Naglampos hi Samson ha Bulig han Kusog ni Jehova!

INI nga tawo ginbuta han naninimalos nga mga parabihag ngan ginpabuhat hin mabug-at gud nga trabaho. Katapos igin-gawas nira hiya ha prisohan ngan gindara ngadto ha usa nga templo han mga pagano basi maghatag hin kaliawan ha damu hinduro nga mga tawo. Ginpirit nira hiya nga magmartsa ha atubangan han yinukot nga mga magkirita ngan ginyubit hiya. Diri kriminal ini nga priso, diri man liwat hiya kumander hin kaaway nga kasundalohan. Usa hiya nga magsiringba ni Jehova ngan nag-alagad sugad nga hukom ha Israel ha sulod hin 20 ka tuig na.

Paonan-o hi Samson—nga amo an pinakamakusog ha pisikal nga tawo nga nabuhi—nahingada ha sugad kamakaarawod nga kahimtang? Maluluwas ba hiya han iya diri ordinaryo nga kusog? Tikang diin an kusog ni Samson? May-ada ba kita mahibabaroan tikang ha istorya han iya kinabuhi?

Hiya “Matikang Pagluwas han Israel”

An mga anak ni Israel damu ka beses na nga binaya ha totoo nga pagsingba. Salit han hira “nagbuhat . . . hin maraot ha atubangan han mga mata ni Jehova, . . . itinubyan hira ni Jehova ngadto ha kamot han mga Pilisteohanon ha kap-atan ka tuig.”—Hukom 13:1.

An asoy mahitungod kan Samson nagtikang han an usa nga anghel ni Jehova nagpakita ha baw-as nga asawa han Israelita nga hi Manoa ngan nagsumat ha iya nga mag-aanak hiya hin bata nga lalaki. “Waray labaha nga madapat ha iya ulo,” gin-instruksyonan hiya han anghel, “kay an bata mana-Nasareo ngadto han Dios tikang ha tagoangkan: ngan hiya matikang pagluwas han Israel tikang ha kamot han mga Pilisteohanon.” (Hukom 13:2-5) Antes ipanamkon hi Samson, ginsiguro ni Jehova nga hi Samson mahatagan hin espisipiko nga buruhaton. Tikang ha iya katawo, hiya magigin Nasareo—usa nga pinili para ha espesyal nga klase hin sagrado nga pag-alagad.

Hiya “Angayan ha Akon Pagkita”

Samtang nagtutubo hi Samson, “hi Jehova nagbendisyon ha iya.” (Hukom 13:24) Usa ka adlaw, dinaop hi Samson ha iya amay ngan iroy ngan nagsiring: “Nakakita ako hin usa nga babaye ha Timna han mga anak nga babaye han mga Pilisteohanon: busa yana kuhaa hiya nga asawa para ha akon.” (Hukom 14:2) Handurawa an ira kahipausa. Imbes nga buligan an Israel nga makatalwas tikang ha pagmando han mga parapanalumpigos, karuyag lugod han ira anak nga makig-alyansa ha ira pinaagi ha pag-asawa. An pag-asawa hin babaye nga magsiringba han pagano nga mga Dios kontra ha Balaud han Dios. (Eksodo 34:11-16) Tungod hito, nagdumiri an iya mga kag-anak: “Waray na ba gud babaye dida ha mga anak nga kababayin-an  han imo kabugtoan, o dida ha bug-os ko nga katawohan, nga makadto ka pagkuha hin asawa hin diri mga sinirkumsisyonan nga mga Pilisteohanon?” Bisan pa hito, hi Samson nagpirit: “Kuhaa hiya para ha akon kay hiya nakakalipay ha akon kaopay [“angayan ha akon pagkita,” NW].”—Hukom 14:3.

Ha ano nga paagi inin partikular nga Pilisteohanon nga babaye “angayan” kan Samson? Diri tungod kay hiya “mahusay, makaruruyag, nakakadani,” siring han Cyclopedia nira McClintock ngan Strong, “kondi angayan may kalabotan ha pagkab-ot hin usa nga tumong, katuyoan, o intensyon.” May kalabotan ha ano nga katuyoan? An Hukom 14:4 nagsasaysay nga hi Samson “nangita hin higayon patok ha mga Pilisteohanon.” Interesado hi Samson hito nga babaye tungod hito. Samtang nagtitikaadulto hi Samson, “an espiritu ni Jehova nagtikang pagpalihok ha iya,” o pag-aghat ha iya nga gumios. (Hukom 13:25) Salit an espiritu ni Jehova amo an nakaimpluwensya hinin naiiba nga hangyo ni Samson para hin asawa ngan han iya bug-os nga karera sugad nga hukom ha bug-os nga Israel. Nakarawat ba ni Samson an higayon nga iya ginbibiling? Tagdon naton siyahan kon paonan-o ginpasarig hiya ni Jehova han Iya pagbulig.

Nagbibiyahe hi Samson tipakadto ha Timna, an syudad han iya maarasawa. Han inabot hiya “ha mga urubasan ha Timna,” an Kasuratanhon nga asoy nagsusumat, “kitaa, usa nga nati nga leon inmuwang patok ha iya. Ngan an espiritu ni Jehova ha makusganon kinmada ha iya, ngan iya hiya ginpirupiksi.” Inin makatirigamnan nga pagpakita hin kusog nahitabo han nag-uusahan hi Samson. Waray nakakita hito. Paagi ba ini ni Jehova ha pagpasarig kan Samson nga hiya, sugad nga Nasareo, may kapas ha pagtuman han sugo ha iya han Dios? Waray magsiring hito an Biblia, kondi sigurado nga nasantop ni Samson nga an sugad nga talagsahon nga gahum diri iya. Sigurado nga tikang ito ha Dios. Makakasarig hiya kan Jehova ha pagbulig ha iya ha tidaraon nga buruhaton. Naparig-on hi Samson han panhitabo may kalabotan ha leon, salit nagpadayon hiya ha pagkadto, “ngan nakighimangraw han babaye, ngan hiya nakalipay kaopay [ha iya].”—Hukom 14:5-7.

Han binalik hi Samson ha urhi basi iupod na pag-uli an babaye, “hiya sinmimang pagkita han lawas nga patay han leon: ngan, kitaa, dida may usa ka balay han putyukan ha lawas han leon, ngan hin dugos.” Tungod kay nahinumdoman ini ni Samson, iginpresenta niya ini nga patigo ha 30 nga abay nga kalalakin-an nga Pilisteohanon ha iya kasal: “Tikang ha parakaon ginmawas in karaunon, ngan tikang ha makusganon ginmawas in katam-isan.” Kon matigo nira an kahulogan hito, tatagan hira ni Samson hin 30 nga pan-ilarom nga panapton ngan mga liliwanan nga bado. Kon diri nira matigo ito, kinahanglan nira ihatag ito nga premyo ha iya. Ha sulod hin tulo ka adlaw, nagugupong an mga Pilisteohanon ha patigo. Han ikaupat ka adlaw, nagdesisyon hira nga tarhugon an babaye. Hira nagsiring ha iya: “Lukmaya an imo bana nga hiya makagsumat ha amon han tiriguhon, kay tingali pagsunugon ka namon ngan an  balay han imo amay ha kalayo.” Mabangis gud ito! Kon sugad hini an pagtrato han mga Pilisteohanon ha ira kalugaringon nga katawohan, handurawa la an kahimtang han tinalumpigos nga mga Israelita!—Hukom 14:8-15.

Tungod kay nahadlok an asawa ni Samson, iya ginpirit hi Samson nga sumatan hiya han baton. Iya dayon iginsumat ito ha mga abay nga kalalakin-an, nga nagpapakita la han kawaray gugma ngan pagkamaunungon kan Samson. Ira nabaton an tiriguhon, ngan maaram hi Samson kon kay ano. Hiya nagsiring ha ira: “Kon waray niyo ig-arado an akon nati nga baka nga babaye, diri kamo nakakatigo han akon tiriguhon.” An higayon nga ginhihinulat ni Samson nakada na yana. “An espiritu ni Jehova ha makusganon kinmuysad ngada ha iya, ngan hiya nakadto ha Askelon ngan humampak hin katloan ka tawo ha ira, ngan kuhaon an dinag-an ha ira, ngan ihatag an mga liliwanan nga panapton ngadto ha ira nga nagsumat han tiriguhon.”—Hukom 14:18, 19.

Hingyap ba nga manimalos an nag-aghat han paggios ni Samson ha Askelon? Diri. Buhat ito han Dios pinaagi han iya pinili nga manluluwas. Pinaagi kan Samson, gintikangan ni Jehova an usa nga away kontra ha mabangis nga mga paratalumpigos han iya katawohan. Kinahanglan igpadayon ini nga kampanya. An sunod nga higayon inabot han binisita hi Samson ha iya asawa.

Nag-uusahan nga Nakig-away

Han binalik hi Samson ha Timna, nadiskobrehan niya nga an iya asawa iginpakasal na han amay hito ha iba nga lalaki, tungod kay nagtoo an amay nga nangangalas hi Samson ha iya asawa. Nagpakuno-kuno hi Samson nga nasisina hiya. Nagdakop hiya hin 300 nga miro ngan ginhigtan ito nga tagduha-duha, nga ginbutangan hin sulo an butnga han ira mga ikog. Han ginbul-iwan na ito, nasunog hito an mga kaumhan, urubasan, ngan olibasan, salit nadaot an tulo ka dagku nga pananom han Pilistia hito nga tuig. An nasina nga mga Pilisteohanon nagpakita hin duro nga panraugdaog. Ira ginhunahuna nga an asawa ni Samson ngan an amay hito an may baratunon ngan ginsunog hira. Tungod han ira madarahog nga pagbulos, natuman an katuyoan ni Samson. Iya liwat hira ginhampak hin duro nga pamatay.—Hukom 15:1-8.

Hinsabtan ba han mga Israelita nga binibendisyonan ni Jehova nga Dios hi Samson ngan salit inupdan hiya ha pagtapos han pagmando han mga Pilisteohanon? Waray gud. Basi makalikay hin samok, an kalalakin-an han Juda nagpadara hin 3,000 nga kalalakin-an basi dakpon an pinili han Dios nga lider ngan itubyan hiya ngadto ha iya mga kaaway. Kondi, inin pagin diri maunungon han mga Israelita nakahatag hin higayon kan Samson ha pagpadapat hin dugang nga kadaot ha iya mga kaaway. Han hirani na hiya itubyan ha mga Pilisteohanon, “an espiritu ni Jehova kinmuysad ha iya ha makusganon, ngan an mga pisi nga nakada ha iya mga butkon nahimo nga baga la in lino nga nasunog ha kalayo, ngan an iya mga gapos nagkahudlog la tikang ha iya mga kamot.” Katapos, ginpurot niya an tul-an han apapangig han usa nga asno ngan ginhampak an usa ka yukot nga mga tawo pinaagi hito.—Hukom 15:10-15.

Ha panginyupo kan Jehova, hi Samson nagsiring: “Ikaw naghatag hini nga daku nga kaluwasan pinaagi ha kamot han imo surugoon; ngan yana mapatay ako hin uhaw, ngan mahuhulog ngadto ha kamot han diri sinirkumsisyonan.” Ginpamatian ni Jehova an pag-ampo ni Samson ngan ginbaton ito. “Gin-abrihan han Dios an lugar nga lungag . . . , ngan ginmawas in tubig dida, ngan han pakainom niya, an iya espiritu nahiuli liwat, ngan nahiuli an iya kaabtik.”—Hukom 15:18, 19.

Determinado hi Samson ha pagtuman han iya tumong, nga amo an iya pakig-away ha mga Pilisteohanon. Inukoy hiya ha balay han usa nga bigaon ha Gasa basi makiaway ha mga kaaway han Dios. Nagkinahanglan hi Samson hin mahuhuronan para hito nga gab-i ha usa nga syudad han kaaway, ngan may-ada hito ha balay han usa ka bigaon. Waray imoral nga motibo hi Samson. Binaya hiya ha balay han babaye ha katutnga han kagab-ihon, ginkaptan an mga sada han ganghaan han syudad ngan an duha nga harigi, ngan gindara ito ngadto ha tarimpongayan han usa nga bukid hirani ha Hebron, nga mga 60 kilometro an kahirayo. Gin-uyonan han Dios ini nga iya ginbuhat ngan gintagan hiya hin kusog nga buhaton ini.—Hukom 16:1-3.

Naiiba an paagi han paggios han baraan nga espiritu ha kahimtang ni Samson tungod kay naiiba  liwat an mga kahimtang. An matinumanon nga mga surugoon han Dios yana makakasarig hito mismo nga espiritu ha paghatag hin kusog ha ira. Ginpasarig ni Jesus an iya mga sumurunod nga “mahatag [hi Jehova] han espiritu santo ha mga nangangaro ha iya.”—Lukas 11:13.

Kay Ano nga ‘Binayaan hi Samson ni Jehova’?

Nahitabo nga hi Samson nahigugma ha babaye nga hi Delila. An lima nga magkaalyado nga mga magmarando han mga Pilisteohanon disidido gud pagpirde kan Samson salit ira ginhangyo an iya bulig. Dinaop hira kan Delila ngan sumiring ha iya: “Lukmaya hiya, ngan kitaa kon hain titikang an iya pagkakusgan hinduro, ngan kon ano nga paagi in ipakakadaog ta ha iya.” Sugad nga hukip, an tagsa han magkaalyado nga mga magmarando nagtanyag ha iya hin “napulo kag usa ka gatos ka tipik han salapi.”—Hukom 16:4, 5.

Kon an mga tipik nga salapi mga siklo, an tanyag nga 5,500 nga siklo daku hinduro nga hukip. Hi Abraham nagbayad hin 400 nga siklo para han lugar nga ginlubngan han iya asawa, ngan 30 la an prisyo han usa nga uripon. (Genesis 23:14-20; Eksodo 21:32) An kamatuoran nga an magkaalyado nga mga magmarando—mga lider han lima nga mga syudad ha Pilistia—nagbantad han kahakog ni Delila ngan diri han iya pagkamaunungon ha iya gintikangan baga hin nagpapasabot nga posible nga usa hiya nga Israelita. Anoman an kahimtang, ginkarawat ni Delila an tanyag.

Tulo ka beses nga sayop an iginbaton ni Samson ha mga pakiana ni Delila, ngan tulo ka beses nga iya gintraydoran hi Samson pinaagi ha pangalimbasog nga itubyan hiya ha iya mga kaaway. Kondi “nahinabo, han iya ha iya pagpirita ha adlaw-adlaw pinaagi han iya mga pulong, ngan gin-aghat hiya, nga an iya kalag gin-urit ha makamaratay.” Ha kataposan iginsumat ni Samson an kamatuoran—waray pa gud maaruti an iya buhok. Kon maarutan ito, manluluya hiya ngan magigin pariho na la ha iba nga kalalakin-an.—Hukom 16:6-17.

An pagsumat ni Samson han surok han iya diri ordinaryo nga kusog nagresulta ha iya kapukan. Ginmaniobra ni Delila nga mahingada hiya ha kahimtang nga maaarutan hiya. Pero, diri literal nga aada ha buhok ni Samson an iya gahum. An iya buhok nagrepresentar la han iya espesyal nga relasyon ha Dios sugad nga Nasareo. Han ginpabay-an ni Samson nga mahingada hiya ha kahimtang nga nakaapekto han iya pagka-Nasareo tungod ha pag-aruti han iya ulo, ‘hi Jehova binaya ha iya.’ Ginpirde yana han mga Pilisteohanon hi Samson, ginbuta hiya, ngan ginpriso hiya.—Hukom 16:18-21.

Gamhanan gud nga leksyon an igintututdo hini ha aton! Diri ba naton sadang tagdon an aton relasyon kan Jehova sugad nga birilhon hinduro? Kon aton ikompromiso ha anoman nga paagi an aton dedikasyon ha Dios sugad nga mga Kristiano, paonan-o naton malalaoman nga hiya padayon nga magbendisyon ha aton?

“Itugot nga Ako Mamatay Upod ha mga Pilisteohanon”

An nagrarayhak nga mga Pilisteohanon nagpasalamat ha ira dios nga hi Dagon tungod han kapirde ni Samson. Ha pagsaurog han ira kadaogan, ira gindara hi Samson ngadto ha templo ni Dagon. Kondi maaram hi Samson han totoo nga hinungdan han iya kapukan. Maaram hiya kon kay ano nga ginbayaan hiya ni Jehova, ngan ginbasolan niya an iya kapakyasan. Samtang nakadto ha prisohan hi Samson, nagtikang na tumubo an iya buhok. Yana nga nakada hiya ha atubangan han yinukot nga mga Pilisteohanon, ano an iya bubuhaton?

“O Ginoo Jehova,” nag-ampo hi Samson, “hinumdumi ako, nanginginyupo ako ha imo, ngan hatagi ako hin kusog, nanginginyupo ako ha imo, hini la ha makausa, O Dios, nga ako makapanimalos han mga Pilisteohanon para han akon duha nga mata.” Katapos iya ginkaptan an duha nga harigi ha butnga han templo, ngan “hiya kinmaob upod an bug-os niya nga kusog.” Ano an resulta? “An balay naharumpag dida ha mga punoan, ngan dida han ngatanan nga katawohan nga nakada. Busa an patay nga iya namatay ha iya pagkamatay darodamu kay ha ira nga iya namatay han buhi pa hiya.”—Hukom 16:22-30.

May kalabotan ha pisikal nga kusog, waray gud kapariho hi Samson. An iya gamhanan nga mga buhat makatirigamnan gud. Kondi an pinakaimportante ha ngatanan, gintatagad han Pulong ni Jehova hi Samson sugad nga usa han mga tawo nga marig-on an pagtoo.—Hebreo 11:32-34.

[Retrato ha pahina 26]

Tikang diin an kusog ni Samson?