Usa nga Mapulsanon nga Bulig ha Paghubad

AN Awtor han Biblia, hi Jehova nga Dios, naghihingyap nga an maopay nga sumat han iya Ginhadian ipasamwak “ha ngatanan nga nasud ngan panon, ngan yinaknan ngan katawohan.” (Pahayag 14:6) Karuyag niya nga an iya sinurat nga Pulong masayon mabasa han ngatanan nga mga tawo. Tungod hito, iginhubad na an Biblia ngadto ha mas damu nga yinaknan kay ha anoman nga iba pa nga libro ha kalibotan. Yinukot nga mga parahubad an naggamit hin daku nga panahon ngan kusog ha paghubad han mga panhunahuna han Dios ha iba nga yinaknan.

Kondi, para ha mga parahubad, an Biblia diri la usa nga libro nga kinahanglan ihubad. Agsob gud nga ginagamit ito mismo sugad nga bulig ha paghubad hin iba nga mga sinurat. Igintanding han damu nga parahubad an pagkahubad han mga termino han Biblia ha magkalainlain nga mga yinaknan basi makakuha hin angayan nga hubad para hin partikular nga mga pulong. An mga kalidad han Biblia sugad nga bulig ha paghubad ginagamit na yana ha paghubad pinaagi hin kompyuter.

Makuri gud an paghimo hin maopay nga hubad pinaagi hin kompyuter. Ginhunahuna pa ngani han iba nga mga eksperto nga an paghubad diri mahihimo han kompyuter. Kay ano? An usa nga yinaknan diri la kay grupo han mga pulong. An tagsa nga yinaknan may-ada kalugaringon nga mga kombinasyon han mga pulong, mga surundon, mga eksepsyon hini nga mga surundon, mga idyoma, ngan simboliko nga mga pulong. Gutiay gud la an nagin kalamposan han mga pangalimbasog nga iprograma ini ngatanan ha usa nga kompyuter. An resulta nga mga hubad han kompyuter makuri gud hisabtan.

Kondi yana, an mga syentista han kompyuter namimiling hin bag-o nga mga paagi ha paghubad. “Ginagamit han amon pamaagi an mga surubdan nga basado ha koleksyon han damu nga impormasyon basi mabilngan an pinakaangayan nga hubad,” siring ni Franz Josef Och, usa nga nangunguna nga espesyalista ha paghubad han kompyuter. Pananglitan karuyag mo ihubad an Hindi ngadto ha Ingles. Siyahan, kuha hin grupo han mga pulong nga aada na hiton duha nga yinaknan. Katapos, isulod ito ha usa nga kompyuter. Igintatanding han kompyuter an duha nga artikulo. Kon, pananglitan, hibilngan han kompyuter an amo gihapon nga Hindi nga pulong ha pipira nga mga dapit ngan ha tagsa nga panahon ha katugbang nga mga pulong nabibilngan hito an Ingles nga pulong nga “balay,” sasabton han kompyuter nga an Hindi nga pulong sigurado nga  amo an pulong para ha “balay.” Ngan posible nga an mga kahirani nga mga pulong mga adhetibo, sugad han “daku,” “gutiay,” “daan,” o “bag-o.” Tungod hito, an kompyuter nagpuporma hin listahan han katugbang nga mga termino ngan mga kombinasyon han mga pulong. Katapos magkaada igo nga lista, nga bangin magkinahanglan hin pipira la ka adlaw o semana ha pagprograma, mahimo na gamiton han kompyuter an “hinbaroan” hito ngada ha bag-o nga grupo han mga pulong. Bisan kon an resulta nga hubad bangin diri gud maopay ha gramatika ngan estilo, kasagaran nga masasabtan na ito hin igo ha pagpakita han kahulogan ngan han importante nga mga detalye.

An kalidad han hubad ha kadak-an nadepende gud ha kadamu ngan kalidad han mga pulong nga siyahan nga iginsulod ha kompyuter. Ngan dinhi hini nga bahin an Biblia nagin mapulsanon. Iginhubad ito hin maopay ngadto ha damu na nga mga yinaknan, masayon tag-iyahon, ngan nagsusulod hin damu nga mga pulong. Salit an Biblia an siyahan nga pili han parasaliksik kon nagpuprograma hin kompyuter para hin usa nga bag-o nga yinaknan.