An Maopay nga Paggawi ‘Nagrarayandayan ha Katutdoan han Dios’

AN BATAN-ON nga hi Maria ha Kransnoyarsk, Russia, maopay gud magkanta salit igin-api hiya han iya maestra ha grupo han mga magkaranta ha eskwelahan. Waray pag-iha katapos hito, matinalahuron nga nakiistorya hi Maria ha usa han iya mga magturutdo basi isaysay nga may mga kanta nga diri niya puydi kantahon. Kay ano? Tungod kay an pagkanta hin relihiyoso nga mga karantahon nakontra ha iya basado-ha-Biblia nga mga gintotoohan. Tungod kay nahipausa, an maestra naghunahuna, ‘Ano an sayop ha paghimaya ha Dios pinaagi han usa nga kanta?’

Basi ipakita kon kay ano nga diri hiya magkakanta hin karantahon mahitungod han Trinidad nga dios, inabrihan ni Maria an iya Biblia ngan iginsaysay nga an Dios ngan hi Jesu-Kristo diri uusa nga Dios ngan nga an baraan nga espiritu amo an aktibo nga pwersa han Dios. (Mateo 26:39; Juan 14:28; Buhat 4:31) Hi Maria nagsasaysay: “Waray madaot an akon relasyon ha maestra. Ha kabug-osan, mag-opay gud an mga magturutdo ha amon eskwelahan. Karuyag nira nga magin tangkod kami.”

Ha bug-os nga tuig han pag-eskwela, tungod han gintotoohan ni Maria, gintahod hiya han mga magturutdo ngan han iya mga kaklase. Hi Maria nasiring: “An mga prinsipyo han Biblia nakabulig ha akon kinabuhi. Ha kataposan han tuig han pag-eskwela, nakakarawat ako hin premyo para ha katangkod ngan kaorganisado, samtang an akon mga ginikanan nakakarawat hin opisyal nga surat han pagpasalamat tikang ha eskwelahan tungod ha maopay nga pagdisiplina ha ira anak.”

Nabawtismohan hi Maria han Agosto 18, 2001. Hiya nasiring: “Malipayon ako tungod kay nag-aalagad ako ha makaruruyag nga Dios nga hi Jehova!” An batan-on nga mga Saksi ni Jehova ha bug-os nga kalibotan nagkikinabuhi uyon ha ginsisiring han Tito 2:10, diin aton mababasa: ‘Igrayandayan an pagturon-an han Dios nga aton Manluluwas ha ngatanan nga bagay.’

[Retrato ha pahina 32]

Surat han apresasyon ngan sertipiko han pagpasidungog

[Retrato ha pahina 32]

Hi Maria ngan an iya mga ginikanan katapos han iya bawtismo