Nakikig-away Ka ba ha Imo mga Pagbati?

HA DAKU nga bahin han kinabuhi ni Lena, nakikig-away hiya ha negatibo nga mga pagbati mahitungod han iya kalugaringon. “An mga tuig han seksuwal nga pag-abuso han bata pa ako nakadaot han daku nga bahin han akon pagtahod ha kalugaringon,” nagsiring hiya. “Inabat ko nga waray na gud ako pulos.” Nahinumdom liwat hi Simone han iya pagkabatan-on ngan nasiring, “Inabat ko gud an pagin kawang ngan naghunahuna ako nga guti la an akon bili.” An duro nga kasubo nga resulta han sugad nga mga pagbati baga hin komon gud yana nga panahon. Usa nga organisasyon nga matatawagan han mga tinedyer para hin sagdon an nasiring nga haros katunga han mga natawag ha ira nagpapahayag hin “nagpapadayon nga mga pagbati hin hamubo nga pagtagad ha kalugaringon.”

Sumala ha pipira nga mga eksperto, naieksperyensyahan an mga pag-abat hin pagin may kakulangan kon an mga tawo ginpapaabat han iba nga waray hira pulos. An usa mahimo magkaada hito nga kahimtang han hunahuna kon pirme hiya nakakaeksperyensya hin pag-inisugi, duro ngan nakakasakit nga pagpakaraot, o nakakadaot nga  pagpahimulusi. Anoman an hinungdan, an mga resulta nakakapanluya ngan nakakadaot pa ngani. Naobserbahan han usa ka bag-o nga medikal nga pag-aram nga an mga indibiduwal nga may negatibo nga mga pagbati mahitungod ha ira kalugaringon may tendensya ha pagruhaduha ha ira kalugaringon ngan ha iba, tungod hito diri tinuyo nga nadadaot nira an duok nga mga relasyon ngan mga pagkamagsarangkay. “Ha usa ka punto,” siring han report mahitungod hito nga pag-aram, “ira ‘ginhihimo’ an mga kahimtang mismo nga ira gud ginkakahadlokan.”

An mga tawo nga naabat hito agsob nga mga biktima han tinatawag han Biblia nga ira “nakakapabaraka nga mga ginhuhunahuna.” (Salmo 94:19, NW) Ha ira pag-abat, diri gud hira sugad kaopay. Kon may-ada nagigin problema, ira dayon ginbabasol an ira kalugaringon. Bisan kon dayawon hira han iba tungod han ira mga nahimo, ha ira gisusuluri naabat hira nga pariho hira hin usa nga impostor nga mabubuhayhag pag-abot han panahon. Tungod kay natoo hira nga diri hira takos nga malipay, damu an nahuhulog ha paggawi nga nakakadaot ha kalugaringon nga ha ira pag-abat diri nira matatadong. Hi Lena, nga gin-unabi kanina, nagkaada seryoso nga sakit may kalabotan ha iya paagi han pagkaon tungod han iya kawaray pagtahod ha kalugaringon, ngan hiya nasiring, “Inabat ko nga diri na ako mababag-o.”

Sugad na la ba hini an aabaton hadton nakikig-away ha “nakakapabaraka nga mga ginhuhunahuna” ha ira bug-os nga kinabuhi? May-ada ba mahihimo basi malamposan an sugad nga mga pagbati? An Biblia naghahatag hin mga prinsipyo ngan praktikal nga sagdon nga nakakabulig ha damu nga makalampos hini nga pakig-away. Ano an pipira hini nga mga prinsipyo, ngan paonan-o hito nabuligan an mga nag-aantos nga makabiling hin kalipay ha kinabuhi? Isasaysay ito han sunod nga artikulo.