Mga Bana, Subara an Gugma ni Kristo!

HA ULTIMO nga gab-i han kinabuhi ni Jesus ha tuna, hiya nagsiring ha iya magtinumanon nga apostol: “Ako mahatag ha iyo hin usa nga bag-o nga sugo, nga kamo maghigugmaanay an usa kag usa; nga sugad gud han akon paghigugma ha iyo, kamo man maghigugmaanay an usa kag usa. Tungod hini an ngatanan makilala, nga kamo akon mga tinon-an, kon kamo maghigugmaanay an usa kag usa.” (Juan 13:34, 35) Oo, an tinuod nga mga Kristiano kinahanglan maghigugmaay ha usa kag usa.

Hi Pablo direkta nga nagsurat ha Kristiano nga mga bana, nasiring: “Mga asawa nga kalalakin-an, higugmaa niyo an iyo mga asawa nga kababayin-an, sugad man nga hi Kristo naghigugma ha singbahan ngan igintubyan niya an iya kalugaringon tungod hito.” (Efe. 5:25) Paonan-o maiaaplikar han Kristiano nga bana inin Kasuratanhon nga sagdon ha iya pag-asawa, labi na kon dedikado nga surugoon ni Jehova an iya asawa?

Pinaura ni Kristo an Kongregasyon

“An mga asawa nga kalalakin-an kinahanglan man nga mahigugma ha ira mga asawa nga babaye sugad ha ira mga kalugaringon nga lawas,” siring han Biblia. “An nahigugma ha iya asawa nga babaye nahigugma man ha iya ngahaw. Kay bisan san-o waray tawo nga nangalas ha iya kalugaringon nga unod; kondi nga gin-aataman ngan ginmamangnoan niya ito sugad man nga hi Kristo ha singbahan.” (Efe. 5:28, 29) Hinigugma gud ni Jesus an iya mga disipulo. Pinaura niya hira. Bisan kon diri hira hingpit, malumo ngan buotan hiya ha ira. Tungod kay hingyap niya nga ‘igpahayag ngadto ha iya ngahaw an singbahan nga mahimayaon,’ nagsentro hiya ha mag-opay nga kalidad han iya mga disipulo.—Efe. 5:27.

Sugad la nga hi Kristo nagpahayag han iya gugma ha kongregasyon, an bana sadang liwat magpakita hin gugma ha iya asawa pinaagi ha pulong ngan buhat. An asawa nga pirme nakakakarawat o nakakabati hin mga kapahayagan han gugma han iya bana naabat nga pinaura hiya ngan nagigin malipayon. Ha luyo nga bahin, an asawa nga naukoy ha panimalay nga may-ada han ngatanan nga kahimyang mahimo umabat hin duro nga kasubo kon ginpapasibay-an o ginbabalewaray hiya han iya bana.

Paonan-o naipapakita han bana nga pinaura niya an iya asawa? Ha publiko, iginpapakilala niya an iya asawa ha dungganon nga paagi ngan gindadayaw hiya tungod han iya suporta. Kon daku an naibulig han iya asawa ha kalamposan han pamilya ha usa nga buruhaton, diri hiya nag-aalang pagsumat hito ha iba. Ha pribado, inaabat han iya asawa an iya gugma. An pagkapot han kamot, paghiyom, paghangkop, ngan pagdayaw bangin gudtiay nga butang, kondi hilarom an epekto hito ha kasingkasing han asawa.

“Waray Hiya Kaawod ha Pagtawag ha Ira nga mga Kabugtoan”

Hi Kristo Jesus ‘waray maawod ha pagtawag [ha iya dinihogan nga mga sumurunod] nga kabugtoan.’ (Heb. 2:11, 12, 17) Kon ikaw usa nga Kristiano nga bana, hinumdumi nga an imo asawa imo liwat bugto ha pagtoo. An iya dedikasyon kan Jehova mas importante kay han iya panumpa ha pag-asawa, nabawtismohan man hiya antes o katapos han iyo kasal. An bugto nga nagdudumara ha katirok han kongregasyon husto la nga natawag ha imo asawa nga “Bugto” kon gintatawag hiya pagkomento. Bugto mo liwat hiya, diri la ha Kingdom Hall kondi pati ha balay. Salit kon buotan ngan matinalahuron ka ha iya ha Kingdom Hall, kinahanglan sugad ka liwat hito ha balay.

Kon may-ada ka dugang nga mga pribilehiyo ha kongregasyon, bangin may mga panahon nga makuri an pagin timbang ha mga responsabilidad ha kongregasyon ngan ha panimalay. An maopay nga kooperasyon han mga tigurang ngan mga ministeryal ngan an pagbansay ha iba ha pagdumara  han pipira nga buruhaton ha kongregasyon makakabulig ha imo nga magkaada hin dugang nga panahon ha bugto nga nagkikinahanglan gud ha imo—an imo asawa. Hinumdumi nga may mga kabugtoan nga sigurado nga makakagbuhat han mga buruhaton ha kongregasyon nga igintoka ha imo, kondi ikaw gud la an bugto nga ginpakasalan han imo asawa.

Dugang pa, ikaw an ulo han imo asawa. An Biblia nasiring: “An ulo han ngatanan nga mga tawo amo hi Kristo; ngan an ulo han babaye amo an lalaki.” (1 Kor. 11:3) Paonan-o mo sadang ipakita an imo pagkaulo? Diri pinaagi han pauroutro nga pagkotar han gin-unabi nga teksto ngan pag-obligar ha iya nga respetuhon ka kondi ha mahigugmaon nga paagi. An husto nga paagi ha pagpakita han pagkaulo amo an pagsubad kan Jesu-Kristo ha paagi han imo pagtratar ha imo asawa.—1 Ped. 2:21.

“Kamo Amo an Akon mga Kasangkayan”

Gintawag ni Jesus an iya mga disipulo nga iya kasangkayan. Hiya nagsiring ha ira: “Ako diri na nagtatawag ha iyo nga mga uripon, kay an uripon diri maaram han ginbubuhat han iya agaron; kondi ako nagtatawag ha iyo mga kasangkayan, kay an ngatanan nga bagay nga akon ginpamatian tikang han akon Amay, akon iginpakilala ha iyo.” (Juan 15:14, 15) Hi Jesus ngan an iya mga disipulo may-ada maopay nga komunikasyon. Urosa liwat hira nga nagbubuhat hin mga buruhaton. “Hi Jesus ngan an iya mga tinon-an” gin-imbitar ha kasal ha Kana. (Juan 2:2) May-ada hira paborito nga mga lugar sugad han hardin han Getsemani. An Biblia nasiring nga “hi Jesus agsob kumadto didto kaupod an iya mga tinon-an.”—Juan 18:2.

An asawa kinahanglan gud umabat nga hiya an pinakaduok nga sangkay han iya bana. Importante gud nga magkaupod nga buhaton niyo nga mag-asawa an iyo mga buruhaton! Mag-alagad ha Dios nga magkaupod. Magmalipayon ha pag-aram han Biblia nga magkaupod. Magkaada panahon nga mamasyada, mag-istorya, ngan mangaon nga magkaupod. Ayaw la kamo pagin mag-asawa; magin duok liwat kamo nga magsangkay.

“Ginhigugma Niya Hira Tubtob ha Kataposan”

Ginhigugma ni Jesus an iya mga disipulo tubtob ha kataposan. (Juan 13:1) May-ada mga bana nga diri nagsusubad kan Kristo may kalabotan hini. Bangin bayaan pa ngani nira ‘an asawa han ira pagkabatan-on,’ tungod kay posible nga may naruruyagan hira nga mas batan-on.—Mal. 2:14, 15.

An iba, pariho kan Willi, nagsusubad kan Kristo. Ha sulod hin damu ka tuig, an asawa ni Willi kinahanglan pirme atamanon tungod kay masakiton hiya. Ano an inabat ni Willi mahitungod hini? Hiya nagsiring: “Pirme ko ginhuhunahuna nga an akon asawa regalo tikang ha Dios ngan ginpapabilhan ko gud hiya. Labot pa, 60 ka tuig na an naglabay, nagsaad ako nga aatamanon ko hiya ha maopay ngan maraot nga kahimtang. Diri ko gud hingangalimtan ito nga saad.”

Kamo nga Kristiano nga mga bana, subara an gugma ni Kristo. Pauraha an iyo mahadlukon ha Dios nga asawa—an iyo bugto ngan sangkay.

[Retrato ha pahina 20]

An imo ba asawa an imo pinakaduok nga sangkay?

[Retrato ha pahina 20]

Padayon nga higugmaa an imo asawa