Diin an mga Katutdoan ni Kristo Gin-aaplikar Yana?

HI Jesu-Kristo ginhuhunahuna han kadam-an sugad nga usa han pinakabantogan nga mga tawo nga nabuhi. Damu an naghuhunahuna nga hiya amo an pinakabantogan nga tawo. Ha sulod hin haros duha ka yukot ka tuig na, an iya mga katutdoan nakakaimpluwensya gud ha mga kinabuhi—“ha simple nga mga kinabuhi han maopay ngan buotan nga mga tawo sugad man ha mga kinabuhi han bantogan nga mga pilantropo,” nagsurat an Ingles nga awtor nga hi Melvyn Bragg.

Paonan-o Gintatagad han mga Tawo an Kristianidad?

Kumusta man an Kristianidad? Iginhulagway ito sugad nga “usa han pinakadaku nga kauswagan ha espirituwal han katawohan.” An usa nga punto-de-bista iginpahayag ni David Kelso han Glasgow Caledonian University, Scotland. Hiya nagsurat: “An duha ka yukot ka tuig nga kasaysayan hito puno hin waray kapariho nga mga kalamposan ha kanataran han arte, arkitektura, pilosopiya, musika ngan ha sosiedad han tawo.”

Kondi, diri sugad hito an panhunahuna han damu nga iba nga tawo. Diri hira nakontra ha Kristianidad sugad han kahulogan nga iginhahatag han usa nga diksyonaryo: “Usa nga relihiyon nga iginbasar ha mga katutdoan ni Jesu-Kristo ngan ha gintotoohan nga hiya amo an anak han Dios.” (Collins Cobuild) Lugod, nangangalas hira ha panggawi han mga institusyon ngan mga organisasyon han mga relihiyon nga nag-aangkon ha pagrepresentar han Kristianidad.

Pananglitan, iginhulagway han Aleman nga pilosopo han ika-19 ka siglo nga hi Friedrich Nietzsche an Kristianidad ha presente nga pagsabot sugad nga “an nagpapadayon nga sayop han katawohan.” Hiya nagsurat nga ito amo “an daku gud nga surok han kadaot, an duro gud ngan sobra nga kalaw-ayan . . . diin gagamiton an bisan ano nga maraot hinduro, diri-tangkod, tago hinduro, ngan mapungtanon  hinduro nga paagi basi makab-ot an tumong hito.” Oo, sobra hinduro an mga ideya ni Nietzsche, kondi may pipira nga mas makatadunganon nga paraobserba nga nagkaada pariho nga mga konklusyon. Kay ano? Tungod kay ha bug-os nga kasaysayan an panggawi hadton nag-aangkon nga mga Kristiano nakilala, diri pinaagi han mga kalidad ni Jesu-Kristo, kondi pinaagi han kalyap nga “karaotan ha moral, makangingirhat hinduro nga mga krimen ngan mga pagpasipara.”

Aada ba hi Kristo ha Kristianidad?

Salit, makatadunganon an pagpakiana, “Aada pa ba gihapon hi Kristo ha Kristianidad?” “Syempre!” mabaton dayon an pipira. “Diri ba iya ginsaaran an iya mga sumurunod nga uupdan niya hira ‘bisan tubtob ha kataposan han kalibotan’?” (Mateo 28:20, King James Version) Oo, nagsiring gud hito hi Jesus. Kondi, karuyag ba sidngon niya nga maupod hiya ha kada tagsa nga nag-aangkon nga iya sumurunod, anoman an panggawi hito nga tawo?

Hinumdumi, inabat han pipira nga lider han relihiyon ha panahon ni Jesus nga maupod ha ira an Dios anoman an kahimtang. Tungod kay ginpili han Dios an Israel para hin espesyal nga bahin, naghunahuna an pipira nga lider han relihiyon nga diri gud hira babayaan han Dios—anoman an ira buhaton. (Mika 3:11) Kondi inabot an panahon, sobra na gud an ira pagtalapas ha mga balaud ngan mga suruklan han Dios. Sugad nga resulta, hi Jesu-Kristo prangka nga nagsiring ha ira: “Kitaa, an iyo balay binabayaan ha iyo nga mamingaw.” (Mateo 23:38) An usa nga bug-os nga sistema han relihiyon waray na uyuni han Dios. Iya ginsalikway ito ngan gintugotan an kasundalohan han Roma nga bungkagon an kapital nga syudad, an Jerusalem, ngan an templo hito han 70 K.P.

Posible ba nga mahitabo an pariho ha Kristianidad? Aton tagdon kon ano nga mga kondisyon an iginhatag ni Jesus may kalabotan ha iya saad ha pag-upod ha iya mga sumurunod tubtob ha “kataposan han kalibotan.”

 [Mga Retrato ha pahina 2, 3]

An mga katutdoan ni Jesu-Kristo may-ada daku gud nga impluwensya ha minilyon nga mga tawo ha bug-os nga kalibotan