An mga Pulong ni Jesus Nakakaaghat Gud han Kalipay

‘Hi Jesus sinaka ngadto ha bukid; ngan an iya mga tinon-an dinaop ha iya. Ngan hiya nagtutdo ha ira.’—MAT. 5:1, 2.

1, 2. (a) Ano an kahimtang han nagpahayag hi Jesus han iya Sermon ha Bukid? (b) Paonan-o gintikangan ni Jesus an iya diskurso?

 TUIG adto han 31 K.P. Inundang anay hi Jesus ha iya pagsangyaw ha Galilea para ha pagsaurog han Paskua ha Jerusalem. (Juan 5:1) Pagbalik ha Galilea, nag-ampo hiya ha bug-os nga gab-i para han giya han Dios ha pagpili han 12 nga apostol. Kinabuwasan, nagtirirok an damu nga tawo samtang gintatambal ni Jesus an magsakit. Upod an iya mga disipulo ngan iba pa, liningkod hiya ha bakilid han bukid ngan nagtikang hiya ha pagtutdo.—Mat. 4:23–5:2; Luk. 6:12-19.

² Gintikangan ni Jesus an iya diskurso—an Sermon ha Bukid—pinaagi ha pagsaysay nga kalipay an resulta han pagkaada maopay nga relasyon ha Dios. (Basaha an Mateo 5:1-12. a) An kalipay amo an ‘maopay nga pag-abat, tikang ha pagkakontento tubtob ha duro nga pagrayhak.’ An siyam nga kalipay nga iginpahayag ni Jesus nagpapatin-aw kon kay ano nga malipayon an mga Kristiano, ngan mapulsanon yana ito nga mga pulong sugad nga mapulsanon ito haros 2,000 ka tuig na an naglabay. Aton paghisgotan yana an tagsa hini.

“Adton Mahunahunaon han Ira Espirituwal nga Panginahanglan”

 3. Ano an kahulogan han pagin mahunahunaon ha aton espirituwal nga panginahanglan?

³ “Malipayon adton mahunahunaon han ira espirituwal nga panginahanglan, tungod kay ira an ginhadian han langit.” (Mat. 5:3, NW) Maaram “adton mahunahunaon han ira espirituwal nga panginahanglan” nga kablas hira ha espirituwal ngan nagkikinahanglan han kalooy han Dios.

4, 5. (a) Kay ano nga malipayon adton mahunahunaon han ira espirituwal nga panginahanglan? (b) Paonan-o matatagbaw an aton espirituwal nga panginahanglan?

⁴ Malipayon adton mahunahunaon han ira espirituwal nga panginahanglan, “tungod kay ira an ginhadian han langit.” An siyahan nga mga disipulo ni Jesus nagkaada hin paglaom nga magmando upod niya ha Ginhadian han Dios ha langit tungod kay ginkarawat nira hiya sugad nga Mesias. (Luk. 22:28-30) Naglalaom man kita nga magin igkasi-manurunod ni Kristo ha langit o nagpapamulat han kinabuhi nga waray kataposan ha paraiso nga tuna durante han pagmando han Ginhadian, magigin malipayon kita kon tinuod nga mahunahunaon kita han aton espirituwal nga panginahanglan ngan bug-os nga nasarig ha Dios.

⁵ Diri ngatanan mahunahunaon han ira espirituwal nga panginahanglan, tungod kay damu an diri natoo ngan diri naapresyar ha sagrado nga mga butang. (2 Tes. 3:1, 2; Heb. 12:16) An mga paagi ha pagtagbaw han aton espirituwal nga panginahanglan nag-uupod han maduruto nga pag-aram ha Biblia, madasigon nga pagbulig ha iba nga magin mga disipulo, ngan regular nga pagtambong ha Kristiano nga mga katirok.—Mat. 28:19, 20; Heb. 10:23-25.

Mga Nabibido nga “Malipayon”

 6. Hin-o “adton nabibido,” ngan kay ano nga “malipayon” hira?

⁶ “Malipayon adton nabibido, kay hira liliawon.” (Mat. 5:4, NW) “Adton nabibido” amo an mga tawo nga “mahunahunaon han ira espirituwal nga panginahanglan.” Diri hira nabibido ha paagi nga nagrireklamo hira tungod han ira kahimtang ha kinabuhi. An ira kabido amo  an kasubo tungod han ira pagin makasasala ngan han makuri nga mga kahimtang tungod han pagkadiri-hingpit. Kay ano nga “malipayon” an sugad nga mga nabibido? Tungod kay natoo hira ha Dios ngan kan Kristo ngan naliliaw tungod ha pagkaada hin maopay nga relasyon kan Jehova.—Juan 3:36.

 7. Ano an sadang abaton naton ha kalibotan ni Satanas?

⁷ Nabibido ba kita tungod han pagkadiri-matadong nga kalyap ha kalibotan ni Satanas? Ano gud ba an inaabat naton ha igintatanyag hini nga kalibotan? Hi apostol Juan nagsurat: “An ngatanan nga aada ha kalibotan, an kairiphon han unod ngan an kairiphon han mga mata, ngan an paghambog han kinabuhi, diri kanan Amay.” (1 Juan 2:16) Kondi kumusta man kon inaabat naton nga an aton espirituwalidad hinay-hinay nga naiimpluwensyahan han “espiritu han kalibotan,” an makusog nga pwersa nga nagmamando ha katawohan nga binulag ha Dios? Kon amo ito, sinsero nga mag-ampo kita, mag-aram han Pulong han Dios ngan mangaro hin bulig ha mga tigurang. Samtang nagigin mas duok kita kan Jehova, ‘maliliaw’ kita, anoman an hinungdan han aton kasubo.—1 Kor. 2:12; Sal. 119:52; Jak. 5:14, 15.

Malipayon Gud “an mga Maaghop”!

8, 9. Ano an kahulogan han pagin maaghop, ngan kay ano nga malipayon an mga maaghop?

⁸ “Bulahan an mga maaghop, kay hira makakapanunod han tuna.” (Mat. 5:5) An “pagkaaghop,” diri nagpapasabot hin pagkamaluya o salingkapaw nga pagkamalumo. (1 Tim. 6:11) Kon maaghop kita, ipapakita naton an pagkamalumo pinaagi ha pagbuhat han kaburut-on ni Jehova ngan pagkarawat han iya giya. Makikita liwat an kaaghop ha aton pagtratar ha mga igkasi-tumuroo ngan ha iba. An sugad nga kaaghop nauyon ha sagdon ni apostol Pablo.—Basaha an Roma 12:17-19.

⁹ Kay ano nga malipayon an “mga maaghop”? Tungod kay “hira makakapanunod han tuna,” siring han maaghop nga hi Jesus. Hiya an nangunguna nga Manurunod han tuna. (Sal. 2:8; Mat. 11:29; Heb. 2:8, 9) Kondi, an maaghop nga “mga manurunod upod ni Kristo” makakapanunod liwat han tuna. (Roma 8:16, 17) Ha tunan-on nga nasasakopan han Ginhadian ni Jesus, damu pa nga maaghop an magpapahimulos han kinabuhi nga waray kataposan.—Sal. 37:10, 11.

10. Paonan-o an kakulang hin kaaghop nakakaapekto ha aton pribilehiyo han pag-alagad ngan ha aton relasyon ha iba?

¹⁰ Pariho kan Jesus, sadang kita magin maaghop. Kondi ano man kon kilala kita nga makiawayon? Kon sugad kita hito, mapahirayo ha aton an mga tawo. An kabugtoan ha kongregasyon nga naghihingyap hin mga responsabilidad, diri magigin kwalipikado kon may-ada hira hini nga kinaiya. (1 Tim. 3:1, 3) Ginsidngan ni Pablo hi Tito nga pahinumdumon pirme an mga Kristiano ha Kreta nga magin “diri makimasamok, magtalunoy, ha pagpakita han bug-os nga kaaghop ha ngatanan nga mga tawo.” (Tito 3:1, 2) Bendisyon gud ha iba an sugad nga kaaghop!

Nagugutom Hira han “Katadongan”

11-13. (a) Ano an kahulogan han kagutom ngan kauhaw han katadongan? (b) Paonan-o ‘ginbubusog’ adton nagugutom ngan nauuhaw han katadongan?

¹¹ “Bulahan an mga ginugutom ngan inuuhaw tungod han katadongan kay hira pagbubusgon.” (Mat. 5:6) An “katadongan” nga nahunahuna ni Jesus amo an kalidad han pagbuhat hin husto pinaagi ha pagpahiuyon ha kaburut-on ngan kasugoanan han Dios. An salmista nagsiring  nga hiya “naruruba ha paghingyap” han matadong nga mga desisyon han Dios. (Sal. 119:20) Pinabibilhan gud ba naton an katadongan salit nagugutom ngan nauuhaw kita hito?

¹² Hi Jesus nagsiring nga an mga ginugutom ngan inuuhaw han katadongan magigin malipayon tungod kay hira “pagbubusgon,” o bug-os nga tatagbawon. Nagin posible ini katapos han Pentekostes 33 K.P. kay an baraan nga espiritu ni Jehova nagtikang maghatag ha kalibotan hin makakombinse nga pamatuod mahitungod han “katadongan.” (Juan 16:8) Pinaagi han baraan nga espiritu, naggiya an Dios hin kalalakin-an basi isurat an Kristiano Griego nga Kasuratan, nga mapulsanon ha “pagdisiplina uyon ha katadongan.” (2 Tim. 3:16, NW) An espiritu han Dios nabulig liwat ha aton ha ‘pagsul-ot han bag-o nga personalidad nga ginlarang uyon ha kaburut-on han Dios ha tinuod nga pagkamatadong.’ (Efe. 4:24, NW) Diri ba nakakaliaw hibaroan nga adton nagbabasol ngan nangangaro hin pasaylo han ira mga sala pinaagi han halad lukat ni Jesus magigin matadong ha paniplatan han Dios?—Basaha an Roma 3:23, 24.

¹³ Bug-os nga matatagbaw an kagutom ngan kauhaw ha katadongan han kadam-an ha aton kon makarawat na naton an kinabuhi nga waray kataposan ha matadong nga kahimtang ha tuna. Kondi, antes hito, magin determinado kita nga magkinabuhi uyon ha mga prinsipyo ni Jehova. Hi Jesus nagsiring: “Pamilnga niyo siyahan an ginhadian han Dios, ngan an iya katadongan.” (Mat. 6:33) Ha pagbuhat hito, magdadamu an aton buruhaton ha pag-alagad ha Dios ngan magpapalipay ito ha aton.—1 Kor. 15:58.

Kon Kay Ano nga Malipayon “an mga Maloloy-on”

14, 15. Paonan-o naton maipapakita an kalooy, ngan kay ano nga malipayon “an mga maloloy-on”?

¹⁴ “Bulahan an mga maloloy-on kay hira makakakarawat hin kalooy.” (Mat. 5:7) “An mga maloloy-on” mapinairon ngan matinagaron ha iba. Milagroso nga gintambal ni Jesus an damu nga magsakit tungod kay nalooy hiya ha ira. (Mat. 14:14) Naipapakita an kalooy kon ginpapasaylo han mga tawo adton nakasala ha ira, sugad han maloloy-on nga pagpasaylo ni Jehova ha mga nagbabasol. (Eks. 34:6, 7; Sal. 103:10) Maipapakita naton an kalooy hito nga paagi ngan ha aton mahigugmaon nga mga pulong ngan buhat nga nakakaliaw ha mga tawo nga nagsasakit. An maopay nga paagi ha pagpakita hin kalooy amo an pagsumat han kamatuoran han Biblia ha iba. Tungod kay nalooy hi Jesus ha katawohan, ‘nagtikang hiya ha pagtutdo ha ira hin damu nga bagay.’—Mar. 6:34.

¹⁵ Nauyon kita ha ginsiring ni Jesus: “Bulahan an mga maloloy-on kay hira makakakarawat hin kalooy.” Kon maloloy-on kita ha iba, malolooy liwat hira ha aton. Kon hukman na kita han Dios, mahimo nga diri kita hukman hin maraot kon maloloy-on kita ha iba. (Jak. 2:13) An pagpasaylo han mga sala ngan an dayon nga kinabuhi para la hadton maloloy-on.—Mat. 6:15.

 Kon Kay Ano nga Malipayon “an mga Maputli ha Kasingkasing”

16. Ano an kahulogan han pagin “maputli ha kasingkasing,” ngan paonan-o adton may-ada hito nga kalidad “makakakita han Dios”?

¹⁶ “Bulahan an mga maputli ha kasingkasing, kay hira makakakita han Dios.” (Mat. 5:8) Kon kita “maputli ha kasingkasing,” makikita ito ha aton mga karuyag, hingyap, ngan motibo. Ipapakita naton an “gugma tikang ha usa nga kasingkasing nga putli.” (1 Tim. 1:5) Tungod kay putli, aton ‘makikita an Dios.’ Diri ini nangangahulogan nga literal nga makikita naton hi Jehova, kay “waray tawo nga makakakita [ha Dios] ngan mabubuhi.” (Eks. 33:20) Kondi, tungod kay hingpit nga ipinakita ni Jesus an personalidad han Dios, nakasiring hiya: “An nakakita ha akon, nakakita man ha Amay.” (Juan 14:7-9) Sugad nga mga magsiringba ni Jehova dinhi ha tuna, aton ‘makikita an Dios’ pinaagi ha pag-obserba han iya ginbubuhat para ha aton. (Job 42:5) Para ha mga dinihogan, bug-os nga makikita nira an Dios kon banhawon na hira ha espirituhanon nga kinabuhi ngan aktuwal nga makita an ira langitnon nga Amay.—1 Juan 3:2.

17. Ano an epekto ha aton han pagin putli ha kasingkasing?

¹⁷ Tungod kay limpyo ha moral ngan ha espirituwal, an putli ha kasingkasing nalikay ha ngatanan nga mahugaw ha paniplatan ni Jehova. (1 Kron. 28:9; Isa. 52:11) Kon putli kita ha kasingkasing, an aton ginsisiring ngan ginbubuhat magigin putli, ngan waray pagkasalingkapaw an aton pag-alagad kan Jehova.

“An mga Makigdaiton” Magigin mga Anak han Dios

18, 19. Paonan-o nagawi an “makigdaiton”?

¹⁸ “Bulahan an mga makigdaiton, kay hira pagngangaranan nga mga anak han Dios.” (Mat. 5:9) “An mga makigdaiton” nakikilala pinaagi ha ira ginbubuhat ngan diri ginbubuhat. Kon kita an klase hin mga tawo nga nahunahuna ni Jesus, nakikigmurayaw kita ngan ‘diri nabulos hin maraot ha maraot ha bisan hin-o.’ Lugod, aton ‘gintitinguha pirme an maopay para ha iba.’—1 Tes. 5:15, NW.

¹⁹ An Griego nga pulong nga “makigdaiton” ha Mateo 5:9 literal nga nangangahulogan hin “nakikigmurayaw.” Basi makaupod han makigdaiton, kinahanglan makigmurayaw kita. An mga nakikigmurayaw diri nagbubuhat hin bisan ano nga ‘nakakapagburublag han magsarangkay.’ (Prob. 16:28) Sugad nga makigdaiton, nangangalimbasog kita ha ‘pakigdait ha ngatanan nga tawo.’—Heb. 12:14.

20. Hin-o yana an “mga anak han Dios,” ngan hin-o pa an iya magigin mga anak?

²⁰ Malipayon an nakikigmurayaw tungod kay “hira pagngangaranan nga mga anak han Dios.” An matinumanon nga dinihogan nga mga Kristiano gin-ampon ni Jehova ngan nagin “mga anak han Dios.” May-ada na hira duok nga relasyon kan Jehova sugad nga iya mga anak tungod han ira pagtoo kan Kristo ngan bug-os-kasingkasing nga pagsingba ha “Dios han paghigugma ngan paghidait.” (2 Kor. 13:11; Juan 1:12) Kumusta man an nakikigmurayaw nga ‘iba nga mga karnero’ ni Jesus? Magigin ira ‘Amay ha Kadayonan’ hi Jesus durante han iya Milenyo nga Pagmando, kondi ha kataposan hito magpapasakop hiya kan Jehova ngan magigin mga anak hira han Dios ha bug-os nga kahulogan.—Juan 10:16; Isa. 9:6; Roma 8:21; 1 Kor. 15:27, 28.

21. Paonan-o kita magawi kon nagkikinabuhi kita uyon “ha espiritu”?

²¹ Kon nagkikinabuhi kita uyon “ha espiritu,” an pakigmurayaw magigin usa han aton mga kalidad nga makikita dayon han iba. Diri kita “magkasuhay-suhay an usa kag usa” o “maggiawa-awa.” (Gal. 5:22-26) Lugod, nangangalimbasog kita nga ‘makigmurayaw ha ngatanan nga tawo.’—Roma 12:18.

 Malipayon Bisan kon Gintitimaraot!

22-24. (a) Ano an mga hinungdan han kalipay hadton gintitimaraot tungod han katadongan? (b) Ano an aton paghihisgotan ha masunod nga duha nga artikulo?

²² “Bulahan an mga gintitimaraot tungod han katadongan, kay ira an ginhadian han langit.” (Mat. 5:10) Ha dugang nga pagsaysay hini, hi Jesus nagsiring: “Bulahan kamo, kon kamo pagdurugasan, ngan pagtitimarat-an ngan kon pagyayaknan ha ngatanan nga magraot hin buwa kontra ha iyo tungod ha akon. Magkalipay ngan maghimaya kamo, kay daku an iyo balos ha langit, kay amo ini an ira pagtimarat-i han mga manaragna nga una ha iyo.”—Mat. 5:11, 12.

²³ Pariho ha mga propeta han Dios hadto, an mga Kristiano naglalaom nga pagpapakaalohan, pagkukontrahon, ngan pagpapakarauton hira—ngatanan “tungod han katadongan.” Kondi, pinaagi han matinumanon nga pagpailob ha sugad nga mga pagsari, tagbaw kita ha pagpalipay ngan pagpasidungog kan Jehova. (1 Ped. 2:19-21) An aton pag-antos diri makakaiban han aton kalipay ha pag-alagad kan Jehova yana ngan ha tidaraon. Diri liwat ito makakaiban han kalipay ha pagmando upod ni Kristo ha Ginhadian ha langit o han kalipay ha pagkarawat han kinabuhi nga waray kataposan sugad nga usa han tunan-on nga mga sakop hito nga gobyerno. An sugad nga mga bendisyon nagpapamatuod nga an Dios mabinuligon, maloloy-on, ngan mahinatagon.

²⁴ Damu pa gud an aton mahibabaroan ha Sermon ha Bukid. Paghihisgotan ha masunod nga duha nga artikulo an magkalain-lain nga leksyon. Aton kitaon kon paonan-o naton maiaaplikar an mga pulong ni Jesu-Kristo.

[Footnote]

Ano an Imo Baton?

• Kay ano nga malipayon “adton mahunahunaon han ira espirituwal nga panginahanglan”?

• Kay ano nga malipayon an “mga maaghop”?

• Kay ano nga malipayon an mga Kristiano bisan kon gintitimaraot?

• Ha mga kalipay nga iginsaysay ni Jesus, ano an labi nga naruyagan mo?

[Mga Pakiana]

[Retrato ha pahina 7]

An siyam nga kalipay nga iginpatin-aw ni Jesus mapulsanon yana sugad la hadto

[Retrato ha pahina 8]

An maopay nga paagi ha pagpakita hin kalooy amo an pagsumat han kamatuoran han Biblia ha iba