Pamatud-i nga Tinuod Ka nga Sumurunod ni Kristo
Pamatud-i nga Tinuod Ka nga Sumurunod ni Kristo
“An ngatanan nga mag-opay nga kahoy nabunga hin mag-opay nga bunga; kondi an maraot nga kahoy nabunga hin magraot nga mga bunga.”—MAT. 7:17.
1, 2. Ano an kaibahan han tinuod ngan diri tinuod nga mga sumurunod ni Kristo, labi na hinin panahon han kataposan?
HI Jesus nagsiring nga makikilala an kaibahan han tinuod ngan diri tinuod nga mga sumurunod niya pinaagi han ira mga bunga—an ira mga katutdoan ngan paggawi. (Mat. 7:15-17, 20) Oo, an mga tawo naiimpluwensyahan gud han ira iginsusulod ha hunahuna ngan kasingkasing. (Mat. 15:18, 19) Adton gintututdoan hin mga buwa, “magraot nga mga bunga” an nakikita ha ira, kondi adton gintututdoan han kamatuoran, “mag-opay nga bunga” an nakikita ha ira.
2 Iton duha nga klase hin bunga nakikita gud durante hinin panahon han kataposan. (Basaha an Daniel 12:3, 10.) An diri tinuod nga mga Kristiano may-ada sayop nga panhunahuna ha Dios ngan agsob nga salingkapaw an ira debosyon ha iya, samtang adton may-ada husto nga pagsabot ha espirituwal nagsisingba ha Dios “ha espiritu ngan ha kamatuoran.” (Juan 4:24; 2 Tim. 3:1-5) Nangangalimbasog hira ha pagsubad han mga kalidad ni Kristo. Kondi kumusta man kita? Samtang ginhihisgotan an masunod nga lima nga pangirilal-an han tinuod nga Kristiano, pakianhi an imo kalugaringon: ‘An akon ba paggawi ngan igintututdo uyon gud ha Pulong han Dios? Nakakadani ba ito ha mga namimiling han kamatuoran?’
Magkinabuhi Uyon ha Pulong han Dios
3. Ano an nakakalipay kan Jehova, ngan para ha tinuod nga mga Kristiano, ano an nahiuupod hito?
3 Hi Jesus nagsiring: “Diri an tagsa nga nagsisiring ha akon: Ginoo, Ginoo, makakasulod ha ginhadian han langit; kondi an nagbubuhat han kaburut-on han akon Amay, nga aadto ha langit.” (Mat. 7:21) Oo, an nakakalipay kan Jehova diri an pagsiring nga Kristiano kita kondi an pagbuhat han iya kaburut-on. Para ha tinuod nga mga sumurunod ni Kristo, nahiuupod hito an ira bug-os nga pagkinabuhi, pati na an ira panhunahuna ha kwarta, trabaho, kaliawan, mga kustomre ngan selebrasyon han kalibotan, pag-asawa ngan pagtagad ha igkasi-tawo. Kondi, ginsusubad han diri tinuod nga mga Kristiano an panhunahuna ngan paggawi han mga tawo ha kalibotan, nga nagtitikaraot gud hinin kataposan nga mga adlaw.—Sal. 92:7.
4, 5. Paonan-o naton masusunod an ginsiring ni Jehova ha Malakias 3:18?
4 Mahitungod hito, hi propeta Malakias nagsurat: “Kamo mabalik ngan magtitin-o han ginkakalainan han matadong ngan han maraot, han ginkakalainan niya nga nag-aalagad ha Dios ngan niya nga diri nag-aalagad ha iya.” (Mal. 3:18) Samtang imo ginpapamalandong ito, pakianhi an imo kalugaringon: ‘Pariho ba ako ha mga tawo ha kalibotan, o iba ako ha ira? Pirme ba ako nakikibagay ha akon mga kaeskwela o katrabaho, o marig-on nga ginsusunod ko an mga prinsipyo ha Biblia ngan gindidepensahan pa ngani ito kon kinahanglanon?’ (Basaha an 1 Pedro 3:16.) Syempre, diri naton karuyag nga baga hin nagpapakamatadong kita ha kalugaringon, kondi sadang magin iba kita ha mga diri nahigugma ngan diri nag-aalagad kan Jehova.
5 Kon may-ada kinahanglan bag-uhon ha imo paggawi, kay ano nga diri ito ig-ampo ngan parig-unon an imo espirituwalidad pinaagi han regular nga pag-aram han Biblia, pag-ampo, ngan pagtambong ha mga katirok? Kon mas ginsusunod mo an Pulong han Dios, mas magkakaada ka “mag-opay nga bunga,” pati na “an bunga han mga im-im nga nagsusumat han ngaran [han Dios].”—Heb. 13:15.
Isangyaw an Ginhadian han Dios
6, 7. May kalabotan ha pagpasamwak han mensahe han Ginhadian, ano an kaibahan han tinuod ngan diri tinuod nga mga Kristiano?
6 Hi Jesus nagsiring: “Kinahanglan gud, nga akon igwali an maopay nga sumat han ginhadian han Dios ha iba man nga mga bungto, kay tungod hini ako ginsugo.” (Luk. 4:43) Kay ano nga an Ginhadian han Dios an tema ni Jesus ha iya ministeryo? Maaram hiya nga sugad nga Hadi hito nga Ginhadian, upod han binanhaw nga kabugtoan niya nga igin-anak ha espiritu, tatapuson nira an hinungdan han kakurian han katawohan—an sala ngan an Yawa. (Roma 5:12; Pah. 20:10) Salit, iya ginsugo an iya mga sumurunod nga isangyaw an Ginhadian tubtob ha kataposan hini nga sistema. (Mat. 24:14) Adton nag-aangkon la nga sumurunod hira ni Kristo, diri nagbubuhat hini—ha pagkamatuod, diri nira ini mahihimo. Kay ano? Aton hisgotan an bisan tulo la nga hinungdan: Siyahan, diri nira maisasangyaw an diri nira nasasabtan. Ikaduha, kadam-an ha ira an diri mapainubsanon ngan waray kaisog ha pag-atubang ha pagtamay ngan pagkontra nga mahimo magin resulta han pagsangyaw han mensahe han Ginhadian. (Mat. 24:9; 1 Ped. 2:23) Ngan ikatulo, an diri tinuod nga mga Kristiano waray espiritu han Dios.—Juan 14:16, 17.
7 Kondi, nasasabtan han tinuod nga mga sumurunod ni Kristo kon ano an Ginhadian ngan kon ano an tutumanon hito. Dugang pa, gin-uuna nira an mga buruhaton para ha Ginhadian, iginpapasamwak ito ha bug-os nga kalibotan ha bulig han espiritu ni Jehova. (Sak. 4:6) Regular ka ba nga nakikigbahin hini nga buruhaton? Nangangalimbasog ka ba nga mag-uswag sugad nga magwarali han Ginhadian, bangin pinaagi ha pagkaada dugang nga panahon ha ministeryo o ha pagin mas epektibo hito? An iba nangangalimbasog nga mapauswag an ira ministeryo pinaagi ha mas epektibo nga paggamit han Biblia. “An pulong han Dios buhi, ngan maabtik,” nagsurat hi apostol Pablo, nga pirme ginagamit an Kasuratan ha pangatadongan.—Heb. 4:12; Buh. 17:2, 3.
8, 9. (a) Ano nga mga eksperyensya an nagpapakita nga importante an paggamit han Biblia ha aton ministeryo? (b) Paonan-o kita magigin mas epektibo ha paggamit han Biblia?
8 Samtang nagsasangyaw, ginbasa han bugto an Daniel 2:44 ha usa nga Katoliko ngan iya iginsaysay kon paonan-o magkakaada tinuod nga kamurayawan ngan kasigurohan pinaagi han Ginhadian han Dios. An lalaki binaton: “Nalilipay ako nga imo gin-abrihan an Biblia ngan iginpakita ha akon an ginsisiring hito imbes nga sumatan la ako.” Han ginbasahan hin teksto han bugto an usa nga babaye nga Griego Ortodokso an relihiyon, nagpakita hiya hin interes ngan damu an iya pakiana. Ha pagbaton, an Biblia gin-gamit liwat hini nga bugto ngan han iya asawa. Katapos, an babaye nagsiring: “Maaram ba kamo kon kay ano nga nakiistorya ako ha iyo? Tungod kay may dara kamo nga Biblia ngan ginbasa niyo ito.”
9 Syempre, importante an aton mga literatura salit kinahanglan itanyag ito ha mga tawo. Kondi, an Biblia gud an ginagamit naton. Salit kon diri mo ito agsob gamiton ha ministeryo, kay ano nga diri himoon nga tumong nga gamiton ito pirme? Mahimo ka magpili hin pipira nga teksto nga nagsasaysay han Ginhadian han Dios ngan kon paonan-o susulbaron hito an mga problema nga nababarak-an han mga tawo ha iyo lugar. Katapos, magin andam ha pagbasa hito ha imo pagsangyaw.
Kadungganan an Pagrepresentar ha Ngaran han Dios
10, 11. May kalabotan ha paggamit han ngaran han Dios, ano an kaibahan ni Jesus ha damu nga nag-aangkon nga iya sumurunod?
10 “Kamo an akon mga saksi, nasiring hi Jehova, ngan ako amo an Dios.” (Isa. 43:12) Para kan Jesu-Kristo, an gimaopayi nga Saksi ni Jehova, daku nga kadungganan an pagrepresentar ha ngaran han Dios ngan pagpakilala hito. (Basaha an Eksodo 3:15; Juan 17:6; Hebreo 2:12.) Ha pagkamatuod, hi Jesus gintawag nga “matinumanon nga testigo” tungod kay iginpasamwak niya an ngaran han iya Amay.—Pah. 1:5; Mat. 6:9.
11 Ha kabaliktaran, damu han nag-aangkon nga representante han Dios ngan han iya Anak an nagpapakita hin kawaray-pagtahod ha ngaran han Dios, ginkukuha pa ngani ito ha ira mga bersyon han Biblia. Ha pagpakita hin pariho hito nga panhunahuna, usa nga bag-o la nga instruksyon ha Katoliko nga mga obispo an nasiring nga “an ngaran han Dios ha tetragrammaton nga YHWH diri sadang gamiton o luwason” durante han pagsingba. * Sayop gud ito nga panhunahuna!
12. Paonan-o mas nakilala an mga alagad ni Jehova han 1931?
12 Ha pagsubad kan Kristo ngan ha damu nga “testigo” nga nabuhi antes ha iya, waray gud ikaawod han tinuod nga mga Kristiano an paggamit ha ngaran han Dios. (Heb. 12:1) Ha pagkamatuod, han 1931, mas nakilala hira nga mga alagad ni Jehova han ginkarawat nira an ngaran nga mga Saksi ni Jehova. (Basaha an Isaias 43:10-12.) Salit, an tinuod nga mga sumurunod ni Kristo nagin katawohan nga ‘ginngaranan ha ngaran han Dios.’—Buh. 15:14, 17.
13. Paonan-o naton maipapakita nga gintutuman naton an pagin tinawag ha ngaran han Dios?
13 Paonan-o naton maipapakita nga gintutuman naton an pagin tinawag ha ngaran han Dios? An usa nga paagi amo an matinumanon nga pagsangyaw mahitungod ha Dios. “Bisan hin-o nga magtawag ha ngaran han Ginoo maluluwas,” nagsurat hi Pablo. “Busa oonan-on ba an pagtawag nira hadton nga ha iya waray hira pagtoohi? Ngan oonan-on ba an ira pagtoo kon waray hira pakabati tungod ha iya? Ngan oonan-on an pamati nira hin waray magwawali? Ngan oonan-on an pagwali nira kon diri hira pakanhion?” (Roma 10:13-15) Kinahanglan liwat nga mataktika nga ibuhayhag naton an sayop nga mga katutdoan nga nagpapasipara ha aton Maglalarang, sugad han doktrina han naglalaga nga impyerno nga ha pagkamatuod nagtututdo nga an mahigugmaon nga Dios may-ada madarahog nga mga kalidad nga pariho han Yawa.—Jer. 7:31; 1 Juan 4:8; itanding an Markos 9:17-27.
14. Ano an nagin reaksyon han iba han ira hinbaroan an ngaran han Dios?
14 Para ha imo, kadungganan ba an pagrepresentar ha ngaran han imo langitnon nga Amay? Ginbubuligan mo ba an iba nga mahibaro hiton baraan nga ngaran? Usa nga babaye ha Paris, Fransia, an nahibaro nga an mga Saksi ni Jehova maaram han ngaran han Dios, salit han may nakaistorya hiya nga Saksi, naghangyo hiya nga ipakita ha iya ito nga ngaran ha Biblia. Han ginbasa niya an Salmo 83:18, nakapamurubuot gud hiya. Nag-aram hiya han Biblia ngan yana matinumanon nga nag-aalagad ha iba nga nasud. Ha Australia, han siyahan nga nabasa han usa nga Katoliko nga babaye an ngaran han Dios ha Biblia, nagtangis hiya tungod ha kalipay. Damu ka tuig na yana nga regular payunir hiya. Hinin bag-o la, han iginpakita han mga Saksi ha Jamaica ha usa nga babaye an ngaran han Dios ha iya Biblia, nagtangis liwat hiya tungod ha kalipay. Salit kadungganan gud an pagrepresentar ha ngaran han Dios, ngan pariho kan Jesus, ipakilala ha ngatanan iton presyoso nga ngaran.
“Ayaw Niyo Higugmaa an Kalibotan”
15, 16. Ano an pagtagad han tinuod nga mga Kristiano ha kalibotan, ngan ano an sadang igpakiana naton ha kalugaringon?
15 “Ayaw niyo higugmaa an kalibotan, bisan an mga bagay ha kalibotan. Kon may tawo nga maghigugma ha kalibotan, an gugma han Amay waray dida ha iya.” (1 Juan 2:15) An kalibotan ngan an unudnon nga mga hingyap hito nakontra kan Jehova ngan ha iya baraan nga espiritu. Salit, an tinuod nga mga sumurunod ni Kristo naglilikay gud nga magin bahin han kalibotan. Nagdudumiri liwat hira ha paghigugma hito tungod kay maaram hira nga an “pakigsangkay han kalibotan amo an kaaway kontra ha Dios,” sugad han iginsurat han disipulo nga hi Jakobo.—Jak. 4:4.
16 Bangin makuri sundon ito nga ginsiring ni Jakobo tungod han damu hinduro nga pagsulay hini nga kalibotan. (2 Tim. 4:10) Salit hi Jesus nag-ampo para ha iya mga sumurunod: “Ako diri nag-aampo ha imo, nga imo hira kuhaon ha kalibotan, kondi nga imo hira pagtipigan gawason ha mga karat-an. Diri hira kanan kalibotan, sugad nga diri man ako kanan kalibotan.” (Juan 17:15, 16) Pakianhi an imo kalugaringon: ‘Nangangalimbasog ba ako nga diri magin bahin han kalibotan? Maaram ba an iba han akon gintotoohan mahitungod ha mga selebrasyon ngan kustomre nga diri uyon ha Kasuratan, pati na adton diri pagano an gintikangan kondi nagpapakita gud han espiritu han kalibotan?’—2 Kor. 6:17; 1 Ped. 4:3, 4.
17. Ano an mahimo makapagios ha mga tangkod an kasingkasing nga dumapig kan Jehova?
17 Sigurado nga diri kita magigin sangkay han kalibotan tungod han aton basado ha Biblia nga mga prinsipyo, kondi mahimo ito makaaghat ha mga tangkod an kasingkasing nga mag-usisa. Oo, kon maobserbahan nira nga an aton pagtoo marig-on nga iginbasar ha Kasuratan ngan igin-aaplikar naton ito ha aton bug-os nga pagkinabuhi, bangin sumiring hira hin sugad hini ha mga dinihogan: “Kami maupod ha iyo, kay kami nakabati nga an Dios aada kaupod niyo.”—Sak. 8:23.
Ipakita an Tinuod nga Kristiano nga Gugma
18. Ano an nahiuupod ha paghigugma kan Jehova ngan ha igkasi-tawo?
18 Hi Jesus nagsiring: “Higugmaon mo an Ginoo nga imo Dios ha bug-os mo nga kasingkasing ngan ha bug-os mo nga kalag, ngan ha bug-os mo nga hunahuna” ngan “higugmaon mo an imo igkasi-tawo sugad ha imo ngahaw.” (Mat. 22:37, 39) Ito nga gugma (a·gaʹpe ha Griego) iginbasar ha kon ano an husto ngan nagtatagad han mga obligasyon, prinsipyo, ngan paggawi, kondi agsob nga may-ada ito duro nga pagbati. Kinasingkasing ito ngan hilarom gud. (1 Ped. 1:22) Kabaliktaran gud ito han pagin makikalugaringon, tungod kay iginpapakita ito ha makonsiderasyon nga mga pulong ngan buhat.—Basaha an 1 Korinto 13:4-7.
19, 20. Pagsaysay hin mga eksperyensya nga nagpapakita han daku nga epekto han Kristiano nga gugma.
19 Tungod kay an gugma bahin han bunga han baraan nga espiritu han Dios, nabulig ito ha tinuod nga mga Kristiano nga buhaton an diri nahihimo han iba, sugad han paglampos ha pagpasulabi tungod han kolor han panit, kultura, ngan politika. (Basaha an Juan 13:34, 35; Gal. 5:22) Napapagios gud an mga maaghop kon nakikita nira an sugad nga gugma. Pananglitan, ha Israel, han siyahan nga tinambong ha katirok an usa nga batan-on nga Judio, nahipausa hiya han iya nakita an mga Judio ngan Arabo nga urosa nga nagsisingba kan Jehova. Sugad nga resulta, regular nga tinambong hiya ha mga katirok ngan nag-aram ha Biblia. Nagpapakita ka ba hin pariho hito nga kinasingkasing nga gugma ha kabugtoan? Ngan nangangalimbasog ka ba nga sinsero nga abiabihon an mga natambong ha iyo Kingdom Hall ha siyahan nga higayon, anoman an ira nasyonalidad, kolor han panit, o kahimtang ha kinabuhi?
20 Sugad nga tinuod nga mga Kristiano, iginpapakita naton an gugma ha ngatanan. Ha El Salvador, ginbuligan han usa nga batan-on ha pag-aram han Biblia an 87-anyos nga babaye nga debotado nga Katoliko. Usa ka adlaw, nagkasakit hin grabe an lagas ngan nahospital. Pag-uli niya, ginbisita hiya han mga Saksi ngan ira ginsiguro nga may pagkaon hiya. Ginbuhat nira ini hin mga usa ka bulan. Kondi, waray binisita nga karelihiyon han babaye. Ano an resulta? Iginlabog niya an iya mga imahen, binaya ha iya relihiyon, ngan nagpadayon pag-aram ha Biblia. Oo, daku gud an epekto han Kristiano nga gugma! Nababantad hito an kasingkasing ha paagi nga diri mahihimo han pagsangyaw la.
21. Paonan-o magigin marig-on an aton tidaraon?
21 Diri na mag-iiha, hi Jesus masiring ha ngatanan nga nag-aangkon la nga nag-aalagad ha iya: “Ako waray gud kilala ha iyo; iwas kamo ha akon, mga magburuhat han karat-an.” (Mat. 7:23) Salit, ipakita naton an mga bunga nga nagpapasidungog ha Amay ngan ha Anak. Hi Jesus nagsiring: “An tagsa-tagsa nga nakabati hini nga mga pulong nakon, ngan ira pagbuhaton, adto igsusugad ko han makinaadmananon nga tawo, nga nagtindog han iya balay ha bawbaw han bato.” (Mat. 7:24) Oo, kon pamatud-an naton nga tinuod kita nga mga sumurunod ni Kristo, uuyonan kita han Dios, ngan an aton tidaraon magigin sugad karig-on han balay nga gintukod ha bawbaw han bato.
[Footnote]
^ par. 11 Ha pipira nga Ingles nga publikasyon yana han mga Katoliko, upod na an The Jerusalem Bible, an tetragrammaton iginhubad nga “Yahweh.”
Nahinunumdoman Mo Ba?
• Ano an kaibahan han tinuod ngan han diri-tinuod nga mga sumurunod ni Kristo?
• Ano an pipira nga “bunga” nga pangirilal-an han tinuod nga mga Kristiano?
• Ano an mahimo mo magin tumong basi magkaada ka hin Kristiano nga mga bunga?
[Mga Pakiana]
[Retrato ha pahina 13]
Pirme mo ba ginagamit an Biblia ha imo ministeryo?
[Retrato ha pahina 15]
Maaram ba an iba han imo gintotoohan may kalabotan ha mga selebrasyon nga diri uyon ha Kasuratan?
