Tuguti an “Pulong” ni Jehova nga Magpanalipod ha Imo

HAN 490 A.K.P. ha makasaysayan nga away ha Marathon, mga 10 ka yukot tubtob 20 ka yukot nga mga taga-Atenas an inatubang ha bantagan gud nga kasundalohan han Persia. An daku an naibulig ha estratihiya han mga Griego amo an phalanx—usa nga grupo hin kasundalohan nga durugkot nga nagmamartsa. An ira mga taming sugad hin marig-on nga pader, usa nga pader nga may nagawas nga mga bangkaw. Tungod han phalanx, nakarawat han mga taga-Atenas an bantogan nga kadaogan kontra ha mas damu hinduro nga kasundalohan han mga Persiano.

An totoo nga mga Kristiano nakikigbahin ha espirituwal nga away. Nakikiaway hira ha gamhanan nga mga kaaway—an diri-nakikita nga mga magmarando han presente nga maraot nga sistema, nga iginhuhulagway ha Biblia sugad nga “mga magburuot hini nga masirom nga kalibotan, . . . [an] mga espirituhanon nga kasundalohan han [karaotan] ha mga langitnon nga lugar.” (Efeso 6:12; 1 Juan 5:19) An katawohan han Dios padayon ha pagin madaugon—kondi diri ha ira kalugaringon nga kusog. An ngatanan nga dungog nahingangadto kan Jehova, nga nagpapanalipod ngan naggigiya ha ira, sugad han ginsisiring ha Salmo 18:30: “An pulong ni Jehova an ginproybahan na; hiya amo an taming ha ngatanan nga naayop ha iya.”

Oo, pinaagi han iya ginpaopay nga “pulong,” nga aada ha Sagrado nga Kasuratan, ginpapanalipdan ni Jehova an iya maunungon nga mga surugoon tikang ha espirituwal nga kadaot. (Salmo 19:7-11; 119:93) May kalabotan ha kinaadman nga aada ha Pulong han Dios, hi Salomon nagsurat: “Ayaw hiya bayai, ngan hiya magmamangno ha imo; higugmaa hiya, ngan hiya magbabantay ha imo.” (Proberbios 4:6; Eklesiastes 7:12) Paonan-o an kinaadman han Dios nagpapanalipod ha aton kontra ha kadaot? Tagda an ehemplo han kadaan nga Israel.

Usa nga Katawohan nga Ginpanalipdan han Diosnon nga Kinaadman

An Balaud ni Jehova nagpanalipod ngan naggiya ha mga Israelita ha ngatanan nga bahin han ira kinabuhi. Pananglitan, an mga regulasyon ha pagkaon, kalimpyo, ngan pagkwarintinas nagpanalipod ha ira tikang ha damu nga mga sakit nga nakadaot han iba nga mga nasud. Han nadiskobrehan la an bakterya han ika-19 ka siglo nga an syensya nagkaada pariho nga suruklan  ha Balaud han Dios. An mga balaud ha pagtag-iya hin tuna, pagtubos, kagawasan ha utang, ngan hitaas nga pagpatubo ha utang nagresulta hin mga kapulsanan ha katiringban han Israel pinaagi ha pag-establisar hin marig-on nga sosiedad ngan makatadunganon nga ekonomiya. (Deuteronomio 7:12, 15; 15:4, 5) An Balaud ni Jehova nakabulig pa ngani nga matipigan nga matambok an tuna han Israel! (Eksodo 23:10, 11) An mga sugo kontra ha palso nga pagsingba naghatag hin proteksyon ha espirituwalidad han katawohan, nga nagpapanalipod ha ira tikang ha panalumpigos han mga demonyo, paghalad hin bata, ngan damu pa nga mga karaotan, gawas han diri husto nga buhat han pagyukbo han mga tawo ha atubangan han waray-kinabuhi nga mga imahen.—Eksodo 20:3-5; Salmo 115:4-8.

Matin-aw, an “pulong” ni Jehova diri gud “waray pulos” para ha Israel; lugod, nangahulogan ito hin kinabuhi ngan kahilawig han mga adlaw ha ngatanan nga nagtatagad hito. (Deuteronomio 32:47) Totoo liwat ito yana nga panahon ngada hadton nasunod han maaramon nga mga pulong ni Jehova, bisan kon an mga Kristiano diri na ilarom han kauyonan han Balaud. (Galasia 3:24, 25; Hebreo 8:8) Ha pagkamatuod, imbes hin usa nga kodego han mga balaud, an mga Kristiano may-ada haluag-an-sakop nga mga prinsipyo han Biblia basi giyahan ngan panalipdan hira.

Katawohan nga Napanalipdan han mga Prinsipyo

An mga balaud bangin may-ada limitado nga aplikasyon ngan bangin temporaryo la. Kondi, an mga prinsipyo ha Biblia, nga basihan nga mga kamatuoran, agsob nga may-ada haluag ngan permanente nga aplikasyon. Pananglitan, tagda an mga prinsipyo ha Jakobo 3:17, nga ha bahin nasiring: “An kinaadman nga tikang ha kahitas-an, siyahan putli, makigdaiton.” Paonan-o ito nga basihan nga kamatuoran makakapanalipod ha katawohan han Dios yana nga panahon?

An pagin putli nangangahulogan hin pagin limpyo ha moral. Tungod hito, diri la an imoralidad an ginlilikyan hadton nagpapabili han kaputli kondi bisan an mga butang nga nagtutugway ngada hito, upod na an pagpantasya mahitungod han sekso ngan pornograpiya. (Mateo 5:28) Ha sugad nga paagi, linilikyan han mga mag-uyab nga nagsiseryoso han prinsipyo ha Jakobo 3:17 an romantiko nga mga buhat nga mahimo magresulta ha kawad-i hin pagpugong ha kalugaringon. Tungod kay ginigiyahan hira han mga prinsipyo, diri hira nasusulay ha pagbuhat hin malaw-ay, bangin naghuhunahuna nga basta diri la nira aktuwal nga talapason an balaud han Dios, an ira buhat may pag-uyon ni Jehova. Maaram hira nga hi Jehova “nagtatan-aw han kasingkasing” ngan nagios sumala han iya nakikita. (1 Samuel 16:7; 2 Kronikas 16:9) Napapanalipdan hiton maaramon nga mga tawo an ira kalugaringon kontra ha damu nga mga sakit nga naitatapon pinaagi ha pakighilawas nga kalyap yana nga panahon ngan natitipigan liwat nira ha maopay nga kahimtang an ira hunahuna ngan emosyon.

An diosnon nga kinaadman “makigdaiton” liwat, siring han Jakobo 3:17. Maaram kita nga nangangalimbasog hi Satanas nga ipahirayo kita kan Jehova pinaagi ha pagsabwag hin espiritu han kamadarahog ha aton kasingkasing, ha bahin pinaagi ha kwestyonable nga mga barasahon, mga sine, musika, ngan mga uyag ha kompyuter—nga an iba hito nag-aaghat ha mga parauyag ha pag-abat nga sugad hin hira an aktuwal nga nakikigbahin ha diri-mahanduraw nga kamadarahog ngan pamatay! (Salmo 11:5) An kalamposan ni Satanas nakikita han pagtikadamu han madarahog nga krimen. May kalabotan ha sugad nga krimen, pipira na ka tuig an naglabay, an peryodiko han Australia nga The Sydney Morning Herald nagkotar kan Robert Ressler nga nag-imbento han termino nga “serial killer.” Hi Ressler nagsiring nga an mga parapamatay nga iya gin-interbyu ha dekada han 1970 naaghat gud han diri duro kagrabe nga pornograpiko nga materyal nga “diri sugad karaot han kanan yana nga panahon.” Salit, nagpahayag hi Ressler hin “makapaluya nga panlantaw para ha tidaraon—usa nga bag-o nga siglo diin nagtitikadamu an mga parapamatay hin damu nga mga tawo.”

Ha pagkamatuod, mga bulan la katapos maipublikar ito nga sumat, ginpatay han usa nga propesyonal nga parapamatay an 16 nga gudtiay nga kabataan ngan an ira maestra ha usa nga eskwelahan han kindergarten ha Dunblane, Scotland, antes hiya mag-unay. Han sumunod nga bulan, ginpatay han usa pa nga lurong nga propesyonal nga parapamatay an 32 nga tawo ha mamingaw nga bungto han Port Arthur ha Tasmania, Australia. Ha bag-o pa la nga mga tuig, an Estados Unidos nabay-og han damu nga mga pamatay ha eskwelahan, tungod hito an mga Amerikano nagpapakiana, Kay ano? Han Hunyo 2001, nagin kaapi han nangunguna nga sumat ha bug-os nga kalibotan an Japan han an usa nga lurong nga lalaki sinulod ha usa nga eskwelahan  ngan ginpanbuno an 8 nga kabataan ha siyahan ngan ikaduha nga mga grado tubtob nga hira namatay ngan ginpansamad an 15 nga iba pa. Sigurado gud nga komplikado an mga hinungdan han sugad nga mga karaotan, kondi an kamadarahog nga nakikita ha media mas gintatagad nga usa nga hinungdan. “Kon an 60-segundo nga komersyal nga patalastas makakapadamu gud han mamaralit,” nagsurat an Australiano nga kolumnista nga hi Phillip Adams, “waray ruhaduha nga an duha-ka-oras nga minilyon-an-gasto nga sine makakagbag-o gud han pamatasan.” Makapainteres nga ha balay han propesyonal nga parapamatay ha Port Arthur, nakompiskar han mga polis an 2,000 nga madarahog ngan pornograpiko nga mga video.

Ginpapanalipdan hadton nagtutuman ha mga prinsipyo ha Biblia an ira hunahuna ngan kasingkasing ha ngatanan nga porma han kaliawan nga nag-aaghat hin duro nga hingyap ha kamadarahog. Salit, diri nira tinutugotan “an espiritu han kalibotan” nga makaapekto han ira panhunahuna ngan mga hingyap. Lugod, ‘gintututdoan hira han espiritu [han Dios],’ ngan nangangalimbasog hira nga makultibar an gugma para ha mga bunga hito, nga nag-uupod han kamurayawan. (1 Korinto 2:12, 13; Galasia 5:22, 23) Ginbubuhat nira ini pinaagi han regular nga pag-aram ha Biblia, pag-ampo, ngan makaparig-on nga pagpamalandong. Naglilikay liwat hira ha pakig-upod ha mga indibiduwal nga may inklinasyon ha kamadarahog, ginpipili lugod nira nga makiupod ha mga tawo nga pariho ha ira naghihingyap han mamurayawon nga bag-o nga kalibotan ni Jehova. (Salmo 1:1-3; Proberbios 16:29) Oo, daku gud nga proteksyon an diosnon nga kinaadman!

Tuguti an “Pulong” ni Jehova nga Bantayan an Imo Kasingkasing

Han sulayon hi Jesus ha kamingawan, ginpamatud-an niya nga sayop hi Satanas pinaagi ha pagkotar han Pulong han Dios ha husto nga paagi. (Lukas 4:1-13) Kondi, diri kay nakiistorya hiya ha Yawa basi ipakita la kon hin-o an mas baltok ha ira. Pinaagi ha paggamit ni Jesus han Kasuratan sugad nga basihan han pagdepensa, nagyakan hiya tikang ha iya kasingkasing, ngan tungod hito an estratihiya han Yawa, nga naglampos gud ha Eden, waray maglampos kan Jesus. An tuso nga mga pamaagi ni Satanas mapapakyas liwat ha aton kon aton pupun-on an aton kasingkasing han mga pulong ni Jehova. Waray iba nga mas importante pa hito, tungod kay “natikang dida an mga burabod han kinabuhi.”—Proberbios 4:23.

Dugang pa, kinahanglan padayon nga bantayan naton an aton kasingkasing, diri gud umundang. Hi Satanas, nga napakyas ha kamingawan, waray umundang ha pagsulay kan Jesus. (Lukas 4:13) Padayon liwat hiya nga magsusulay ha aton, nagsasari ha paggamit hin magkalainlain nga mga estratihiya ha pagbungkag han aton integridad. (Pahayag 12:17) Salit, subaron naton hi Jesus pinaagi ha pagkultibar hin hilarom nga gugma ha Pulong han Dios, ngan ha pariho nga panahon pag-ampo nga waray udong-udong para han baraan nga espiritu ngan kinaadman. (1 Tesalonika 5:17; Hebreo 5:7) Ha bahin ni Jehova, hiya nagsasaad nga an ngatanan nga naayop ha iya diri gud madadaot ha espirituwal.—Salmo 91:1-10; Proberbios 1:33.

An Pulong han Dios Nagpapanalipod ha Kongregasyon

Diri mapupugngan ni Satanas an igintagna nga daku nga panon nga maluwas ha daku nga kagol-anan. (Pahayag 7:9, 14) Bisan pa hito, nangangalimbasog gihapon hiya hinduro ha pagdaot ha mga Kristiano basi may mga indibiduwal na man la nga mawad-an han pag-uyon ni Jehova. Naglampos ito nga estratihiya ha kadaan nga Israel ngan nagresulta ha kamatayon han 24,000 nga hirani na gud makasulod ha Tuna nga Iginsaad. (Numeros 25:1-9) Syempre, an nakasala nga mga Kristiano nga nagpapakita hin totoo nga pagbasol nakarawat hin mahigugmaon nga bulig basi maibalik ha espirituwal nga paagi. Kondi, an diri mabinasulon nga mga makasasala, pariho kan Simri han naglabay, nagbubutang ha peligro han moral ngan espirituwal nga kahimtang han iba. (Numeros 25:14) Pariho han mga sundalo ha usa nga phalanx nga naglabog han ira mga taming, ira iginbubutang ha peligro diri la an ira kalugaringon kondi pati an ira mga kaupod.

Salit, an Biblia nagsusugo: “Diri kamo makipag-upod-upod, kon an usa ka tawo nga ginngangaranan nga bugto, paralibog, o masingbahon ha mga ladawan, o malibakon, o parahubog, o paralimbong; bisan ha pagkaon diri kamo makigsaro ha iya. . . . Kuhaon niyo an maraot nga tawo tikang ha iyo ngahaw.” (1 Korinto 5:11, 13) Diri ka ba nauyon nga inin maaramon nga “pulong” nabulig ha pagpanalipod ha moral ngan espirituwal nga kaputli han Kristiano nga kongregasyon?

Ha kabaliktaran, gintatagad han damu nga mga relihiyon han Kakristianohan sugad man han mga  apostata nga diri na napapanahon an mga bahin han Biblia nga nakontra ha moderno, matinuguton nga mga panhunahuna mahitungod han moralidad. Tungod hito, ira ginpapalabay an ngatanan nga porma han dagku nga sala, bisan ha mga klero. (2 Timoteo 4:3, 4) Kondi, tigamni nga an Proberbios 30:5, nga naghihisgot liwat han sugad hin taming nga “pulong” ni Jehova, ginsusundan han sugo ha bersikulo 6: “Diri mo pagdugangan an [kanan Dios] mga pulong, kay bangin sawayon ka niya, ngan ikaw hiagian nga buwaon.” Oo, adton nagbabaliko ha Biblia mga buwaon gud ha espirituwal—an girarauti gud nga mga buwaon! (Mateo 15:6-9) Kon sugad, magin mapasalamaton gud kita ha pagin bahin han usa nga organisasyon nga natahod gud ha Pulong han Dios.

Ginpapanalipdan hin “Mahamot nga Amyon”

Tungod kay an katawohan han Dios nagsusunod gud ha Biblia ngan nagsusumat han nakakaliaw nga mensahe hito ngadto ha iba, naghahatag hira hin sugad-insenso nga “mahamot nga amyon” han kinabuhi nga nakakalipay kan Jehova. Kondi para ha mga diri-matadong, an mga paradara hito nga mensahe naghahatag “hin makamaratay nga amyon han kabungkagan,” sumala ha hubad ni J. B. Phillips. Oo, an simboliko nga sentido han pangamyon han magraot nabaliko gud han sistema han mga butang ni Satanas salit diri hira komportable o nakontra pa ngani hadton nagpapasarang han “mahamot nga amyon ni Kristo.” Ha luyo nga bahin, adton madasigon nga nagpapasarang han maopay nga sumat nagigin “mahamot nga amyon ni Kristo ha butnga hadton mga ginluluwas.” (2 Korinto 2:14-16, NW) An sugad nga tangkod nga mga tawo agsob nga nangangalas ha pagkasalingkapaw ngan relihiyoso nga mga buwa nga amo an pangirilal-an han palso nga relihiyon. Tungod hito, kon aton inaabrihan an Pulong han Dios ngan nakikiistorya ha ira mahitungod han mensahe han Ginhadian, nadadani hira kan Kristo ngan naruruyag nga mahibaro hin dugang pa.—Juan 6:44.

Salit ayaw panluya kon diri nakarawat an iba ha mensahe han Ginhadian. Lugod, tagda an “mahamot nga amyon ni Kristo” sugad nga klase han espirituwal nga proteksyon nga nag-aaghat ha damu nga nakakadaot nga indibiduwal nga magpahirayo ha espirituwal nga urukyan han katawohan han Dios, samtang nagdadani hadton maopay an kasingkasing.—Isaias 35:8, 9.

Tungod kay an Griego nga kasundalohan ha Marathon durugkot nga nagmartsa ngan nagkapot han ira mga taming ha ira bug-os nga kusog, nagdaog hira bisan pa han makuri hinduro nga mga kahimtang. Ha sugad nga paagi, an maunungon nga mga Saksi ni Jehova nakakasiguro hin bug-os nga kadaogan ha ira espirituwal nga pakig-away, tungod kay ito an ira “panurundon.” (Isaias 54:17) Salit, hinaot nga kita ngatanan padayon nga umayop kan Jehova pinaagi ha padayon nga ‘pagkapot hin marig-on ha pulong han kinabuhi.’—Filipos 2:16, NW.

[Mga Retrato ha pahina 31]

“An kinaadman nga tikang ha kahitas-an, siyahan putli, makigdaiton”