Magin Madasigon Para ha Balay ni Jehova!
Magin Madasigon Para ha Balay ni Jehova!
“Mapupuno gud ako hin kadasig para ha imo balay.”—JUAN 2:17, NW.
1, 2. Han 30 K.P., ano an ginbuhat ni Jesus ha templo, ngan kay ano?
HANDURAWA an kahimtang. Panahon adto han Paskua han 30 K.P. Unom ka bulan antes hito, gintikangan ni Jesus an iya ministeryo ha tuna. Yana, tikadto hiya ha Jerusalem. Didto ha templo han Bungsaran han mga Hentil, nakita niya an “mga namamaligya han mga baka, ngan mga karnero, ngan mga sarapati, ngan mga magbaralyo hin kwarta nga nagkakalingkod.” Gintabog niya an ngatanan nga hayop pinaagi ha paghampak hin lubid, ngan sigurado nga ginsundan han magbaraligya an mga hayop. Pinanhuwad liwat ni Jesus an mga sinselyo han magbaralyo han kwarta ngan pinamaliskad an ira mga lamesa. Ginsidngan niya an magbaraligya hin sarapati nga kuhaon an ira mga baligya ngan umiwas.—Juan 2:13-16.
2 An ginbuhat ni Jesus nagpapakita han iya daku nga pagtagad ha templo. Hiya nagsugo: “Ayaw paghimoa an balay han akon Amay nga balay nga baraligyaan.” Han nakita ini han mga disipulo ni Jesus, ira nahinumdoman an iginsurat ni salmista David mga siglo na an naglabay: “Mapupuno gud ako hin kadasig para ha imo balay.”—Juan 2:16, 17, NW; Sal. 69:9.
3. (a) Ano an kadasig? (b) Ano an mahimo naton igpakiana ha aton kalugaringon?
3 Pagtagad ngan kadasig para ha balay han Dios an nagpagios kan Jesus. An kadasig amo an “kaikag ngan duro nga hingyap nga makab-ot an usa nga butang.” Hinin ika-21 ka siglo, sobra pito ka milyon nga Kristiano an madasigon para ha balay han Dios. An tagsa ha aton mahimo magpakiana, ‘Paonan-o ako magigin mas madasigon para ha balay ni Jehova?’ Basi mabaton ito, aton anay usisahon kon ano an balay han Dios yana. Katapos, aton paghihisgotan an susbaranan han magtinumanon nga kalalakin-an ha Biblia nga nagin madasigon para hito. Iginsurat ito “ha pagtutdo ha aton” ngan makakapagios ito ha aton nga magin mas madasigon.—Roma 15:4.
Balay han Dios—Hadto Ngan Yana
4. Ano an katuyoan han templo nga gintukod ni Salomon?
4 Ha kadaan nga Israel, an balay han Dios amo an templo ha Jerusalem. Syempre, hi Jehova diri literal nga naukoy didto. Hiya nagsiring: “An langit amo an akon trono, ngan an tuna amo an akon turumbanan: Ano nga klase hin balay an iyo tutukuron para ha akon? Ngan ano nga lugar an maaakon pahuwayan?” (Isa. 66:1) Kondi, an templo nga gintukod durante han pagmando ni Salomon amo an sentro han pagsingba kan Jehova, diin hira nag-aampo.—1 Hadi 8:27-30.
5. Ano nga kahikayan yana an ginpadagawan han pagsingba ha templo ni Salomon?
5 Yana, an balay ni Jehova diri literal nga tinukod ha Jerusalem o ha bisan diin. Lugod, ito an kahikayan ha pagsingba ha iya pinaagi han halad lukat ni Kristo. An ngatanan nga matinumanon nga surugoon ni Jehova ha tuna nagkakaurosa ha pagsingba ha iya dida hinin espirituwal nga templo.—Isa. 60:4, 8, 13; Buh. 17:24; Heb. 8:5; 9:24.
6. Hin-o nga mga hadi ha Juda an nagpakita hin makatirigamnan nga kadasig para ha tinuod nga pagsingba?
6 Han 997 A.K.P., katapos mabahin an Israel, 4 han 19 nga hadi nga nagmando ha sur ha Juda an nagpakita hin makatirigamnan nga kadasig para ha tinuod nga pagsingba—hira Asa, Jehosapat, Hesekia, ngan Josia. Ano nga importante nga leksyon an aton mahibabaroan ha ira susbaranan?
Ginbibendisyonan an Bug-os-Kasingkasing nga Pag-alagad
7, 8. (a) Ano nga klase hin pag-alagad an ginbibendisyonan ni Jehova? (b) Ano nga leksyon an aton mahibabaroan ha ginbuhat ni Hadi Asa?
7 Durante han pagmando ni Hadi Asa, nagsugo hi Jehova hin mga propeta basi giyahan an Iya nasud nga magin matinumanon. Pananglitan, an Biblia nasiring nga hi Asa namati kan propeta Asaria, an anak ni Oded. (Basaha an 2 Kronikas 15:1-8.) Tungod han reporma nga ginhimo ni Asa, nagkaurosa an katawohan han Juda ngan an damu nga tawo tikang ha ginhadian han Israel nga inupod ha daku nga katirok ha Jerusalem. Urosa nga iginpahayag nira an ira determinasyon nga magsingba hin maunungon kan Jehova. Aton mababasa: “Hira nagsumpa kan Jehova ha daku nga tingog, ngan ha guliat, ngan pinaagi ha mga trumpeta, ngan mga korneta. Ngan an bug-os nga Juda nalipay ha pagsumpa; kay hira nagsumpa ha bug-os nira nga kasingkasing, ngan nangita ha iya ha bug-os nira nga tinguha: ngan hiya hin-agian nira: ngan tinagan hira ni Jehova hin kapahuwayan ha palibot.” (2 Kron. 15:9-15) Sigurado nga bibendisyonan liwat kita ni Jehova kon bug-os-kasingkasing nga mag-alagad kita ha iya.—Mar. 12:30.
8 Makasurubo, paglabay han panahon, nasina hi Asa han ginsaway hiya ni Hanani nga manaragna. (2 Kron. 16:7-10) Ano an aton reaksyon kon ginsasagdonan o ginigiyahan kita ni Jehova pinaagi han mga tigurang? Kinakarawat ngan gin-aaplikar ba dayon naton an ira sagdon tikang ha Kasuratan ngan diri nasisina?
9. Ano nga peligro an inatubang ni Jehosapat ngan han Juda, ngan ano an ira ginbuhat?
9 Durante han ika-10 ka siglo A.K.P., nagmando hi Hadi Jehosapat ha Juda. Nameligro an bug-os nga Juda ha plano nga pag-atake han gintarampo nga kasundalohan han Amon, Moab, ngan han katawohan tikang ha kabukiran han Seir. Bisan kon nahadlok an hadi, ano an iya ginbuhat? Hiya ngan an katawohan, upod an ira mga asawa ngan anak, nagkatirok ha balay ni Jehova basi mag-ampo. (Basaha an 2 Kronikas 20:3-6.) Pariho han pag-ampo ni Salomon ha dedikasyon han templo, hi Jehosapat nanginyupo kan Jehova: “O amon Dios, diri ba nimo hira huhukman? Kay waray kami kusog patok hini nga daku nga panon nga nakanhi patok ha amon; diri ngani kami maaram kon ano [an] amon bubuhaton: kondi an amon mga mata aada ha imo.” (2 Kron. 20:12, 13) Katapos mag-ampo ni Jehosapat, ha “butnga han katirok,” an espiritu ni Jehova nagpagios ha Lebita nga hi Jahasiel nga magyakan hin nakakaliaw nga nagparig-on ha katawohan.—Basaha an 2 Kronikas 20:14-17.
10. (a) Paonan-o nakarawat ni Jehosapat ngan han Juda an giya? (b) Paonan-o naton yana maipapakita an apresasyon ha giya ni Jehova?
10 Oo, nakarawat hadto ni Jehosapat ngan han ginhadian han Juda an giya ni Jehova pinaagi kan Jahasiel. Yana, nakakarawat naton an pagliaw ngan giya pinaagi han matinumanon ngan maaramon nga uripon. Karuyag gud naton magkooperar pirme ha ginpili nga mga tigurang, nga maduruto nga nagmamangno ha aton ngan nagpapatuman han giya han “matinumanon ngan maaramon nga uripon.”—Mat. 24:45, NW; 1 Tes. 5:12, 13.
11, 12. Ano nga leksyon an aton mahibabaroan ha nahitabo kan Jehosapat ngan han Juda?
11 Sugad la nga nagkatirok hira Jehosapat ngan an iya katawohan ha pangaro han giya ni Jehova, diri naton pabay-an an regular nga pagtambong ha mga katirok kaupod han aton kabugtoan. Kon duro an aton problema ngan diri kita maaram kon ano an bubuhaton, subaron naton an maopay nga ginbuhat ni Jehosapat ngan han katawohan han Juda, ngan bug-os-an-pagsarig nga mag-ampo kan Jehova. (Prob. 3:5, 6; Fil. 4:6, 7) Bisan kon nag-uusahan kita, an aton pag-ampo nagbubugkos ha aton ngan han kabugtoan ha bug-os nga kalibotan.—1 Ped. 5:9.
12 Ginsunod ni Jehosapat ngan han katawohan an giya han Dios pinaagi kan Jahasiel. Ano an resulta? Nagdaog hira ha sumunod nga away ngan binalik ha Jerusalem nga ‘malipayon’ nga “dara an mga salteryo, ngan mga harpa, ngan mga trumpeta ngadto ha balay ni Jehova.” (2 Kron. 20:27, 28) Gintatahod liwat naton an giya ni Jehova pinaagi han iya matinumanon nga uripon ngan naupod ha ira ha pagdayaw ha iya.
Atamana hin Maopay an Aton Katirokan
13. Ano an ginbuhat ni Hesekia ha tinikangan han iya pagmando?
13 Ha siyahan nga bulan han pagmando ni Hesekia, ipinakita niya an kadasig ha pagsingba kan Jehova pinaagi ha pag-abri utro ngan pag-ayad han templo. Gin-organisa niya an mga saserdote ngan Lebita ha paglimpyo han balay han Dios. Ginbuhat nira ito hin 16 ka adlaw. (Basaha an 2 Kronikas 29:16-18.) Nagpapahinumdom ito ha aton han pagmintinar ngan pag-ayad han aton katirokan basi maipakita hito an aton madasigon nga pagsingba kan Jehova. Nakabati ka na ba hin eksperyensya nga gindayaw han mga tawo an kadasig han kabugtoan nga binulig ha sugad nga buruhaton? Oo, an ira mga pangalimbasog daku gud nga kadayawan kan Jehova.
14, 15. Ano nga buruhaton yana an nakakagdayaw gud kan Jehova? Paghatag hin mga ehemplo.
14 Ha usa nga syudad ha norte han Inglatera, nakontra an amyaw ha plano nga pag-ayad han Kingdom Hall. Bisan pa hito, maopay an ginyakan ngan ginbuhat han kabugtoan. Tungod kay nakita nira nga kinahanglan aydon an pader butnga han Kingdom Hall ngan han amyaw, gin-ayad nira ito nga waray bayad. Daku adto nga trabaho kay ira gintukod utro an kadak-an han pader. Maopay gud an ira ginbuhat salit nagbag-o ito nga tawo. Yana, nabulig na hiya nga kita-kitaon an Kingdom Hall.
15 An katawohan ni Jehova nasuporta ha bug-os kalibotan nga proyekto han pagtukod. Disidido an kabugtoan ha kongregasyon nga bumulig ha mga international servant diri la ha pagtukod hin mga Kingdom Hall kondi liwat mga Assembly Hall ngan pasilidad han Bethel. Hi Sam usa nga inhinyero nga eksperto ha pagmintinar han sistema han pagpapaso, bentilasyon, ngan air-condition. Hiya ngan an iya asawa nga hi Ruth nagbiyahe ha iba-iba nga nasud ha Europa ngan Aprika basi bumulig ha mga proyekto han pagtukod. Diin man hira kumadto, malipayon liwat hira ha pagsangyaw kaupod han kabugtoan ha kongregasyon. Iginsumat ni Sam an nagpagios ha iya nga bumulig hinin internasyonal nga proyekto: “Tungod ito han pagdasig han mga boluntaryo ha Bethel ha iba-iba nga nasud. An ira kadasig ngan kalipay nagpagios gud ha akon nga mag-alagad hini nga paagi.”
Sunda an Instruksyon han Dios
16, 17. Ha ano nga espesyal nga buruhaton madasigon nga nakigbahin an katawohan han Dios, ngan ano an resulta?
16 Labot pa ha pag-ayad han templo, ginpahiuli ni Hesekia an tinuig nga pagsaurog han Paskua nga iginsugo ni Jehova. (Basaha an 2 Kronikas 30:1, 4, 5.) Gin-imbitar niya ngan han umurukoy han Jerusalem an bug-os nga nasud—bisan an umurukoy ha norte nga ginhadian. Ginsugo an mga mensahero ha pagdara hin mga imbitasyon ha bug-os nga nasud.—2 Kron. 30:6-9.
17 Ha naglabay nga mga tuig, nakigbahin kita ha pariho nga buruhaton. Pinaagi han nakakadani nga inimprinta nga imbitasyon, gindapit naton an mga tawo ha aton teritoryo nga tumambong ha pagsaurog han Panihapon han Ginoo, sugad nga pagsunod ha sugo ni Jesus. (Luk. 22:19, 20) Pinaagi han instruksyon ha aton Katirok ha Pag-alagad, madasigon nga nakigbahin kita hini nga buruhaton. Ngan ginbendisyonan gud ni Jehova ini nga pangalimbasog! Oo, han 2008, mga pito ka milyon an nanhatag han imbitasyon, ngan 17,790,631 ka tawo an tinambong!
18. Kay ano nga importante gud ha imo an kadasig para ha tinuod nga pagsingba?
18 Mahitungod kan Hesekia, an Kasuratan nasiring: “Hiya sinarig kan Jehova, an Dios ha Israel; ha pagkaagi nga ha katapos niya waray nakapariho ha iya dida ha ngatanan nga kahadian ha Juda, o waray dida ha ira nga nahiuna ha iya. Kay hiya kinupkop kan Jehova; waray hiya bumaya ha pagsunod ha iya, kondi nagbantay han iya mga sugo, nga kan Jehova iginsugo kan Moises.” (2 Hadi 18:5, 6) Hinaot subaron naton hiya. An aton kadasig para ha balay han Dios mabulig ha aton nga padayon nga ‘kumupkop kan Jehova’ nga naglalaom han kinabuhi nga waray kataposan.—Deut. 30:16.
Sunda Dayon an Giya
19. Ano an ginpapangalimbasogan ha panahon han Memoryal?
19 Han nagmando hi Hadi Josia, nangandam liwat hiya hin maopay basi isaurog an Paskua. (2 Hadi 23:21-23; 2 Kron. 35:1-19) Nangangandam liwat kita hin maopay para ha distrito nga kombensyon, sirkito ngan espesyal nga asembleya, ngan Memoryal. Basi maisaurog an kamatayon ni Jesus, an kabugtoan ha iba nga nasud nagkakatirok bisan kon mameligro an ira kinabuhi. Ginsisiguro han madasigon nga mga tigurang ha kongregasyon nga makatambong an ngatanan. Ginbubuligan an mga lagas ngan may sakit nga makatambong hito nga okasyon.
20. (a) Ano an nahitabo durante han pagmando ni Hadi Josia, ngan ano an iya ginbuhat? (b) Ano nga leksyon an kinahanglan hunahunaon naton hin seryoso?
20 Durante han pag-ayad nga gin-organisa ni Hadi Josia, an Hitaas nga Saserdote nga hi Hilkia “nakaagi han basahon han balaud ni Jehova nga ihinatag [pinaagi kan] Moises.” Iginhatag niya ito ha sekretaryo han hadi nga hi Sapan, nga nagbasa hito kan Josia. (Basaha an 2 Kronikas 34:14-18.) Ano an resulta? Gin-gisi dayon han hadi an iya bado tungod han duro nga kasubo ngan ginsugo an kalalakin-an nga komunsulta kan Jehova. Pinaagi kan propetisa Hulda, naghatag an Dios hin mensahe nga nagkukondenar han relihiyoso nga mga rituwal nga ginbubuhat ha Juda. Kondi, nakita ni Jehova an pangalimbasog ni Josia ha pagkuha han idolatroso nga rituwal, tungod hito gin-uyonan hiya bisan pa kon igintagna na an kabungkagan han bug-os nga nasud. (2 Kron. 34:19-28) Ano an mahibabaroan naton tikang hini? An aton hingyap pariho gud han kan Josia. Karuyag naton nga sundon dayon an giya ni Jehova, nga ginhuhunahuna hin seryoso an magigin resulta kon tugotan naton an apostasya ngan pagkadiri-matinumanon nga makaulang ha aton pagsingba. Ngan makakasarig kita nga uuyonan ni Jehova an aton kadasig para ha tinuod nga pagsingba, sugad la nga gin-uyonan niya hi Josia.
21, 22. (a) Kay ano nga sadang magin madasigon kita para ha balay ni Jehova? (b) Ano an aton paghihisgotan ha sunod nga artikulo?
21 An upat nga hadi han Juda—hira Asa, Jehosapat, Hesekia, ngan Josia—mag-opay nga susbaranan ha pagin madasigon para ha balay han Dios ngan ha pagsingba ha iya. Sadang magpagios liwat ito ha aton nga sumarig kan Jehova ngan mangalimbasog ha pagsingba ha iya. Maaramon ngan makalilipay gud an pagsunod ha mga instruksyon han Dios ngan an pagkarawat ha mahigugmaon nga pagmangno ngan pagtadong ha aton pinaagi han kongregasyon ngan mga tigurang.
22 An sunod nga artikulo maghihisgot han kadasig ha pagsangyaw ngan mag-aaghat ha mga batan-on nga mag-alagad hin madasigon ha aton mahigugmaon nga Amay. Paghihisgotan liwat naton kon paonan-o malilikyan an usa han nakakadaot gud nga impluwensya ni Satanas. Samtang madasigon nga ginsusunod naton an ngatanan nga pahinumdom ni Jehova, masusubad naton an Iya Anak, hi Jesus, nga mahitungod ha iya ini an ginsiring: ‘An daku nga tinguha [“kadasig,” NW] ha imo balay nakalukop ha akon.’—Sal. 69:9; 119:111, 129; 1 Ped. 2: 21.
Nahinunumdoman Mo Ba?
• Ano nga klase hin pag-alagad an ginbibendisyonan ni Jehova, ngan kay ano?
• Paonan-o naton maipapakita nga nasarig kita kan Jehova?
• Paonan-o an kadasig magpapagios ha aton nga sundon an mga instruksyon han Dios?
[Mga Pakiana]
[Mga Retrato ha pahina 9]
Paonan-o ipinakita nira Asa, Jehosapat, Hesekia, ngan Josia an kadasig para ha balay ni Jehova?
