Subara an Pagkamabinantayon ni Jesus

“Magbantay kamo, ngan pag-ampo.”—MAT. 26:41.

ANO AN IMO BATON?

Paonan-o makikita ha aton mga pag-ampo nga mabinantayon kita?

Ha ano nga mga paagi naton maipapakita nga mabinantayon kita ha aton ministeryo?

Kay ano nga importante nga magin mabinantayon kita kon nakakaeksperyensya hin pagsari, ngan paonan-o naton ito mahihimo?

1, 2. (a) Ano an bangin ipakiana naton ha aton kalugaringon mahitungod han susbaranan ni Jesus ha pagkamabinantayon? (b) Mahimo ba masubad han makasasala nga mga tawo an hingpit nga susbaranan ni Jesus? Iilustrar.

 BANGIN maghunahuna ka: ‘Posible gud ba masubad an pagkamabinantayon ni Jesus? Kay kon huhunahunaon, hingpit hiya! Ngan may mga panahon nga maaram gud hiya han mahitatabo ha tidaraon, yinukot ka tuig pa ngani antes ito mahitabo! Kinahanglan gud ba hiya magin mabinantayon?’ (Mat. 24:37-39; Heb. 4:15) Batunon anay naton ito nga mga pakiana basi masabtan kon kay ano nga importante ngan kinahanglanon gud nga magin mabinantayon kita.

² Mahimo ba masubad han makasasala nga mga tawo an hingpit nga susbaranan? Oo, sugad la nga an estudyante nahibabaro ha susbaranan han maopay nga magturutdo. Pananglitan, handurawa an usa nga tawo nga siyahan pa la nga gintutdoan pagpana. Diri dayon hiya makakaigo han iya ginpupuntirya, kondi padayon hiya nga nag-aaram ngan nagpapraktis. Basi magin maopay magpana, gin-aadman niya hin maopay an susbaranan han iya magturutdo nga eksperto nga parapamana. Ginkikita niya hin maopay kon paonan-o natindog an iya magturutdo, an posisyon han iya mga butkon, ngan an iya pagkapot ha higot han bawog. Hinay-hinay nga nahibabaro an determinado nga estudyante kon ano kakusog niya uunaton an higot; iya gintatagad an direksyon han hangin ngan padayon nga nangangalimbasog. Pinaagi ha pangalimbasog nga subaron an iya magturutdo, hinay-hinay nga an iya pagpana nagtitikahirani ha iya ginpupuntirya. Ha pariho nga paagi, padayon kita nga nangangalimbasog nga magin mas maopay nga Kristiano pinaagi ha pagsunod ha mga instruksyon ni Jesus ngan pagsubad ha iya hingpit nga susbaranan.

3. (a) Paonan-o iginpakita ni Jesus nga kinahanglan hiya magin mabinantayon? (b) Ano an aton hihisgotan hini nga artikulo?

³ Ginkinahanglan gud ba ni Jesus nga magin mabinantayon? Oo. Pananglitan, ha gab-i antes hiya mamatay, iya gin-aghat an  iya magtinumanon nga apostol: “Pag-agma kamo upod ha akon.” Nagsiring liwat hiya: “Magbantay kamo, ngan pag-ampo, basi diri kamo mahulog ha pagsulay.” (Mat. 26:38, 41) Bisan kon pirme mabinantayon hi Jesus, labi na nga karuyag niya magin mabinantayon ngan duok gud ha iya langitnon nga Amay hito nga mga oras nga makuri hinduro an iya kahimtang. Maaram hiya nga kinahanglan magin sugad liwat hito kamabinantayon an iya mga sumurunod, diri la hito nga panahon kondi pati ha tidaraon. Salit aton hisgotan kon kay ano nga karuyag ni Jesus nga magin mabinantayon kita. Katapos, aton usisahon an tulo nga paagi nga masusubad naton an pagkamabinantayon ni Jesus.

KON KAY ANO NGA KARUYAG NI JESUS NGA MAGIN MABINANTAYON KITA

4. Kay ano nga kinahanglan kita magin mabinantayon pirme?

⁴ Karuyag ni Jesus nga magin mabinantayon kita pirme tungod han duha nga hinungdan. Siyahan, diri kita maaram han ngatanan nga mahitatabo ha tidaraon. Han nakanhi hi Jesus ha tuna sugad nga tawo, maaram ba hiya han ngatanan nga mahitatabo ha tidaraon? Diri, kay hiya mapainubsanon nga nagsiring: “Mahitungod hito nga adlaw ngan oras, waray usa nga maaram, diri bisan an mga anghel ha langit, bisan an Anak kondi an Amay la.” (Mat. 24:36) Hito nga panahon, hi Jesus, “an Anak,” diri maaram kon san-o gud bubungkagon inin maraot nga kalibotan. Kumusta man kita yana? Limitado ba an aton hinbabaroan mahitungod ha tidaraon? Oo! Diri kita maaram kon san-o susugoon ni Jehova an iya Anak basi bungkagon inin maraot nga sistema. Kon maaram kita, kinahanglan pa gud ba nga magin mabinantayon kita? Hi Jesus nagsaysay nga an kataposan tigda nga maabot, ha panahon nga diri naton ginlalaoman; salit kinahanglan pirme kita mabinantayon.—Basaha an Mateo 24:43.

5, 6. (a) Paonan-o an aton kahibaro mahitungod ha Ginhadian han Dios mabulig ha aton nga magin mabinantayon? (b) Kay ano nga an aton hinbabaroan mahitungod kan Satanas nakakadugang han aton determinasyon nga magin mabinantayon?

⁵ Ikaduha, karuyag ni Jesus nga magpabilin kita nga mabinantayon tungod kay damu an aton hinbabaroan mahitungod ha tidaraon. Han nakanhi hiya ha tuna, maaram hiya han damu nga makalilipay nga butang mahitungod ha tidaraon nga diri gud hinbabaroan han kadam-an ha iya panahon. Bisan kon gutiay la an aton hinbabaroan kon itanding ha hinbabaroan ni Jesus, damu an iya igintutdo ha aton mahitungod ha Ginhadian han Dios ngan han bubuhaton hito ha diri na maiha. Samtang aton gin-oobserbaran an mga tawo ha aton palibot, ha eskwelahan man, ha trabaho, o ha aton teritoryo, diri ba nakikita naton nga kadam-an ha ira an diri gud maaram hinin makalilipay nga mga kamatuoran? Salit usa pa ini nga rason nga magin mabinantayon. Pariho kan Jesus, kinahanglan pirme kita alerto ha mga higayon ha pagsumat ha iba han aton hinbabaroan mahitungod ha Ginhadian han Dios. Birilhon an tagsa hito nga mga higayon, ngan diri naton karuyag nga karagan la ito. Namimeligro an kinabuhi han mga tawo!—1 Tim. 4:16.

⁶ May-ada pa hinbaroan hi Jesus nga nakabulig ha iya nga magpabilin nga mabinantayon. Maaram hiya nga determinado hi Satanas nga sulayon hiya, timarauton, ngan bungkagon an iya integridad. Iton mabangis nga kaaway pirme namimiling hin lain nga higayon ha pagsari ha iya. (Luk. 4:13) Waray gud hi Jesus magin kampante. Karuyag niya magin andam ha bisan ano nga pagsari, pagsulay man ito, pagkontra, o pagtimaraot. Diri ba sugad liwat hito an aton kahimtang? Maaram kita nga tubtob yana hi Satanas “sugad hin maaringasa nga leon, naglilinakat-lakat, pagpinamiling hin iya lalamyon.” Salit an Pulong han Dios nag-aaghat ha ngatanan nga Kristiano: “Magbuotan, ngan mag-agma kamo.” (1 Ped. 5:8) Kondi paonan-o naton ito mahihimo?

KON PAONAN-O MAGIGIN MABINANTAYON PINAAGI HAN PAG-AMPO

7, 8. Ano an iginsagdon ni Jesus mahitungod ha pag-ampo, ngan ano an iya iginpakita nga susbaranan?

⁷ An Biblia nasiring nga importante gud an pag-ampo basi magpabilin nga alerto, o mabinantayon ha espirituwal. (Kol. 4:2; 1 Ped. 4:7) Waray pag-iha katapos hangyoon ni Jesus an iya mga sumurunod  nga mag-agma upod ha iya, hiya nagsiring: “Magbantay kamo, ngan pag-ampo, basi diri kamo mahulog ha pagsulay.” (Mat. 26:41) Karuyag sidngon ba niya nga ito nga sagdon aplikado la hiton makuri nga sitwasyon nga ira gin-aatubang? Diri, usa ito nga prinsipyo nga sadang naton sundon kada adlaw.

⁸ Hi Jesus susbaranan gud ha pag-ampo. Bangin mahinumdoman mo nga makausa nag-ampo hiya ha iya Amay ha bug-os nga gab-i. (Basaha an Lukas 6:12, 13.) Handurawa ini: Katsaringsing adto, ngan posible nga hi Jesus nakadto hirani ha syudad han Kapernaum. Samtang nagtitikagab-i, sinagka hiya ha usa han mga bukid diin tikang hito nakikita an Dagat han Galilea. Samtang nagtitikasirom an palibot, bangin nakikita niya an kapawa han mga lampara ha Kapernaum ngan ha kahigrani nga baryo. Kondi han nag-ampo hiya kan Jehova, nakapokus gud hiya ha iya pag-ampo. Linabay an mga oras. Waray niya mapanginano an mga suga nga usa-usa nga napaparong o an pagbag-o han posisyon han bulan o an aringasa han mga hayop ha palibot. An iya pag-ampo posible gud nga nakasentro ha daku nga desisyon nga iya hihimoon—an pagpili han iya 12 nga apostol. Mahahanduraw naton hi Jesus nga kinasingkasing nga nagsusumat ha iya Amay han ngatanan nga iya ginhuhunahuna ngan nababarak-an mahitungod ha tagsa niya nga disipulo samtang sinsero nga nangangaro hiya hin giya ngan kinaadman.

9. Ano nga leksyon an aton hibabaroan ha susbaranan ni Jesus ha pag-ampo ha bug-os nga gab-i?

⁹ Ano nga leksyon an aton hibabaroan ha susbaranan ni Jesus? Nga kinahanglan mag-ampo kita hin maiha? Diri, kay mahigugmaon nga nagsiring hiya mahitungod ha iya mga sumurunod: “Matuod, an espiritu andam, kondi an unod maluya.” (Mat. 26:41) Bisan pa hito, masusubad naton hi Jesus. Pananglitan, nag-aampo ba kita ha aton langitnon nga Amay antes maghimo hin bisan ano nga desisyon nga makakaapekto ha espirituwalidad naton, han aton pamilya, o han aton mga igkasi-tumuroo? Igin-aampo ba naton an aton kabugtoan? Kinasingkasing ba kita nga nag-aampo imbes nga uroutruhon la an amo gihapon nga mga pulong? Tigamni liwat nga ginpabilhan ni Jesus an iya sinsero ngan pribado nga pakiistorya ha iya Amay. Ha kalibotan yana nga damu hinduro an buruhaton, masayon gud la naton hingalimtan kon ano an pinakaimportante. Kon maggagahin kita hin igo nga panahon ha sinsero ngan pribado nga pag-ampo, magigin mas alerto kita ha espirituwal. (Mat. 6:6, 7) Magigin mas duok kita kan Jehova, ginhihimo an ngatanan basi maparig-on an aton relasyon ha iya ngan malikyan an pagbuhat hin bisan ano nga makakapaluya hito.—Sal. 25:14.

KON PAONAN-O MAGIGIN MABINANTAYON HA PAGSANGYAW

10. Ano nga ehemplo an nagpapakita nga hi Jesus pirme alerto ha mga higayon nga magsangyaw?

¹⁰ Hi Jesus mabinantayon ha buruhaton nga igintoka ha iya ni Jehova. May mga trabaho nga puydi magpatlaag an hunahuna han nagtatrabaho nga waray maraot nga resulta. Pero damu nga trabaho an nagkikinahanglan hin pagpokus ngan pagin alerto, ngan sugad gud hito an Kristiano nga ministeryo. Hi Jesus pirme alerto ha iya buruhaton, namimiling hin mga higayon ha pagsangyaw han maopay nga sumat. Pananglitan, han inabot hiya ngan an iya mga disipulo ha bungto han Sikar katapos magbinaktas ha bug-os nga aga, an mga disipulo nagkalakat basi pumalit hin pagkaon. Hi Jesus nagpabilin hirani ha atabay han bungto basi pumahuway, pero nagpabilin hiya nga alerto, ngan nakaagi hiya hin higayon ha pagsangyaw. Usa nga Samaritana an inabot basi mag-alog. Puydi unta hi Jesus kumaturog o maghunahuna hin mga rason nga diri makiistorya ha iya. Pero nakiistorya hi Jesus ha iya ngan nagsangyaw ha makakombinse nga paagi salit damu nga umurukoy hito nga bungto an nabuligan. (Juan 4:4-26, 39-42) Puydi ba naton dugangan an aton pangalimbasog nga subaron hi Jesus, bangin pinaagi ha pagin mas alerto ha mga higayon nga magsangyaw ha mga tawo nga aton iginkikita kada adlaw?

11, 12. (a) Ano an ginsiring ni Jesus ha mga nagsari pag-ulang han iya buruhaton? (b) Paonan-o iginpakita ni Jesus an pagin timbang ha iya buruhaton?

¹¹ May mga panahon nga an mga tawo nga  maopay an intensyon nagsari pag-ulang han buruhaton ni Jesus. Ha Kapernaum, nabantad gud an mga tawo han iya milagroso nga panambal salit karuyag nira nga magpabilin hiya didto. Diri ito urusahon. Kondi an iya toka amo an pagsangyaw ha ngatanan nga “nagkawawara nga mga karnero, han balay ni Israel,” diri ha mga tawo ha usa la nga syudad. (Mat. 15:24) Salit iya ginsidngan ito nga mga tawo: “Kinahanglan gud, nga akon igwali an maopay nga sumat han ginhadian han Dios ha iba man nga mga bungto, kay tungod hini ako ginsugo.” (Luk. 4:40-44) Matin-aw nga an kinabuhi ni Jesus nakasentro ha iya ministeryo. Waray hiya magpaulang ha bisan ano.

¹² Sobra ba nga nakapokus hi Jesus ha iya buruhaton salit diri hiya timbang ngan waray na panahon nga malipay ha iba nga butang? Sagipo ba hiya hinduro ha iya ministeryo nga diri hiya maaram han panginahanglan han mga tawo? Diri, hi Jesus hingpit nga susbaranan ha pagin timbang. Malipayon hiya ha iya kinabuhi ngan ha pakig-upod ha iya kasangkayan. Napaid hiya ha mga pamilya ngan nasabtan gud niya an ira mga panginahanglan ngan problema. Iginpakita niya an iya gugma ha kabataan.—Basaha an Markos 10:13-16.

13. Paonan-o naton masusubad hi Jesus ha pagin mabinantayon ngan timbang ha ministeryo?

¹³ Samtang aton ginsusubad an pagin mabinantayon ni Jesus, paonan-o kita magigin timbang pariho ha iya? Diri kita nagpapaulang hini nga kalibotan. Bisan an kasangkayan ngan mga paryente nga maopay an intensyon bangin mag-aghat ha aton nga ibanan an aton ginhihimo ha ministeryo o magkinabuhi ha ira ginhuhunahuna nga normal nga kinabuhi. Pero kon ginsusubad naton hi Jesus, gintatagad naton an aton ministeryo sugad hin pagkaon. (Juan 4:34) Nagpaparig-on ito han aton espirituwalidad ngan nakakapalipay liwat ha aton. Kondi diri gud naton karuyag nga magin panatiko, nagpapakamatadong ha kalugaringon o diri nalilipay ha iba pa nga butang ha kinabuhi. Pariho kan Jesus, karuyag naton magin malipayon ngan timbang nga mga surugoon han “malipayon nga Dios.”—1 Tim. 1:11, NW.

KON PAONAN-O MAGIGIN MABINANTAYON HA PANAHON HAN PAGSARI

14. Ha mga panahon han pagsari, ano an sadang naton likyan, ngan kay ano?

¹⁴ Sugad han aton hinbaroan, iginhatag ni Jesus an pipira han iya pinakamapwersa nga pag-aghat nga magpabilin nga mabinantayon han nakaeksperyensya hiya hin duro nga pagsari. (Basaha an Markos 14:37.) Kon makuri an aton kahimtang, mas labi na nga kinahanglan naton hinumdoman an iya susbaranan. Damu han nakakaeksperyensya hin pagsari an nahingangalimot hinin importante nga kamatuoran nga duha ka beses nga gin-unabi ha libro han Proberbios: “May-ada dalan nga daw matadong ha usa ka tawo, kondi an kataposan hini amo an mga dalan ha kamatayon.” (Prob. 14:12; 16:25) Kon masarig kita ha aton kalugaringon nga panhunahuna, labi na ha mga panahon nga may-ada kita dagku nga problema, posible gud nga mameligro kita ngan an aton mga hinigugma.

15. Ano nga pagsulay an bangin maeksperyensyahan han usa nga ulo han pamilya ha panahon nga makuri an ekonomiya?

¹⁵ Pananglitan, an usa nga ulo han pamilya bangin  nangangalimbasog ha pagtagana han materyal nga panginahanglan han mga “iya kalugaringon.” (1 Tim. 5:8) Bangin masulay hiya nga karawaton an trabaho nga magigin hinungdan nga agsob hiya nga diri makatambong ha mga katirok, diri makapanguna ha pagsingba han pamilya, ngan diri makasangyaw. Kon masarig la hiya ha panhunahuna han tawo, bangin maghunahuna hiya nga makatadunganon ito ngan husto pa ngani. Kondi mahimo gud ito magresulta hin panluya ha pag-alagad o kadaot han iya relasyon kan Jehova. Mas maopay gud nga sundon an sagdon ha Proberbios 3:5, 6! Hi Salomon nagsiring: “Sarig kan Jehova ha bug-os mo nga kasingkasing, ngan ayaw sandig dida ha imo kalugaringon nga pagsabot: ha ngatanan mo nga dalan kilalaha hiya, ngan hiya magtututdo han imo mga agianan.”

16. (a) Ano nga susbaranan an iginpakita ni Jesus ha pagsarig ha kinaadman ni Jehova imbes nga ha iya kalugaringon? (b) Paonan-o hi Jesus ginsusubad han damu nga ulo han pamilya ha pagsarig kan Jehova ha makuri nga mga panahon?

¹⁶ Han hi Jesus nakaeksperyensya hin pagsari, waray gud hiya sumarig ha iya kalugaringon nga pagsabot. Hunahunaa la ito! An pinakamaaramon nga tawo nga nabuhi ha tuna waray sumarig ha iya kalugaringon nga kinaadman. Pananglitan, han ginsulay hiya ni Satanas, pauroutro nga binaton hiya: “Nahisurat na.” (Mat. 4:4, 7, 10) Sinarig hi Jesus ha kinaadman han iya Amay ha pag-ato ha pagsulay. Hito nga paagi iginpakita Niya an pagkamapainubsanon—usa nga kalidad nga waray gud kan Satanas ngan iya gintatamay. Nasarig ba liwat kita ha kinaadman ni Jehova? An usa nga ulo han pamilya nga nasubad ha pagin mabinantayon ni Jesus nagpapagiya ha Pulong han Dios labi na ha makuri nga mga panahon. Ha bug-os nga kalibotan, yinukot nga ulo han pamilya an nagbubuhat hito. Marig-on nga gin-uuna nira an Ginhadian han Dios ngan an tinuod nga pagsingba kay han ira materyal nga panginahanglan. Ha pagbuhat hito, ginmamangnoan nira an ira pamilya ha gimaopayi nga paagi. Ginbibendisyonan ni Jehova an ira pangalimbasog ha pagtagana han materyal nga panginahanglan han ira pamilya, sugad la han iya iginsaad.—Mat. 6:33.

17. Ano an nakakaaghat ha imo nga subaron an pagkamabinantayon ni Jesus?

¹⁷ Sigurado nga hi Jesus an pinakamaopay nga susbaranan ha pagin mabinantayon. An iya susbaranan praktikal, mapulsanon, ngan nagluluwas pa ngani hin kinabuhi. Hinumdumi nga determinado hi Satanas nga pakaturugon ka ha espirituwal—magluya an imo pagtoo, mawara an imo kadasig ha pag-alagad, ngan ikompromiso mo an imo integridad. (1 Tes. 5:6) Ayaw tuguti nga maglampos hiya! Pariho kan Jesus, magpabilin nga mabinantayon—ha imo pag-ampo, ministeryo, ngan pag-atubang ha mga pagsari. Ha pagbuhat hito, magigin malipayon ngan may katuyoan an imo kinabuhi bisan yana nga nagtitikahirani na an kataposan hini nga sistema. Kon magpapabilin ka nga mabinantayon, maaabtan ka ni Jesus nga alerto ngan sagipo ha pag-alagad ha Dios ha panahon nga umabot hiya basi bungkagon inin maraot nga kalibotan. Malilipay gud hi Jehova nga balosan an imo pagkamatinumanon!—Pah. 16:15.

[Mga Pakiana]

[Retrato ha pahina 6]

Hi Jesus nagsangyaw ha babaye ha may atabay. Ano an imo ginhihimo basi makasangyaw kada adlaw?

[Retrato ha pahina 7]

An pagbulig ha imo pamilya nga maparig-on an ira espirituwalidad nagpapakita nga mabinantayon ka