Ira Iginpapaangbit an Maopay nga Sumat ha mga Bungol

“NAGDADARA hira ha iyo hin espirituwalidad!” Ito an bag-o la nga iginsaysay han direktor han usa nga urukyan para han mga lagas ha Navalcarnero, Madrid, ha Espanya, mahitungod han mga pagbisita didto han mga Saksi ni Jehova. Ano an nakaaghat ha iya nga sidngon ito?

Mga bungol an pipira han mga residente ha urukyan han mga lagas ha Rosas del Camino. Kondi, tungod kay nangangalimbasog an mga Saksi nga mahibaro han Espanyol nga Sign Language, mahimo hira makigkomunikar hini nga mga residente. Gindayaw han direktor an mga Saksi tungod han waray bayad nga paghatag han ira panahon ha pagtutdo han mga leksyon tikang ha Biblia ha mga nanginginahanglan hito nga bulig. Naobserbahan niya an maopay nga epekto han pagtutdo ha mga residente mahitungod han maopay nga sumat han Ginhadian. Ngan inaapresyar gud han mga residente—labi na hadton mga bungol ngan mga buta—an mga pagbisita han mga Saksi.

Hi Eulogio, usa han mga residente nga buta ngan bungol, nag-aaram na yana han Biblia upod han mga Saksi ni Jehova. Usa ka adlaw samtang nagpapadayon an pag-aram, usa nga lagas nga lalaki an dinaop ngan iginhatag ha Saksi an usa nga siday nga ginkomposo han mga residente sugad nga kapahayagan han ira pagpasalamat. An siday may-ada ulohan: “Pagin Usa nga Saksi.” Ha bahin, ito nagsiring: “Nagkikinabuhi hira hin maopay, disiplinado-hin-maopay, ngan nakakarawat nira tikang kan Jehova an makalilipay nga kinaadman. Agsob hira bumisita ha mga balay tungod kay nasarig hira kan Jehova.”

Ini gud nga pagsarig kan Jehova an nakakaaghat ha damu nga mga Saksi ha bug-os nga kalibotan nga mag-aram han sign language han mga bungol ha ira nasud. Hini nga paagi ira iginpapaangbit ha sugad nga mga tawo an makapadasig nga mensahe mahitungod han paglaom nga aada ha Biblia.