Hin-agian Ko an Katuyoan han Kinabuhi

Iginsumat ni Gaspar Martinez

Ha pipira nga paagi, an akon kinabuhi istorya hin pobre nga batan-on nga taga-baryo nga nagriko ha syudad. Kondi iyo hibabaroan nga an bahandi nga akon natirok diri sugad han akon ginlalaoman.

NAGDAKU ako ha usa nga baryo nga makuri an panginabuhi ha rehiyon han Rioja ha norte han Espanya han dekada han 1930. Han dyes anyos ako, napiritan ako pag-undang ha pag-eskwela, kondi maaram na ako magbasa ngan magsurat. Upod han akon unom nga kabugtoan, pirme ako aadto ha uma ngan nagbabantay hin karnero o nagtatanom ha amon gutiay nga tuna.

Tungod han kapobrehan, nahunahuna namon nga importante gud an kwarta ngan panag-iya. Naawa kami ha iba nga mas maopay an kahimtang kay ha amon. Bisan pa hito, an obispo nagsiring nga an amon baryo “an pinakarelihiyoso ha iya nasasakopan.” Diri hiya maaram nga maabot an panahon nga damu an mabaya ha pagin Katoliko.

Pamiling hin Kaopayan

Nakaasawa ako kan Mercedes, nga taga-didto liwat ha amon baryo. Waray pag-iha, nagkaanak kami hin lalaki. Han 1957 binalhin kami ha kahirani nga syudad han Logroño, ngan ha urhi binalhin liwat an amon bug-os nga pamilya. Hinbaroan ko nga tungod kay diri ako maabtik nga trabahador, gutiay la an akon tsansa nga magkaada kità nga makakasuporta ha akon pamilya. Naghunahuna ako kon diin mamimiling hin giya. Nagtikang ako pamiling ha librarya, bisan kon diri ako maaram kon ano an bibilngon.

Ha urhi, hinbatian ko nga may-ada programa ha radyo nga nagtatanyag hin pag-aram ha Biblia pinaagi hin surat. Han natapos ko an pag-aram, nakigkita ha akon an pipira nga membro han relihiyon nga Evangelical Protestant. Katapos hin duha ka beses nga pagkadto ha ira singbahan, nakita ko an pagpalabaw-labaw han prominente nga mga membro hito. Waray na ako bumalik, ngan nahunahuna ko nga parapriho la an ngatanan nga relihiyon.

Nahibaroan Ko an Tinuod nga Katuyoan han Kinabuhi

Han 1964 binisita ha amon an batan-on nga hi Eugenio. Usa hiya han mga Saksi ni Jehova. Diri ako maaram nga may sugad ngay-an hito nga relihiyon. Kondi interesado gud ako makiistorya mahitungod ha Biblia. Kahuna ko nga damu na an akon hinbabaroan mahitungod ha Kasuratan. Ginbabaton ko hiya gamit an pipira nga teksto nga akon hinbaroan ha akon pag-aram han Biblia pinaagi hin surat. Pero bisan kon gindidepensahan ko an iba nga doktrina han Protestante, diri ako kombinsido hito.

 Katapos hin duha ka beses nga maiha nga pakiistorya kan Eugenio, nakasiring ako nga eksperto hiya ha paggamit han Pulong han Dios. Nahipausa ako nga madali hiya makaagi hin teksto ngan maopay mag-esplikar hito, bisan kon hurohitaas an akon edukasyon kay ha iya. Iginpakita niya ha akon ha Biblia nga nabubuhi na kita ha kataposan nga mga adlaw ngan hirani na himoon han Ginhadian han Dios an tuna nga paraiso. Nahipausa gud ako.—Sal. 37:11, 29; Isa. 9:6, 7; Mat. 6:9, 10.

Ginkarawat ko dayon an pag-aram ha Biblia. Bag-o ha akon an haros ngatanan nga akon hinbaroan, ngan kombinsido gud ako hito. Nagkaada ako bag-o nga paglaom ngan tungod hito nagkaada katuyoan an akon kinabuhi. Hin-agian ko na an akon ginpipinamiling. An akon pangalimbasog nga magriko baga hin waray na kapulsanan, ngan an akon panalinguha nga magkaada maopay nga trabaho diri na duro kaimportante. Kon mawawara bisan an sakit ngan kamatayon, labi na gud an iba nga mga problema.—Isa. 33:24; 35:5, 6; Pah. 21:4.

Iginsumat ko dayon ha akon mga paryente an akon hinbabaroan, madasigon nga iginsaysay ha ira nga an Dios nagsaad nga hihimoon an tuna nga paraiso diin maukoy an matinumanon nga katawohan ha waray kataposan.

Ginkarawat han Akon Pamilya an Kamatuoran

Waray pag-iha, dose ha amon an nagdesisyon nga magkirigta kada Domingo nga kulop ha balay han akon batâ basi hisgotan an mga saad ha Biblia. Kada semana, duha o tulo ka oras nga gin-iiristoryahan namon ito. Han nakita ni Eugenio nga damu an akon paryente nga interesado ha Biblia, nag-eskedyol hiya nga dumarahan hin pag-aram an kada pamilya.

May-ada ako iba nga paryente ha Durango, usa nga gutiay nga bungto nga mga 120 ka kilometro an kahirayo, ngan waray mga Saksi didto. Salit paglabay hin tulo ka bulan, nagbakasyon ako hin duha ka adlaw basi bisitahon hira ngan sumatan han akon bag-o nga gintotoohan. Hito nga higayon, mga napulo kami nga nagkikirigta kada gab-i, ngan nag-iinistorya ako ha ira bisan pasado na alas dose han gab-i. Hira ngatanan malipayon nga namamati. Han tiuli na ako, ginbilinan ko hira hin mga Biblia ngan literatura. Katapos hito, padayon nga nakigkomunikar ako ha ira.

Pag-abot han mga Saksi ha Durango—diin waray pa iba nga nagsangyaw—18 ka tawo an naghuhulat nga naruruyag gud pag-aram han Biblia. Malipayon nga ginhikay han mga Saksi nga dumarahan hin pag-aram an kada pamilya.

Tubtob hito nga panahon, hi Mercedes diri interesado ha kamatuoran, diri tungod kay diri hiya natoo ha katutdoan han Biblia kondi tungod han kahadlok ha tawo. An buruhaton han mga Saksi igindidiri ha Espanya hito nga panahon, salit naghunahuna hiya nga bangin paiwason han mga awtoridad an amon duha nga anak ha eskwelahan ngan isalikway na kami ngatanan. Kondi han nakita niya nga ginkakarawat han bug-os nga pamilya an kamatuoran, naruyag liwat hiya pag-aram.

Ha sulod hin duha ka tuig, 40 nga membro han akon pamilya an nagin Saksi ngan nagpabawtismo sugad nga simbolo han ira dedikasyon nga mag-alagad ha Dios. Oo, an amon pamilya nagkaada uusa nga tumong ngan katuyoan ha kinabuhi. Inabat ko nga nakab-ot ko na an usa nga butang nga mapulsanon gud. Hura nga ginbendisyonan kami hin espirituwal nga bahandi.

Mas Tagbaw Samtang Nagtitikalagas

Han sumunod nga 20 ka tuig, nagin sagipo ako ha pagpadaku han amon duha nga anak ngan pagbulig ha amon kongregasyon. Pagbalhin namon ni Mercedes ha Logroño, mga 20 la an Saksi hito nga syudad nga may-ada mga 100,000 nga umurukoy. Waray pag-iha nagkaada ako damu nga responsabilidad ha kongregasyon.

Katapos, han 56 anyos ako, an pabrika nga akon gintatrabahoan tigda nga nagsara, ngan nawarayan ako trabaho. Maiha ko na gud nga hingyap nga mag-alagad hin bug-os-panahon, salit ginsalingabot ko ini nga higayon basi magpayunir. Gutiay la an pensyon nga akon nakakarawat, ngan makuri gud ito para ha amon. Binulig hi Mercedes pinaagi ha pagtrabaho hin part-time. Nasuportahan namon an amon pamilya ngan  waray gud kami makulangi hin mga panginahanglan. Payunir pa gihapon ako, ngan ha panapanahon hi Mercedes nag-o-auxiliary, ngan nalilipay gud hiya ha pagsangyaw.

Pipira ka tuig an naglabay, hi Mercedes regular nga naghahatag hin magasin kan Merche, usa nga batan-on nga babaye nga nag-aram ha Biblia han bata pa hiya. Interesado hi Merche pagbasa han aton literatura, ngan naobserbahan ni Mercedes nga gin-aapresyar pa gihapon niya an kamatuoran ha Biblia. Ha urhi, kinarawat hiya hin pag-aram ha Biblia ngan nag-uswag gud. Kondi an iya bana nga hi Vicente parainom ngan waray permanente nga trabaho. Tungod hito diri niya nasusuportahan ha pinansyal hi Merche. Masamok an ira pag-asawa tungod han iya paghinubog.

Nagsuhestyon an akon asawa kan Merche nga sidngon hi Vicente nga makiistorya ha akon, ngan ginbuhat ito ni Vicente. Katapos hin pipira nga pakiistorya, kinarawat hiya hin pag-aram ha Biblia. Nagtikang magbag-o hi Vicente; may mga higayon nga diri hiya nainom hin pipira ka adlaw. Inabot an panahon nga diri na hiya nainom hin usa ka semana o sobra pa. Ha kataposan, diri na gud hiya nainom. Nag-opay an iya pamahongpahong, ngan nagkaurosa an iya pamilya. Yana, an iya bug-os nga pamilya nabulig ha gutiay nga kongregasyon ha Canary Islands, diin hira naukoy.

Paghinumdom ha Makalilipay nga Kinabuhi

Bisan kon nagkamatay na an iba han akon paryente nga nahibaro han katutdoan ha Biblia mga tuig na an naglabay, padayon nga nagdadamu an amon kaurupdan, ngan hura nga ginbibendisyonan kami han Dios. (Prob. 10:22) Makalilipay gud makita nga haros ngatanan hadton nag-aram han Biblia 40 ka tuig na an naglabay—upod an ira mga anak ngan kaapohan—padayon nga nag-aalagad hin matinumanon kan Jehova!

Yana damu an akon paryente nga Saksi na, ngan damu ha ira an mga tigurang, ministeryal, ngan payunir. An akon suhag nga anak ngan an iya asawa nag-aalagad ha sanga nga opisina han mga Saksi ni Jehova ha Madrid, Espanya. Han nagin Saksi ako, mga 3,000 la an Saksi ha Espanya; yana sobra 100,000 na. Malipayon gud ako ha bug-os-panahon nga ministeryo, ngan mapasalamaton gud ha Dios tungod han damu ka tuig nga makalilipay nga pag-alagad ha iya. Bisan kon diri hitaas an akon edukasyon, ha panapanahon nag-aalagad ako sugad nga kasaliwan nga paramangno han sirkito.

Pipira ka tuig an naglabay, hinbaroan ko nga haros waray na naukoy ha baryo nga amon gin-ukyan hadto. Tungod han kakurian, ha urhi napiritan an ngatanan nga umurukoy nga bayaan an ira kaumhan ngan kabablayan basi mamiling hin kaopayan ha iba nga lugar. Makalilipay nga damu ha amon nga namalhin an nakaagi hin espirituwal nga bahandi. Hinbaroan namon nga may-ada gud katuyoan an kinabuhi ngan an pag-alagad kan Jehova nagriresulta hin duro nga kalipay.

[Retrato ha pahina 32]

Haros ngatanan nga kapamilya ni Bugto Martínez nga nagin Saksi