An Mesias—Paagi han Dios ha Pagluwas ha Katawohan
An Mesias—Paagi han Dios ha Pagluwas ha Katawohan
“Kay sugad nga ha kan Adan an ngatanan nagkamamatay, sugad man ha kan Kristo an ngatanan pagbubuhion.”—1 KOR. 15:22.
1, 2. (a) Ano an ginsiring nira Andres ngan Felipe han nakilala nira hi Jesus? (b) Kay ano nga mas damu an aton ebidensya nga hi Jesus an Mesias kay han mga Kristiano ha siyahan nga siglo?
“AMON hin-agian an Mesias.” Ito an ginsiring ni Andres kan Pedro nga iya bugto, tungod kay kombinsido hiya nga hi Jesus nga taga-Nasaret an Dinihogan han Dios. Kombinsido liwat hi Felipe salit iya ginbiling an iya sangkay nga hi Natanael ngan ginsumatan: “Amon hin-agian adton ginsurat ni Moises didto ha Kasugoanan ngan han mga manaragna, hi Jesus nga taga-Nasaret, nga anak ni Jose.”—Juan 1:40, 41, 45.
2 Kombinsido ka gud ba nga hi Jesus an iginsaad nga Mesias, an kan Jehova ‘Punoan han kaluwasan’? (Heb. 2:10) Yana, mas damu an aton ebidensya nga hi Jesus an Mesias kay han iya mga sumurunod ha siyahan nga siglo. Tikang ha katawo ni Jesus tubtob ha iya kabanhaw, an Pulong han Dios naghahatag hin makakombinse nga ebidensya nga hiya an Kristo. (Basaha an Juan 20:30, 31.) Iginpapakita liwat hito nga ha langit padayon nga tutumanon ni Jesus an iya pagin Mesias. (Juan 6:40; basaha an 1 Korinto 15:22.) Ha espirituwal nga paagi, masisiring mo liwat yana nga imo “hin-agian an Mesias.” Kondi, tagda anay kon kay ano nga an siyahan nga mga disipulo husto nga nakasiring nga ira hin-agian an Mesias.
An Sagrado nga “Tinago” Mahitungod han Mesias Hinay-hinay nga Iginpahayag
3, 4. (a) Kay ano nga nakasiring an mga disipulo ha siyahan nga siglo nga ira “hin-agian an Mesias”? (b) Kay ano nga hi Jesus gud la an makakatuman han mga tagna may kalabotan ha Mesias?
3 Kay ano nga nakasiguro an mga sumurunod ni Jesus han siyahan nga siglo nga hiya an Mesias? Tungod kay hinay-hinay nga iginpahayag ni Jehova an mga pangirilal-an han tiarabot nga Mesias pinaagi han mga propeta. Iginpariho ini han usa nga eskolar han Biblia ha pagturugkop han tagsa nga bahin han marmol nga estatwa. Handurawa nga damu nga kalalakin-an nga waray pa gud mag-iristorya an nagdara hin tag-usa nga bahin hito nga estatwa ha usa nga kwarto. Kon pagturugkupon na ito ngatanan ngan mabug-os an estatwa, masiring ka gud nga sigurado nga may-ada naghimo han tagsa nga bahin ngan nagpadara hito ha kada usa ha ira. Pariho han tagsa nga bahin hito nga estatwa, an kada tagna may kalabotan ha Mesias may-ada importante nga impormasyon mahitungod ha iya.
4 Posible ba nga aksidente la nga natuman ha usa ka tawo an ngatanan nga tagna may kalabotan ha Mesias? Usa nga parasaliksik an nagsiring nga imposible gud matuman hin diri tinuyo ha usa ka tawo an ngatanan nga tagna mahitungod ha Mesias. “Hi Jesus—ngan hi Jesus gud la ha bug-os nga kasaysayan—an nakatuman hito.”
5, 6. (a) Paonan-o ipapadapat an paghukom kan Satanas? (b) Paonan-o hinay-hinay nga iginpahayag han Dios an katulinan nga pagtitikangan han iginsaad nga binhi?
5 An sentro han mga tagna mahitungod han Mesias sagrado nga “tinago” nga may-ada damu nga bahin ngan nakakaapekto ha bug-os nga uniberso. (Kol. 1:26, 27; Gen. 3:15) Upod hito nga tinago an paghukom kan Satanas nga Yawa, “an daan nga halas” nga nagin hinungdan han sala ngan kamatayon han katawohan. (Pah. 12:9) Paonan-o ipapadapat ito nga paghukom? Hi Jehova nagtagna nga usa nga “katulinan” o binhi nga magtitikang ha usa nga “babaye” an magtutultog han ulo han halas. Ito nga binhi magbubungkag kan Satanas, an hinungdan han pagrebelde, sakit, ngan kamatayon. Kondi tutugotan anay han Dios hi Satanas nga simboliko nga tultugon an tikod han binhi han babaye.
6 Hinay-hinay nga iginpahayag ni Jehova kon hin-o an iginsaad nga binhi. Nagsaad hiya kan Abraham: “Ha imo katulinan an mga nasud ha kalibotan pagbabaraanon.” (Gen. 22:18) Pinaagi kan Moises, hi Jehova nagtagna nga an iya Pinili magigin “manaragna” nga mas labaw kan Moises. (Deut. 18:18, 19) Ginpasarig hi David, ngan ha urhi ginpamatud-an han mga propeta, nga an Mesias magtitikang ha iya katulinan ngan magigin manurunod han iya trono ha kadayonan.—2 Sam. 7:12, 16; Jer. 23:5, 6.
Mga Ebidensya nga hi Jesus an Mesias
7. Ha ano nga paagi hi Jesus nagtikang ha simboliko nga “babaye” han Dios?
7 Ginsugo han Dios an iya Anak—an iya siyahan nga linarang—tikang ha Iya sugad-asawa nga organisasyon han espiritu nga mga linarang ha langit basi magin an iginsaad nga binhi. Inin bugtong nga Anak han Dios kinahanglan ‘mag-ula han iya kalugaringon’ nga kinabuhi ha langit ngan ig-anak sugad nga hingpit nga tawo. (Fil. 2:5-7; Juan 1:14) An ‘paglandungi’ kan Maria han baraan nga espiritu naggarantiya nga an iya magigin anak baraan ngan “pagngangaranan hin Anak han Dios.”—Luk. 1:35.
8. Paonan-o gintuman ni Jesus an tagna mahitungod han Mesias han nagpabawtismo hiya?
8 Iginsaysay han mga tagna mahitungod han Mesias kon diin ngan san-o maabot hi Jesus. Sugad han igintagna, natawo hiya ha Betlehem. (Mika 5:2) Ha siyahan nga siglo, ginpinamulat gud han mga Judio an pag-abot han Mesias. Ginhunahuna han iba nga hi Juan nga Parabawtismo an Kristo. Kondi hi Juan nagsiring: “Hiya tikanhi nga makurokusog ha akon.” (Luk. 3:15, 16) Pinaagi ha pagkadto ni Jesus kan Juan han katrakdag han 29 K.P. basi magpabawtismo han 30 anyos hiya, iya iginpresenta an iya kalugaringon sugad nga Mesias ha itinanda nga panahon. (Dan. 9:25) Katapos iya gintikangan an iya makatirigamnan nga ministeryo, nasiring: “An panahon natuman na, ngan an ginhadian han Dios tikahirani na.”—Mar. 1:14, 15.
9. Bisan kon diri pa nasasabtan han mga disipulo ni Jesus an ngatanan, ano an ira marig-on nga gintotoohan?
9 Kondi, kinahanglan bag-uhon an panhunahuna han mga tawo. Maopay an ira motibo ha pagdayaw kan Jesus sugad nga hadi, pero waray gud nira masabti nga an iya pagmando ha tidaraon pa ngan tikang ha langit. (Juan 12:12-16; 16:12, 13; Buh. 2:32-36) Bisan pa hito, han nagpakiana hi Jesus ha iya mga disipulo, “Ha iyo siring, hin-o man ako?” hi Pedro binaton dayon: “Ikaw an Kristo, an Anak han buhi nga Dios.” (Mat. 16:13-16) Puropariho liwat hito an baton ni Pedro han damu an binaya kan Jesus han waray nira masabti an iya igintutdo.—Basaha an Juan 6:68, 69.
Pamatii an Mesias
10. Kay ano nga ginpabug-atan ni Jehova nga kinahanglan pamatian an iya Anak?
10 Ha langit, an bugtong nga Anak han Dios usa nga gamhanan nga espiritu nga persona. Dinhi ha tuna, hi Jesus an representante han iya Amay. (Juan 16:27, 28) Hiya nagsiring: “An akon pagtutdo, diri akon, kondi kanan han nagpakanhi ha akon.” (Juan 7:16) Basi pamatud-an nga hi Jesus an Mesias, han nagbag-o an iya dagway, hi Jehova nagsiring: “Pamatii niyo hiya.” (Luk. 9:35) Oo, pamatii, o sunda ini nga Pinili han Dios. Nagkikinahanglan ito hin pagtoo ngan mag-opay nga buhat nga importante gud basi mapalipay an Dios ngan mabuhi ha waray kataposan.—Juan 3:16, 35, 36.
11, 12. (a) Kay ano nga waray karawata han mga Judio ha siyahan nga siglo hi Jesus sugad nga Mesias? (b) Hin-o an nagkarawat kan Jesus?
11 Bisan kon damu hinduro an ebidensya nga hi Jesus an Mesias, waray hiya karawata han kadam-an nga Judio ha siyahan nga siglo. Kay ano? Tungod kay iba an ira panhunahuna mahitungod han Mesias. Usa hito an ideya nga hiya magigin lider ha politika nga magtatalwas ha ira ha panalumpigos han Roma. (Basaha an Juan 12:34.) Salit diri nira makarawat an Mesias nga nagtuman han mga tagna nga hiya tatamayon, isasalikway, mag-aantos, mahibabaro han mga sakit, ngan ha urhi papatayon. (Isa. 53:3, 5) Bisan an iba nga maunungon nga disipulo ni Jesus nasubo han waray hiya maghatag hin kagawasan tikang ha pagmando han Roma. Kondi nagpabilin hira nga maunungon, ngan inabot an panahon nga iginhatag ha ira an husto nga pagsabot.—Luk. 24:21.
12 Usa pa nga hinungdan nga waray karawata han mga tawo hi Jesus sugad nga iginsaad nga Mesias amo an iya mga katutdoan, tungod kay damu an nakurian pagkarawat hito. Basi an usa makasulod ha Ginhadian, kinahanglan hiya ‘magdumiri ha kalugaringon,’ “kumaon” han unod ngan “uminom” han dugo ni Jesus, “ig-anak tikang ha igbaw” o ig-anak utro, ngan diri magin bahin han kalibotan. (Mar. 8:34; Juan 3:3; 6:53; 17:14, 16) Para ha mga mapahitas-on, riko, ngan salingkapaw, makuri hinduro an pagsunod hito. Kondi ginkarawat han mapainubsanon nga mga Judio nga hi Jesus an Mesias, pati na han pipira nga Samaritano nga nagsiring: “Ini amo an matuod nga magluluwas han kalibotan.”—Juan 4:25, 26, 41, 42; 7:31.
13. Paonan-o gin-antos ni Jesus an simboliko nga pagsamad ha tikod?
13 Hi Jesus nagtagna nga hiya huhukman hin kamatayon han punoan nga mga saserdote ngan iraraysang han mga Hentil, kondi ha ikatulo ka adlaw babanhawon. (Mat. 20:17-19) Ginhukman nga pasipara an iya pagpahayag ha atubangan han Sanhedrin nga hiya “hi Kristo, nga Anak han Dios.” (Mat. 26:63-66) Hi Pilato nagsiring nga ‘waray hiya ginbuhat nga takos igpatay ha iya,’ kondi tungod kay an mga Judio nag-akusar nga nag-aaghat hiya hin pagrebelde ha gobyerno, “hi Jesus iya igintubyan ha ira kaburut-on.” (Luk. 23:13-15, 25) Hito nga paagi ira “iginlirong” an “Prinsipe han kinabuhi” ngan nagsarabot nga patayon hiya, bisan kon damu hinduro an ebidensya nga hiya an sinugo han Dios. (Buh. 3:13-15) Sugad han igintagna, an Mesias ‘gin-utod’ han iginraysang hiya ha kahoy han Paskua han 33 K.P. (Dan. 9:26, 27; Buh. 2:22, 23) Pinaagi hinin makuri nga kamatayon, iya gin-antos an pagsamad ha “tikod” nga igintagna ha Genesis 3:15.
Kon Kay Ano nga Kinahanglan Mamatay an Mesias
14, 15. (a) Ano an duha nga hinungdan nga gintugotan ni Jehova nga mamatay hi Jesus? (b) Ano an ginbuhat ni Jesus katapos hiya banhawon?
14 May-ada duha nga importante nga hinungdan kon kay ano nga gintugotan ni Jehova nga mamatay hi Jesus. Siyahan, an iya pagkamatinumanon tubtob ha kamatayon nagpatin-aw han usa nga importante nga bahin han sagrado nga “tinago.” Bug-os nga ginpamatud-an niya nga mahimo matipigan han hingpit nga tawo an “pagkadiosnon” ngan masuportahan an pagkasoberano han Dios bisan pa han pinakamakuri nga pagsari ni Satanas. (1 Tim. 3:16) Ikaduha, sugad han ginsiring ni Jesus, ‘an Anak han Tawo kinanhi basi ihatag an iya kinabuhi nga lukat han kadam-an.’ (Mat. 20:28) Inin katugbang nga lukat amo an bayad han sala nga napanunod han katulinan ni Adan. Tungod hito nagin posible an kinabuhi nga waray kataposan ha ngatanan nga nakarawat kan Jesus sugad nga paagi han Dios ha pagluwas ha katawohan.—1 Tim. 2:5, 6.
15 Paglabay hin tulo ka adlaw, ginbanhaw hi Jesus, ngan ha sulod hin 40 ka adlaw nagpakita hiya ha iya mga disipulo basi pamatud-an nga buhi hiya ngan basi maghatag pa hin mga instruksyon. (Buh. 1:3-5) Katapos, sinaka hiya ha langit basi ipresenta kan Jehova an bili han iya presyoso nga halad ngan maghulat han itinanda nga panahon han iya paghadi ha Mesianiko nga Ginhadian. Kondi antes hito, damu an iya buruhaton.
Bug-os nga Pagtuman han Iya Pagin Mesias
16, 17. Isaysay an mga buruhaton ni Jesus sugad nga Mesias han sinaka hiya ha langit.
16 Tikang han ginbanhaw hi Jesus, matinumanon nga ginigiyahan niya an mga buruhaton ha Kristiano nga kongregasyon nga iya ginmamandoan sugad nga Hadi. (Kol. 1:13) Ha itinanda nga panahon, gagamiton niya an iya gahum sugad nga Hadi han Ginhadian han Dios. Ginpapamatud-an han mga tagna ha Biblia ngan mga hitabo ha kalibotan nga han 1914 nagtikang an iya paghadi ngan an “kataposan han kalibotan.” (Mat. 24:3; Pah. 11:15) Waray pag-iha katapos hito, ginpangunahan niya an mga anghel ha paglabog kan Satanas ngan han mga demonyo tikang ha langit.—Pah. 12:7-10.
17 Hirani na matapos an pagsangyaw ngan pagtutdo nga gintikangan ni Jesus han 29 K.P. Diri na mag-iiha, iya huhukman an ngatanan nga buhi. Hito nga panahon iya sisidngan an mga sugad-karnero nga nakarawat ha iya sugad nga paagi ni Jehova ha pagluwas nga ‘panundon an ginhadian, nga igin-andam ha ira tikang han pagtindoga han kalibotan.’ (Mat. 25:31-34, 41) Adton diri nakarawat kan Jesus sugad nga hadi mabubungkag kon iya na pangunahan an kasundalohan ha langit ha pagpoo han ngatanan nga karaotan. Katapos, gagapuson ni Jesus hi Satanas ngan ilalabog hiya ngan an mga demonyo ha “atabay nga waray sag-od.”—Pah. 19:11-14; 20:1-3.
18, 19. Ano an bubuhaton ni Jesus ha pagtuman han iya pagin Mesias, ngan ano an magigin resulta hito ha masinugtanon nga katawohan?
18 Durante han Usa ka Yukot ka Tuig nga Pagmando ni Jesus, bug-os nga tutumanon niya an ngatanan nga iya titulo sugad han “Urusahon nga Magsaragdon, Gamhanan nga Dios, Amay nga Waray Kataposan, Prinsipe han Kamurayaw.” (Isa. 9:6, 7, Maopay nga Sumat) Pinaagi han iya pagmando magigin hingpit an mga tawo pati na an mga binanhaw. (Juan 5:26-29) Gigiyahan han Mesias an masinugtanon nga katawohan ngadto ha “mga burabod ha mga tubig han kinabuhi” basi magkaada mamurayawon nga relasyon kan Jehova. (Basaha an Pahayag 7:16, 17.) Katapos han ultimo nga pagsari, an ngatanan nga rebelde upod na hi Satanas ngan an iya mga demonyo ‘ilalabog ngadto ha linaw nga kalayo,’ an makamaratay nga pagtultog ha ulo han “halas.”—Pah. 20:10.
19 Hingpit gud nga gintutuman ni Jesus an iya katungdanan sugad nga Mesias! An paraiso nga tuna mapupuno hin linukat nga katawohan nga malipayon nga mabubuhi ha waray kataposan nga may hingpit nga kahimsog. Hito nga panahon waray na an ngatanan nga pasipara ha baraan nga ngaran ni Jehova, ngan bug-os nga napamatud-an nga hiya an may katungod ha pagmando ha uniberso. Maopay gud nga panurundon an naghuhulat ha ngatanan nga nasugot ha Dinihogan han Dios!
Hin-agian Mo ba an Mesias?
20, 21. Kay ano nga sadang mo isumat ha iba an mahitungod han Mesias?
20 Tikang han 1914 nagkikinabuhi na kita ha panahon han pa·rou·siʹa o presensya ni Kristo. Bisan kon diri nakikita an iya presensya sugad nga Hadi ha Ginhadian han Dios, ginpapamatud-an ito han katumanan han mga tagna. (Pah. 6:2-8) Bisan pa hito, kadam-an han mga tawo yana an pariho han mga Judio ha siyahan nga siglo nga nagbabalewaray han ebidensya han presensya han Mesias. Karuyag liwat nira hin lider o bisan la usa nga magkukontrol han mga magmarando ha politika. Kondi imo hinbaroan nga hi Jesus nagmamando na yana sugad nga Hadi ha Ginhadian han Dios. Sigurado nga nalipay ka ha paghibaro hito, diri ba? Pariho han mga disipulo ha siyahan nga siglo, napagios ka ha pagsiring: “Amon hin-agian an Mesias.”
21 Yana, kon nagsasangyaw ka, imo ba ginpapabug-atan an katungdanan ni Jesus sugad nga Mesias? Mabulig ito ha imo nga mas pabilhan an iya ginbuhat na, ginbubuhat yana, ngan bubuhaton pa ha tidaraon para ha imo. Pariho kanda Andres ngan Felipe, sigurado nga ginsumatan mo na an imo mga paryente ngan kasangkayan mahitungod han Mesias. Kay ano nga diri makiistorya utro ha ira nga may dugang nga kadasig ngan ipakita ha ira nga hi Jesu-Kristo amo gud an iginsaad nga Mesias, an paagi han Dios ha pagluwas ha katawohan?
Maisasaysay Mo Ba?
• Kay ano nga nakasiring an mga disipulo ha siyahan nga siglo nga ira hin-agian an Mesias?
• Ano an duha nga importante nga hinungdan nga namatay hi Jesus?
• Ano pa an bubuhaton ni Jesus ha pagtuman han iya katungdanan sugad nga Mesias?
[Mga Pakiana]
[Retrato ha pahina 21]
Paonan-o nahibaro an mga tawo ha siyahan nga siglo nga hi Jesus an iginsaad nga Mesias?
[Retrato ha pahina 23]
Kon nakikiistorya ha iba, imo ba ginpapabug-atan an katungdanan ni Jesus sugad nga Mesias?
