han katawohan an kaburut-on ni Jehova, nagin malipayon gud hira.—Neh. 12:43-47.

16. (a) Para ha nasud han Israel ha kabug-osan, ano an resulta han ira pagin diri mabinasulon? (b) Ano nga higayon an iginhahatag ni Jehova ha mga indibiduwal nga katulinan han nasud han Israel?

¹⁶ Katapos sugoon hi Jesus nganhi ha tuna ngan igintagana an amo la nga hingpit nga halad lukat, waray na karawata ni Jehova an mga halad nga hayop han Israel. (1 Juan 4:9, 10) Sugad nga tawo, iginpahayag ni Jesus an panhunahuna han iya Amay han iya ginsiring inin makapabantad nga mga pulong: “Jerusalem, Jerusalem, nga nagpapatay han mga manaragna, ngan nagbabato han mga sinugo nganhi ha iya: Makapira nga buot ko pagtirukon an imo mga anak, sugad han usa nga ugang nga nagtitirok han iya mga kapisoan ha sirong han iya mga pako, ngan kamo nadiri.” Tungod hito hi Jesus nagsiring: “Kitaa, an iyo balay binabayaan ha iyo nga mamingaw.” (Mat. 23:37, 38) Salit an makasasala ngan diri mabinasulon nga nasud han Israel ginsaliwnan han espirituwal nga Israel. (Mat. 21:43; Gal. 6:16) Kondi kumusta man an indibiduwal nga mga Israelita? Mahimo hira magpahimulos ha pagpasaylo ngan kalooy ni Jehova kon magpakita hira hin pagtoo ha Dios ngan ha halad ni Jesu-Kristo. Ito nga higayon ihahatag liwat ha mga tawo nga namatay nga waray magbasol ha ira mga sala kondi ginbanhaw ha Paraiso nga tuna.—Juan 5:28, 29; Buh. 24:15.

17, 18. Paonan-o kita mapapasaylo ni Jehova?

¹⁷ Tungod kay hi Jehova andam magpasaylo ha aton, ano an sadang naton buhaton? Sadang naton subaron an ginbuhat ni David ngan ni Manases. Sadang naton karawaton nga makasasala kita, magbasol han aton mga sala, sinsero nga makimalooy kan Jehova nga pasayloon kita, ngan hangyoon hiya nga hatagan kita hin putli nga kasingkasing. (Sal. 51:10) Kon nakabuhat kita hin daku nga sala, sadang liwat kita magsumat ha mga tigurang ngan mangaro hin bulig ha ira. (San. 5:14, 15) Anoman an aton kahimtang, nakakaliaw hinumdoman nga sugad han iginhulagway ni Jehova kan Moises, hiya “usa ka Dios nga maloloy-on ngan mapinairon, mahinay ha pagkasina, ngan hura hin pagkalooy ngan hin kamatuoran: matinipigon hin pagkalooy ha mga yinukot, mapinasayloon hin karat-an ngan hin pagtalapas ngan hin sala.” Hi Jehova waray magbag-o.—Eks. 34:6, 7.

¹⁸ Pinaagi ha paggamit hin mapwersa nga pagtanding, hi Jehova nagsaad ha mabinasulon nga mga Israelita nga bug-os nga papasayloon niya an ira mga sala. An ira mga sala nga sugad kapula han “eskarlata” iya hihimoon nga sugad kabusag hin “niebe.” (Basaha an Isaias 1:18.) Kon sugad, paonan-o kita makakapahimulos ha pagpasaylo ni Jehova? Bug-os nga mapapasaylo an aton mga sala kon mapasalamaton kita ha pagpasaylo ni Jehova ngan mabinasulon.

19. Ano an aton hihisgotan ha sunod nga artikulo?

¹⁹ Tungod kay ginpapasaylo kita ni Jehova, paonan-o naton hiya masusubad ha aton pagtratar ha usa kag usa? Paonan-o naton malilikyan an pagin diri mapinasayloon ha mga nakahimo hin daku nga sala kondi tinuod nga nagbabasol? An sunod nga artikulo mabulig ha aton nga usisahon an aton kasingkasing basi mas masubad naton an aton Amay, hi Jehova, nga “maopay ngan andam ha pagpasaylo.”—Sal. 86:5.