“Sugad ha Langit, Amo Man ha Tuna”

“Gin-uunabi han gintotoohan han Katoliko an Upat nga Ultimo nga Hingangadtoan: Kamatayon, Paghukom, Impyerno, Langit.”—Catholicism, George Brantl an editor.

TIGAMNI nga hini nga lista han hingangadtoan han katawohan, waray iapi an tuna. Diri gud ito urusahon tungod kay an Iglesia Katolika, pariho ha iba pa nga mga relihiyon, natoo nga maabot an adlaw nga an tuna bubungkagon. Iginpapatin-aw ini han Dictionnaire de Théologie Catholique ilarom han topiko nga “Kataposan han Kalibotan”: “An Iglesia Katolika natoo ngan nagtututdo nga an presente nga kalibotan, sugad han pagkalarang han Dios ngan han pag-eksister hito, diri magpapabilin ha waray kataposan.” Usa nga diri pa la maiha nga katekismo han Katoliko an nagpipresenta liwat hini nga ideya: “An aton kalibotan . . . igintanda na nga mawawara.” Kondi kon an aton planeta mawawara, ano an bili han mga saad han Biblia mahitungod han paraiso ha tuna?

An Biblia matin-aw nga naghihisgot mahitungod hin tidaraon nga paraiso ha tuna. Pananglitan, ginhulagway ni propeta Isaias an tuna ngan an mga umurukoy dida hito ha sugad hini nga  paagi: “Hira magtutukod hin mga balay ngan maukoy hini; ngan hira magtatanom hin mga urubasan, ngan makaon han mga bunga hini. Diri hira magtutukod, ngan an iba an maukoy; diri hira magtatanom, ngan an iba an makaon: kay masusugad han mga adlaw han usa nga kahoy an mga adlaw han akon katawohan, ngan an akon mga pinili ha maihaan magpapahimulos han buhat han ira mga kamot.” (Isaias 65:21, 22) An mga Judio nga ginsaaran hini han Dios sigurado nga an ira tuna—oo, an bug-os nga tuna—usa ka adlaw magigin paraiso para ha waray kataposan nga kapulsanan han katawohan.

An Salmo 37 nagpaparig-on hini nga paglaom. “An maaghop makakapanunod han tuna.” (Salmo 37:11) Ini nga bersikulo diri naghihisgot mahitungod hin temporaryo la nga pagpahiuli han nasud han Israel ha Tuna nga Iginsaad. Ito mismo nga salmo nasiring: “An mga magtadong makakapanunod han tuna, ngan maukoy hira dida hin waray kataposan.” (Salmo 37:29) a Tigamni nga ini nga salmo nasiring nga an waray kataposan nga kinabuhi ha tuna magigin balos para ha mga “maaghop.” An usa nga komento mahitungod hini nga bersikulo nasiring nga an pulong nga “maaghop” “may-ada mas haluag gud nga kahulogan kay han nakikita ha mga hubad; nag-uupod ito han mga pobre, han nag-aantos o gintitimaraot tungod kan Yahweh, mapainubsanon nga mga kasingkasing nga mapinasakupon ha Dios.”

Ha Tuna o ha Langit?

Ha Sermon ha Bukid ni Jesus, naghatag hiya hin saad nga nagpapahinumdom ha aton han mga teksto nga ginkotar ha igbaw: “Bulahan an mga maaghop, kay hira makakapanunod han tuna.” (Mateo 5:5) Makausa pa, an tuna magigin permanente nga balos para ha magtinumanon. Kondi, iginpatin-aw ni Jesus ha iya mga apostol nga nag-aandam hiya hin lugar para ha ira “ha balay han [iya] Amay” ngan hira makakaupod niya ha langit. (Juan 14:1, 2; Lukas 12:32; 1 Pedro 1:3, 4) Kon sugad, paonan-o naton sasabton an mga saad may kalabotan ha mga bendisyon ha tuna? Angayan pa ba ito yana, ngan ha kan kanay ito naaplikar?

An magkalain-lain nga eskolar ha Biblia nasiring nga simboliko la an “tuna” nga ginhisgotan ha Sermon ni Jesus ha Bukid ngan bisan ha Salmo 37. Ha mga komento ni F. Vigoroux ha Bible de Glaire, iya ginsabot ini nga mga bersikulo sugad nga “simbolo han langit ngan han Iglesia.” Para kan M. Lagrange, usa nga parasaliksik ha Franses nga Biblia, ini nga saad “diri saad nga an mga maaghop makakapanunod han tuna nga ira inuukyan, ha presente man nga sistema o ha mas hingpit nga kahimtang ha tidaraon, kondi nagtutudlok ha lugar, hain man ito, nga amo an ginhadian ha kalangitan.” Sumala ha usa pa nga parasaliksik, “simboliko nga paggamit [ito] han mga hiyas ha tuna ha paghisgot han langit.” Para ha iba pa, “an tuna nga iginsaad, an Kanaan, ginhuhunahuna ha simboliko nga kahulogan ngan nagrirepresentar han urukyan ha igbaw, an ginhadian han Dios, nga an pagtag-iya hito igin-gagarantiya ha mga maaghop. Ito liwat an kahulogan han paghulagway hini ha Salmo 37 ngan ha iba nga teksto.” Kondi sadang ba naton hunahunaon dayon nga an pisikal nga tuna diri kaapi ha mga saad han Dios?

An Waray Kataposan nga Katuyoan Para ha Tuna

Ha tinikangan, an tuna direkta nga nakakaw-ing ha katuyoan han Dios para ha mga tawo. “An mga langit amo an mga langit ni Jehova; kondi an tuna iya ihinatag ha mga anak han mga tawo,” nagsurat an salmista. (Salmo 115:16) Salit, an orihinal nga katuyoan han Dios para ha katawohan nakakaw-ing ha tuna, diri ha langit. Ginsugo ni Jehova an siyahan nga mag-asawa nga  pahaluagon an hardin ha Eden basi malukop an tuna. (Genesis 1:28) Ini nga katuyoan diri temporaryo. Ginparig-on ni Jehova ha iya Pulong nga an tuna magpapadayon ha waray kataposan: “An usa ka lito nalakat, ngan an lain nga lito naabot; kondi an tuna nabibilin ha kadayonan.”—Eklesiastes 1:4; 1 Kronikas 16:30; Isaias 45:18.

Natutuman gud an mga saad han Dios, tungod kay hiya an Gihitaasi, ngan iya ginsisiguro an katumanan hito. Ha paggamit han natural nga sikolo han tubig sugad nga ilustrasyon, iginsaysay han Biblia nga sigurado nga matutuman an mga saad han Dios: “Sugad nga an uran ngan an niebe nahuhulog tikang ha langit, ngan diri nabalik ngadto, kondi nahatag hin tubig ha tuna, ngan nakakapanurok ngan nakakapamiyoos hini, . . . maaamo man an akon pulong [kanan Dios pulong] nga magawas ha akon baba: diri ini mabalik ha akon nga kawang, kondi magtutuman hadton akon karuyag, ngan ini mauswag dida ha bagay ngain ko ini igpapadara.” (Isaias 55:10, 11) An Dios nagsasaad ha mga tawo. Mahimo lumabay an panahon antes matuman ito, kondi diri ito napapakyas. ‘Nabalik’ ito ha iya katapos nga matuman an ngatanan nga ginyakan.

Hi Jehova sigurado nga ‘naruyag’ ha paglarang han tuna para ha katawohan. Ha kataposan han ikaunom ka adlaw han paglarang, hiya nagpahayag nga an ngatanan “duro hin kaopay.” (Genesis 1:31) An paghimoa han tuna nga nagpapadayon nga paraiso bahin han katuyoan han Dios nga waray pa matuman. Kondi, an mga saad han Dios ‘diri mabalik ha iya nga kawang.’ Matutuman an ngatanan nga saad mahitungod han hingpit nga kinabuhi ha tuna diin an mga tawo mag-uukoy ha kamurayawan ngan kasigurohan ha waray kataposan.—Salmo 135:6; Isaias 46:10.

An Katuyoan han Dios Sigurado nga Matutuman

An sala han aton siyahan nga mga kag-anak, hira Adan ngan Eva, temporaryo nga nakaulang han orihinal nga katuyoan han Dios ha paghimo han tuna nga paraiso. Katapos han ira pagtalapas, ginpaiwas hira ha hardin. Tungod hito nawara nira an pribilehiyo nga magkaada bahin ha katumanan han katuyoan han Dios nga paukyan hin hingpit nga mga tawo an paraiso nga tuna. Ha gihapon, naghimo an Dios hin mga paagi basi matuman an iya katuyoan. Paonan-o?—Genesis 3:17-19, 23.

An kahimtang ha Eden pariho ha kahimtang hin tawo nga nagtikang pagtukod hin balay ha ekselente nga lote. Samtang iya pa la iginbubutang an pundasyon, may-ada inabot ngan gin-guba an iya ginhimo. Imbes nga bayaan an proyekto, an tawo naghimo hin mga paagi basi masiguro nga matatapos an balay. Bisan kon inin dugang nga buruhaton nagkikinahanglan hin dugang nga gastos, diri maruruhaduhaan an pagkamakaruruyag han siyahan nga proyekto.

Ha pariho nga paagi, naghimo hin mga kahikayan an Dios basi masiguro an katumanan han iya katuyoan. Waray pag-iha katapos makasala an aton siyahan nga mga kag-anak, nagpahayag hiya hin paglaom para ha ira katulinan—usa nga “binhi” nga magpapara han kadaot nga nahimo. Ha pagtuman hini nga tagna, napamatud-an nga an siyahan nga bahin han binhi amo an Anak han Dios, hi Jesus, nga kinanhi ha tuna ngan naghatag han iya kinabuhi sugad nga halad ha pagtubos han katawohan. (Galasia 3:16, NW; Mateo 20:28) Kon banhawon na ngadto ha langit, hi Jesus magigin Hadi han Ginhadian. Hiya an nangunguna nga maaghop nga makakapanunod han tuna kaupod an pinili nga magtinumanon nga babanhawon ngadto ha langit basi magin mga igkasi-magmarando hini nga Ginhadian. (Salmo 2:6-9) Maabot an panahon, mamandoan hini nga gobyerno an mga kahikayan ha tuna basi tumanon an orihinal nga katuyoan han Dios ngan himoon an tuna nga paraiso. Damu hinduro nga maaghop an “makakapanunod han tuna” ha punto nga magpapahimulos hira tikang ha pagmando hini nga Ginhadian pinaagi kan Jesu-Kristo ngan han iya mga igkasi-magmarando.—Genesis 3:15; Daniel 2:44; Buhat 2:32, 33; Pahayag 20:5, 6.

“Sugad ha Langit, Amo Man ha Tuna”

Ini nga kaluwasan nga may duha nga hingangadtoan, langitnon ngan tunan-on, ginhihisgotan  ha usa nga bisyon nga hinkit-an ni apostol Juan. Nakakita hiya hin mga hadi ha mga trono ha langit nga ginpili tikang ha magtinumanon nga disipulo ni Kristo. An Biblia espisipiko nga nasiring mahitungod hini nga mga kaupod ni Kristo nga ‘maghahadi hira ha tuna.’ (Pahayag 5:9, 10) Tigamni an duha nga bahin ha katumanan han katuyoan han Dios—iginpahiuli nga tuna ilarom han paggiya han Ginhadian ha langit nga ginkukompwesto ni Jesu-Kristo ngan han iya mga igkasi-manurunod. Pahihinaboon hini ngatanan nga kahikayan han Dios an ultimo nga pagpahiuli han Paraiso ha tuna uyon ha iya orihinal nga katuyoan.

Ha modelo nga pag-ampo ni Jesus, iya ginhangyo an iya mga disipulo nga ig-ampo nga matuman an kaburut-on han Dios “sugad ha langit, amo man ha tuna.” (Mateo 6:9, 10) May-ada ba bili ini nga mga pulong kon an tuna mabubungkag o simbolo la han langit? Ha pariho nga paagi, may bili pa ba ito kon an ngatanan nga magtadong kumadto ha langit? An kaburut-on han Dios para ha tuna matin-aw ha Kasuratan, tikang ha asoy han paglarang tubtob ha mga bisyon ha libro han Pahayag. An tuna magigin lugar nga sugad han katuyoan han Dios—usa nga paraiso. Ini an kaburut-on nga iginsasaad han Dios nga iya tutumanon. An magtinumanon ha tuna nag-aampo para ha katumanan hito nga kaburut-on.

An kinabuhi nga waray kataposan ha tuna amo an orihinal nga katuyoan han Maglalarang, an Dios nga “diri nababalhin.” (Malakias 3:6; Juan 17:3; Jakobo 1:17) Ha sulod hin sobra usa ka siglo na, iginsasaysay hini nga magasin, An Barantayan, inin duha nga bahin ha pagtuman han katuyoan han Dios. Nabulig ini ha aton nga hisabtan an mga saad han pagpahiuli han tuna nga aada ha Kasuratan. Gin-aaghat ka namon nga dugang nga usisahon ini, pinaagi man ha pakiistorya ha mga Saksi ni Jehova o pinaagi ha pakigkomunikar ha mga nagpublikar hini nga magasin.

[Footnote]

[Retrato ha pahina 4]

Matin-aw nga naghihisgot an Biblia mahitungod han tidaraon nga pagpahiuli han Paraiso ha tuna

[Retrato ha pahina 7]

May-ada pa ba bili an modelo nga pag-ampo ni Jesus kon mawawaray an tuna?