Ikaw ba “Manggaranon ha Dios”?

HA DAMU nga makabantad-ha-hunahuna nga mga parabola nga iginhatag ni Jesu-Kristo, usa hito an mahitungod han manggaranon nga tag-iya han uma. Ha pangalimbasog nga magkaada sigurado nga kabubuwason para ha iya kalugaringon, nagplano an tag-iya han uma nga magtukod hin mas dagku nga mga kamalig. Kondi, ha ilustrasyon ni Jesus, ito nga tawo tinatawag nga “kulang-kulang.” (Lukas 12:16-21) Ginagamit pa ngani ha damu nga mga hubad han Biblia an pulong nga “lurong.” Kay ano nga ginamit iton nakakasakit hinduro nga pulong?

Matin-aw, ha mga plano hinin manggaranon nga tawo, waray hiya maghunahuna ha Dios; waray liwat hiya maghatag hin anoman nga kadungganan ha Dios tungod ha pagkamabungahon han uma. (Mateo 5:45) Lugod, hiya naghambog: “Kalag, may damu ka nga manggad, nga gintirok ha kadam-an nga mga tuig; pahuway, kaon, inom, ngan paglipay.” Oo, naghunahuna hiya nga an resulta han iya mga pangalimbasog magpapanalipod ha iya sugad hin “hitaas nga kuta.”—Proberbios 18:11.

Ha pagpahamangno kontra han sugad nga mapahitas-on nga panhunahuna, an disipulo nga hi Jakobo nagsurat: “Kadi yana, kamo nga nasiring: Niyan o buwas makadto kita hini nga bungto, ngan maukoy kita didto hin usa ka tuig, ngan magpapatigayon, ngan magana kita. Diri kamo maaram kon ano an mahinanabo buwas. Ano ba an iyo kinabuhi? Ha pagkamatuod usa kamo nga alisngaw nga nagpapahayag ha madaliay la, ngan napapara na layon.”—Jakobo 4:13, 14.

Sugad nga katumanan hito nga mga pulong, an manggaranon nga tawo ha parabola ni Jesus ginsumatan: “Kulang-kulang, yana nga gab-i an imo kalag aaroon ha imo, ngan an mga butang nga imo igin-andam, maka kan kanay man hira?” Pariho han alisngaw nga napapara dayon, an manggaranon nga tawo mamamatay antes niya makita an katumanan han iya mga ambisyon. Nasasabtan ba naton an leksyon? Hi Jesus nagsiring: “Amo ini an nagtitirok hin manggad ha iya kalugaringon, ngan diri manggaranon ha Dios.” Ikaw ba “manggaranon ha Dios”?