Pagbantad ha Kasingkasing han Bata

NASUSUBO ka ba kon nakakakita ka hin bata nga nag-uuyag hin mga uyag nga may kalabotan ha girra? An sugad hini nga mga kiritaon nagigin ordinaryo na la bisan ha gudtiay nga kabataan, tungod kay an kamadarahog nakasulod na ha kaliawan. Paonan-o mo bubuligan an usa nga bata nga balyoan an mga uyagan nga may kalabotan ha girra hin mga uyagan para ha kamurayawan? Hi Waltraud, nga maiha na nga misyonera han mga Saksi ni Jehova ha Aprika, nakahimo hin paagi nga mabuligan an usa nga bata nga lalaki nga iton gud an buhaton.

Tungod han girra, kinahanglan bumaya hi Waltraud ha nasud nga iya inuukyan ngan bumalhin ngadto ha iba nga nasud ha Aprika. Didto nagtikang hiya bumulig ha iroy han singko anyos nga bata nga lalaki ha pag-aram ha Biblia. Kon nabisita hiya ha iroy, an bata nag-uuyag han gutiay nga plastik nga pusil, an amo la nga iya uyagan. Waray pa makita ni Waltraud nga may-ada hiya ginpuntirya hito, kondi okupado pirme an bata ha pag-abri ngan pagsarado han pusil, nga baga hin ginbubutangan ito hin bala.

Hi Waltraud nagsiring ha bata: “Werner, maaram ka ba kon kay ano nga naukoy ako ha iyo nasud? Tungod ito han girra—kinahanglan bumaya ako ha akon nasud basi makapalagiw ha peligroso nga mga tawo nga nagpapatay ha mga tawo pinaagi han mga pusil nga baga hin kapariho han imo uyagan nga pusil. Ha hunahuna mo, maopay ba an sugad nga pagpusil?”

“Diri,” an masurub-on nga baton ni Werner.

“Husto ka,” siring ni Waltraud. Katapos, nagpakiana hiya: “Maaram ka ba kon kay ano nga nabisita ako ha imo ngan ha imo nanay kada semana? Tungod kay karuyag han mga Saksi ni Jehova nga buligan an iba nga magkaada maopay nga relasyon ha Dios ngan ha ira mga amyaw.” Ha pagtugot han iroy ni Werner, hi Waltraud nagsiring ha iya: “Kon ihatag mo ha akon an imo pusil, ilalabog ko ito ha hirayo, ngan sisiguruhon ko nga magkaada ka uyagan nga trak nga upat an kaliding.”

Iginhatag ni Werner kan Waltraud an iya uyagan nga pusil. Kinahanglan maghulat hiya hin upat ka semana, katapos inabot an iya bag-o nga uyagan—usa nga uyagan nga trak nga kahoy, nga kinarawat niya nga may daku nga kalipay.

Nagamit ka ba hin panahon ha pakiistorya ha imo kabataan, nangangalimbasog nga mabantad an ira kasingkasing basi mapagios hira nga ilabog ha hirayo an mga uyagan nga pariho han mga armas ha girra? Kon amo, tututdoan mo hira hin usa nga leksyon nga mapapahimulosan nira ha bug-os nga kinabuhi.