Tipigi an Imo Pag-abat hin Pagkaapurado
Tipigi an Imo Pag-abat hin Pagkaapurado
“Magwali ka han pulong; maniguro ka gud.”—2 TIM. 4:2.
MAISASAYSAY MO BA?
Kay ano nga gin-aghat hi Timoteo nga magsangyaw nga may pagkaapurado?
Paonan-o naton matitipigan an aton pag-abat hin pagkaapurado?
Kay ano nga an pagsangyaw han Ginhadian mas apurado gud yana?
1, 2. Ano nga mga pakiana an nabangon may kalabotan ha sugo nga “maniguro” o magin apurado ha pagsangyaw?
AN MGA tawo nga an trabaho pagtalwas hin mga kinabuhi kasagaran na nga nagbubuhat hito nga may pag-abat hin pagkaapurado. Pananglitan, an mga bombero nagdadagmit pagresponde kon may sunog kay maaram hira nga namimeligro an mga kinabuhi.
2 Sugad nga mga Saksi ni Jehova, karuyag naton buligan an mga tawo nga maluwas. Tungod hito, importante gud ha aton an pagsangyaw han maopay nga sumat han Ginhadian. Pero bisan kon apurado an aton buruhaton, diri naton ito ginbubuhat nga nalilisang. Hi Pablo nagsiring ha 2 Timoteo 4:2: “Magwali ka han pulong; maniguro ka gud.” An Griego nga pulong nga iginhubad nga “maniguro” nagpapasabot liwat han “pagbuhat nga may pagkaapurado.” Kon sugad, ano an karuyag sidngon ni Pablo? Paonan-o kita magigin apurado ha pagsangyaw? Ngan kay ano nga apurado gud an aton pagsangyaw?
KAY ANO NGA APURADO AN ATON PAGSANGYAW?
3. Ano an mahimo magin resulta kon an mga tawo kumarawat o magdumiri ha mensahe han Ginhadian?
3 Kon imo ginhuhunahuna nga an aton pagsangyaw mahimo makaluwas hin kinabuhi, sigurado nga naabat ka nga kinahanglan mo gud isumat ha iba an maopay nga sumat. (Roma 10:13, 14) An Pulong han Dios nasiring: “Kon akon sidngon an maraot: Ikaw ha waray ruhaduha mapatay; kon hiya tumalikod tikang ha iya sala, ngan magbuhat hadton subay ha balaud ngan matadong; . . . ha waray ruhaduha hiya mabubuhi, hiya diri mamamatay. Waray han iya mga sala nga iya ginbuhat hinunumdoman patok ha iya.” (Esek. 33:14-16) Oo, an Biblia nasiring ha mga nagtututdo han mensahe han Ginhadian: “Maluwas ka ngan an imo mamarati.”—1 Tim. 4:16; Esek. 3:17-21.
4. Kay ano nga kinahanglan tipigan ni Timoteo an pag-abat hin pagkaapurado?
4 Basi masabtan kon kay ano nga gin-aghat ni Pablo hi Timoteo nga magsangyaw nga may pagkaapurado, tagda an konteksto han aton tema nga teksto. Ini an aton mababasa: “Magwali ka han pulong; maniguro ka gud ha panahon, ngan ha diri panahon; magbadlong ka, magsaway ka, maglaygay ka, upod an higlawig nga pagpailob ngan panutdo. Kay maabot an panahon nga diri hira mag-aantos han putli nga pagturon-an; kondi, tungod ha ira magkatol nga mga talinga, magtitirok hira hin ira mga lugaringon nga magturutdo nga magsusunod ha ira mga kalugaringon nga kaipa; ngan ira ipahirayo an ira mga talinga tikang ha kamatuoran.” (2 Tim. 4:2-4) Hi Jesus nagtagna nga magkakaada apostasya. (Mat. 13:24, 25, 38) Salit kinahanglan apurado nga ‘iwali [ni Timoteo] an pulong’ bisan ha sulod han kongregasyon basi an mga Kristiano diri masulay hini nga apostasya ngan malimbongan han buwa nga mga katutdoan. Namimeligro an ira kinabuhi. Kumusta man yana?
5, 6. Ano nga popular nga mga katutdoan an gintotoohan han damu nga aton nakakaistorya ha ministeryo?
5 An pag-apostata tikang ha tinuod nga pagsingba nag-uuswag na ngan nagsasarang ha damu nga lugar. (2 Tes. 2:3, 8) Ano nga sayop nga mga katutdoan an naruruyagan han mga tawo yana? Ha damu nga lugar, an ebolusyon igintututdo nga may pariho nga kadasig han pagtutdo hin relihiyon. Bisan kon an ebolusyon kasagaran na nga iginsasaysay pinaagi han syensya, sugad hin nagin relihiyon na ito nga nakakaapekto ha pagtagad han mga tawo ha Dios ngan ha ira igkasi-tawo. Usa pa nga popular nga katutdoan amo nga an Dios diri interesado ha aton salit diri kita kinahanglan magin interesado ha iya. Kay ano nga ini nga mga katutdoan makaruruyag hinduro ha minilyon nga tawo nga tungod hito nahingangaturog hira ha espirituwal? Kay ginpapatoo hito an mga tawo nga puydi nira buhaton an bisan ano kay diri hira huhukman. Ini an karuyag mabatian ngan toohan han damu nga tawo.—Basaha an Salmo 10:4.
6 Pero may iba pa nga katutdoan nga gintotoohan han mga tawo. Karuyag mabatian han iba nga nasingba pa nga anoman an ira ginbubuhat, hinigugma hira han Dios. An iba naruruyag pagpamati ha ira mga padi o pastor nga nasiring nga an mga seremonya, Misa, piyesta, ngan imahen may bendisyon han Dios. Ini nga mga parasingba bangin diri maaram nga peligroso an ira sitwasyon. (Sal. 115:4-8) Pero kon bubuligan naton hira nga makamata ha espirituwal basi masabtan nira an tinuod nga mensahe han Biblia, makakapahimulos hira ha Ginhadian han Dios.
ANO AN KAHULOGAN HAN PAGSANGYAW NGA MAY PAGKAAPURADO YANA?
7. Paonan-o naton maipapakita an pag-abat hin pagkaapurado?
7 An maopay nga doktor kinahanglan magpokus ha iya pag-opera kay bangin mamatay an pasyente. Ha aton ministeryo, maipapakita naton nga naabat kita hin pagkaapurado pinaagi ha pagpokus ha aton pagsangyaw, sugad han paghunahuna kon ano nga mga topiko, pakiana, o impormasyon an bangin makapainteres ha mga tawo ha teritoryo. An pag-abat hin pagkaapurado makakapagios liwat ha aton nga bag-uhon an aton eskedyol basi mabisita an mga tawo ha oras nga mas andam hira mamati ha aton mensahe.—Roma 1:15, 16; 1 Tim. 4:16.
8. Ano an kasagaran na nga nahiuupod ha pag-abat hin pagkaapurado?
8 An pag-abat hin pagkaapurado nag-uupod liwat hin pagkaada mga prayoridad. (Basaha an Genesis 19:15.) Pananglitan, sidngon ta nga katapos mo makuha an resulta han imo eksaminasyon, ginkaistorya ka han imo doktor ngan nagsiring: “Delikado an imo sakit. Kinahanglan panginanoon mo ito dayon; ayaw na paghulat nga lumabay pa an usa ka bulan.” Posible nga diri ka mag-aapura paggawas ha iya opisina pariho hin bombero nga gintawagan nga may sunog. Lugod, mamamati ka hin maopay ha iya iginrirekomenda, katapos mauli ka ngan mamumurubuot kon ano an siyahan mo nga bubuhaton.
9. Kay ano nga masisiring naton nga hi Pablo nagsangyaw nga may pagkaapurado han nakadto hiya ha Efeso?
9 Masasabtan naton an pag-abat ni Pablo hin pagkaapurado kon aton babasahon an iya ginsiring ha mga tigurang ha Efeso mahitungod han iya pagsangyaw ha distrito han Asia. (Basaha an Buhat 20:18-21.) Tikang ha iya siyahan nga adlaw didto, nagin okupado hiya ha pagsangyaw han maopay nga sumat ha balay-balay. Dugang pa, ha sulod hin duha ka tuig regular hiya nga nagpapahayag “adlaw-adlaw didto ha liburan ni Tirano.” (Buh. 19:1, 8-10) Matin-aw nga ha rutina ni Pablo nakita an iya pag-abat hin pagkaapurado. Syempre, an sugo nga magsangyaw nga may pagkaapurado waray ihatag basi makapabug-at ha aton. Pero sadang naton magin prayoridad an pagsangyaw.
10. Kay ano nga nalilipay kita nga an mga Estudyante han Biblia nagsangyaw nga may pagkaapurado?
10 Antes han 1914, usa nga gutiay nga grupo han mga Estudyante han Biblia an nagtikang han buruhaton nga pagsangyaw. Iginpakita han ira susbaranan an kahulogan han pag-abat hin pagkaapurado. Bisan kon pipira la hira ka yukot, maaram hira han pagkaapurado han panahon ngan madasigon nga nagsangyaw han Ginhadian. Nagpapublikar hira hin mga sermon ha sobra 2,000 nga dyaryo ngan nagpasalida han “Photo-Drama of Creation,” usa nga programa nga may mga slide ngan sine. Hito nga paagi, minilyon an nakabati han maopay nga sumat. Kon waray hira umabat hin pagkaapurado, sugad ba kadamu an makakabati han mensahe han Ginhadian?—Basaha an Salmo 119:60.
PAG-IKMAT NGA DIRI MAWARA AN IMO PAG-ABAT HIN PAGKAAPURADO
11. Kay ano nga an iba nawad-an han pag-abat hin pagkaapurado?
11 May mga butang nga mahimo magin hinungdan nga an usa diri na maghunahuna nga importante gud an pagsangyaw. An sistema ni Satanas gindisenyo basi aghaton kita nga ubuson an aton panahon ha personal ngan diri importante nga mga buruhaton. (1 Ped. 5:8; 1 Juan 2:15-17) An iba nga hadto gin-uuna an pag-alagad kan Jehova nawad-an han pag-abat hin pagkaapurado. Pananglitan, hi Demas usa nga Kristiano nga igkasi-magburuhat ni Pablo, pero ha urhi nagin mas importante ha iya an mga butang ha kalibotan. Imbes nga padayon nga parig-unon hi Pablo ha panahon han kakurian, ginbayaan niya hi Pablo.—Filem. 23, 24; 2 Tim. 4:10.
12. Ano nga higayon an iginhahatag ha aton yana, ngan ano nga mga higayon an aton mapapahimulsan ha waray kataposan?
12 Kon karuyag naton matipigan an pag-abat hin pagkaapurado, kinahanglan atohan naton an pagsulay nga pahimulsan an mga butang nga maitatanyag han kinabuhi yana. Kinahanglan mangalimbasog kita nga ‘madakop an kinabuhi nga totoo.’ (1 Tim. 6:18, 19) Sigurado nga natoo ka nga ha kinabuhi nga waray kataposan ilarom han Ginhadian han Dios, magkakaada kita waray tubtoban nga mga higayon ha pagpahimulos hin makalilipay nga mga buruhaton. Kondi an higayon yana nga makabulig ha iba nga makatalwas ha Armagedon diri na gud mauutro.
13. Ano an makakabulig ha aton nga matipigan an aton pag-abat hin pagkaapurado?
13 Tungod kay kadam-an yana an nakaturog ha espirituwal, ano an makakabulig ha aton nga diri mawara an pag-abat hin pagkaapurado? Kinahanglan hinumdoman naton nga hadto sugad kita hin nakaturog ha kasisidman. Pero ginpukaw kita, ngan hi Kristo naglamrag ha aton, sugad han gin-unabi ni Pablo. Yana pribilehiyo naton nga ipasanag ha iba an kalamrag. (Basaha an Efeso 5:14.) Katapos ito unabihon, hi Pablo nagsiring: “Tan-awa niyo hin maopay kon mationan-o iton iyo panggawi, diri sugad ha mga diri maaram, kondi sugad ha mga maaram; pagpahimulosan an oras, kay an mga adlaw magraot.” (Efe. 5:15, 16) Hinin maraot nga kalibotan, aton ‘pahimulosan an oras’ ha mga buruhaton nga makakabulig ha aton nga magpabilin nga nagmamata ha espirituwal.
NAGKIKINABUHI KITA HA IMPORTANTE HINDURO NGA PANAHON
14-16. Kay ano nga mas apurado na gud yana an pagsangyaw han Ginhadian?
14 An Kristiano nga ministeryo apurado na tikang pa hadto, pero mas apurado gud ito yana. Tikang han 1914, nagin matin-aw na an tigaman nga igintagna ha Pulong han Dios. (Mat. 24:3-51) Labaw kay ha kan-o pa man, namimeligro an kinabuhi han mga tawo. Bisan kon an pinakagamhanan nga mga nasud may kasabotan para ha kamurayawan, may-ada la gihap hira mga 2,000 nga armas nuklear nga magagamit ha pagbomba ha bisan diin nga bahin han tuna. Damu ka beses nga an mga awtoridad nagreport nga “nawawara” an mga materyales nga ginagamit ha paghimo hin mga armas nuklear. Posible ba nga an iba hito aadto ha mga terorista? An iba nasiring nga madali la poohon an ngatanan nga tawo pinaagi hin girra nga terorista an nagpatikang. Kondi diri la girra an puydi makabungkag ha katawohan.
15 “An pagbag-o han klima amo an pinakadaku nga peligro ha kahimsog han mga tawo ha bug-os nga kalibotan hinin ika-21 ka siglo,” siring han usa nga report han The Lancet ngan University College London han 2009. Nagsiring ito: “An mga epekto ha kahimsog han pagbag-o han klima makakaapekto ha kadam-an nga tawo ha masunod nga mga dekada salit mas mamimeligro an kinabuhi ngan kahimsog han binilyon nga tawo.” Damu nga lugar an mahimo madaot tungod han paghitaas han tubig ha dagat, mga huraw, baha, epidemya, magkusog nga bagyo, ngan han mga girra tungod han kakulang hin mga suplay. Oo, namimeligro an katawohan tungod han mga girra ngan kalamidad.
16 Bangin maghunahuna an iba nga kon magkaada girra nuklear, an mga resulta hito an magigin katumanan han “tigaman” nga igintagna ni Jesus. Pero kadam-an an diri nakakasabot han tinuod nga kahulogan han tigaman. Damu na ka dekada nga nakikita naton ito, nga nagpapakita nga tinuod an presensya ni Kristo ngan hirani na an kataposan hini nga sistema. (Mat. 24:3) Yana gud naton nakikita hin matin-aw an damu hinduro nga bahin hito nga tigaman. Panahon na nga magmata an mga tawo tikang ha pagkaturog ha espirituwal. An aton ministeryo makakabulig ha ira nga magmata.
17, 18. (a) Ano an epekto ha aton han pagkinabuhi ha kataposan nga mga adlaw? (b) Ano an makakapagios ha mga tawo nga bag-uhon an ira panhunahuna mahitungod ha mensahe han Ginhadian?
17 Halipot na la an nabibilin nga panahon basi pamatud-an naton an aton gugma kan Jehova ngan tapuson an pagsangyaw nga buruhaton nga igintoka ha aton hinin kataposan nga mga adlaw. An ginsiring ni Pablo ha mga Kristiano ha Roma may-ada mas daku gud nga kahulogan ha aton yana: “Hinbaroan ta na an panahon, nga oras na nga kamo igmamata tikang ha pagkaturog; kay niyan hurohirani na an aton kaluwasan, kay ngan han pagtikang ta han pagtoo.”—Roma 13:11.
18 An mga igintagna nga mahitatabo ha kataposan nga mga adlaw makakabulig ha mga tawo nga masantop an ira espirituwal nga panginahanglan. Nasasantop han iba nga an tawo nagkikinahanglan hin bulig kon ira ginhuhunahuna an kapakyas han mga gobyerno han tawo ha pagsulbad han kakurian ha ekonomiya, peligro nga magkaada girra nuklear, madarahog nga krimen, o kadaot han tuna. An iba nagigin interesado ha mensahe han Ginhadian tungod han mga problema ha ira pamilya, sugad han pagkasakit, pagdiborsyo, o kamatay han usa nga hinigugma. Salit kon nakikigbahin kita ha ministeryo, puydi naton buligan ini nga mga indibiduwal.
NAPAGIOS HAN PAG-ABAT HIN PAGKAAPURADO
19, 20. Paonan-o an pag-abat hin pagkaapurado nagpagios ha damu nga Kristiano nga bag-uhon an ira estilo han pagkinabuhi?
19 An pag-abat hin pagkaapurado nagpagios ha damu nga Kristiano nga dugangan an ira pakigbahin ha ministeryo. Pananglitan, usa nga batan-on nga mag-asawa ha Ecuador an nagdesisyon nga pasimplihon an ira kinabuhi katapos nira mabatian an programa ha adlaw han espesyal nga asembleya han 2006 nga may ulohan nga “Tipigi nga Simple an Imo Mata.” Iginlista nira an ira mga gamit nga diri nira kinahanglan, ngan waray pa magtulo ka bulan binalhin hira tikang ha ira apartment nga tulo an kwarto ngadto ha apartment nga usa la an kwarto, iginbaligya an ira iba nga gamit, ngan ginbayaran an ngatanan nga ira utang. Waray pag-iha nag-auxiliary payunir hira ngan ginsunod an suhestyon han paramangno han sirkito nga bumulig ha usa nga kongregasyon nga mas daku an panginahanglan.
20 Usa nga bugto ha Estados Unidos an nagsurat: “Han tinambong kami han akon asawa ha usa nga asembleya han 2006, bawtismado na kami hin 30 ka tuig. Samtang nagbibiyahe tipauli tikang ha asembleya, amon ginhisgotan kon paonan-o namon maiaaplikar an sagdon nga pasimplihon an amon kinabuhi. (Mat. 6:19-22) May-ada kami tulo nga balay, tuna, marahalon nga mga sarakyan, motorboat, ngan motor home. Inabat kami nga baga kami hin diri maaramon nga mga Kristiano, salit nagdesisyon kami nga himoon nga tumong an pag-alagad hin bug-os-panahon. Han 2008 nagregular payunir kami pariho han amon anak nga babaye. Makalilipay gud an mas duok nga pakig-upod ha kabugtoan ha ministeryo! Nagin posible ha amon nga mag-alagad ha lugar nga mas daku an panginahanglan. Sugad man, nagin mas duok kami kan Jehova tungod han pagbuhat hin labaw pa para ha iya. Makalilipay hinduro labi na an pakakita ha mga tawo nga nalilipay gud kon nababatian nira ngan nasasabtan an kamatuoran ha Pulong han Dios.”
21. Ano nga kahibaro an nagpapagios ha aton nga magsangyaw nga may pag-abat hin pagkaapurado?
21 Maaram kita han hirani na mahitabo hinin maraot nga sistema—an “adlaw ha paghukom ngan pagbungkag ha mga tawo nga diri magtinahuron ha Dios.” (2 Ped. 3:7) An aton kahibaro ha Pulong han Dios nagpapagios ha aton nga madasigon nga ipasamwak an tiarabot nga daku nga kagol-anan ngan an bag-o nga kalibotan. Padayon nga naabat gud kita hin pagkaapurado nga isumat ha mga tawo an tinuod nga paglaom ha tidaraon. Pinaagi han pagbuhat han ngatanan nga aton mahihimo hinin apurado nga buruhaton, iginpapakita naton an tinuod nga gugma ha Dios ngan ha aton igkasi-tawo.
[Mga Pakiana]
