Mga Batan-on, Hinumdumi Yana an Iyo Harangdon nga Maglalarang

“Hinumdumi yana an imo Magburuhat ha mga adlaw han imo pagkabatan-on.”—EKLES. 12:1.

 1. Paonan-o iginpahayag ni Jehova an iya pagtapod ha iya batan-on nga mga magsiringba?

 AN Kristiano nga mga batan-on gintatagad ni Jehova nga presyoso ngan makarepresko sugad hin tun-og. Oo, nagtagna hiya nga ha adlaw han “kagamhanan” han iya Anak, ‘kinaburut-on nga maghahalad’ hira han ira kalugaringon ha pag-alagad kan Kristo. (Sal. 110:3) Natutuman ito ha aton panahon yana diin an mga tawo ha kabug-osan waray pagtagad ha Dios, okupado hinduro ha kalugaringon, magpakikwarta, ngan matinalapasnon. Kondi, maaram hi Jehova nga iba gud an mga batan-on nga nagsisingba ha iya. Daku gud an iya pagtapod ha iyo!

 2. Ano an nahiuupod ha paghinumdom kan Jehova?

² Handurawa an kalipay han Dios kon nakikita niya an mga batan-on nga nahinunumdom ha iya sugad nga ira Harangdon nga Maglalarang. (Ekles. 12:1) Syempre, an paghinumdom kan Jehova diri la kay paghunahuna ha iya. Nangangahulogan ito hin pagbuhat han nakakalipay ha iya ngan pagpagiya han iya mga balaud ngan prinsipyo ha aton adlaw-adlaw nga pagkinabuhi. Nag-uupod liwat ito hin pagsarig ha iya tungod kay maaram kita nga nagtatagad gud hiya han aton kaopayan. (Sal. 37:3; Isa. 48:17, 18) Ito ba an imo inaabat ha imo Harangdon nga Maglalarang?

“Sarig kan Jehova ha Bug-os Mo nga Kasingkasing”

3, 4. Paonan-o ipinakita ni Jesus an iya pagsarig kan Jehova, ngan kay ano nga importante nga sumarig kita ha Iya yana?

³ Syempre, hi Jesu-Kristo an gimaopayi nga susbaranan han nasarig ha Dios. Nagkinabuhi hiya uyon ha ginsiring han Proberbios 3:5, 6: “Sarig kan Jehova ha bug-os mo nga kasingkasing, ngan ayaw sandig dida ha imo kalugaringon nga pagsabot: Ha ngatanan mo nga dalan kilalaha hiya, ngan hiya magtututdo han imo mga agianan.” Waray pag-iha katapos han iya bawtismo, ginsulay hiya ni Satanas nga karawaton an gahum ngan himaya han kalibotan. (Luk. 4:3-13) Waray malimbongi hi Jesus. Maaram hiya nga an tinuod nga ‘bahandi, dungog, ngan kinabuhi’ amo an “balos han kamapainubsanon ngan [han] kahadlok kan Jehova.”—Prob. 22:4.

⁴ Kalyap an kahakog ngan kamakikalugaringon ha kalibotan yana. Ha sugad nga kahimtang, maopay gud nga sundon naton an susbaranan ni Jesus. Hinumdumi liwat nga determinado hi Satanas ha pagsulay ha mga surugoon ni Jehova nga bumaya ha haligot nga dalan tipakadto ha kinabuhi. Karuyag niya nga an ngatanan maglakat ha haluag nga dalan tipakadto ha kabungkagan. Ayaw palimbong ha iya! Lugod, magin determinado ha paghinumdom han imo Harangdon nga Maglalarang. Sarig ha Iya hin bug-os, ngan kapti hin marig-on an “kinabuhi nga totoo” nga hirani na gud umabot.—1 Tim. 6:19.

Mga Batan-on, Magin Maaramon!

 5. Ano an imo masisiring mahitungod han tidaraon hini nga kalibotan?

⁵ Maaramon gud an mga batan-on nga nahinunumdom han ira Harangdon nga Maglalarang. (Basaha an Salmo 119:99, 100.) Tungod kay ginsusubad nira an panhunahuna han Dios, maaram gud hira nga diri mag-iiha mawawara na ini nga kalibotan. Bisan kon batan-on pa kamo, sigurado nga naobserbahan niyo nga nag-uuswag an  kahadlok ngan kabaraka. Ha eskwelahan, posible nga nakabati na kamo mahitungod han polusyon, pagtikapaso han klima, pagdaot han kagurangan, ngan mga problema nga pariho hini. Nababaraka gud hini an mga tawo, kondi an mga Saksi ni Jehova la an nakakasabot hin bug-os nga bahin ini han tigaman han kataposan han kalibotan ni Satanas.—Pah. 11:18.

 6. Paonan-o nalimbongan an iba nga mga batan-on?

⁶ Makasurubo, waray magpadayon ha pagbantay an pipira nga batan-on nga surugoon han Dios ngan hinngalimtan nira nga halipot na la an panahon. (2 Ped. 3:3, 4) An iba nasulay ha pagbuhat hin seryoso nga sala tungod han magraot nga kaupod ngan pornograpiya. (Prob. 13:20) Makasurubo gud kon mawara an aton maopay nga relasyon ha Dios, yana nga hirani na hinduro an kataposan! Lugod, mahibaro kita hin leksyon ha nahitabo ha mga Israelita han 1473 A.K.P. han nagkakampo hira ha Kapatagan han Moab han tisulod na hira ha Tuna nga Iginsaad. Ano an nahitabo didto?

Nasulay Hira han Tisulod Na ha Tuna nga Iginsaad

7, 8. (a) Ano nga taktika an gin-gamit ni Satanas ha Kapatagan han Moab? (b) Ano nga taktika an ginagamit ni Satanas yana?

⁷ Hito nga panahon, matin-aw nga karuyag ni Satanas nga diri makarawat han mga Israelita an iginsaad ha ira nga panurundon. Han mapakyas hi Satanas nga panhimarauton hira ni propeta Balaam, mas tuso nga paagi an iya gin-gamit; nangalimbasog hiya nga mawara an pag-uyon ni Jehova ha ira. Gin-gamit niya an nakakadani nga kababayin-an han Moab ha pagsulay ha ira, ngan naglampos hiya hini. Nakighilawas hira ha kababayin-an han Moab ngan nagsingba kan Baal han Peor! Bisan kon hirani na gud an ira presyoso nga panurundon—an Tuna nga Iginsaad—24,000 ha ira an namatay. Daku gud ito nga trahedya!—Num. 25:1-3, 9.

⁸ Yana, nagtitikahirani na gud kita ha mas maopay nga tuna nga iginsaad—an bag-o nga sistema. Ginagamit pa gihapon ni Satanas an seksuwal nga imoralidad ha pagdaot ha katawohan han Dios. Duro na kahamubo an suruklan ha moral han kalibotan. Para ha ira, normal la an pakighilawas ha diri asawa ngan depende la ha kalugaringon nga desisyon an homoseksuwalidad. Nagsiring an usa nga Kristiano, “Ha balay ngan ha Kingdom Hall la nahibabaroan han akon mga anak nga maraot ha paniplatan han Dios an homoseksuwalidad ngan pakighilawas ha diri asawa.”

 9. Ano an mahimo mahitabo durante han panahon nga makusog pa an seksuwal nga mga pagbati, ngan paonan-o ini malalamposan han mga batan-on?

⁹ An mga batan-on nga nahinunumdom ha ira Harangdon nga Maglalarang maaram nga an pakighilawas sagrado nga regalo may kalabotan ha kinabuhi ngan pagpanganak. Salit, maaram hira nga mag-asawa la an mahimo magbuhat hito uyon ha balaud han Dios. (Heb. 13:4) Kondi,  durante han panahon nga makusog pa an seksuwal nga mga pagbati ngan posible makadaot ha pagturutimbang han usa, mahimo nga makuri an pagpabilin nga putli. Ano an imo bubuhaton kon may-ada maraot nga nasulod ha imo hunahuna? Sinsero nga mag-ampo kan Jehova para hin bulig ha pagsentro ha putli nga mga butang. Pirme Hiya namamati ha sinsero nga nadangop ha iya. (Basaha an Lukas 11:9-13.) Makakabulig liwat an makaparig-on nga iristorya basi maisentro utro an panhunahuna.

Maaramon nga Pilia an Imo Tumong!

10. Ano nga negatibo nga panhunahuna an karuyag naton likyan, ngan ano an mahimo naton ipakiana ha aton kalugaringon?

¹⁰ Damu nga batan-on an waray-kontrol ngan nagsasalingabot han kalibotanon nga kalipayan. Ito an hinungdan kon kay ano nga waray hira “bisyon”—waray giya han Dios o sigurado nga paglaom ha tidaraon. (Prob. 29:18) Pariho hira han waray pagtagad ha Dios nga mga Israelita ha panahon ni Isaias nga nagsalingabot han ‘kahimongaya ngan kalipay, pagpinangaon ngan pag-irignom han alaksiw.’ (Isa. 22:13) Imbes nga maipa ha ira, kay ano nga diri pamalandungon an presyoso nga paglaom nga iginsaad ni Jehova ha mga maunungon ha iya? Kon batan-on ka nga alagad han Dios, ginpapamulat mo gud ba an bag-o nga kalibotan? Nangangalimbasog ka gud ba ha pagkinabuhi nga may maopay nga panhunahuna samtang ginhuhulat mo an makalilipay nga paglaom nga iginsaad ni Jehova ha imo? (Tito 2:12, 13) Makakaimpluwensya ha imo tumong ngan prayoridad an imo baton hito.

11. Kay ano nga sadang mag-aram hin maopay an Kristiano nga mga batan-on nga naeskwela pa?

¹¹ Karuyag han kalibotan nga gamiton han mga batan-on an ira kusog ha sekular nga mga tumong. Syempre, an mga naeskwela pa sadang gud mangalimbasog nga magkaada han kinahanglanon nga edukasyon. Hinumdumi nga an imo tumong diri kay makabiling la hin maopay nga trabaho kondi liwat, magin daku nga bulig ha kongregasyon ngan epektibo nga parasamwak han Ginhadian. Tungod hito, kinahanglan mahibaro ka ha pakigkomunikar hin maopay, paghunahuna ha makatadunganon nga paagi, ngan pangatadongan nga kalmado ngan matinalahuron. Kondi, an mga batan-on nga nag-aaram han Biblia ngan nangangalimbasog ha pag-aplikar han mga prinsipyo hito, nakakakarawat han gimaopayi nga edukasyon ngan nagkakaada maopay nga pundasyon para ha malampuson ngan waray kataposan nga tidaraon.—Basaha an Salmo 1:1-3. a

12. Ano an sadang subaron han Kristiano nga mga pamilya?

¹² Ha Israel, importante gud an pagtutdo han mga kag-anak ha ira mga anak. Gintutdoan hira ha haros ngatanan nga bahin han kinabuhi, labi na han espirituwal nga mga butang. (Deut. 6:6, 7) Salit, an batan-on nga mga Israelita nga namati ha ira mga kag-anak ngan ha iba nga edaran nga mahadlukon ha Dios nagkaada kahibaro, kinaadman, hilarom nga pagsabot, ngan abilidad ha paghunahuna—talagsahon nga mga kalidad nga maihahatag han paghibaro mahitungod ha Dios. (Prob. 1:2-4; 2:1-5, 11-15) Salit, sadang pabilhan han Kristiano nga mga pamilya yana an pariho hito nga pagtutdo.

Hin-o an Imo Pamamatian?

13. Ano nga klase hin sagdon an nakakarawat han mga batan-on, ngan kay ano nga sadang hira magbantay?

¹³ Nakakakarawat an mga batan-on hin sagdon tikang ha ngatanan nga klase hin tawo—upod na an mga magturutdo ha eskwelahan nga agsob la mag-aghat nga magin malampuson ha kalibotan. Alayon pag-ampo nga giyahan ka han Dios samtang gintitirotimbang mo an sugad nga mga sagdon  ha bulig han Iya Pulong ngan han espirituwal nga pagkaon nga igintatagana han matinumanon ngan maaramon nga uripon. Ha imo pag-aram han Biblia, nahibaroan mo nga an mga batan-on ngan waray eksperyensya an siyahan nga puntirya ni Satanas. Pananglitan, ha hardin han Eden, an waray eksperyensya nga hi Eva namati kan Satanas, usa nga estranghero nga waray gud magpakita ha iya hin gugma. Kondi, pinamatud-an ni Jehova an Iya gugma ha iya ha damu nga paagi. Iba gud unta an kahimtang kon namati hi Eva ha Iya!—Gen. 3:1-6.

14. Kay ano nga sadang kita mamati kan Jehova ngan ha aton Saksi nga mga kag-anak?

¹⁴ Ginhihigugma ka liwat han imo Harangdon nga Maglalarang ha putli gud nga paagi. Karuyag niya nga magin malipayon ka ha waray kataposan, diri la yana! Salit, pariho han mahigugmaon nga kag-anak, nasiring hiya ha imo ngan ha ngatanan nga nagsisingba ha iya: “Amo ini an dalan, maglakat kamo dida hini.” (Isa. 30:21) Kon hinihigugma gud han imo mga kag-anak hi Jehova, may-ada ka dugang nga bulig. Matinalahuron nga pamati han ira sagdon kon naghihimo ka hin prayoridad ngan tumong. (Prob. 1:8, 9) Ha pagkamatuod, karuyag nira nga makarawat mo an kinabuhi, nga mas birilhon gud kay ha karikohan o kabantogan hini nga kalibotan.—Mat. 16:26.

15, 16. (a) Ano an masasarigan naton kan Jehova? (b) Ano nga importante nga leksyon an aton mahibabaroan ha eksperyensya ni Baruk?

¹⁵ Nagkikinabuhi hin simple an mga nahinunumdom han ira Harangdon nga Maglalarang, ngan nasarig nga ‘diri gud’ hira babayaan o pasisibay-an ni Jehova. (Basaha an Hebreo 13:5.) Tungod kay ini nga maopay nga disposisyon naiiba ha panhunahuna han kalibotan, kinahanglan mag-ikmat kita nga diri maimpluwensyahan han espiritu hito. (Efe. 2:2) May kalabotan hini, tagda an ginbuhat han sekretaryo ni Jeremias nga hi Baruk, nga nagkinabuhi durante han makuri nga panahon han hirani na bungkagon an Jerusalem han 607 A.K.P.

¹⁶ Posible nga karuyag ni Baruk hin mas maopay nga panginabuhi. Naobserbahan ini ni Jehova ngan mahigugmaon nga ginpahamangnoan hiya nga diri magpinamiling hin “dagku nga mga butang.” Nagin mapainubsanon ngan maaramon gud hiya tungod kay namati hiya kan Jehova ngan naluwas han mabungkag an Jerusalem. (Jer. 45:2-5) Ha luyo nga bahin, mas gin-una han iba ha panahon ni Baruk an “dagku nga mga butang” kay ha pag-alagad kan Jehova, kondi nawara ito ngatanan han ginsakop hira han mga Kaldeanhon (Babilonyahanon). Damu liwat ha ira an namatay. (2 Kron. 36:15-18) Nabulig ha aton ini nga eksperyensya ni Baruk nga masabtan nga an maopay nga relasyon ha Dios mas importante gud kay ha karikohan ngan kabantogan hini nga kalibotan.

Subara an Mag-opay nga Susbaranan

17. Kay ano nga hira Jesus, Pablo, ngan Timoteo susbaranan han mga surugoon ni Jehova yana?

¹⁷ Basi mabuligan kita ha dalan han kinabuhi, an Pulong han Dios naghahatag ha aton hin mga susbaranan. Pananglitan, hi Jesus an pinakamaabilidad nga tawo nga nabuhi, kondi nagsentro hiya ha makakabulig ha mga tawo ha waray kataposan—“an maopay nga sumat han ginhadian.” (Luk. 4:43) Basi maihatag ni Pablo an iya  gimaopayi kan Jehova, ginbayaan niya an daku-an-kitá nga propesyon ngan gin-gamit niya an panahon ngan kusog ha pagsangyaw han maopay nga sumat. Ginsubad ni Timoteo, an “anak nga matuod ha pagtoo,” hi Pablo. (1 Tim. 1:2) Nagbasol ba hira Jesus, Pablo, ngan Timoteo ha ira ginpili nga kinabuhi? Waray gud! Ha pagkamatuod, ginhunahuna ni Pablo nga “mga sighot” an igintatanyag han kalibotan kon itanding ha pribilehiyo han pag-alagad ha Dios.—Fil. 3:8-11.

18. Ano nga daku nga desisyon an ginhimo han usa nga batan-on, ngan kay ano nga waray hiya magbasol?

¹⁸ Damu nga Kristiano nga batan-on yana an nasubad han pagtoo nira Jesus, Pablo, ngan Timoteo. Pananglitan, usa nga batan-on nga bugto nga may-ada hadto daku nga sweldo an nagsurat: “Tungod kay ginsusunod ko an mga prinsipyo han Biblia, nakakarawat dayon ako hin promosyon. Bisan pa han pinansyal nga bentaha, inabat ko nga nananalinguha ako ha hangin. Han igin-istorya ko ha mga manidyer han kompanya an akon hingyap nga magpayunir, gintanyagan dayon nira ako hin mas daku nga sweldo basi diri ako bumaya. Kondi, determinado ako. Diri nasasabtan han damu nga tawo kon kay ano nga ginbayaan ko an trabaho nga daku an sweldo basi magpayunir. Ginsasaysay ko ha ira nga karuyag ko gud tumanon an akon dedikasyon ha Dios. Tungod kay nakasentro na an akon kinabuhi yana ha pag-alagad ha Dios, may-ada ako kalipay ngan kakontento nga diri maihahatag han kwarta o kabantogan.”

¹⁹ Ha bug-os nga kalibotan, yinukot nga batan-on an naghihimo hin sugad nga mga desisyon. Salit, mga batan-on, kon ginpapamalandong niyo an iyo tidaraon, hinumdumi pirme an adlaw ni Jehova. (2 Ped. 3:11, 12) Ayaw kaipa ha mga nagigin malampuson hini nga kalibotan. Lugod, pamati ha mga tinuod nga nahigugma ha iyo. An pagtirok hin “bahandi ha langit” amo an waray kalugian nga puhunan ngan ito la an may-ada waray kataposan nga kapulsanan. (Mat. 6:19, 20; basaha an 1 Juan 2:15-17.) Oo, hinumdumi an iyo Harangdon nga Maglalarang. Kon buhaton niyo ito, hi Jehova magbibendisyon ha iyo.

[Footnote]

Nahinunumdoman Mo Ba?

• Paonan-o naton ipinapakita an pagsarig ha Dios?

• Ano an gimaopayi nga edukasyon?

• Ano nga mga leksyon an aton mahibabaroan kan Baruk?

• Hin-o an mag-opay nga susbaranan, ngan kay ano?

[Mga Pakiana]

19. Ano nga maaramon nga desisyon an igin-aaghat ha mga batan-on?

[Mga Retrato ha pahina 13]

Hi Jehova nagtatagana han gimaopayi nga edukasyon

[Retrato ha pahina 15]

Hi Baruk namati kan Jehova ngan natalwas ha kabungkag han Jerusalem. Ano an imo mahibabaroan ha iya susbaranan?