Tipigi an Positibo nga Disposisyon han Kongregasyon

“An grasya han Ginoo nga Jesu-Kristo umupod ha iyo espiritu.”—FIL. 4:23.

PAONAN-O NATON MAAAGHAT AN IBA HA KONGREGASYON NGA MAGKAADA POSITIBO NGA DISPOSISYON . . .

samtang nakikig-upod kita ha kabugtoan?

pinaagi han aton kadasig ha ministeryo?

pinaagi han pagsumat ha mga tigurang han dagku nga sala?

1. Kay ano nga ginkumendasyonan an mga kongregasyon ha Filipos ngan Tiatira?

 AN SIYAHAN-SIGLO nga mga Kristiano ha Filipos mga pobre. Kondi mahinatagon hira ngan nagpakita hin daku nga gugma ha ira mga igkasi-tumuroo. (Fil. 1:3-5, 9; 4:15, 16) Salit ha kataposan han surat ni apostol Pablo ha ira, hiya nagsiring: “An grasya han Ginoo nga Jesu-Kristo umupod ha iyo espiritu.” (Fil. 4:23) Sugad liwat hito an “espiritu” o disposisyon han mga Kristiano ha Tiatira salit an ginhimaya nga hi Jesu-Kristo nagsiring ha ira: “Maaram ako ha imo mga buhat, ngan an imo gugma, ngan an imo pagtoo, ngan an imo pagkaministro, ngan an imo pagpailob, ngan, nga an imo urhi nga mga buhat labi pa kay han siyahan.”—Pah. 2:19.

2. Paonan-o an aton disposisyon nakakaimpluwensya ha disposisyon han aton kongregasyon?

² An tagsa nga kongregasyon han mga Saksi ni Jehova yana nagpapakita hin usa nga espiritu, o kabug-osan nga disposisyon. May mga kongregasyon nga kilala ha pagin buotan ngan mahigugmaon. An iba madasigon gud ha pagsuporta ha pagsangyaw nga buruhaton ngan ha bug-os-panahon nga pag-alagad. Kon an tagsa ha aton nagkukultibar hin positibo nga disposisyon, nabulig kita basi magkaurosa ngan mas mag-uswag ha espirituwal an kongregasyon. (1 Kor. 1:10) Pero kon negatibo an aton disposisyon, mahimo maimpluwensyahan an aton mga kakongregasyon nga magluya an espirituwalidad, mawad-an hin kadasig ha ministeryo, ngan konsinteron pa ngani an dagku nga sala. (1 Kor. 5:1; Pah. 3:15, 16) Ano an disposisyon han iyo kongregasyon? Paonan-o ka makakabulig basi magkaada positibo nga disposisyon an iyo kongregasyon?

BULIG BASI MAGKAADA POSITIBO NGA DISPOSISYON

3, 4. Paonan-o naton madadayaw hi Jehova ha kongregasyon?

³ An salmista nagkanta: “Tatagan ko ikaw [Jehova] hin  mga pasalamat didto hiton daku nga katig-uban: pagdadayawon ko ikaw dida ha damu nga mga tawo.” (Sal. 35:18) Gindayaw niya hi Jehova han upod niya an iba nga surugoon han Dios. An sinemana nga mga katirok, pati na an Pag-aram ha Barantayan, maopay gud nga mga higayon ha pagpakita han aton kadasig ngan pagtoo pinaagi han aton mga komento. Maopay nga pakianhan naton ngatanan an aton kalugaringon: ‘Ginpapahimulsan ko gud ba an pribilehiyo han pagkomento ha mga katirok? Nag-aandam ba ako hin maopay basi makahatag hin mapulsanon nga mga komento? Sugad nga ulo han pamilya, ginbubuligan ko ba an akon mga anak nga abanse nga mag-andam hin mga komento ngan gintututdoan hira nga bumaton ha ira kalugaringon nga mga pulong?’

⁴ Iginpakita han salmista nga hi David an kalabotan han pagkanta ha pagin marig-on han aton kasingkasing. Hiya nagsiring: “An akon kasingkasing marig-on, O Dios, an akon kasingkasing marig-on: magkakanta ako, oo, magkakanta ako hin mga dayaw.” (Sal. 57:7) An mga kanta ha aton mga katirok maopay gud nga higayon para ha aton nga ‘magkanta hin mga pagdayaw’ kan Jehova nga may marig-on nga kasingkasing. Kon diri pa kita pamilyar ha iba han aton mga kanta, kay ano nga diri ito praktison durante han aton Pagsingba han Pamilya? Hinaot magin determinado kita nga ‘magkanta kan Jehova samtang buhi pa kita ngan magkanta hin pagdayaw ha iya samtang may-ada pa kita kinabuhi.’—Sal. 104:33.

5, 6. Paonan-o naton maipapakita an pagkamaabiabihon ngan pagkamahinatagon, ngan ano an epekto hito ha kongregasyon?

⁵ An pag-abiabi ha kabugtoan usa liwat nga paagi nga makakabulig kita basi magkaada mahigugmaon nga disposisyon an kongregasyon. Ha kataposan nga kapitulo han surat ni Pablo ha mga Hebreohanon, iya gin-aghat hira: “Ipadayon an iyo minagburugto nga pagsihigugmaay . . . Ayaw niyo hingalimti an pag-abiabi.” (Heb. 13:1, 2, Maopay nga Sumat) Usa nga maopay gud nga paagi ha pagpakita hin pagkamaabiabihon amo an pag-imbitar ha pangaon han mga nagbibiyahe nga paramangno ngan han ira asawa o han aton mga kakongregasyon nga aada ha bug-os-panahon nga pag-alagad. Hinumdumi liwat an mga balo, pamilya nga nagsusolo an kag-anak, o an iba pa nga makakapahimulos ha pakig-upod ha aton ha panapanahon ha pangaon o ha aton pagsingba han pamilya.

⁶ Ginsidngan ni Pablo hi Timoteo nga aghaton an iba nga ‘magbuhat hin maopay,  mamanggaran ha mag-opay nga buhat, maandam ha panhatag ngan ha kalooy; nga nagtitirok ha ira kalugaringon hin maopay nga patukoranan ha tidaraon, basi madakop nira an kinabuhi nga totoo.’ (1 Tim. 6:17-19) Gin-aaghat ni Pablo an iya mga igkasi-Kristiano nga mahibaro ha pagin mahinatagon. Bisan ha panahon nga makuri an ekonomiya, mahimo kita magin mahinatagon. Pananglitan, kon may sarakyan kita, mahimo naton pasakyon an iba nga kabugtoan tipakadto ha pagsangyaw o ha mga katirok. Kumusta man an kabugtoan nga nabubuligan ha sugad hito nga paagi? Paonan-o nira maipapakita an ira pagpasalamat ngan makabulig basi magkaada positibo nga disposisyon an kongregasyon? Puydi hira maghatag han ira maaakos basi makabulig ha kagarastohan han gasolina. Usa pa nga paagi nga maipapaabat naton ha kabugtoan nga ginkikinahanglan ngan ginhihigugma hira amo an paggahin hin mas damu nga panahon ha pakig-upod ha ira. Kon nagbubuhat kita hin maopay “ha panimalay han pagtoo” ngan andam nga gamiton an aton panahon ngan mga panag-iya ha pagbulig ha ira, maghihilarom an aton gugma ha ira ngan makakabulig kita nga magkaada positibo nga disposisyon an kongregasyon.—Gal. 6:10.

7. Paonan-o an diri pagsumat han kompidensyal nga mga butang nakakabulig basi matipigan an positibo nga disposisyon han kongregasyon?

⁷ Tagda an iba pa nga paagi nga mapaparig-on naton an gugma ha usa kag usa sugad nga Kristiano: an aton pakigsangkay ngan diri pagsumat han kompidensyal nga mga butang. (Basaha an Proberbios 18:24.) An tinuod nga sangkay diri nagsusumat han kompidensyal nga mga butang. Kon an usa nga bugto nagsusumat ha aton han iya panhunahuna ngan pagbati ngan natapod nga diri naton ito isusumat ha iba, an aton gugma ha usa kag usa nagigin mas marig-on pa gud. Hinaot makabulig kita nga magin sugad hin mahigugmaon nga pamilya an kongregasyon pinaagi ha pagin masasarigan nga sangkay nga diri nagsusumat han kompidensyal nga mga butang.—Prob. 20:19.

MAGIN MADASIGON HA MINISTERYO

8. Ano an iginsagdon ha mga taga-Laodisea, ngan kay ano?

⁸ Hi Jesus nagsiring ha kongregasyon ha Laodisea: “Maaram ako han imo mga buhat, nga ikaw diri mataghom ngan diri man mapaso: buot ko unta nga mataghom ka o mapaso. Busa kay makalabanhod ka, ngan diri mapaso ngan diri mataghom, itutupra ko ikaw ha akon baba.” (Pah. 3:15, 16) An mga taga-Laodisea diri madasigon ha ministeryo. Ito nga disposisyon posible nga nakaapekto liwat ha ira pagtratar ha usa kag usa. Salit hi Jesus mahigugmaon nga nagsagdon ha ira: “Ginsasaway ngan ginsisirotan ko an ngatanan nga akon ginhihigugma: busa magkasindak [“magin madasigon,” NW], ngan magbasol kamo.”—Pah. 3:19.

9. Paonan-o an aton kadasig ha ministeryo nakakaapekto ha disposisyon han kongregasyon?

⁹ Basi makabulig nga magkaada positibo nga  disposisyon an kongregasyon, kinahanglan magin madasigon kita ha ministeryo. Gin-organisa an kongregasyon basi bilngon an sinsero nga mga tawo ngan tutdoan hira han kamatuoran. Salit kinahanglan magin madasigon kita ha buruhaton nga paghimo hin disipulo, sugad han ginbuhat ni Jesus. (Mat. 28:19, 20; Luk. 4:43) Kon mas madasigon kita ha ministeryo, mas magkakaurosa kita sugad nga “mga kabulig han Dios ha pagbuhat.” (1 Kor. 3:9) Kon nakakaupod naton an iba ha ministeryo ngan naoobserbaran an ira pagdepensa ha ira pagtoo ngan pagpahayag han ira apresasyon ha espirituwal nga mga butang, napapagios kita nga mas higugmaon ngan tahuron hira. Sugad man, an pagburubligay ha ministeryo nagriresulta hin pagkaurosa han kongregasyon.—Basaha an Filipos 1:27.

10. Ano an epekto ha aton mga kakongregasyon kon ginpapauswag naton an aton ministeryo?

¹⁰ An aton pangalimbasog nga mapauswag an aton ministeryo may maopay liwat nga epekto ha iba. Kon nagpapakita kita hin mas daku nga pagtagad ha mga nakakaistorya naton ha ministeryo ngan nangangalimbasog nga maabot an ira kasingkasing, nagigin mas madasigon kita. (Mat. 9:36, 37) An kadasig nakakatapon liwat ha aton mga nakakaupod. Ginsugo ni Jesus an iya mga disipulo nga magsangyaw nga tagduha-duha, diri nag-uusahan la. (Luk. 10:1) Diri la kay nakaaghat ngan nagbansay ito ha ira kondi nakabulig liwat ito basi magin mas madasigon hira ha ministeryo. Diri ba nalilipay kita nga makaupod ha ministeryo an madasigon nga mga magwarali? An ira kadasig nakakaaghat ngan nakakabulig ha aton nga magpadayon ha buruhaton nga pagsangyaw.—Roma 1:12.

LIKAYI AN PAGNGURUTOB NGAN PAGTAGO HAN SALA

11. Ano an nagin disposisyon han pipira nga Israelita ha panahon ni Moises, ngan ano an nagin resulta hito?

¹¹ Pipira la ka semana katapos maestablisar an Israel sugad nga nasud, an mga Israelita nagtikang pagngurutob ngan pagreklamo. Ito an hinungdan nga nagrebelde hira kan Jehova ngan ha iya mga representante. (Eks. 16:1, 2) Gutiay la han mga Israelita nga binaya ha Ehipto an nakasulod ha Tuna nga Iginsaad. Bisan hi Moises waray tuguti nga makasulod tungod han iya reaksyon ha maraot nga disposisyon han mga Israelita! (Deut. 32:48-52) Ano an mahihimo naton yana basi diri magkaada negatibo nga disposisyon?

12. Paonan-o naton malilikyan an pagngurutob?

¹² Kinahanglan likyan naton an pagngurutob. An pagpaubos ngan pagtahod ha awtoridad makakabulig ha aton nga malikyan ini nga disposisyon. Importante liwat nga pilion naton hin maopay an aton mga kaupod. Makasurubo an resulta han pagpili hin diri maopay nga kaliawan o han paggahin hin daku hinduro nga panahon ha pakig-upod ha mga katrabaho o kaeskwela nga diri nasunod ha magtadong nga prinsipyo ni Jehova. Maaramon nga limitahan naton an pakig-upod ha mga mahilig magreklamo o nag-aaghat hin pagin independente.—Prob. 13:20.

13. Ano an iba pa nga maraot nga resulta han nakakadaot nga impluwensya han pagngurutob ha espirituwalidad han kongregasyon?

¹³ An nakakadaot nga impluwensya han pagngurutob mahimo magkaada iba pa nga maraot nga resulta ha espirituwalidad han kongregasyon. Pananglitan, an pagngurutob makakadaot han kamurayawan ngan pagkaurosa han kongregasyon. Dugang pa, an pagreklamo kontra ha mga igkasi-tumuroo diri la makakapasubo ha ira kondi mahimo liwat magtugway ngadto ha pakasala hin pagpakaraot ngan panginsulto. (Leb. 19:16; 1 Kor. 5:11) An iba ha kongregasyon han siyahan nga siglo nga mahilig magngurutob ‘nagsikway han kagamhanan ngan nagbusa ha mga punoan.’ (Jud. 8, 16) Ito nga pagngurutob kontra ha kalalakin-an nga nangunguna ha kongregasyon sigurado nga waray uyuni han Dios.

14, 15. (a) Ano an mahimo magin epekto ha bug-os nga kongregasyon kon ibabalewaray an dagku nga sala? (b) Ano an sadang naton buhaton kon maaram kita nga an usa nga bugto nagbubuhat hin sekreto nga sala?

 ¹⁴ Ano man kon mahibaro kita nga an usa nagbubuhat hin sekreto nga sala sugad han sobra nga pag-inom hin makahurubog nga irimnon, pagkinita hin pornograpiya, o pagbuhat hin imoralidad? (Efe. 5:11, 12) Kon aton ibabalewaray an dagku nga sala, makakaulang ito ha paggios han baraan nga espiritu ni Jehova ngan mamimeligro an kamurayawan han bug-os nga kongregasyon. (Gal. 5:19-23) Sugad la nga kinahanglan kuhaon han siyahan nga mga Kristiano ha Korinto an ngatanan nga karaotan, kinahanglan liwat naton kuhaon an magraot nga impluwensya dida ha kongregasyon basi matipigan an positibo nga disposisyon hito. Ano an imo mahihimo basi makabulig nga magin mamurayawon an kongregasyon?

¹⁵ Sugad han gin-unabi na, importante nga diri isumat an pipira nga butang nga kompidensyal, labi na kon ginsusumat ha aton han iba an ira pagbati ngan panhunahuna. Sayop gud ngan nakakasakit an pagpinangistorya ha iba han kompidensyal nga impormasyon mahitungod ha usa! Pero kon may nakahimo hin daku nga sala, kinahanglan ito isumat ha mga tigurang. Hira an may Kasuratanhon nga responsabilidad ha pagpanginano hito. (Basaha an Lebitiko 5:1.) Salit kon maaram kita nga an usa nga bugto nakahimo hin daku nga sala, sadang naton hiya aghaton nga makiistorya ha mga tigurang ngan mangaro han ira bulig. (Jak. 5:13-15) Pero kon ha sulod hin igo nga panahon diri niya ito buhaton, sadang naton isumat ito.

16. Paonan-o an pagsumat ha mga tigurang kon may hinbabaroan kita nga nagbubuhat hin daku nga sala makakabulig ha pagtipig han positibo nga disposisyon han kongregasyon?

¹⁶ An Kristiano nga kongregasyon usa nga espirituwal nga arayopan, ngan kinahanglan bumulig kita ha pagpanalipod hito pinaagi ha pagsumat ha mga tigurang kon may nakabuhat hin daku nga sala. Kon mabuligan nira an nakasala nga masantop nga daku gud an iya sala ngan magbasol hiya ngan karawaton an disiplina, diri na mamimeligro an disposisyon han kongregasyon. Kondi ano man kon an nakasala diri nagbabasol ngan diri nasunod ha mahigugmaon nga sagdon han mga tigurang? Papaiwason hiya ha kongregasyon. Kon diri kita ‘nakikig-upod-upod ha sugad hito nga tawo,’ nakukuha an nakakadaot nga impluwensya ha kongregasyon ngan natitipigan an positibo nga disposisyon hito. (Basaha an 1 Korinto 5:11.) Oo, basi matipigan an disposisyon han kongregasyon, an tagsa ha aton may responsabilidad nga isumat ha mga tigurang an dagku nga sala, makigkooperar ha ira, ngan protektahan an kaopayan han aton mga igkasi-tumuroo.

DASIGA AN IBA NGA TIPIGAN AN “PAGKAUROSA HAN ESPIRITU”

17, 18. Ano an mabulig ha aton nga matipigan an “pagkaurosa han espiritu”?

¹⁷ Pinaagi ha ‘pagpadayon han igintututdo han mga apostol,’ an siyahan nga mga sumurunod ni Jesus nakabulig nga magkaurosa an kongregasyon. (Buh. 2:42) Ira ginpabilhan an Kasuratanhon nga sagdon ngan instruksyon han mga tigurang. An mga tigurang yana nakooperar ha matinumanon ngan maaramon nga uripon, salit an ngatanan ha kongregasyon naaaghat ngan nabubuligan nga magpabilin nga nagkakaurosa. (1 Kor. 1:10) Kon ginsusunod naton an basado ha Biblia nga instruksyon han organisasyon ni Jehova ngan han mga tigurang, iginpapakita naton nga kita ‘nagtitinguha ha pagbantay ha pagkaurosa han espiritu ha gapos han kamurayawan.’—Efe. 4:3.

¹⁸ Salit himoon naton an ngatanan basi matipigan an positibo nga disposisyon han kongregasyon. Kon bubuhaton naton ito, makakasiguro kita nga ‘an grasya han Ginoo nga Jesu-Kristo maupod ha aton espiritu.’—Fil. 4:23.

[Mga Pakiana]

[Retrato ha pahina 19]

Nabulig ka ba nga magkaada positibo nga disposisyon an kongregasyon pinaagi han pag-andam hin mapulsanon nga mga komento?

[Retrato ha pahina 20]

Bulig nga magkaada positibo nga disposisyon an kongregasyon pinaagi ha pagin pamilyar ha aton mga kanta