An Imo ba Pagtoo Nagpapagios ha Imo nga Magbuhat?

KOMBINSIDO an senturyon nga matatambal ni Jesus an paralisis han iya uripon. Kondi waray dapita han senturyon hi Jesus ha iya balay, bangin tungod kay inabat hiya hin pagin diri takos o tungod kay Hentil hiya. Lugod, nagsugo an senturyon hin pipira nga katigurangan nga kalalakin-an nga mga Judio nga makiistorya kan Jesus ngan sumiring: “Ginoo, diri ako takos nga ikaw sumirong ha akon atop; kondi pagsiring mo la hin usa ka pulong, ngan maoopay an akon uripon.” Nasantop ni Jesus nga an senturyon natoo nga makakatambal hiya bisan ha hirayo, salit nagsiring hiya ha damu nga tawo nga nagsisinunod ha iya: “Matuod, ako nasiring ha iyo, nga bisan pa ha Israel, waray ako hin-agian nga sugad kadaku hin pagtoo.”—Mateo 8:5-10; Lukas 7:1-10.

Ini nga panhitabo makakabulig ha aton nga maghatag hin espesyal nga atensyon ha usa nga importante nga kamatuoran mahitungod han pagtoo. An totoo nga pagtoo diri kay waray hinihimo; sinusuportahan ito han buhat. An parasurat han Biblia nga hi Jakobo nagsaysay: “An pagtoo, kon waray mga buhat, patay ha iya ngahaw.” (Jakobo 2:17) Mas hisasabtan gud ini nga kamatuoran kon aton tatagdon an usa nga totoo nga ehemplo kon ano an mahimo mahitabo kon an pagtoo nagigin diri aktibo.

Han 1513 A.K.P., an nasud han Israel nakakaw-ing  kan Jehova nga Dios pinaagi han Balaud han kauyonan. Sugad nga manlalaban hito nga kauyonan, iginsumat ni Moises an mga pulong han Dios ngadto ha mga anak ni Israel: “Kon masugot kamo ha akon tingog hin ungod, ngan pagbantayan niyo an akon kauyonan, dida hito . . . kamo [magigin] . . . baraan nga nasud.” (Eksodo 19:3-6) Oo, an pagin baraan han Israel nadepende ha pagsugot.

Paglabay hin damu nga mga siglo, gintagad han mga Judio nga mas importante an pag-aram han Balaud kay han pag-aplikar han mga prinsipyo hito. Ha libro ni Alfred Edersheim nga The Life and Times of Jesus the Messiah, hiya nagsurat: “An [mga rabi]—an ‘mga maaramon han kalibotan’ maiha na nga nagdeklara nga mas importante an pag-aram kay han mga buhat.”

Totoo nga an kadaan nga mga Israelita ginsugo nga maduruto nga mag-aram han mga ginkikinahanglan han Dios. An Dios mismo nagsiring: “Ini nga mga pulong nga akon iginsugo ha imo hini nga adlaw mahasulod ha imo kasingkasing; ngan igtutdo mo hira ka mainuyatmon ha imo mga anak, ngan maghimangraw ka mahitungod hini kon malingkod ka ha imo balay, ngan kon maglalakat ka ha dalan, ngan kon ikaw mahigda, ngan ha imo pagbuhat.” (Deuteronomio 6:6, 7) Kondi, katuyoan ba ni Jehova ha anoman nga panahon nga an pag-aram han Balaud magin mas importante kay han pagbuhat uyon hito o sugad han iginpapasabot hito? Aton usisahon ini.

Detalyado nga Pag-aram

An paghatag hin sobra nga importansya ha pag-aram han Balaud bangin makatadunganon para ha mga Israelita, tungod kay an usa nga tradisyon han mga Judio nasiring nga an Dios mismo naggasto hin tulo ka oras kada adlaw ha pag-inaram han Balaud. Masasabtan mo kon kay ano nga an pipira nga mga Judio bangin mangatadongan, ‘Kon an Dios regular nga nag-aaram han Balaud, diri ba sadang liwat ito buhaton han iya mga linarang ha tuna?’

Pag-abot han siyahan nga siglo K.P., an sobra nga kamaduruto han mga rabi ha pag-analisar ngan pag-interpretar han Balaud bug-os nga nakabaliko na han ira panhunahuna. “An mga eskriba ngan mga Pariseo . . . nagyayakan ngan diri nagbubuhat,”  nagsiring hi Jesus. “Hira nagbubutok hin magbug-at nga mga luran ngan makuri pagdad-on ngan ibutang nira ha sugbong han mga tawo, kondi hira ngahaw diri karuyag nga magbantad hito bisan ha ira tudlo.” (Mateo 23:2-4) Ginpabug-atan hiton mga lider han relihiyon an komon nga mga tawo hin sobra kadamu nga mga surundon ngan mga regulasyon, kondi hira mismo may pagkasalingkapaw nga naghimo hin mga paagi nga mahigawas hira ha pagsunod hito mismo nga mga balaud. Dugang pa, ito nga kalalakin-an nga nagsentro ha detalyado nga pag-aram “[binaya ha] mga butang nga darodaku han Kasugoanan, an katadongan, an kalooy, ngan an pagkamatinoohon.”—Mateo 23:16-24.

Daku gud nga pagkasumpaki nga ha pangalimbasog han mga eskriba ngan mga Pariseo nga parig-unon an ira katadongan, an resulta amo nga gintalapas lugod nira an Balaud mismo nga ira gin-aangkon nga ira ginsusunod! An ngatanan nga mga siglo han pagdinebate mahitungod ha mga pulong ngan gudti nga mga detalye han Balaud waray magpaduok ha ira hin dugang pa ha Dios. An epekto hito pariho ha pagbulag nga resulta han gintawag ni apostol Pablo nga “mga yakan nga diri mga espirituhanon,” “mga pagkontra,” ngan palso nga “kaaram.” (1 Timoteo 6:20, 21) Kondi, an usa pa nga seryoso nga problema amo an epekto ha ira hiton waray kataposan nga pagsinaliksik. Waray hira magkaada han klase han pagtoo nga nagpagios unta ha ira ha husto nga buhat.

Intelihente nga mga Hunahuna, Waray Pagtoo nga mga Kasingkasing

Kaiba gud ha panhunahuna han Dios an panhunahuna han Judio nga mga lider han relihiyon! Han hirani na gud sumulod an mga Israelita ha Tuna nga Iginsaad, hi Moises nagsiring ha ira: “Ibutang an iyo kasingkasing ha ngatanan nga mga pulong nga akon iginpamatuod ha iyo hini nga adlaw, nga iyo igsusugo ha iyo mga anak ha pagbantay ha pagbuhat, bisan ha ngatanan nga mga pulong hini nga balaud.” (Deuteronomio 32:46) Matin-aw nga an katawohan han Dios diri la kay sadang magin seryoso nga mga estudyante han Balaud kondi mga magburuhat han Balaud.

Kondi, an nasud han Israel pauro-utro nga nagin diri matinumanon kan Jehova. Imbes nga buhaton an husto nga klase han mga buhat, an mga anak ni Israel “waray . . . tumoo ha iya, o waray . . . mamati han iya tingog.” (Deuteronomio 9:23; Hukom 2:15, 16; 2 Kronikas 24:18, 19; Jeremias 25:4-7) Ha kataposan, nabuhat han mga Judio an ira pinakamaraot nga buhat han pagkadiri-matinumanon han ira iginsalikway hi Jesus sugad nga an Mesias. (Juan 19:14-16) Sugad nga resulta, iginsalikway ni Jehova nga Dios an Israel ngan iginbirik an iya atensyon ngadto ha mga nasud.—Buhat 13:46.

Kinahanglan gud kita magin mabinantayon nga diri naton mabuhat an pariho hito nga sayop—an paghunahuna nga mahimo kita makagsingba ha Dios nga may intelihente nga hunahuna kondi waray pagtoo nga kasingkasing. Ha iba nga pagkayakan, an aton pag-aram han Biblia kinahanglan magin labaw pa kay ha pagtirok la hin kahibaro. An husto nga kahibaro kinahanglan makabantad ha aton kasingkasing basi makaapekto ha aton kinabuhi ha mapulsanon nga paagi. May kapulsanan ba an pag-aram ha paghardin hin mga utanon kondi diri gud magtanom hin bisan ano nga mga binhi? Oo, bangin may mahibaroan kita mahitungod ha kon paonan-o magkultibar hin hardin, kondi diri gud kita makakaani hin bisan ano! Ha pariho nga paagi, kon an mga tawo nahibabaro han mga ginkikinahanglan han Dios pinaagi han pag-aram han Biblia, kinahanglan tugotan nira nga an mga binhi han kamatuoran makabantad han ira kasingkasing basi tumurok ito nga mga binhi ngan mag-aghat ha ira nga magbuhat.—Mateo13:3-9, 19-23.

Magin “mga Magburuhat han Pulong”

Hi apostol Pablo nagsiring nga “an pagtoo tikang ha pagpamati.” (Roma 10:17) Inin natural nga pagkasunod tikang ha pagpamati ha Pulong han Dios ngadto ha pagbuhat hin pagtoo ha iya Anak, hi Jesu-Kristo, naghahatag ha aton han paglaom nga kinabuhi nga waray kataposan. Oo, dugang pa an ginkikinahanglan kay han pagsiring la, ‘Natoo ako ha Dios ngan ha Kristo.’

Ginsagda ni Jesus an iya mga sumurunod nga magkaada han klase han pagtoo nga magpapagios ha ira ha pagbuhat: “Dida hini an akon Amay paghimayaon, nga kamo nanmumunga hin damu nga mga bunga; busa mahimo kamo nga akon mga tinon-an.” (Juan 15:8) Ha urhi, an bugto ni Jesus ha iroy nga hi Jakobo nagsurat: “Mahimo  kamo nga mga magburuhat han pulong, ngan diri la mamarati.” (Jakobo 1:22) Kondi, paonan-o naton hibabaroan kon ano an angay buhaton? Pinaagi han pulong ngan susbaranan, iginpakita ni Jesus kon ano an kinahanglan naton buhaton basi mapalipay an Dios.

Samtang nakanhi ha tuna, nangalimbasog gud hi Jesus nga pauswagon an mga butang nga may kalabotan ha Ginhadian ngan himayaon an ngaran han iya Amay. (Juan 17:4-8) Ha ano nga paagi? Damu nga mga tawo an bangin nahinunumdom han mga milagro ni Jesus nga pagtambal han mga magsakit ngan baldado. Kondi an Ebanghelyo ni Mateo nagpapatin-aw han nangunguna nga paagi: “Hi Jesus naglibot ha ngatanan nga kaburubungtohan ngan mga baryo ha pagtutdo ha ira mga sinagoga, ngan ha pagwali han maopay nga sumat han ginhadian.” Makatirigamnan nga waray limitihi ni Jesus an iya ministeryo ha diri pormal la nga pakiistorya ha pipira nga kasangkayan ngan mga kakilala o ngada hadton iya la iginkikita ha palibot. Hiya nangalimbasog gud, nga ginagamit an anoman nga paagi nga magagamit niya basi mabisita an mga tawo “han bug-os nga Galilea.”—Mateo 4:23, 24; 9:35.

Ginsugo ni Jesus an iya mga sumurunod nga makigbahin liwat ha paghimo hin disipulo. Oo, nagtagana hiya hin hingpit nga susbaranan para ha ira basi subaron. (1 Pedro 2:21) Hi Jesus nagsiring ha iya matinumanon nga mga disipulo: “Busa, lakat kamo, ngan manhimo kamo hin mga tinon-an ha ngatanan nga mga nasud ngan pamaptisan hira ha ngaran han Amay, han Anak, ngan han espiritu santo. Pagtutdui hira han pagbantay han ngatanan nga mga bagay, nga akon iginsugo ha iyo.”—Mateo 28:19, 20.

Oo, an pakigbahin ha pagsangyaw nga buruhaton nagpipresenta hin totoo nga ayat. Hi Jesus mismo nagsiring: “Kitaa, ako nagsusugo ha iyo, sugad han mga karnero ha butnga han mga lobo.” (Lukas 10:3) Kon naatubang kita hin pagkontra, an natural nga tendensya amo an pag-isol basi makalikay ha diri kinahanglanon nga kasubo o kabaraka. Ito an nahitabo han gab-i nga gindakop hi Jesus. Pinalagiw an mga apostol katapos nga madaog hira han kahadlok. Ha urhi hito nga gab-i, tulo ka beses nga iginlirong ni Pedro nga nakilala hiya kan Jesus.—Mateo 26:56, 69-75.

Dugang pa, bangin mahipausa ka ha paghibaro nga bisan hi apostol Pablo nagsiring nga nangalimbasog gud hiya ha pagsangyaw han maopay nga sumat. Hiya nagsurat ha kongregasyon ha Tesalonika: “Nangahas gud kami ha aton Dios ha pagyakan ha iyo han maopay nga sumat han Dios ha daku nga kasamokan [“pangalimbasog,” NW].”—1 Tesalonika 2:1, 2.

Nalamposan ni apostol Pablo ngan han iya mga igkasi-apostol an bisan ano nga kahadlok ha pag-istorya ha iba mahitungod han Ginhadian han Dios, ngan malalamposan mo liwat ito. Paonan-o? An pinakaimportante nga pitad amo an pagsarig kan Jehova. Kon aton ihatag an bug-os nga pagtoo kan Jehova, ito nga pagtoo magpapagios ha aton ha pagbuhat, ngan mahihimo naton an iya kaburut-on.—Buhat 4:17-20; 5:18, 27-29.

May-ada Balos Para han Imo Buhat

Maaram gud hi Jehova han aton pangalimbasog ha pag-alagad ha iya. Pananglitan, maaram hiya kon kita masakit o kapóy. Maaram hiya han aton mga pagruhaduha. Kon nagpuproblema kita tungod ha pinansyal o kon an aton kahimsog o aton emosyon baga hin nagpapaluya ha aton, hi Jehova maaram pirme han aton kahimtang.—2 Kronikas 16:9; 1 Pedro 3:12.

Sigurado nga nalilipay gud hi Jehova kon bisan pa han aton mga pagkadiri-hingpit ngan mga kakurian, an aton pagtoo nagpapagios ha aton nga magbuhat! An mahigugmaon nga pagtagad ni Jehova ha iya matinumanon nga mga surugoon diri kay emosyon la nga waray hinihimo—iya ipinapakita ito pinaagi ha paghatag ha aton hin usa nga saad. Pinaagi ha paggiya han Dios, hi apostol Pablo nagsurat: “An Dios diri nga diri matadong, nga hikalimtan niya an iyo buhat ngan an iyo gugma nga iyo iginpakita tungod ha iya ngaran, nga nagmangno kamo ha mga baraan, ngan nagmamangno pa kamo niyan.”—Hebreo 6:10.

Makakasarig ka ha paghulagway han Biblia kan Jehova sugad nga “usa nga Dios ha pagkamatinumanon ngan waray karat-an,” ngan “[nagbabalos] han ngatanan nga nagbibiling ha iya.” (Deuteronomio 32:4; Hebreo 11:6) Pananglitan, usa nga babaye ha California, E.U.A., an nahinumdom: “Hi Tatay nag-alagad sugad nga bug-os-panahon nga ministro ha sulod hin napulo ka tuig antes hiya magpamilya. Naruyagan ko an iya mga istorya ha akon mahitungod ha kon paonan-o hiya ginbuligan  ni Jehova ha ministeryo. Damu ka beses nga iya ginagasto an iya ngatanan nga kwarta para ha gasolina basi makakadto ha ministeryo. Ha iya pag-uli tikang ha ministeryo, agsob nga may-ada diri-linalaoman nga mga suplay hin pagkaon nga naghuhulat ha iya ha purtahan.”

Dugang pa ha materyal nga suporta, “an Amay han ngatanan nga pagkalooy ngan Dios han ngatanan nga paglipay” naghahatag ha aton hin emosyonal ngan espirituwal nga bulig. (2 Korinto 1:3) “An pagsarig kan Jehova usa nga makapatagbaw nga pag-abat,” siring han usa nga Saksi nga nakailob hin damu na nga mga pagsari ha paglabay han mga tuig. “Naghahatag ito ha imo han higayon nga sumarig kan Jehova ngan obserbahan kon paonan-o hiya nagios samtang binubuligan ka niya.” Mapainubsanon nga madadaop mo an “Parapamati han pag-ampo,” ngan makakasarig ka nga tatagdon niya an imo personal nga mga kabaraka.—Salmo 65:2, NW.

Damu an mga bendisyon ngan mga balos nga nakakarawat han mga magburuhat han espirituwal nga pag-ani. (Mateo 9:37, 38) Damu na an nakakarawat hin kapulsanan ha kahimsog tungod ha pakigbahin ha ministeryo ha publiko, ngan posible nga makapahimulos ka liwat hito. Kondi, labaw ha ngatanan, an pagsangyaw ha iba nabulig ha aton nga maparig-on an aton maopay nga relasyon ha Dios.—Jakobo 2:23.

Padayon nga Buhata an Maopay

Sayop gud nga hunahunaon han usa han mga surugoon han Dios nga diri nalilipay hi Jehova kon an mga limitasyon tungod han kalagas baga hin nagpupugong ha iya ha pagbuhat han ngatanan nga iya karuyag buhaton ha ministeryo. Sayop liwat an paghunahuna hin sugad hito may kalabotan hadton nalilimitahan tungod han maluya nga kahimsog, mga responsabilidad ha pamilya, o iba pa nga mga kahimtang.

Hinumdumi nga han nanluya hi apostol Pablo tungod han sakit o kaulangan, hiya “nanginginyupo . . . ha Ginoo hin makatulo nga kuhaon ini tikang” ha iya. Imbes nga tambalon hi Pablo basi mas damu an iya mabuhat ha pag-alagad kan Jehova, an Dios nagsiring: “Iton akon grasya igo ha imo: kay iton akon gahum mahihingpit ha kamaluya.” (2 Korinto 12:7-10) Salit, alayon sarig nga bisan pa han anoman nga makuri nga mga kahimtang nga bangin imo gin-aantos, gin-aapresyar han imo langitnon nga Amay an bisan ano nga imo nahihimo ha pagpauswag han mga butang nga iya gintatagad.—Hebreo 13:15, 16.

An aton mahigugmaon nga Maglalarang diri nagkikinahanglan ha aton hin labaw pa kay han aton maihahatag. Naghahangyo la hiya nga magkaada unta kita han klase han pagtoo nga nagpapagios ha aton nga magbuhat.

[Retrato ha pahina 26]

Igo na ba an pag-inaram han Balaud?

[Mga Retrato ha pahina 29]

An aton pagtoo kinahanglan suportahan han mga buhat